“O, KAHINKHO”
Heart touching life Story
By: Naocy Haokip
(9957110489)
(3rd Episode)
(“HENU KEIJONG NACHA KAHI”)
Genthei le hahsa pumin changin hinkho kahin mang jingtan, nilhuma jouleiya kikonji nilhah le inn lhun le ann kihonthu kit ding twi kikhai thu ding, thinglhang kho chengte akihi jeh-in gancha tichu vohcha, ahcha, bong, uicha ho kavah ji ahin, hiche ho jouse vet toh katho jing chu jan choldo na phat jong kaneiji poi, ajeh chu jan le vocha-an kahonji ahin, bongpi le uicha chu louva kapuijin, ka ganchate chu keidin insungmi ahibepjin ahi.
Hapta khat jouvin nikhat louva kona kahunglhun khojin mit chip chep hin mi khat ahungin hitin ahung seiye
“Naocy, napaten jingle kahungtou diu ahin ngahmun chanin eihung ngah’uhen, atiuve, ahung tin ahi.
Kenjong aumden dinga kigo’u hilou hammo? Ipi dia jing nikho tah-a hungpot gou hitam? Tia kadoh leh
Aman, bandh ding hichula agamneiten phat tep louva bandh ding aphondoh jeh’uva janhi masa langa kona school jouse jong kikhah ahitai, atin
Kenjong, Ohhhh..! Bandh ding jeh-a chuba hungdoh gou hinte, chuti loule nehmoh hol’in hungpot pouvinte katin ahi.
Jing nikhoa gapui ding chu kagel le ka-engse tenin, kapui got nia hungnom lou chu gapui kit ponge tin kihet mo sah tah-in lou langa chedin kakigo tai, kot ho kagah kamtup chet le kanu sopinu chu ahung lhailut’in
Nuneo: “Naocy, nanute puija nache hitam kitia, tugeiya nakipat nailou onk? Cheloi loi tang ahung tin.
Kei: Nuneo, koi puisuh puitou nasei ham? Akipui got pet’a nomlou chu gavel pui angai tahih-e, kalou natoh akhoh toh, hung lhung jongleu eikithopi deh loudiu ahin hung nauvinte.
Nuneo: Uipi, nulepa thu ngailou, Nanu hunglhun teng nasei jouse kaseidoh thou thou ding ahi.
Kei: Haha, ipi ase kasei onk, adih kasei hichula, mi avoh leu ahat’a hat’u, ipi hiche nikhat lampi pou hung lhung lel sam diu ham? Hibanga hat’uva ahunglhun lel leu haitah tau, katin ka-eng paovin ahile alunghan dan chu kholai sung chun ahangtou peh jengin ahi.
Sun nilhuma kakigel leh kalainat na ding atam cheh cheh-in, ahunglhun diu jong kakikhoto joh joh jengin hinla kapa le naosen mukal ka-ngahlel lheh in ahi.
Nilhah in me ding ho kahol’in, vohcha-an kahol’in kalel set’in kahinpon inn kalhun konin insunga kanu le asopinu kihou sou let lut chu kagahja ngalin, keijong kipah lou thim, kilunghansah thimin insung kagalut le kapa chun bu anahonin kanu le asopinu chu kagahvet leh amitha kaobel bulin einave lhonin ahi.
Kenjong kapa chu kahouvin
Hepa itih a nahung lhunu hitam?
Kapa: Ajolang 5:00pm vel chu ahitai, nahung gei na-e, boinu.
Kei: Hititah a kilose tah-a katoh vanga imakham jong katongdoh ji hih-e, hepa
Kapa: Khohlou chu, jokham khama na toh ding ahi, tin kakihou lim lhonin ahile kanu chun
Kamin lhingset’in eihin kouvin
“Hoinunnem, (Semthu ahi) tuni ahungsuh dinga nakiseiya gamhoise lah nangaiya nahung lou hija onk?
