Robert Sitlhou
Nilhah in Chongboi in jong akhou va Christmas mang a ache ding thu asei kit le aginchat lou aginchat lou bang in atehpi in aja nom tapon;
ATEHPI: Boi naki jah da jong ahi poi. Ven na U Lal toh nakichen jou a pat le nao inei jou uva pat tuchung hi apat na jong ahin insung mi kikim in Christmas maang khom hiute. Kumdaang phat dang le akhoh poi. Chi chung chon in nao jong asen val jeng in pam a poh doh din daap jong adaap val jenge. Tu chung chun pot da mai lhon in.. Kho khal lang le nom in nabon un ga che nao vin nate.
CHONGBOI : Angai poi kache lou thei ahi poi…
ATEHPI : Boi epi lom2 umma ole na inkote ana adamlou umham. Aboi nao khoh ten aum jong le phone beh hijong le in hetsah lou uva. Among a jong Nanu in jong nopmo saan te tulaitah a adaap toh.. Cheda ngap o Boinu.
Atehpi (Lalboi Nu) in hitia asei phat in alung haang tan thip beh in akigo thou2 tai. Akigot ahet phat in Atehpi jong alung haang doh taan, ” Boi, hibanga nakingai lua kamou in jong kagel thei poi kacha bang2 a kagel ahi. Alang khat a sei din namin hi kei kanao te khat toh aki bang chet in, vaangset um tah in eina dalha taove. Ama mella jong kamua kanao nu bang a kagel nahi. Idia nanu keima thu sei jeng jong napel jeng got hitam” atin ahileh Chongboi jong alung hang in athu ala bei in thip chet in aki go nah2 tai.
Thil um daan ahoi lou phat in mihem thisaan pu a kihing akihi jeh in kilhase thei, kiki pah thei kinui thei kikaap thei ahi. Tun vaang atehpi jong alung hang mong2 tan ” Boi hichen a lungel ding in jong kahin tah saan poi, chutia che tei2 ding a nakigellhah ahi tah jong le kakhaam tapoi. Nanop chen2 um in lang nadei phat2 le hung taan, ahin nao vang pui doh da taan. Ijem tia kathu nalah lou a nachaam2 a nakisah ding le akhoh poi aboi ahung um khah le vang kei kajao tapoi ” ati sung in Chongboi ana kigong jou tan. Che ding in aum tai. Thip chet a apot jou in ateh pin seibe di ahe tapon amoh vet tho tai. Bus a atou doh a ache jou in Lalneo ahung vahlut in Chongboi le naosen amu lou phat in ama jong akigong gangchellin anung adel tai. Nilhah lam in apute kho aga lhun in tai.
Christmas kaikhom ho jong aki chai tan, jaan lengkhom phat ahi hi taan Chongboi in jong naocha chu apa (Lalneo) ape in apot doh tai. Lalneo in jong gapampot khat tou hinte atin naocha chu apom in lenkhom a chun ajao tai. Asot thim phat in Lalneo in jong epi ti hija epi hung kibol den ham atin alungnomo lheh tai. Hitia nao apom sung jeng a jong chun api nun atupa chu pom ding jong ago pon, thum jong athum poi, vet ding jeng jong anom poi. Kioman ahet peh lou vang in Lalneo hinkho maan chu ahahsat ding daan le alunggel van le leiya alen ding chu igelle jaan mang a maat ding a jong dei lou tah ahi. Hijongle Lalneo in jong kihetmo sah tah in api nu koma “Hepi nao chom chakhat ana ve o, gapam pot tadi inge ” naosen chu apeh le asaan peh pon ” pool chunga chun lup sah in ima tiponte ati bep seu ve”. Lalneo in jong naocha chu phaten achun lum in pol chunga chun alup sah in adalha tai.
