“O, KAHINKHO”
Heart touching life Story
By: Naocy Haokip
(9957110489)
(4th Episode)
“KADEI CHU KEN KILHEN NANGE”
Phat sotpi damlou puma hinkho kahin mana damkang bep’a na kahintoh Jing laiyin nikhat vaikon kahunglhunin kani le kagang anaum lhonin kamu chun kipa le lhaset kakop’in kani chu ka-ngong koiyin kakap jengin ahi.
Nilhah in kanile kagangin maicham asem lhonin, naosen vetna anei lhonin chule chomkhat mun choma vadohna ding kin khoh aumjeh-a kei jong in ngah dia eihung pui lhon ahidan asei lhonin kakipadan dan chu apet pet’a chu che jeng thei hile kanomin ahi.
Kanu vang chu alung lhai hita alhai lou hitam,tapsah lang aven kaiku jem jumin atouvin kapa ahung houlimin hitin aseiye
“Ama ahung nom poule akhoh hih-e,boina chung jong ahin hinla aumsot ding vang boijep maithei ahi, ajeh chu insunga ama tailou chat le ding aumlou jeh-in anu kithopia aumle apha e,atin chuin kagangin
Apha-e kipa aume chuti ahile ipi jong umsot val deh diham, jingle chedin kigo tauvinge atin,maicham chu kasem jou tauvin,kani le kagang komin kalumin, kanu hung thou kit kabahsah jengin ahi.
Jingkah chun kani le kagang chu insah inlhanga kholai agavah le lhonin hichekah chun kanu chun hitin ahinsei kit taget’e
Kanu: Aninu jong nehmoh kihol’a hungvah lut jing ham, ka nungah laiya einadem lelea tua ka insunga hunglut ngam nalai, amaivun jong asa mong monge kati chu..o
Kapa: Se le pha le kei asopi pasal khatseh kihia amadia pel thei kihilou chula.
Kanu: Nang jong janlhah a anu kithopia aumle apha e, nagah tivel itih a eikithopi khah beh ham?sol’in lang hungkit datan tipeh-in.
Kapa: Hoija ama aumloule hithei ponte, kei kagim val ding ahi atin akinel nel lhonin keivang chun che kal ngah lel’in kakigo chai kei tan ahi.
Hiti chun kanite kho chu kalhung tauvin, kalunggel oldan dan chu tepi ding aum tapoi, insah inlhanga nungah gollhang ho chu ahung kholai leng jiuvin chomlou kah-in loile gol tampi kahin neitan anom lheh jengin ahi.
Kani le kagang jong Tripura langin achapa sepoy pangpa vil’in agache lhonin lhakhat lhing dehchet ho jouvin ahung kinungle kit lhon tan ahi, lou vaikon ding toh ding ijat umjongle kani le kagangin natongdin eiphalji lhonpon, inna kaumjin toh ding hetmo manin kaloiho toh thing (fire wood) pon kache jiuvin ahi.
Nilhah seh le gollhang hung lai leng ho lah-a chun mikhat amin Ngamboi akitin amel jong hoimo val lou ahin, ama chutoh eidai beh jiuvin gollhang chingtah ahitan kaloite jouse chun Ngamboi toh eihin dai jing jeh’uvin kei chu kajahcha jin, Ngamboi chu kajachat jin kahou ngam jipon ahi, hijongle aman vang eihoujin eihouna khambep’in kadonbutjin ahi.
Nilhah khat kaloiho toh TV kavet pet’uvin khosunga upapu atiuvin upapu le ajinu chu ahung kholai leng lhonin TV ve ho komin TV chu chomkhat off uvo chule naoteho chomkhat anapot doh tadiuvin houlimna kanei lhon ding ahi, ati lhonin kaloiho toh potdoh kagot le kei chu eikham lhonin.
“Boinu, nang potdoh hih-o, innei nahin houlimnan jaovin eiti lhonin ka potdoh tapoi.
Kalungthima chun ipi thu ahitade o, tin kichatnan kadimin paolouvin thip chet’in katouvin ahi, hichun upapu chun kani le kagang komin hitin ahin seiye.
Uthang (kagang min semthu) Naocy hi achan chin tichu ahinkho thusim them khat beh kahet thei lhon ding ham?
Kagang: Them khat hilou aboncha kaseipeh thei nahi, aninun jong aseithei ahi, alhingset’a sei ding hile kiseijou pontin achomlamin hin seiyinge tin ka thusim jouse aseipeh tan ahi.
