“O, KAHINKHO”
Heart touching life Story
By: Naocy Haokip
(9957110489)
(2nd Episode)
(“HINKHO HAHSA”)
Kanu jong anaovop ahin lel cheh cheh tan, a-oi apoh cheh cheh leh akhoh cheh cheh-in, houpi ngamsanin jong aumji tapon, ahi chu kisei maileh naovop chu hahsa mong ahinai, hijongleh nupi jousen nao avop chehjin ama naovop bang koima aumpoi kitile seival hiponte.
Niseh le kadam poi atijiing jeh-in kapa chu lou kon talouvin niseh-in kanu chu aumpijin, lel lheh jongleng kahapan loule akitung gobet ding kahi jeh’uvin katha neisunin na katong jing tan ahi, nilhah le thing (fire wood) kahinpojin joulei lou gamlha tah tah ahijitoh kalel mama jengjin ahi.
Loujaova kakonpi ho chula nomtah-in akeuseh-in acheji tauvin keivang ganchate an ding jong kapoh loule pohlou hijeng, thing kapohda le kakeng kati a ann kahon dingin aumjin, genthei tah-in eipanpi ding ngaiyin na katongjin ahi.
Adang dang sanga na kasahpen chu ahileh gim tah-a naa kitong jia nilhah le ann neh ding itile me anaum jilou, abangle bu lhang khutphangte bep khat umji, chukit le jingkah le vaikon ding kihia kino tah-a ann le me kakihon ji ahin, twi kakhai dimset gancha umsun kavah le kakijo teng ann kaneh a lou lang kajot ji ahitai, kapot doh nungle kanunga atui tui akihon ji lhona lung-oi tah-a aneh ji lhon ahi.
Ann hi thakhat’a neh khom jing angaiye itile khoh cheh cheh-in aumji lhonin keijong nikhat kapa komin hitin kaseitai.
Kei: Hepa niseh a inna nauma hibang mi natoh kitet tho laiya nang eikithopi louva kachanga naa neitoh sah sah, veteh mihon lou akijo gam ahitai.
Kapa: Keijong kakinoa nanu damlou kidalha theilou, tin uh chet chot’in alu akhot’in.
Kei: Hepa, ipi lom loma damlou ham?
Kapa: Kahe hih-e, kating kakong anai ati chu.
Kei: Hepa, tingnat kongnat itile keiya jong ana-e, akinop sah mong hinte, natoh neikithopi tan tunia pat’in loukon louvin um tahih-o, min einuisat diuhe.
Kapa: Nilhah le kiseipeh pou pou le, atin thu tampi sei sei dijong ajole alunggel naval khante katin kathipsan tan ahi.
Nilhah ahiphat’in kapa in thing apon ken vohcha an ding le me ding ho kapon inn kahin jon lhon tai, lou agamlhat jeh-in 5:00pm a inlang ihinjot le 6;25-30pm hoa kilhungji ahi, che jong chu kino thimle kinga louva che ngai ahi.
Inn kagalhun lhon le mei jong tih lou, bu hon lou lupna a chun ham hol hol’in analumin, keijong kache lut’in “Henu, ipi nati ham? Naha dammo ham?” Tia alu kagah tham leh ahung lunghangin
Nahung thiden leu iti ham? Kon nakou lhona napacha lhona nahunglut kit lhon ham? Hibanga ki dammoa khohsah-a jong nei nei louvu,
Kei: Henu, chutin gel hih-o, natoh khoh behseh jenga mihon lou kijo gamta hijeh a chu akhoh dungjuiya na kitong ahiye, lunghang ji hih-o henu.
Kanu: Hitia neibol bol sanguvin neihung da doh uvin, nangho uicha bol ding kahipoi, neihungda leu chun kainkoten eikijen nauvinte, ahinti leh kapa chun hitin ahin seiye
Kapa: Numeiyin paoje ihet le pha hichu, koima adammo khalou umlou nanghi na leivol/nadup dehset’e, atipeh leh kanu lunghan dan chu alupnaa konin ahung thoudoh in kapa maichang chu amit sunkha deh deh-in akoh jap jap’in
“Ipi ham ase kasei, ipi chu kalei vol mong ham? Najahcha louva hibang kanaovop kalel toh nanop nop’a neihin hou nahlai” tin akisen jah jah jengin hichun kenjong kapa komin
“Hepa, mivet din jong amelse ngap’e thip taute, insunga hi kihoucham ding bou ahin, insah inlhang het’a kisenloi loi jeng hohi bolji poute, katileh kanu chun kot panga thing len beh lou khat kitung chun eihin vei ngal jengin hitin aseiye
Kanu: Hepa, hepa nati vanga kei neisei chu kahaipoi, mi lungthimse chapang chavai hingsot hih-in, tia avei toh atho phat chun kapa chun mol chu alah peh-in.
