Heart touching life Story
By: Naocy Haokip
(9957110489)
(5th Episode final)
“SANGGA KEI LONLHIN LONG TANGE”
“Hoinunnem, kathusei hi ngaidom dom tang, nei noise val hih-in nathat doh inge, Luntinlen (min semthu ahi) toh nakichen lou pou poule nahinga naumlou ding ahi, atin (Luntinlen hi kanu dinga aji masapa naopa ahi) kalunghang val’in ka eh cha hi Luntinlen hichu, amin min jong kajah nom poi, ajudon alouneh toh tin kap puma kaseileh kapa in
Lhainei, aji ding beh chu amadei dei kilhen nante khuche Luntinlen khutoh ipi akichen lou akhoh poi.
Kanu: Kathu thu hichu, hiche uipi asen laiya ajun a-eh kahe hea tua kathu ahilou dingle kathadoh chu phajo ahi.
Kapa: Kate asen laiya bon nang hunglut nailou, itih a ajun a-eh nahe khah beh ham?
Kanu: Seitam hih-in, thu akiseile nachanu bou na o leilei jia eihiti noise ahi.
Kei: Hijenga chu Luntinlen toh kakichen sangin thi ding kanomjo e.
Tin kakap’in ahile aphunbel bul’in nao akipoh in kholai sunga aphuntou peh-in ahi.
Achena mun jousen kisenjah jah-in eiseise jin, ahingnu koma umjongle hibang lom hin nomsaponte, tiho pou aseiyin, ngaida da umjongle akingai chai thoujin ahi.
Ngamboi sei bangin ahapta kitpa chun anu le apa toh insung tulebe ho ahungvai kon tauvin, kanu vang chun kei kanatpha hih-e, tin asopinu te inna chun akiumthim beh tan ahi, akihoudan’u chun kuki custom dungjuiya amasapen ahinah lai jeh chun keiho insungmi hung kihou toh tadi uvinge, akit leh ipi ti di hijongleh seikhom kit taute, tin amaho jong akile kit tauvin ahi, chule tulha kichai ding kon ahitan, lhakit hapta masa sunga hungkit din akihoulha tauvin ahi.
Kanu vang chu lungdamtih umkha louvin jingkah nilhah in kapa chu agot got jengin Luntinlen toh goptei tei ding plan agong jingtan ahi.
Nikhat louva kachen khojin chip chep mihem le kungbul kimah dona inn kagalhun leh insung kalut masangin kanu chun insunga konin
Hekateijo boinu nahung hitam? Tin awnem heuvin einalemin kidang kasajap jengin insung kagahlut leh Luntinlen toh anaum lhonin kalungthima chun
Ooo, Nasopipa um jeh-a hiba kahoupi tei tei nadia awnem nanabol hidan chu o na? Katin kaseidoh tadem katileh gah jumso ding chu kanomjep pon
Kei: Henge heno kahungtai,
Kanu: Veteh na-Ulenin nahunglhun di angalel val ahitai, ahin tin kalung chu anopmo lheh vangin kagah houpi mai maiyin
Kei: Pulen, itih a nahung hammo? Tin chibai kabolin ahile
Luntinlen: Sun lah-a kahunglhun ahite, Cy nahung geina-e.
Kei: Pulen, ipi nasei ham hibang natoh akhoh a, kenbon maval kasah ahiye, tin aphat phatna chun kagah houpi mai maiyin ahi.
Nini ham jouvin nilhah khat kanu in kaumkhom pet’uvin hitin ahin seiye.
Kanu: Lunlen kachanu hi kathu thu ahin, nang dinga gotsa kakoi ahitai, nadei phat phatle nakipui thei ahiye.
Luntinlen: Kate tutah a jinei divang kadat theipoi.
Kanu: Ipi ti onk? Midang nakipui sanga ama nakipui le iumkhom jingdiu hichula, ahin tin kalunghang behseh in kapotdoh tai.
Ajing nikho chun louva kachele Luntinlen chu ahinsol’in kanung ahinjuiyin natoh eihung kithopin hichun hitin ahin sei tai.
Luntinlen: Naocy nanu in nang chu kipui doh jengin midang kapeh sanga nang kapeh chu pha ahi atin nangin ipi nagel-em?
Kei: Pulen thil ijakai nang jong nahet chula, kanu in eibolna jouse jong anoma um ngaplou tua Evan Ngamboi toh kichen ding sumsel’a pumhat san’a nang toh eisuhto got naki-oi poule nathu ahe, hinla mihem pap neilou akium hih-e.
Luntinlen: Cy keijong kanom poi, nanu lunggel khu hiti ahi.