Kei: Henu kahunglou vanga Kei sanga nahunglhun masat tah-u hila.
Kanu: Thu akisei le ngaidom dom tang, hoilang gam thilhapi khat nahia hil lou cha kiti chu nanghi nahi, jingkah a nanuneo nahouna ho jong najohsah le navun kalip ding ahi.
Kei: Haha, kavun nalip a naneh got ham? Henu kahungnom phat phat le hung nange, kakeng chu kathu thu nati chula tunia jong kei kenga hung hideh ngap lou, tin engse tah-in kadonbut in ahile kapa in eihin phoh in
Kapa: Boi, nanu chu jadom ji tango, mi athachol ding toh atin keijong ima kaseibe tapoi.
Jingkah matah in kathouvin naosen pon ho le amani von ho kagasop lhan, kahung lhunin an kahonin angai bangin lou vai kakon kit tai, kapa um jongle kanu atoule tou, adin le ding ahijeh chun eikithopi dehji pon ahi.
Khosung mi eihethem ho chun eilungset lheh jiuvin, hinla kanu le asopinu toh kihou thei jouse chun anop nop’in eihouse jiuvin houin kagakai ji jongle ki gospel sahnu, eitiuvin kakaida leh satanpi pou eitiuvin kanu hi an aneh kah le a ihmut sung bou inna umji ahin, adang chu aphat jouse kholai len nanbou amangin ahi, kholai alenna mun jousen eiseisen, eidemjin iti ham khat’a mi khat touvin kei eidemna chu agah nel kal thim jongle amuda kit ngal jengji ahi.
Mi phabep in jong aninghal jiuvin, kei komin nanu khu mi natoh asuboiji e, mi inna tou nilhum keiji, mi aseiset nilhumji khu phoh thip domin eiti jiuvin, kenjong keikoma nasei sanguvin ama komin jangpet’in seijiuvo, ajole mi khat touvin keiseiyin gaseikit intin keini kakinahlo lhon ding ahi, kanu thu kapa thu Kei komin seiji tahihvin katijin ahi.
Kanaosen’u (Sennu) chu khatvei kapom ding jong anomji pon keidin jong naopom na ding phat aumji poi, nilhah khat louva kona inn kalhun le kanu bou anaumin, kenjong
Henu, kanao la m?
Kanu: Na inao hija nahol hol ham?
Kei: Sennu, kanao hichula ama tailou nao dang kinei ngaplou.
Kanu: Najahcha lou chula kachanu kanao nahinti ngam ham?
Kei: Kiti dehta “HENU KEIJONG NACHA KAHI”
Kanu: Ka isunga peng nahia kacha nahi ham? Nang le kei ikimatna imacha aumpoi.
Kei: Kakap’in “HENU KEIJONG NACHA KAHI” Nang kanu nahi, kanao kon apom ham?
Kanu: Jum helou heno jong neiti ti hih-in, nalim lim toh nahingnu nanu akivuina akhun gakilai doh-in.
Hitia eihou phat chun kalhase val’in kakap’in ann jong nelouvin kaka ka nan kana ihmu tan ahi, nikhat hi area sunga youth conference umding ahin, khosunga nungah gollhang jouse la, lam kihil ding youth conference a jaosoh kei ding ahi atiuvin, kathanop dan danchu keijong ajing nikhoa pat la kihilna leh lam kihilna hoa jao ding chun kakigo tan ahi, nilhah in kapa komin kasei tai.
Kei: Hepa, youth conference a keijong kache tei tei dihe, kathanom val’e.
Kapa: Kahe hih-e, nanu komin kiseijo, kenla chen tijongleng sum kakoipon.
Kei: Mitlhi pumin Hepa, kanu koma kasei sanga nangkoma kasei chu phajo hilou ham? Veteh kaloiho khu apaten bazaar a von kichoh a asol gam tai, kei von ding jong kaseipoi, youth conference a bou kagajao nome
Kapa: Nache nom le nathu thu ahi, che-in
Kei: Kakipah val’e hepa katin kakichom leuvin ahi.