Lhainei, val behseh hih-o, asen atuija kona tuni chana hi kavoh khah lou ahin, nahin bol sot le nang chunga chu ding ahi, atileh
Kanu: Nahiti o jeh-a hi hiti phatlou nakihet em? Nakihet nomle einoise kidang ahi nang jah jah dinga apha asei vanga kato kalua eihou jing ahi, tin jouthu tamtah ahin seiyin, kanatoh kalel toh kagilkel toh mitlhi pumin ann kahon minin kapa toh kane lhonin jansot ahikit tah jeh-in kisil louvin ka ihmu tan ahi.
Jingkah matah-in kathouvin buleme kahon minin kapa komin hepa an netaute vaikon kageiji val’e katileh
Kapa: Boi, nangin nen lang ol olin na anatongin ken nanu kapuisuh ding ahi, janlhah chun sum bat dingin kahol’in sangsom kalan tuni le louina kapui ding ahi.
Kei: Hepa apha e, phaten hinjen damin lang hungdoh vah uvo, thakon na ding atamji toh kachanga na katoh le kamachal but hih-e.
Kapa: Henge kei gela chu tuni kapuisuh a jingle kavetsah ding akit le hungtou ding kati ahi, atin hitia umding chun kakigel lhauvin keijong kavaikon kit tai.
Hetding
(Kakhou hi thinglhang ahin, hospital jotna dia nikhat lampi jot ngai ahi, pasal hon vang pung thum (3hours) ho bou ajot jouvin nunao chapang dinga nikhat cheng lutji ahi)
Hiti chun kanu le kapa hospital ajon lhonin hinla kitepna bang talouvin hapta khat’in jong ahung kile lhon tapoi, phone a houpi dingla tulai banga mobile umlou ahin kalungkham lheh jengin amanin la athu ala ima eiseipeh lhon pon ahi.
Keijong natoh kalel lheh jeng tan, thingkal dingha louvat ding ha kalung boi lha jengin February lha kichai pai ding hita kanu le kapa hung kile talou hijeh chun bolthei bolmo umlouvin lou chu ka chuti vat tai, kakhosung mi eihethem ho chun eipahcha ji lheh-un, eilungset lheh jiuvin ahi, nikhat khat le mi khat le nin eihung kithopijin kajo na ding anailam tan ahi.
Nikhat khojin nunga inn kagalhun le kapa anaumin ann einahonpeh chu kakipadan dan chu kapa kakolin hepa kagil kel val’e, ann neinahonpeh kakipah val’e kayin akaa toh kakop jengin ahi.
Kapa anhon kanen nomtah-in kakicholin ahi, kapa koma
Kei: Hepa ipi dinga lhakhat val jengtaa nahungdoh louvu hitam?
Kapa: Nanu in naonei jou chan umpai dihe, kon hichan gam jotsuh jot tou ponte atin, hijeh-a chu kahin umpi ahitai.
Kei: Ahile tua ipi dia ba nahung doh ham hepa?
Kapa: Sum umlou jeh-a thing (ginger) ho chu nakal chaitah le tolsuh ding kati ahi, April lha le naonei ding ahin, sum le pai holkhom ngai ahitai.
Kei: Hepa, hichu ahinai, hijongle ka changa naa katoh a eikithopi ding umlou kanu jong chapang hitalouva umpipi jeng ngaitalou ahi hitia iumleu kon eivet diu ham? Keivang kalung amoh kham khame.
Kapa: Iba kilo ding ham Pathenin aphat phatnan hin gong maihen atin, kapa jonghi kanu lungthima lhamang jep jep ahitai.
Katohsa jouse chu sum le pai muna ding ahitan, bat jouse sahchai ahitan, hinla sum chu siki makhai beh jong kamaipha deh poi, hijongle dammo hahsatna chung ahin ima kasei nompon kahethemin ahi.
April lha kichai ding konin kanu naonei thu kajan kakipah lheh jengin ahi, naochu numei ahin mukal kangalel dan chu o, amahola hung mong mong talou, mi khat’in nanu in nao kaneitai sum umlou jeh-in kimanchah aboiye sum hinthot’in atie, ahung tin, kalungthima chun keihi sumphung kahi hi o, mu ding jouse nang ho khut’a hunglut chaita hoiya sum kalah ding ham? Ti jeng ding chu kanomin hinla ahung seipa koma sei jeng ding chu kanop lou jeh-in hitin kaseipeh-e.
Ohh..! Damsela nao aneileu kipaum val’e, kanao chu kamunom tave, umhih jongle kanao toh kanu le kapa dama ahungdoh nadin sum holpeh nange, hinla tuni hilou haptakit langle bou kathot thei dihe, tin kaseipeh-in ahi.
Hiti chun kapate sum thot ding deina jal chun bazaar a thing (ginger) kapojin niseh-in kathah jingin nikhat le atampenin 36/37kg ho kalu’ah kapojin niseh-a kathah jing jeh chun kalu jong amon go leutan achainapen nikho chun 40kg kapon kathi vangin ahi.
