NUNGAH KAHI TAPOI

Life Story

By: Naocy Haokip (9957110489)

(Part-I)

---

Hiche Life story hi fiction ham! Ole real life story ham tihi abul a pat achaina chan simhon bou ihet diu ahiye, ajeh chu story kichaina a bou kiphongdoh ding ahiye. Chule story kijih sunga min, khomin, gam min, kitiho hi semthu le atah jong um ahin inahetthem diuvin ikitem uve_

Simpan taute,,,!

Keihi ka-U pasal khat aumin kapa toh chule kaneuva pat kakivoppi kaloinu toh insung khat’a kahung cheng khom uvin, kaloinu hi kakigol lhon jeng vangin ka-Upa chate langjoh ahitan, kapa dinga apalen chapa tute chu ahitan, gol khat’a kakivop jilhon vangin aman heni tin eikoujin ahi.
Hinla heni eiti ji chu kajahda ji lheh in hijeh chun kanitah lhonin “BURI” tin bou kakikou to jilhonin ahi.
Aneu laiya kona kapa hin keitoh einavah khom ahi jeh-in kakingai mama jeng lhonin, kapa le kaupa injong eingailutna lhon akibangin ahi.
Ka-Upa hi sepoy pang ahin kapa in lekha anasim sah-a, class-XII ajoa sepoy ana kivea sepoy ahung panna kum khat bep hinalai anahi.
Kei le kaloinu Chingboi jong high school simlai kahung hilhon tan, kapa hi primary teacher pension ahin, lhalo alhom lheh vangin Kei kadampet beh in Kei mina nakichin lhon ding tin “Activa” Khat eichohpeh lhonin hichu keinin school chenan kamang jilhonin ahi.
Ka-Upa Gigin vang lhalo aneitah vangin atam naipon, amukham kham ahin homkhen jin, inlanga thilkhoh tah tah ho in kamang pha jing thouvun ahi, kapa chu in ngah le invela melei neocha cha aboljin kaloinu toh keini nunghe nan amathah den jitan, keini pichu kapum lhon alet tah vanga chapang banga ngolthet thut a umjeng ji kahi lhon nahlai ahi.
Kahlah le akina bangin khacheh chuh in kakihou ji lhonin, akina ham tia eigel jilhon jongle kanuikit ji lhonin, chapang khat’in anu koma henu hiche teni hi akina ham iti jongle anuikit lhonin, akidai ham katile akidel kit lhonin ipi ti dan ham? Tin lungdong tah-in anu ana dongjin ahi.
Phat le nikho ahung chal dungjuiyin kaloinu toh keijong HSLC 1st exam bol ding chu ahung naitan, school kache lhon jongle keini kakilhon poule koi chu koiham tibeh jong kahepha jilhon pon ahi.
Exam naitah jeh chun janle lekha sot tah tah kasim ji lhonin, ahe masa ding kakichu ji lhonin, abangle kahung kidel kit ji lhonin, jingkah teng kathou lel lheh jeng ji lhonin kapa in jingkah le anneh dikon le eithou thu ji lhonin, anneh joule school jotna din jong gari drive ding kahung kichu kit ji lhonin kidelna chu kachai thou thou ji lhonin ahi.
Chutia insunga kingolsah tah a kaum ji lhon vangin out side lang ahiteng ching thei tah in hinkho kamang ji lhon nai, an kaneh lhon jongle kong khat’a pang khoma akidai le kinah toh thoa an kaneh ji lhon ahin, jan jongle geh khoma lupna chung pon jouse anot deh kahse a kidel khopset’a ihmu ji kahi lhone.
Nikhat jong kikhen kang theilou ahivanga kaum khom lhonle kicham khalou tichu kahi lhon mai ahi.
Nikhat ka-Upa suty hungpot dingthu kapan eihil lhonin, kakipah lheh jeng lhonin, nilhah in airport langa kapa toh kathum uvin ka-Upa puiyin kacheuvin nehthei kadu jat jat lhon kakineh vaset lhonin, ka-Upa chun nalop lhondan pihi koichan navah jou lhon ding ham? Tipouvin eidai lhonin ahi.
Ka-Upa umsungin a phone chu kachansah man lhon tapon YouTube kave ji lhonin phone ahin thum teng kaselpeh kit ji lhonin, abangle avonho pou kasel lhon toh kahlah le aneh ding an lhomcha kathuhpeh ji lhonin adangse kaselpeh ji lhonin engse tah-in kabol ji lhonin ahivangin alunghang ngaipon amanjong ka key lhon ahet phat’in school kache kah lhon jongle eina ngahlel keiji lhonin ahi.
Ka-U in phatea exam boldin eihaseipeh lheh ji lhonin keini jong kaki songlel deh lhon pon, hiti chun 1st exam chu ka-Upa umsungin kahin chaidoh lhontan ka-U in 1st a pass pen pen von hoitah kachoh peh ding ahi, atin keini kanom lhonpon mobile joh kakisei lhonle aman jong 1st mu dinga eigel lhon lou hintin ahung nom taget e, hiti chun results out ding chu kangah lel lhon valtan, niseh le results holin kamathah ji lhonin ahi.
Results kangalel jing laitah uvin ka-Upa suty ahung kichai kit tan, jingle che ding ahitah jeh chun results out teng 1st namu lhonle phone man d kahin thot lhon ding ahi, hijongle final a jong 1st namutei tei lhon ding ahi atin, keini jong kisonglel lou helin henge kati ngam lhonin ahi. Hichun kapa in maicham asemin kaugin le kei kaloinu chunga khut angamin taona eimanpeh uvin, ajingin kapa in ka-U airport a agathah in, keini vang school kache lhon jeh-in inmuna kaki vailhah tauvin ahi.
Het thei khat chu Kaloinu Chingboi toh keihi jouva kichem kahi lhon pon, kasei lhon molso tei tei chu kahi lhon jeh-in ka-U le kapa in tahsan tah-in eikinep pi lhonin ahi, hiti chun 1st exam na results ahung out tan, kaga kivet lhonle kani lhonin 1st kahin mu lhonin subject thum cheh-in jong letters mark kajih doh gel lhonin ahi, ka-U koma kasei lhon leh akipadan chu o chuin ka-U in sum eihin thot lhonin phone khat cheh chu kakichoh lhon tan, kapa le ka-U in ka phone choi lhon chun ka lekhasim lhon asuhboi ding ham tin jingkah nilhah in eihil jing lhonin hijongle keinin vang lekhasim jong masanga bangin pontah in kasim jing lhonin ahi.

