By:-Shonkhogin (Hegin) Haokip
Maranatha Cottage Hebron Veng
Phaipijang Langol Imphal West.
9774096152
Thumun kipeding nahiuve, Hol’un namu dingu ahi, Kiuvun kihon peh ding nahiuve. Ijeh in em itileh athum chan achangin, ahollin amun chuleh akiuva chu kot kihon peh ding ahi.Mat.7:7-8.
Pathen thun aseibang bangin, Pathen dihtah a holho, kouho chuleh thumhon chanlel anei ngai pouve. Hiche hi lungthim thu ahi. Ajehchu Pathenin mi alungthim avet ahi. Ikamin ipi seijongleh ilungthimin deisahna tah tah chu inei tokah a ima cha adih chu ahung thei poi. Mi phabepkhat hi Pathen ngaichatah ahi vanga Pathen holtheilou jong aumdapoi. Adihtah a Pathen ngaicha ho leh holho chu Pathenin ahin na diu lampi asempeh jin, hichea chu thu kisei ho chu phatecha a angai leh hing teitei ding ahi. Ajehchu nang in imacha naseilou vangin, Pathen in nangaichat chu nahet pi thou thou ve. Amavang Pathen ngaicha jongleh holjongleh anomlam lam a holho le ngaicha ho chu Pathenin iman agelpeh poi.
Pathenin aseisei ngaijet jet dinghohi Pathenin atumbeh in akhohsah e. Tekahna in Sepai Jalamkaipa hinkho gah veuhite, ama hi Caesarea mi amin Cornilius akiti. Amahi Pathen ngaisah tahle ainsung mi jousetoh Pathen gingtah ahin, miho thilpeh tamtah pejia, jingkah nilhah a taojing insung mite chu ahiuve. (Acts.10:2). Ahinla amahon hin Pathen tahsanna dihtah aneilou laiju ahi. Hijeh a chu, Pathenin Cornilius koma Pater kouding a asol lona pentah chu ahi. Peter ahunga gospel kipana thu ahinseiphatin abonchaovin lhagao achang taove . Veuhite, Cornilius in Pathen thu seiding jengcha jong koi kouding ham ahepoi, ahivangin Pathenin amao kithopi dingin Pater ana solpeh in Pathen akimu taove.
Hitabanga chu, Ethiopia gama mikhat nukisopa jong chu alungthima Pathen angaichatna chu asang lheh jengin, koima cha la akithopiding aumpoi. Hichun, Pathenin asoh pa Philip koma a vantil khat asolin, Philip kipat’in lang Jerusalema kona Gaza jotna lampi a khun chesuh in, hikhu gamthip ahi ati. Chuin ama akipatdoh in achetai, chuin veuvin, Ethoptia gama mikhat nuki sopa chu kangta laija atou amun, chuin Pathen lhagao thengin, nailut din thu apen, nukisopa chun Bible ahinsim chothethu jeng ahi. hichun, Philip in nukiso pa koma chun, nasim chu nahet thei hinam atileh, aman mikhatin eihil chen louleh iti kahet thei ding ham atitan, chuphat chun Philip in phatecha a ahilleh Pathen atahsan in baptaiz achangpai pai tai. (Acts.8:26-30).
Hitabanga chu, koi hijongleh alungthim pumpi alhagao pumpi a Pathen holnom jouse chu aman aholje hehen lang hehih jongleh angai chat chu, Pathenin asei sei boldinga akigot kalse chu Pathen in amaho kithopi dinga amite achate aum umna mun uva kona asola Huhhing na thu agaseipeh diu ahi, agaseipeh phat uleh ama hon bailamtah akisanlut diu ahi. Keima hinkho jong hitabang anahi. Keima lhagaova gilkel dangchah a kaum laitah a Pathenin amiteho khat eihin solpeh a, ama jalla kona Pathen mitetoh kahung kimuto a, hiche a kona hinkho kikhelna ana kinei kha ahibouve.
Pathenin asimho jouse phatthei bohtahen.
KAKIPAH-E!
“God Loves You!
And
Wants You To Love Him Back”