“Nang toh keihi suhto ding chule kaupa chateni ama sunga peng teni khu kilah a umpi ding ati ahin kei kanompoi, olmo hih-in, ahinti chun
Kei: Pulen kakipah-e, nangbon neihin het thema ahinla tua ikihouna hohi kanu hetsah poite o.
Luntinlen: Ole, Ole ibola kihetsah ding ham? Atin alang khat’ah Luntinlen toh kakihou toh tah jeh chun kalung a-ol lheh tan ahi.
Hapta khat ho jouvin Luntinlen jong akho languva ache kit tan, achedoh kon chun kanu in
Lunlen nahung kit teng akipui din hungtan, tua la natoh khohval jeng nalai ahin phat chomkhat khongaitadin tin availhah-in aman jong henge atipeh-in ahi.
Hinla tuni chanin ahung kile kit tapon kalung-olna khat ahi, achateni toh umkhom ding atup jeh-a ajipa sopipa toh eisuh got bou ahin koi lungset khoto nahsal’a thilbol ahipon ahi.
Ngamboi le a-inkote aniveinan ahung kit tauvin kanu chu pao jong paolou mijong velouvin aumin kihoulimna kipat masangin keiho tulebe toh kaum laiyuvin kanu in
“Kacha chu ka thu nopna hinpe jongleu chun Kei kanop loule hitheilou ding ahi, cha jong omsah louvin nungsol tauvin,” tipou aseiyin ipi ti ahung kihounadiuvem tin lunggim lungdon nan kadimin ahi.
Ahung kihou tauvin ahile kabepao chun keiho kinopto natah jong imacha aumtheipon ipi hile apa in hinkiseilhah tante, tin atoukit tai.
Ngamboite bepa chun ahile inneipa, ipi ti lung nagel lhah hitam? Lungset’in nagel lhahpen chu hin seitan, kalolhin diu vang kinepna lentah kaneiyuve, tin atoukit tai.
Kapa chun kanu agahven uhchet chot’in kei gel’a vang chu kadalou ahin, hijongleh anu chun aphal thimlou hile kiloma ahintileh kanu chu ahung ding doh-in
Nahung masat chunguva hungkit da tauvin katipeh sa hilou ham? Nangho hung masanga min ahung kithuma kinop tosa akihi tai, milah-a jumleja thoh sah ding neitiu ahibouve, na chabel’u kidop uvin lang kile kit tauvin, aban jong hungkit tahihvin tia akhit avaitoh akisen toh atho phat chun keiho bepa chu ajahcha val’in amai akisip’in apotdoh tai.
Hichun Ngamboite bepa chun inneipa itidana chanu chung changa jong mipa nang joh-in thu sei louva minu thua joh kanun diu ham? Hithei ponte, nangma tah-in thutan lhahna nasem dingdol ahi, keihon ichanu’u kangailuvin tuchung kalosap jongleu kahungkit tei tei diu ahi.
Kanu: Insung hi kathu thu ahin mipa minu ti aumpoi, kacha chu kathu ahin tikit’in ahung kinel sang lheh jeng tauvin, keivang kalupna a konin ngai ngamlouvin kitimlel sasan kakap kap jengtan ahi.
Ahung kalsong ho jong lungna tahle lhase pumin akinungle tauvin ahi, ajingin kabepao chun guhthimin lekhathot khat eihungpen kasimpeh Ungamboi lekhathot anahin hitin akisun’e.
Kanao Cycy, ana lungneo hih-in, tuchung chu lungnopmona tampi umjongle nangdin nadehset’in te, hijongleh iman anagel hih-in, akit le henu le hepa kahinsol kit ding ahi, Pathenin lampi eigonpeh lhon nante, nang ding kagel lou hileh avel’a hung ding kanom tapoi, kahin lungset jinge Boi.
Tia kisun kamu chun kalai ana dehset’in “O, KAHINKHO” lonlhin vang neilon kang sah hihbeh-o, kakinepna cheng hi keidin kipana kolni in hungsoh tei hen, tin ka op toh kasip beh-in kakap kap jengtan ahi.
Hiche jou haptani jouvin nikhat ka insung bepao ahungin kapa komin hitin ahungseiye
Kabe, Janhi jong chun Ngamboi nulepa chu athumveina din ahung kit lhonin ahunglhunu thu chu Lhaineiyin ahet phat’in kain’uva ahin del bulu in mit neilou mai neilou bangin ahung houvin dan dungjuiya kibol ding hijongleh na inneipi hi aval behseh tai, hijeh chun tua hi hapta kit le hungkit diu ahin hijongleh chanu thum ding hitalouvin ngaidam thumna le kikhaokhina lhamlha ding joh-a hung diu ahitai, ahung ti kajah chun ka room a pat kalhase val’in kalhaidoh-in kabepao keng chu katuh-in.