Chutia thusim aseilai chun kabon chauvin lhilong pumin ka-ngaiyuvin, ahin sei chai phat’in upapu jinu chun phatthei eiboh-in anupa lhonin kalu chunga khut ngamin eitaopeh lhonin hitin ahin sei lhone.
Upapu: Naocy, vangse kisa hih-in, Pathenin nangailu jingnai, keini kahile na-U Ngamboi nulepa kahi lhonin kachapa Ngamboi hi Bible sim ahin tutua hi Evangelist ahi, khosung miho leh na-U Ngamboiyin nadeisah dan thu kaja jingin hijeh a chu tunilhah hi nang vedia kahung lhon ahi.
Upanu: Cy, na-U Ngamboi khu nadeimo jengem? Nadei nah nah le chapa chang khat’a kanei ahin ama ka-ngailut bang banga nang jong ka-ngailut nahi, nadeimo khah le vang tei tei kati poi Boinu, ahinti chu kati akithing leuvin kadang agon kalol kamoh khon khon komin ahi, chuin aw kithing det det’in seimo sasan hitin kagah seiye.
Kei: Henu, Hepa lungset chandia jong kilomlou kei hichangei lungset khoto tah-a thu neiseipeh lhon kakipah val’e, ka-U Ngamboi dinga neideisah lhonin hijongle keini kikah thu ding hi aman jong ima aseikhah lou jeh-in keidin donbut ahahsa e, ipi hile amato joh hung kihou toh masa phot’uvo kagahti leh.
Upapu: Boinu, aman joh eigaseipeh uvin ati ahiye ahintin kajahcha cheh kit’in
Kei: Ipi hile amatoh hung kihou tange Henu hepa katin ahi.
Ajing nikho chun Ngamboi chu kaha jachat cheh kit’in ve jong kave ngam tapon, hijongleh ama gollhang chingtah ahitah jeh-in chingthei tah-in eikivoppi jin, ol ol’in lungset thu ahinsei tan, keijong jahcha jongleng alang khat’in ngaina khat kahin neitan, hiti chun kahet lou kah-in kana lungset doh tan ahi.
Kani le kagang komin lha thum val set kaumin kalunggimna jouse kasumil tan katahsa jong akido doh-in, kalim kamel jong nidang sangin kana hoidoh tan ahi, kani le kagangin Tripura a kona ahung kile lhon chun von mantam tam hoitah tah tampi eihin chohpeh lhonin, inna umjing leng ichanin kahahsa tadem katileh kahet loukah kah chun kana lhisohjin ahi.
Nikhat kaloinu Vahboi toh TV sun chang laiya kavet lhona mimi kakihon lhona kakidai sou the thu lhon laiyin inpolanga min eikougin kajan, kenjong hoiyo… Tia phatah a ka-ngaileh hungpot doh tango eihintin kapotdoh-a kot kagahon leh kanu le kapa anahin kalungthim chun thimpi ahung jing pai jengin houje helouvin thipchet’in kaumin ahileh kanu in
Nakam umlou onk? Mi nahou theilou ham? Tin insunga chun ahunglut uvin, kenjong cha ka-omin kagapen kamaiso achomhel jeng chu kaloinu Vahboi chu alung dongin imacha hephalouvin
Bhainu, nalung lhaimo toh na-e, ipi nati hita? Eihin tin hijongle kapao deh tapoi.
Kani le kagang ahung lhunin aki chibai sao saovun inlanga che ding thu hung ging khante tin kadip achah-in kani chu lhaso lou beh-in katuh jingtan, kani apotdoh komle kagang katuhjin kaginmo bang bangin kapa in kagang komin ahin seitai.
Uteni, Boinu chu khoh lheh jongle inlanga ahunglou le boi ding ahitan, lou ho jong donman vilmana umlou ahin jingle kapui lhona kacheu ngai ding ahita e, ahinti chun kakap lhatan ahi.
Kagang: Ipi hile phat chomkhat beh umsah tadiuvin lang hitau hiti, keini changseh hibanga kiboijia ama auma nilhah le ann ima aminsa ihung vailhun le kiol chomji hime.
Kanu: Hinavehta inlanga aum jongle kinopsah ji val’a imama manthei hijilou nao beh adon loule toh ding atamval tai, jingle kapui tei tei loule hithei lou ding ahi.
