O, KAHINKHO
Heart touching Life Story
By: Naocy Haokip
(9957110489)
Amasan thusim sim jousen min (name) kijih hohi akibahpi khat le ni jong umkha ding ahin, gelse louva inahet them diuvin temna kahin neiye.
Kaneulaiyin kanu le kapa toh insung kipah tah-in kana cheng khom’uvin, kum nga jen kahitah vangin kasang aumnai pon, hijeh chun kanu le kapan cha masapen jong kahijeh-in eilungset lheh jeng lhonin, huise mut ding chan jong einaphal jilhon poi.
Kum nga kahung val jep phat’in kasang um dingin ahung naitan kanu naovop chu anei dingkal ka-ngahlel lheh jengin ahi, hinla kanu naonei dinga ahung umlai tah-in hahsatna ahintoh tan, thinglhang kho cheng akihi jeh chun hospital jotna ding aumthei tapon, hiti chun kanu chu nat thoh gimin nini sung chu apeng peng jengin, anithum hung lhin nin kalungset le ka-ngaipen kanu chu kanao/kasang hinna ding jeh chun ahinkho ahung bei jeng tai, naosen jong damjou talou kanu jong damjou talou, Ani tah lhonin nikhat sungin kapa toh eidalha lhontan ahi.
“AW KAHINKHO” Ana e.. Ka chunnu mel jong kahechen man tapoi, kanun eidalhah lhon phat’in kapa toh thomhao tah le thip dil del’in kahung cheng khom lhontan, kapa in eilungset lheh ji vangin minu le mipa dinmun kop ahitah jeh-in ahiding bangin eisinsah jou ji tapoi.
Jingkah le lekha eihiljin, an ahonjin, thing le twi asutupjin, kei school a eithah joule vailou akonjin, sun le kaneh dingin sunbu veranda a eikoipeh jin, insunga lut dingjong chabi kihong thei nailou ahijeh chun kapa hung vailhun kahsen veranda’a chun kaumjin ahi.
Hiti chun genthei le hahsa tah-in kanu puldou pumin kapa toh kahung umlhonin, kum thum jouvin keijong anhon, twi khai, thingpoh tiho chu kahung kijil them pantan, kapa pohgih chu insunga khel le theiyin kahung umtan ahi.
School kikai nom jongle kapa in nikhat eimulou jongle among theijipon, keijong chutima chun kapa kamu loule kamong theikit pon, hijeh chun school kai talouvin kapa toh thinglhang lou kahung kon khom lhontan ahi.
Thilgih val ho le nisa saval ho kathoh ding kapan eiphal jipon, akoma kaum poule lungmong sel’in naa atongjin ahi, phat le nikho ahung chal jingin keijong kum som le gup kahung hitan, katahsa chu kathaovin kavom thimin nungah tithei chu kahung hitai.
Kum som le li kalhina pat gollhang eihin hel aumpan tan hijongle chapangin kakigel’in koima kana limsah jipon ahi, kum som le gup kahung hi tah vangin kapa in jithah nei ding agel pha pon, kanu beijouva pat mihon jithah neidin anasei jinguvin hijongle kapa vang ananom jipon ahi.
Kahung nungah tan kapan jong ei it lheh jengin, achena jousen eipuijin, aneh jouse einehsah jin, kilha kang louvin eiumpi jin ahi, nungah akihi jeh chun kapa ma hi mipha milungnem ahijeh-in upa tilou gollang hon jong angai theiyuvin jan le somleng atamjin, chule gollhang phabep jong ka-inn’uva chun ajan geh jiuvin insung chu achoh thet jengjin lunghel lunghem kana hephaji pon ahi.
Nikhat kapa toh vaikon kahung lhun lhonle khosunga nupi phabep’in eina daiyuvin limsah-in kanei lhon pon, athuseiyu chu kajanan hinla ipi kisei ahi kahepoi, aumdan chu kapa chu nungah anajolpeh’u dan ahin, hinla keinin kahepha lhon poi.
Haptani ho jouvin mihon Lhainei toh kapa anadai dai jiu dan ahi, kahin hedoh-in, kapa koma naki-ngai lhon ham tia direct a kadoh le kahepha poi, atin hijeh chun athu chu oltah-in kahin kholtan ahileh hiti hi anahidan ahi.
Nu Lhainei hi aji toh kikhen, cha jong ni aneiya ahin dalhah ahi, numei phalou tah ajipa masanga jol sai jing ahin, aji mitmua mitoh ajon jeh-a ajipa insung mihon insunga kona ahin nodoh-u keiho khoa asopinu hung cheng kha a amanu koma chu hung umdan anahin, hapta ni lang aumtah vanga kapa le ken kanamu khah nai lhon lou ahi.
Hitia mihon anadai dai jiu chu amachu ana kipah lheh jeng jin, ol ol’in eihungvil vil jilhon tan kapa toh keini lung holna chun akisugim jilheh-in ahi, hijongle kenvang ipi injong kagel theipon kou jong kakou khapon ahi.