Hepa, Keivang kanom naisai poi, lungset tah-in nop peh uvinlang Ka-Ungamboi toh neigom tei teiyuvo tin kithing leuvin kakap’in ahile aman jong kakhut tenin eikai dingin.
“Chanu, itilom loma ba hiti vangset nahi hitam? Napa jeh tah tah hi ahiye, hiche mulaopi Lhainei thu thu angaiya tua hichangei nasuhgim jong hi napa hin khoh asah louhel ahi, iba kilo ding ham Boinu, keithu hile sot’a anomsa kahitai.
Tin akile kit tai, haptakit nin alivei channa din ahungkit tauvin aseidiu kanahet masat tah jeh-in ve jong kave ngam tapon abepao ahung houlimin hitin asei tai.
Inneite ikah’uva suhkhel jouse ngaidam thuma hung kahiuve, ichanu’u hi kadeiyuvin, kalungset’un hinla keiho dinga naphal him him tahlou jeh-un ngaidam thuma hung kahiuve, chule chanu Naocy, nang jong hung potdoh’in kaseipeh nomu thu tampi aume, tin eihin kouvin hijongleh kamuh kasim chah bet’in pao louvin kaumin ahile kanu chu kihansah deuvin
Hoinunnem, anangong nahi ham? Khatvei kou jalou nahile anaum um tang nasam buchinga hungkai dog nange, tin ahung kisenjah jah-in, kakitim lel phat’in kaponsil chu kakam dimin kapet’in lhase tah-in kakap jengtan ahile, akihounao jong jona asemun ache tauve.
Kalupna chunga kitimlel puma kaka laiyin kanunga pat olchan kaleng ahung kituh-in kavedeh pon kamai ahin domin kamitlhi ahintheh chu kahen kamit kagah hadoh le Ungamboi anahin, keijong akeng chu kakolin
He-u, kangai val’e neidalhah ding hitam? Tin kapdoh theilouvin kahaitan lo in ahile phat chomkhat set eina boipi uvin kahung khahdoh leh Ungamboi malphei eina khap sah-in, anu le apa jong kakoma anatou lhonin oltah-in kathou doh-in Ungamboi nu chu kakol’in hitin kaseiye.
Kei: Henu, kei jeh-a jumleja nathohna jouseu kahesoh keiye, hijongleh henu lungset tah-in neidalha hihvo keivang kanom naisai poi, tin kakap’in ahile abonchauvin akapsoh keiyuvin.
Kanu: Tunilhah achaina hita ding kikhen doh loi loiyun tin nao akipoh-in apotdoh tai.
Ngamboinu: Boinu nang banga kalungset kakhoto ding aumpoi, na-u Ngamboi jong munchoma aumding tah jeh-a apotdoh kah-a gop tei ding katiu ahin, chukit le napi kei tehpi jong tehse ahitan kathi masangin katupa Ngamboi jineisah loiyun katu, kamou mel kamu nom valtai ati jing ahi, tunla nang keiho din eipenom tapouvin kalaina behseh-e Boi.
Kei: Henu tun neipui jenguvo kahinjui ding ahite o henu, lungset tah-in nei dalha hihvo,
Ngamboi: Cy, ipi dia ahitheilou thil nasei ham? Boi, kahin lungset lou ahipoi hijongleh kei danthenga Pathen le mipi ang’a bou jinei ding kahi, tua nangtoh ikichen ding hi Pathen phatsah lou himai tante boi, lhase hih-in, Pathenin kei sanga hoilepha naji ding nahin gonpeh tante, kenjong damlai hinkho sunga kahin lungset jing ding nahinai, hiche ponve hi kalhahna ahi, Boi kei melin hinve jingtan.
Kei: He-u hitia nei vailhah sangin neithat doh jengo kahin nom tapoi, he-u kangai val’e kenvang lhadoh jou ponge, tin atoka katuh chah kheh jengin ahile anu le apan jong eive jou lhonpon Ungamboi jong ki pasal sah jongle akitim jou deh pon, aka pumin Boi, Neingaidamo tin katuh lai athinglhan polanga apotdoh tai.
Anu chu kakolin ka chuti ka jengin ahile abonchauvin tilkhouna le lhamonna thu tampi eiseipeh uvin mitlhi pumin eidalha tauvin ahi.