Nilhah in kaloihon choir uniform chu youth club in achoh ding ahin personal a sum tampi lut ding ahipoi, eima kimanchahna ding inei le che ding ahijenge atiuvin kakipah lheh jengin ahi.
Ahinla kinepna bangta louvin kanu in kapa toh kakinop tona thu ajah phat’in alunghangin
“Hoinunnem, hoimachan vahdoh thei hihveh ta chun, nache pou poule nakeng katan ding ahi, naphatlou lou toh nalim lim toh Nang hoija vahdoh kigo nahim? La kihil’a jong nache kit tahlou dichu, jummo hen hunin lang nangal ngal toh vah vah inlang hung gai tang, najonpi pasal ho la nang tobang bep atin aval vala eihou phat chun kalung ahung hangin
Itih-a koi toh kajon khah ham? Koitoh kajon khah m? Neijahda jongle aphabep’in thu kiseita chaga kahi mana hi paap neilouva neigel ham? Tin lhase tah-in kakap’in kalupna chunga chun hai theilouvin kakap kap jengtan ahi, kanu anadam hile o katiteng kalainat akibe chehjin alhem ding bei naosen kabangjin ahi.
“O, KAHINKHO” agenthei ding monga leiset’a hung peng kahi ham? Apen’a ana penglou hileng kanomji val’e, tin sun le jaanin lonlhi toh kakivop jingtan ahi.
Kaloiho acheniu chun kapotdoh ngam tapon kalupna bang window neocha kahongin guhthimin kap pumin kaven amaho vang smart thet thet’in akisem uvin, anu apateuvin khopam gei agathah-un, kaloi kagol ho umchan kavet le ochatnan kadimin “O, KAHINKHO” ana val’e, hiti ding bep’a chung Pathen laitan kahi hitam? Tin nitin kahinkho chu lhilonnan bou kamangtan ahi.
Nikhat lung kagel puma kanatoh pet sun nisa noiyin kalung ahung vai tan, kalu chu akipei jengin kho jong kamu thei tapon, hoija um kahi jong kahe tapoi, nisa noiya nachang phung khat chu kabelin alim noiya chun kalu chu kakisip’in nachang phunga chun kaki-ngaiyin sun nilhumin natong theilouvin kaumtan ahi, nilhah in imacha po talouvin kabeng keoseh kipoh-in inn kahinjon tai.
Nah changsal’in inn kalhungin kanatohna von jong khel louvin kalupna a chun kakijam den jengin ahi, kapa in ipi nati ham atin kadonbut tapoi, hichun kalu akhoiyin ipi lou eipeh ham jong kahepon kane pou pouvin, kapa in kanu koma chun
Boinu, khu ipi tiham? Adamlou hinte alel toh lheh e, atile
Kanu: Thasepi hija le kinat sah hikit nahta, alop lop toh khubang milop khu na jongle itoh kilommo diham? Alop in atha vah ding hija, tin gamtin ahin sei chu kaja ham hamin hinla kadonbut ngap tapoi.
Hitia kadammo jou nini ahitan, jingkah khat chu naosen chu matah-in akhangin kanu chu a imut theilou phat’in athoudoh-in mei jong tih lou nao akipoh-in mi mumu ding chun twibel akichoiyin nao pumin twi agadomin amu jouse koma chun uipi jingthoulou jingkah nilhah voh vah-a kavah vah nan kachol behseh e..! Ahiti sot sot leu eithadoh paidiu ahitai, mimu din apha pha bangin aumin insunga achalohna jouse eigot got tin agaseipeh-in, asopinun alupna a kon chun asam buchingin kailha tho tau hitobang numei chavai tin kholai mi het ding chun kitho thei tah-in eiseise jilhonin ahi.