Nikhat hi kani (kapa U-nu numei khat um ahin) amachun eihung vil lhonin ka hahsat lheh jilhon vanga kani jong jilecha nei ahitah jeh-a dei banga eihungvil theiji lhon lou ahin, nikhat ahungin keini lou vaikon inn lhung nailou kahi lhonin nilhah in an einahon peh lhonin hapta khat vel eiumpi lhonin ahi.
Kani in eiumpi lhon chu nom kasa val jengin ache ding jong kanom tapon kalho chon jing jeh-a hapta um galkai lo ahi, kani jong ahunglhun nikhoa pat miho thusei chu ahinja jap jap tan nikhat lou kakon khom nauvin kapa komin hiti hin aseitai.
Kani: “Naocy pa, miho thusei kajahdan toh abahle Lhainei toh aki-ngaiye atiuvin atah ham?
Kapa: Ipi atah hi diham? Heo eidai dai jiuva nomchoma gah kitot ji ahinouve.
Kani: Boi Ven, Lhainei hi numeipha ahipoi, ken athu jouse kahet soh ahi, nahin kipui khah le insung mangthah ding ahi, kathusei hi kichin phat’in.
Kapa: Haha heo Lhainei chu sana eh kai hideh louva ibol’a kipui khoh ding ham?
Kani: Numei chu moh nuisat thei ahipoi, ajole nahin lhep lhah khah ding kakichat peh nahi, ama toh nakichen le nachanu jong misoh lou ding keijong nasopia neisim thei tah lou ding ahi, numei lungthim moh khoiphah ahipoi, kichih theiyin nei ngailutna ahile kathusei napel lou ding ahi, keijong kaboiji jeh-in itih a kahung vil kit lhon ding kasei thei tapoi.
Kapa: Akhoh poi heo dama idam pouleu apha ahijenge.
Kani: Henge ahiye hijongle boi, kasei nom pen chu Lhaineiya konin kikangse pou pouvin tihi katemna khoh pen ahi.
Tin thudang tampi aseipeh-in kani jong hapta khat jouvin akiletan ahi, kani um sungin nu Lhainei chu ahung vahlut khapon kani chedoh nikhoa pat chun ka-inn lhonin apansa pai kit tan ahi, eiphat bol ji dan dan chu ngahkheh naosen bol’in eiboljin ahi, abang khat le kaloi lah-a lhadin eisol jin inna bou eikisil sah got jin, kapa jong aphatbol jin nilhah vaikon inn lhun masangin an ahonmin jitan, kapa kisilna din twisa ana om jin kapenna kanutah ana bang jin ahi.
Nikhat kapa toh kana toh lhonpet’in kapan hitin eihin donge
Kapa: Boinu, nani in Lhainei vetda jongle eini din miphamo ahipon lungset jong aumin nanu dinga ipui ngap ding hitam ahin titan ahi.
Kei:Hepa, kani in apha poi atile mipha hisam ponte, ajeh chu aman ahetsoh kei ahin mihem chu nikhat nini in aphat aset akihedoh jipoi, hepa joneida jengo eini hitin umkhom maita hite.
Kapa: Boi, ahinai hijongleh nikhat le nang numei nahin nahung jineidoh teng kei ka thomhao val ding ahiye.
Kei: Hepa, najinei ding jongle kei jineodoh joule bou neiyo, nuthah nei ding hahsa kasa e.
Kapa: Kenjong kahenai, hijongle chapa khatbeh nei d kanome, tia asei tei tei phat chun kada lheh vsngin ima kaseibe tapoi.
Hiti chun kapa le Lhainei chu khosunga mi phabep’in ol ol’in ahin dai daiyuvin suhto tei ding ago tauve.
Thu tam sei ding jong chapang akihin kalungthimin vang kadeimo lheh jengin ahi, nikhat keijong khanglai te thakon ding joulei lho ding ati jeh’uvin kache tan, kapa jong lou vai akondoh-in nilhah a inn kahung lhun chun bu le me aminsan ana koiyin amavang anaum poi.
Janin jong ahung tapon kalungdon phat chun Lhainei umnate chu kagadoh jeng leh Lhainei toh nilhah khojin masangjep chun apotdoh lhone eitipeh uvin ahile kahe pai jengin…..
“Hiche vanghi akijam lhon hitei ding ahitai,” tin thipbeh-in inn kajon tai, nini jouvin kabepaovin agapui lut lhonin kakipa lou dan chu o.. Kalungthim chu akap kap jengtan ahi.
Alang khat’a kani in athu ajahkit phat chun alunghangin kahung kithah lut kit lou ding ahitai, tin thu eihin thot’in hiche nikhoa pat chun kalungthim anom thei tapon, seidoh theilou lungboina chu kahin neipan tan ahi.
Kapa jithanu Lhainei ji masate chun anop agot chan man le mol khum din ahin seiyuvin bat le tham hol khomin hahsa tah-in kanuthah man le mol chu dangka lakh li val lut’in kasutheng nah nah uvin ahi.