Hiche nikhoa pat chun hinglai puldou kahinpan tan, “SANGGA KEI LONLHIN LONG TANGE” he-U, hamphat vangphatna jouse nanga hijohen katin nitin kahinkho kagela kangaito le hin ding nomlouvin nikhat kalou kon nan loupama kaponve kasut lhan kikhailih ding katitan ahi, chutia kalol’a pon kakhi a kitha ding kagot laitah-in mi khat’in eikou kajan, kahouloh poi aniveinan
Kachanu Naocy, tia eikikou gin kajakit’in koi nahim tua eikou tia kadonbut leh.
Ka masang dona chun kanu tobang mikhat kamun henu, katile
Ipi nabol got ham? Eitin
Kei: Kakitha got ahitai.
Kanu: Ipi jeh-a nakitha got ham?
Kei: Kahinkho hi kipana ding aumpoi, hitia hin sangin thileng nom jonte.
Kanu: Boi, nathilbol got chu apha ahipoi, ken noma ilenkhom ding ngah lel’a kahinvet jing nahi, tua tol nathaleh itihle noma ilenkhom tah ding ham? Leiset gentheina hi chomcha a ding bou ahin, lhagao gentheina vang tonsot kunkhoa ding ahitai, tunung tuban le hitobang bolkit tahih-in, ven kahin lungset jinge Boi, tin kanu chu amang kit tai.
Hichun kanu chu kakouvin henu, chomkhat beh neiumpi tangem kangai val’e henu hung thou kit’o tin dilsun kakap’in
“O, KAHINKHO” SANGGA KEI LONLHIN LONG TANGE” damsung kumkhon, chunnu ngai banna ding umlou, sengolngai banna ding umlou “O, KAHINKHO” kathoh thempoi, tin kakap kap jengjin ahi.
Kumlhun ding konin nikhat chapang khat’in “Invitation card” thupi tah khat eihungpen kenjong kisonglel pumin kagah hongin ahile hitin ajih e.
“Gollhang Hengoungam@Ngamboi leh Nungah Moineilam@Lalam houdan thenga kigopna kinna nangma jong ngailut jal’a thon louva hunglha teidin tem le deisah nahi.”
Tia kijih kamu chun lainatnan kadimin alang khat’a kagel le kakipah kit’in card chu mitlhi vachut chut’in kaven hitin kaseiye
“He-ungamboi, tuni hi eini a ding ana hitale mitlhi longponte, ana long tajongle kipana mitlhi joh hinte hijongleh iba kalo ding ham? Nakeng neinan hamjangpha maitan kahin kipapi e genthei chaga paojoulou “SANGGA KEI LONLHIN LONG TANGE” He-ungamboi angdang koi ding hita jongle chun kahinlha joupoi, “O, KAHINKHO” iti hitam? Hibang loma vangse dingbep’a peng kahi hinte.
Akinni ding ahitan miho chu akigo umsao sao hile kilom kasan hijeh chun keiman kakhut tah-a kakhon jatpon (KHAMTANG PONVE) chu ajinu din kathot’in chule Ungamboi dingin jatpon (SAIPIKHUP) khat kathot’in lekha neocha kajih-in hitin kathot tai.
“SANGGA KEI LONLHIN LONG TANGE, O KAHINKHO” kile joulou keidin nitin hinkho thimpi ajing jinge, he-ungamboi hamjang phan lang damseltan, lhahna ding thilpeh kahin neijou poi, hoi hih jongle keima khutsoh ahin, kei mel’a namudin ana kichin jing lhontan. “HAPPY MARRIED LIFE Ngam&Lam”
Amani jong akichen jou jou lhonin Bangalore jonin ache lhontan aban kiti kakinung mukit tapouve, keivang kathohna ho jong akile deh pon jinei din jong kakigo tapon nitin kahinkho “SANGGA KEI LONLHIN KALONG JINGE“
THE END
“TEMNA”
Thusim kijihna sunga ngaimah thei jong tampi umthei ahin, hijongleh inahet themdiuvin kahung taove.
“JILDOH THEI”
Nuthah nei hinkho hi anome tiding koima aumpoi, chule minuthah (step mother) ga hi ding jong thilnom ahikit poi, nuthah nei lou hon anatdan hegil ponte, napenna nanu hinlai damsungin lungset themin, khoto tah-in bol jingin, nuthah nei kiti hi ahahdan nahet tengle nanu nangaina sang dehset ding ahi, hijeh chun nuthah nei ho demle seiset bol hih-in, asung thu hegil jou pon nate.
Note:
“O, KAHINKHO” Heart touching life Story part I-V chu hichan hin akichaitai, jihbe ding tampi aum nalaiye, hijongleh phat’in eitoh jou jipoi, abula pat lunglut tah-a anasim jouse chungin kakipana thu kaseiye, asim jouse Pathenin phatthei naboh cheh-u hen…………
Copyright©NaocyHaokipJuly2020
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