Chutia ahin tilset be kitji jeh’uvin akihansah cheh cheh-in in ahunglhunin kalupnaa konin kasam buchingin eihung kailha tahbeh-in, keila katha him him aumpon, ipi pi chu eilo ham pao jong pao joulouvin thipbeh-in kathoh chaikeiyin ahi, akenga eipeh toh, muntheh a eijep toh hijongleh kam khatbeh-in jong kapao tapon ahi.
Khosung mi kadamlou thu hehon eihungvet’u jongle anoise dom domho chu alut sah jipon upa khat’in maicham ahung semin kanu le kapa chu nasatah-in themmo achanin hospital a puiyun tin sum sang khat (1000) apen ahileh kanu chun themchan nadingin sum agahol vel’in sang khat ma chu ahin hap’in ajingin khosunga gollhang hon ngahmun chan eihung thah uvin, kaloinu Hoinu chu toh hospital kanache lhonin ahi.
Kahung dam doh jep tan, inlang kahinjon kit lhon tai, kahung damdoh jouvin katha jong aumtheipon, kanao Sennu chu avahthei pan panin eingaidan chu kidang kasan ahi, donla kadon khapon insung khat’a kiumkhom vanga kanun katoh khah ding jong aphalji lou jeh-in kadeiya kalungset lheh vangin kadonbeh jipon ahi, hinla naocha chun kakeng amu jongle eikaa jin gahpom ding kati ji jongle kanu in kacha nang tohkhah din jong kaphal poi atijin keidin ahahsa lheh jin ahi.
Kahung oljep jep tan, louvai kakon pankit jitan ol ol’in katha umkham khamin na katongjin ahi.
Nilhah khat louva kona kahungle naosen kaa gin kagal jah-in, insung kalut le kanao chu ana haka lheh in, kenjong ka bengpoh ka-nga loiyin kanao chu kalhembi tan, Henu hoiya naum ham? Kanao akap kap’e katileh akisilpet dan anahin ahung potdoh doh-in eihin house ngal jengin naosen kaa chu ken kavoh danin ahin seiyin.
Uipi chavai, naosen chomkhat kadalhah kah-a jong ipi nanalo kit ham? Kathadoh ding nahim? Mithat ngam louva neigel ham? Neiki suh lunghang le kavautan ding eitin naosen chu asalhah tho got le naosen in kasangkhol atuhchah denin kalha vangin eikaa in kakhi abot tan lotan ahi, adasasa noi toh asuhto vangin naosen chun keibou eisangin kave jou mong mong pon kenjong naosen komin
Boi, noi chepva set’in lang ajoteng kapoh dichu o tin mitlhi pumin kaseiyin ahile, kanu chun najahcha lou hin thamkit tang nakhut katan ding ahi
Kei: Henu ipi lom lom kasuhkhel uma hibanga neimuda jeng hitam? Kasuhkhel aumjongle nei ngaidamo “HENU KEIJONG NACHA KAHI” tin kakap’in ahile
Kanu: Nang kacha nahipoi, kakomin um um hih-in, nalim lim jong kamit’in atholpoi, tin nao akipoh-in apotdoh tan ahi.
Kanu in eilungset hih jongle kapa in beh eilungset ding ham katileh kapa jong kanu lang akaijep jep jin, kei joh themmo tin cheng eihin chanjin kagel gel jileh hin ding jong kanom jipon, kalunggelin “O, KAHINKHO” hitia hin hin khulsin kanom jotai, chung Pathen kahinkho lamang jengtan, ka chunnu toh kimuto ka-ngahlel tai tin sunlejanin lonlhin kalongjin, chungto nisa ahungso a pat molpang alep gei lhilon nan kamang chaijitan, jansot samang jeng jong nomin kajal theijipoi. “O, KAHINKHO” kathoh chim valtai.
To be Continue
“KEI DING CHU KEN KILHEN NANGE”
Episode-IV
Note:
Nasim chai jeh-in kakipah-e, lunglut tah-a sim jouse Pathenin phatthei naboh cheh-u hen, aban jingle simkhom kit taute🖐……….