Ka sum lodoh kham kham chu kipah tah-in kathot tan ahi, hinla hiche chunga jong chun ahungdeh kit pouvin lou natoh la khoh cheh cheh jengta, ajonan kapa chunga chun kahung lhase pan tan ahi.
Ahungdoh lou mong phat uvin nao aneoijouvu lhani val achephat’in bahara dingin thing chu kapo kit’in kapate kimupi din kachetan ahi, kagalhun chun kanu le naosen ana ihmu lhonin kapa chun von ho anasop’in ahi, kahet lou vanga chu in bahara akilah uva umden dinga kigodan anahiu ahi, kapan eimu chun akiphalam lheh jengin eihin houvin
Kapa: Boi, ipi ngaitoa nahung suh hitam?
Kei: Nangho pui tou dinga kahung ahe, nahung diu hibanga ki-ngahlel’a ipi bol’a nahung louvu ham?
Kapa: Nanu in lamjot ding kalungjo poi atia le kahung louvu ahiye, tin kiphalam tah-in twi don ding eipen kenjong kadonin naosen chu kamu nom val jeh chun kanai pheiyin pon kikhu chu kahoh doh-in
Boi, nadam hinam? Kanaochu ahoi tave, boi mukal ka-ngalel dan chu o tia kapomdoh got le kanu chun
Pom hih-in, na ulsa puma naosen chun alel ding ahi, ahin tin chu phat’in kakhoi loh tapoi.
Hichun kanu koma henu, tuni mama a kile dinga kahung ahin, kigo uvo che tou taute, gari jong kalah ahitai, kagah tile chapa kahe amit kao let lut’a eivet toh, asam bah the thu toh eine le kilom leuvin eisen jah jah jengin
Nanop le kiche tou tango, Kei kenga che ding ham? Uipi, natoh akhoh e natia sudo a vahle le nahim? Natouna a chun nalhomat den inge, tumaman chetou ta kahung d phat chu nangsei di ipi apankai umem! Tin kasam buchingin eimanin inpolanga chun eihin kaidoh in kol le vai lah-a chun mit neilou mai neilou bangin eihouse jah jah jengin ahi.
Kajahcha behseh jengin kamai kakisip’in kakap’in
Henu, kajahcha val’e hiti behseh in neibol hih-o, ken nangho ka-ngaival jeh le iumkhom diu kadei jeh-a hahsa pum puma hichan gama hung kahibouve, katile
Kiche tou tang natoh dinga lom bon kitoh joulouva kinopsah tah-a navale le ham? Kanop phat phat leu hungtou naveh tauvang, eitin insung alut’in kot akam tan ahi.
Kalungnat toh kajachat toh kalel toh asat toh, keijong kakile ding phat’in kapa komin
Hepa, kasei ho eina ngaipeh le chun tunia hi ikikhen lou ding ahiye, hepa nangin nei ngai tahih jongle chun kahin ngaiji val’e, phat jousen nakoma um kanome hepa, na angsung tah-a kathohna jong namu jinge, ole neilungset tahlou ham? “O, KAHINKHO kilejou lou ding hitam?katin othongjejun kakap’in gari kakilah-in kachangin inlang kahin jon kit tan ahi.
Lampi chu gamlha matah ahijeh-in kenga jan khothim noiya ka changa kache chu kagelle kakichat kom aumjin, light la kakichoipon, numei ihina kah-a kilhonpi ding beh umlou, kathom hao lheh jengin, kho ijat ham kajot galkai tan kho khat kaphah kit ding chujou tengle bou keiho kho kalhun bep ding ahin, gamlah noiho chu lhavah noiya kiche ahin athimlai aumjin kalung ahungneojin kakicha lheh jengin, nungche ding jong gamlha mache ding jong gamlha lamkim lai ti ding hintin kagil kel toh katha bei toh, kaka pum pumin “O, KAHINKHO,” hitia hing ding bep’a leiset’a anapeng kahim? Hepa nang selungmol jeh-in nacha kei lung ngapna ding neilouvin jan khothim noiyin lonlhin kalonge, naki-oi sam e, katileh kalha asecheh cheh-in, Hepa kanu jong nachunga lung-oi sam ponte, tunin nacha kei khankho geldoh tahih jongle chun nikho khat le keidin kipana kolni hungsoh tei nante, katin kathi le kathi kahin le kahin tin kino thimin jan muthim noiya chun inn kahin jonin ahi.
Kaphahna kho chu kalhunin geden ding katileh jan sot nung 10:00pm lang ahitan, natoh khohlai ahitoh mi ana ihmu gam tan kicha pum pumin kache peh-in 11:47pm in inn kalhungin kaleldan dan chu kavon kakikhelin gilkel pumin ka choldo ham hamin ahi.
“O, KAHINKHO” kile loiyo sangga kei din lungnopna kolni hungsoh loihen.
To be Continue
“HENU KEIJONG NACHA KAHI” Episode-III
Note:
Nasim chai jeh-in kakipah-e, lunglut tah-a sim jouse Pathenin phatthei naboh cheh-u hen, aban jingle simkhom kit taute🖐……….