*DONGMA KAHIN NEIPAN LHON*

Ka school kai khompi class mate ho chun eina otcha ji lheh-un, keinin vang kana hepha ji lhonpon ahi, kaloinu chu Jacob kiti khat’in anajol in ana kingai lhontan, akingai lhon jou nini jouvin eiseipeh bep in, keijong lunghang kisan napu le napaneo koma kaseidoh di he dongma nanei katile, nasei dohle kadalhah di nahe, eikiti peh nopselin adongmapa chu amel hoilou vangin mipha ahijeh chun keijong eingam sungin, school sunga chun kathum uvin kakivop jiuvin ahi, nikhat inna ahung nomdan aseiyin kenjong ahung nomle pui tango, katipeh le kaumnau kigamlhat jeh chun uniform pumin kanung lhon ahinjuiyin, nanu napate lungdong lou diham? Tia kadoh leh akhoh hih e, classmates hinan kikilep tante, ati phat chun inna kapui lhontan ahi, nilhah 5:00 pm ahitan an kaneh sah lhonin, gathah ding kati lhonle garineo khat’a mithum kipoh ding ahitheilou jeh chun, kenjong “BURI” kihoulim toh gomin nang gathah to katile, Jacob anomkit pon, main road chan kengin kagathah lhonin auto in achepai tan, keini jong kahung kile lhontai.
Ajingin school gate in eina ngah lhonin, kalut khom uvin, kakivop thei lheh uvin loi dangho chun ei otcha lheh jiuvin, keiho vang chu koima otcha louhelin kakivop jiuvin ahi.
Ka school uva chun college student khat’in eina velhi jingin, letter luck lai ana hile letter eipeh ding ahin, mobile khang ahi phat chun miho koma ka number anahol le le jin, Kei koma la thum ngamlou mi kahoupi beh jilou jeh chun akiletsah danin eina gel jiuvin ahi, hijongle akiletsah chu kahipon kajaset jeh le, mi kamtam kahilou jeh joh chu ahi.
Nikhat hichepa chu kakomin ahungin, Hello Sister, eihung tin kenjong Ipi thu hammo? Eimi nahile eipaova kihou di ahijenge, ipi jat dang hijat lah a paochom gah kitho khoh ding ham? Tia ka donbut le amai chu kaikong minsa bangin asanlha jengin, chuphat’in.
Ohhh,,, namin ipi na? Tin nemheu chan ahin seiyin
Kenjong: Ehhh,, kamin Naocy ahiye, nangla katileh
Keimin: Luncha ahiye ahile kum ijat nahi taimo? Tin eidong kit’in.
Kei: Kakum som le gup ahitaiye, katile ohhh,, na chapang tave Kei somni le gup kahi te, nao thil khat kathum noma kahung hichu o, nagel thei ding ham atin, kenjong nathum ding helouva kagel thei kagel mo ding iti kasei ding hita? Tia ka donbut leh..
Nao, na phone number eipe tango atin, kenjong ole tin kape tai.
Nilhah chun call eihin bolin chomkhat kakihou lhon le line hoilou jeh-in, kathapeh tan ahi, aman message ahinthot in,
“Nao, jingle kimaito in kihoulim taite aw,, thanks for pickup👍, ahin tin ka reply deh tapoi.
Ajingin half pet’in kakoma ahungin “Nao, nakoma kaseinom um hichu o,, atin kenjong ipi thu lom lom hija katileh,
“Nao, kamua nia pat kahin vechim theipon, lungsetna sangpen kahin chan nahitai, hinla kisonlel naho jeh-in kana seingam pon, tunin vang kisonlel na jouse pam koiyin nakoma kahung tauve, lungset’in neigel thempeh o na? ahin ti chun Vokarah,, kamai asanlha jengin houje kahe tapon ahi.
Ajeh chu eijol masapen jong ahin, kamchenga ahin seikit jeh chun kajachat toh, kakichat toh kati akithingin kajamdoh tho tan ahi.
Hiche nikhoa pat chun Luncha chu kamu ngam tapon, gal a pat kamu jongle kajam jitan, a phone number ka block peh in hou ngamlouvin kaumlo tan ahi.