Kani: Ahihih-e, naoteni ipi chu hileh tuni hung lhung pan’uva jingle nomtah-in kichol uvin lang akit le che ding ahijongle cheuvin, Boinu jong aloi agol ho ngaiyin tin jing nikho beh umpiuvin, ahinti chun kalupna lang kadel’in lhasetah-in kakap tan ahi.
Janin kani le kagang komin kakiphin pantan neisol lhon hih-o, kache nompoi, neisol lhon pou pouleh kakitha thou thou ding ahi ti changei kaseidoh manin ahi.
Kache nomlou behseh jeh chun kani tenin jong jochanin asei lhonin hinla kanu koma thu kisei chu janna vacha ham tobangbep ahi, hijeh chun ajing nilhah chun kaloiho koma kavahlen nilhah-in kalungset Evan, Ngamboi toh kakimuto ahile eimu chun kamaiso chu nidang toh bang ahilou jeh chun alung himon.
Ngamboi: Naocy tunilhah chu nalung lhaimo toh tave, nidang toh nabang hih beh-e.
Kei: He-u, mihem chu koiba phat jousea lunglhai diham na? Kipana nikho hi chomcha bou ahiye.
Ngamboi: Cy, ipi ham? Nalung lhai louna chu, kei het thei hilou ding dan hammo?
Kei: Hethei mama in nate he-u, jing kho hungvah le che ding kahitai, kagahtile kaloinu Vahboi chun
Ungamboi, tujan mama in jam taute, atilou le anu le apa janhi hunga ada sasa jingle apui diu ahite, anu khoh khoh toh, ahintin
Kei: Azzzz,, Bhainu, hochu seiji hih tango, phat jong alhing nai poi.
Ngamboi: Cy, kanao lungneo hihta Boi, jingle nache leu hapta kit tengle chabel kahinsol di ahitai, ima kingaisetna nei hih-in lang, lungmong selin chen.
Kei: Henge, he-u kache ding ahi, natah nasei khat hammo, chabel hindop dijong kei kum som le get bep kihia, tia jahcha tah-a kagah seile.
Vahboi: Bhainu, nakison lel hammo? Nang chapang jongle chun He-uNgamboi lenta hila imacha aboi umhih-e.
Ngamboi: Cy, chapang kisa jongle chun iba kilo ding ham? Henu hepa te akinop to poule keijong mun danga kaumvah ding ahitan kajinei nom na asot tai.
Kei: He-u ahinongle o, nasei bangin henu le hepa chu hapta kit teng nahinsol tei tei dihe tin kilhalel tah-in lhavah noiya katouvun ahi.
Ajingin kaloiho phabep’in lamkim gei eihung thah uvin, Ngamboiyin plastic vom khat’a kichun ipi ham khat eipen.
Cy, henu in nang chu gapen eitie, asunga chu lekhathot jong um hile kilom ahi, atin kanu le kapa in eihin phah masangu chun eipen ahi, eihin phah lhon phat’in kap pum pumin inlang kahin jon tan amaho jong akinungle tauvin ahi.
In kagalhun chun lunghelnan kadim jengin kamoh lhiso so jeng laitah-in Ngamboiyin plastic vom khat eipeh chu kageldoh-in guhthima kagah vet leh jatpon (Khamtang ponve) hoitah khat ahin lekhathot chu kalhamin kahin sim tai.
Chanu Naocy, ngai naumin lhahlel naum lheh jenge, hijongle che lou thei nahi tapon kigolou kiging louva che ding nahitah jeh-in kam chengin kahungsei man tapon, hiche ponve hi kahin kikhao khi nao ahitai, lungdang anagel tahih-in boinu, na-uNgamboi dinga gotsa nahitai, damselin
Kei Nanu, (Ngamboinu)
Tia kijih kamu chun kipanan kadimin, kanu in hiche chu anamu khel khel kit manin
Uipi ipi lekhathot nasimdol dol kit ham? Naji ding holsa kakoi ahitai, mi lekhathot sim sim tahih-in, navun tan leuvin najep’inge eihin tin kenjong Henu “KADEI CHU KILHEN NANGE” katileh……….
To be Continue
“SANGGA KEI LONLHIN LONG TANGE” Episode-V
Lunglut tah-a nasim chai jeh-in kakipah-e, asim jouse Pathenin phatthei naboh cheh-u hen, aban jingle anasim khom kit taute🖐……….