Lalneo in jong Chongboi um khat tou dem tin apute in lam aga vet le ana um pon. Hol nathei2 ahol vang in amu tapon. Naocha ana khang le kaap tei ding ahi jeh chun lenkhom lang chu ahin thi del tho jeng tan. Alungel vang anomo lheh jeng tan apinu jah a ” hepi Chongboi hoi a che hija nao jong adang hung chah le iti di ham ole kin khat tou a nasol khat ham” tia asei jeng le api nu in “Kahe pha poi” ati peh bep seu vin ahi. Phat jong asot jap taan, Lalneo in jong thil um daan adih thei tah lou jeh chun aga pot kit in tu chunga vaang pam lang a pasal ho toh ana kidaai uvin ana nui choh lah2 u aga mu doh tan ahi. “Chong, hoi a naum ham kiti lai a na um in hungo nao hung ve o” atin ahin pui lut tai. Naosen jong ahung khag chet in avah va in a imu kit tai. Lenkhom jong ahung kichai tan mipin a in cheh aki jot tan ahi. Imu ding aki sao vin alup got uleh Chongboi jong akisem jolsel in apot doh go kit tai.
Lalboi in jong ” hoi a che kigo nahim, naji nei nacha nahai mil ham, naosen hung khang hen lang adang chah le iti di ham pot hih in” ati vang in apot thou2 tai. Chongboi kivaisah chu anu le apa, a u anaoten jong amu in ahe soh kei uve ahin ima asei pou vin pho ding jong ago pouve. Lalneo in jong sei be di ahet lou maan in alupna achun akijaam in aki gel2 jeng tan ahi leh chomkhat jou vin nao ahung khang tah bah in adangchah in akiphin in akaap pan tai. Lalneo in jong aven ahi leh ajun a eh ana che phat in akhel loi chel in apo in i alo vang in naosen daangchah chu oi mai2 a chun akidoi pon akaap chim thei tapoi. Chuphat in Chongboi nu in Lalneo jah a “Lalneo nao chu kaa sah hih in kilel ahi. Jaan beh a ikichol lou le suun a itih kah a kikichol ding ham” ati ahi leh Lalneo in jong kitim jou talou khat tou jong hintin ” Hepi hiti kha khan te kati jeh a kana jah da peh2 ahin ahi ti thou2 ve” atin alung don maan in twi sa lum adon sah le naocha chu ahungbi dom tai. Lalneo in jong naocha chu apo in lhong lai chu alet aneo te in avah lele in nao chu a oii imu tai. Hibang loma genthei le hitobang a hinkho ahin maan ding ajaan maang jeng a a jong ana maat lou agel le alai anan, Nungah-gollhan lai a ana thimthu lel lhon le ana len khom lai ni lhon agel le tua ahinkho maan toh kikhe val asah beh set jeh chu mi het lou in aguh in alhi akitheh tai.
Chomkhat jou vin Chongboi jong ahung vahlut tan Lalneo in jong lungna tah in:
LALNEO : Ga va be tango, tuhi in jot phat ham? Hitia hi naki sah nom jeh a in che di nahiti soom hijahi o na. Kei chun la kapi le kapun kin khoh tah umma nan kou u ham kiti chu.
CHONGBOI : Na in nahi sah a hitia chu nin hou ham? Gangchel in kipot doh o..
LALNEO : Kipot doh hilou va naosen sin daan nalhahsaam behset jeh a Kalung don maan a a
hung kahi, Kagel toh nabang mo lheh jeng e. Epi hileh kichol in jingkah le kihou pha tai te.
Jingkho ahung vah in Lalneo jong alung haan lheh vaang chun apha ding dei najaal in ima asei tapoi. Christmas sung se2 chu Lalneo in nopna hinkho mong2 amang tapon hijong le athoh ham2 in kumhei ahung kichai in damsel in in lam ahung kile taove. Lalneo in jong apute lung put daan le Chongboi True Colour chu ahin hedoh tan, ahin lunglen tah in aum jing nalai e. Lalneo in adatmo pen khat chu Chongboi chuti tajong le Anu le apa beh chu hil hen lang phoh le kilom tah ahin koi pho koi hil malah a abol jouse amoh phatsah ule kimumosah bang a aum u chu ahi.