Kilung-oi hih jongle kapa kalungset jal’in kanuthah jong chu kahin lungset’in lha khat, lha ni sung chu aphatdan o,,,, jingkah matah-in ana thoujin an ahonminjin kakitho ji jongle
“Ihmu tangem nalel ding ahi, nomtah-in kicholin eitijin, abangle naloi lah-a gakichemin ken imama hinbol nange eitijin hiche phat lai chun kalungthimin “Nu neilou sangin NU neihi anome, henu kakipah-e,” tin lungthimin kana kihoujin ahi.
Lha ni val ahung che tan, nikhat jingkah atho a kon aphunin athusei mumal kihelouvin achuti lunghan han jengtan ahi, vaikon phat hita mi vailou kon gamta amala kigo him him talou hijeh chun kenjong
Kei: Henu, tuni louva nahung lou diham? Kikigo chaita gam khuchan jouleiya kachanga iti kache ding ham?
Kanu: Nanop leu kiche uvo, nang ho soh goi goi ding kahipoi, naa itoh le bou nakipah uvin kathusei hoilam ham jong nati pouve.
Kei: Henu, ipi ham nathusei? Ipi bol dinga lom umham?
Kanu: Kachateni gapui ding katile nahingpa ki-nangon sah khula, kachateni kapuidoh loule kibolna hung nom ponte.
Kei: Henu, micha, minao chu eihon iti ikipui thei diu ham? Ajole min eigelse khauvinte.
Kanu: Kithip’in chapang nasei dia lombep kiseiyin, tin eidalha tai.
Chomkhat jouvin kapa chun che-o nao eini loukonin che hite tin kakigo lhonin kapa toh loulam kajon lhon tai.
Nilhah inn kagalhun lhon chun kanu inna anaumpon an jong anahon pon, kalhun lhunin kino tah-in an kahonin, kisil man louvin kamai kaphet’in houin lang kadeltho kit tan ahi, ajeh chu khanglai kikhop ni ahin, conduct akihi kit leh khatvei phat ichan lhaso ding kinomlou hel ahi.
Houin kilhadoh jouvin kagil kel valin kapa komin hepa an netaute katile nanu ga kouvin eitin hijeh chun khonah langa asopinu te inn lang chun kalhai tou kit’in kaga kouvin hitin kaseiye.
Kei: Henu, hungo an netaute, kagil kel val jenge, lunghang jongle chun hiti hin umji hih-o.
Kanu: Naduleu kineh tauti, kei kama ne d nahiu ham?
Tin lunghang tah-in munchom lang avetan ahi.
Kei: Henu hungo chesuh tahite, jan jong asot tan lunghang tahih-o.
Kanu: Chen lang napa chu hinsolta, ahungloule kihung hih vehta, atin aumdan chu anungjam dan anahi.
Keijong kachesuh kit’in kapa koma
Hepa, kanun napa chu hinsol’in ahungloule kahung lou dihe ati’e.
Kapa: Hichu o, ama sap le leng hija kousuh koutou ding mong hichu bu thuh-in nedoh hite atin an kane lhonin kam khatbeh in jong kapao tapoi, ajeh chu aphatlou henasa akipui ahijeh chun thu tamsei ding jong kisih val khante katin ahi.
An neh jouvin natoh akilel toh inna chun kakisil’in kalum pai pai tan ahi, itih a chu kanu chu hung ham kahe tapoi, jingkah kahung tho chun ana ihmu nalaiyin ahi.
Ahungtho tho chun thipbeh-in atouvin kapa vang gama avahdoh pai paiyin kanu chu nidang toh abang mo jep jep tan, kungbul kitung bangin akitung chahkhehjin ka changa lam vet’in eihin vepan tan ahi.
Lou jong ahungkon kha ji tapon, kapa koma hepa ipi da kanu lou hungji lou hitam? Natoh dingla atamin nilhah le inna um jongle an jong ahon jipon ken kalel ji val’e, tia kaseileh
Kapa: Boi, hethem jengin nao avop pan ahijeh-a khu lunghang nom jing ahibouve atin, kenjong kanu naovop chu kakipah-in nao sopi kanei ding ahitai katin kanu chu kalungset cheh jon ahi.
Hinla kanu chu alunghol ahung hah cheh cheh-in, ale langin ei engbol ahi tipouvin kahin geljin abangleh “KOL ILUNGSET LE POH ANGAIYE” kiti chu amahi ahi katijin ahi, ipi chu kiseile hinkho gentheinan eingah jinge ti chu kahen ka masang hinkho ding gelnan kalung athomhao lheh jin ahi.
To be Continue
“HINKHO HAHSA” Episode-II
Note:
Nasim chai jeh-in kakipah-e, lunglut tah-a sim jouse Pathenin phatthei naboh cheh-u hen, aban jingle simkhom kit taute🖐….,.
