Home Lahkhom O Manipur a Kuki te!

O Manipur a Kuki te!

108
0
Kuki
Kuki

Jaila

Asun
Mangcha Haokip

Chairman, Kuki Cultural Troupe, Gangpijang

2nd December, 2022

Tona pi le pute ningju-aisa nehna, thingtin pahnamkim abomna gamleiset,
Jutin vatin, sa-hang sa-ngui, sa-len sa-neo noma lhatna gam,
Muchi chivo le theinamkim kikimna Zougam nom.
Aphunggol umi sihtwi nu bang lon khom na.
Galngam le Hangsai, Khupting le Ngambom, Lenchonghoi lenna.
Chullou in pahjing jeng o!

Kum jabih somni bullam a thangvan meibol bang ahung jing e Zougamnom.
Chengzapao Tintong Ngulphup Khotinthang le alom gol cheng in
Thingkho-le-malcha mang in anasem hoh uve nampi thimthu.
Sahso lam India gamsung’a Pa vangboh nan kithethang’e Kuki chate.
Abil’a chen tamna Manipur gamleiset’a idia kinousuh ihitauvem?
Sim Sahei bang chan hung pah kitto!

Kum jabih somni kim lam’a nampi khankho kisuitohna
Gamtum nei a khantou nadia namthimthu chu
Iding lampet khonggan tan jeng a hitam?
Hoilam koi doi ai in eilhim uva ahlungvai ibah u hitam?
Aicha kiloillhato te bang le mahthah ding kon kichuto ahcha ibah jing diu hitam?
Pu le pa te lhaolha’n thimu bang nei hung vil uvin!

Mangkang thimthu doudal le semhoh Pupa galhang cheng in,
Ponsan le Thingnang anathum, khopholou le thilmusao lou tin oimo chang.
Iding tu’a nampi lunlai cheng in sum-le-pai le khantou na tia pupa gam apehdoh u hitam?
Kuki vonchoi ahung peng ding ten ipin eihin sei ta diu vem?
In le lou neilou a kisem hoisel a muntin vahle kon apa chat am?
Mollep din nalom poi chunnu gamlei!

Lenggam khat ama le ama akidou teng iti din jou mong ding ham?
Chung le noi cheng tenin malai thimthu thang thangthip pia vuimang di go,
Tuh khuh a gem talou a chalpang a gep jeng a jong kikhang doh ta lou,
Ohe! Hoilang hitam mipi khel a thusei dia kilheng doh ho?
Hoilam hitam nampi huhna ding a hem le thal, idia eilam a ngat hitam?
Kuki te gam a lhangmei aka e hung un kipan un phalmit taute.
Kamei phimit din thonggo hung’o!

Manipur Kuki chate alen- aneo, aching- amol, ahat- ahatmo kiveipei jing lai hin,
Chomchou chung a chem hem bang a dougal mel man ei bol lai uva,
Koiham nampi sumkon mut ding a? Hoilang gei u hitam bullunmang cheng?
Thangkhomang henkol kai jou a Ngulkhohao Thanglam Jangmang bou hitam?
Neojo’n ijat sei jong le Upa bou in asei teng kilhemjal ji te ihiu lou ham?
Benglam kithisah nampi lunlai le bullunmang cheng selung hin hei them’o
Kuki nam kile kit na din, O Chungmang pa!

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleBuying an Essay Is Not the Only Way to Get a Good Grade in College
Next articleA VIRTUAL REVIEW OF THE ONLY WORTHWHILE TOURIST DESTINATION IN CHURACHANDPUR DISTRICT

LEAVE A REPLY

Please enter your comment!
Please enter your name here