Lalneo in jong damna ding ahi poule atin ima alo deh poi, ahin Lalneo nu le pa vang amounu in hitia athu lhon apal keh jeng chu phamo vang asa lhon lheh e. Phat le nikho ahung che2 in Chongboi le Lalneo kikah hihen ateh akhang kah hijongle phat masa laia nom a kipah tah a hinkho amaan u tobang ahi jou tapon ahi. Insung maichaam a jong vel som vel ja akisei a akihil vaang in akhoh cheh daan joh in aum tai. Hi jongle neh dingla song pai dingla saa ti daan chu asoh doh tan ahi. Chongboi hinkho maan hoi lou jeh in insunga cham na le kipana aum thei tapon. Ama jeh in Lalneo jong anu le apan amuda lo lhon tan ahi. Ajeh chu akinep na bang u ahi tah lou jeh ahi. Lalneo in jong ahil toh apho toh akop jin angai deh pon, aval behset phat in Lalneo jong ki tim jou lou chu hitan tin akhut ana lha kha tai. Athi ani kai a kivo hilou in angei phelep abeh ahi joi.
Chongboi jong ajing in a inkote het lou in guhthim in ain lang u ana gei tan ahi. Lalneo in jong nopmo asan aga kou in ahi leh anom tapon, anu apa kisen in anop peh tapoi. Khosung mi het a chu Lalneo chu miphalou in ana kithang maan tan ahi. A inko alouko atu-abe ahin kipui a ahung lou uleh moh in kingai dam ponte tuia thu ahin hil phat uvin Lalneo jong achaang in ahung kile tai. Aki vailhah nao tobang in achon tao vin ahi leh agih toh thon ahin kipui sah kit tao ve. Hitia Chongboi inkote achon jeh un Chongboi in jong anungsaang akisonpi cheh2 in phat masa lai a saang in akhoh se cheh jo tai. Jicha chu kina kha tei ding ahi, Chongboi jong thil neo cha2 jeh mai2 in ajaam jing tan akou a ache teng uleh Pute chun Chongboi lhunna te mai nei lou mit nei lou bolla abol uva ahou uchu Chongboi in ajachat pi deh pon khoh jong anasa pon ahi.
Lalneo te inko jong aki hou lin jiu vin donja jeng ding atiu jong le amou u khat ahi jeh le tupa melhoita anei peh jeh un anol thei deh kit pouve. Alangkhat a Lalneo ding a a jong asen ji ahi jeh in iti alung haan a alhaset ji lheh vang in anol thei deh ji poi. Nikhat angai bang in Chongboi jong ajam kit tan ahi leh Lalneo in jong aloipa akipui in aga kou lhon le ahung thoh lo tan aloi pan jong kidaang asa vallin ahin pui doh tai. Iti aga kou vang uvin aki doi lou phat in adon tapou vin. Lalneo in vang nanop chen2 hung um tan akhoh poi genthei tah in keini pa-cha le insung mite hung kikhou khah tao vinge atin achaina adin, nahung kal ngah jing kahi gel mil hih in ati toh thon adon tapou ve.
Kum 6 lam aval tan ahung mong2 lou phat in aga kou uvin ahi leh lung han jeh in aleu sah un sa atha sah un ahi. Koima ngai na vang chu hilou daan ahi. Hichun pu-te in ” daana maan in kasaan peh tao ve, tunia pat Chongboi hi nami u nasa u ahi tapoi” tia asei toh lhon in kumkhoa kikhenna chu asoh doh tan ahi. Lalneo in jong naosen chu aki sin in amaan pi tai. Lalneo in jong ” Pathen laitan hidin kagelthei poi, mihem laitan hiding bou kagelle” tin ana kilhem jing tan ahi. Phat sot lou in aman jong Govt. Job neo khat ahin kimu in nom in inchen asem tai. Chapang pa jong api apu aang sung a ahungseilen in anu um lam jong hepha lou khop in apa toh nom in hinkho amang jing lhon tan ahi.
BEITA..
Asim jouse chunga kipa thu ahung kiphong’e.