Amanvang eihol le le jin, keivang ajonan school jong kache ngam tapon, kaloinu jong alungdongin adamlouvin kilep in school nini kache tapon ahile, kapa in nadam loule hospital in che hite atin, jou kasei theilou phat chun thil umdan hochu kaseipeh in ngaidam joh kathum tan ahi.
Hichun kapa in, boinu nungah lhing hinai hih jongle chun gollhang in nungah ajol ding mong ahi, tin thu tampi eihil’in hijongle Luncha vang ka melma phatah asohlo tan ahi.
Lha thum jouvin amanjong eijol tapon eimu jongle eihou ji tapoi, hichun kahung ngamdom tan school kai jong anomdom kit tan ahi.
Dongma neikha lou mi eijol umkhalou eihin jol masapen ahijeh chun iti kagel ham kakichat tho jeng ana hi.
Hslc final ahung naitan kaloinu toh coaching class kache ji lhonin exam a all subject a letter mark jih doh hite kakiti lhonin kihambol tah-in lekha kasim ji lhonin, exam jo kahsea din phone jong kapa kakoitup sah lhonin ahi, kapa in katoh lhon jouse kitah tah a kabol ji lhon jeh chun eikipapi keu hilou eikinep pilheh ji lhonin ahi.
Nikhat kaloinu toh Jacob toh school compound sunga thingphung noiya lekha kavet vet pet uvin kaloinu chun “Buri, nehthei duchat ume, hungo icecream gakilah ute, nisa sat toh ahintin, ken nangni gache lhono kei anaum tange, katile amani jong ache lhontai, ahung gei thim lhon phat’in gal’a pat kavet vet le icecream kijohna a chun pasal khat toh akihou lim uchu kagah mun, keilang ahinve jap jap jiuvin gah kou dingla agamlhat jeh chun thipbeh in kangah in ahile chomkhat set jouvin ahung phei uvin, pasal dang khat ahin kilhonpi lhonin ahi.
Kakom ahunglhun phat uvin lung nommo kisan kahouda leh, pasal khatpa chun.
“Naocy, nalunghang hammo.. Nungah kilunghang ngailou chu, hi o icecream kahin choh peh e, ahin tin keijong ama velouvin kaloinu chu kaven, hiche icecream cho ding jong chu selthat ding banga ipi nahin bol den onk..! Naum chan jom hih ta, tin lunghang tah a ka houset leh, khatpa chun.
“Naocy, lunghang hih o, kei jeh ahi, kei kamin ahile Haopu ahin, hilai school kahunglut na lha thum valbep ahi nalaiye, hijeh a chu thudoh tampi kabol le hung vaigei ahi atin, icecream chu eipen kenjong hiche koi choh hija..? Koi suma nachoh uham katile keichoh ahiye, lungset tah in kilah o, atin kenjong ka bag a Rs 50/= chu kaladoh in icecream chu kakilah in sum chu kapeh le lung nommo akisan hiche aman pen tin kahinpe hih e, tin eidalha jengin chuphat in, kin tah in kakipat doh in, ahipoi Haopu lunghang hih o, kakiphatlam jeh ahibouve katile kalunghang poiye, nangba naha lunghan val’a atin ahung nuiyin, kihet masat pen ni hijongle loithah khat toh nuikhom masat ni ahijeh chun Haopu chu kavet nom lheh in ahi.
Hiti chun mithum kivop a konin mi li kahi tauvin jingkah le school lhung masasa gate a kakingah to jiuvin, ajonan loicha kingaitah kahung hidoh tauvin, school kikhen a inlang jot d teng jongle kilha lel tah-in kakikhen ji tauvin ahi.
Keile kaloinu kaumkhom jing lhon vangin, pasal teni umna vang mun chom cheh ahin, school inn a konin jong agamlha lheh in ahi, amani vang school bus a hung ji ahilhonin keini chu school gamlha jongle keini gari a che ji kahi lhon jeh-in kaboi ji lhonpon ahi.
Hslc final exam ahung naitan nikho somni ham bou aumphat chun lekhasim kakihabol lheh jiuvin, pasal tenin numei teni vang lekha athem lhon valin nangni sanga mark mutam din kinepna aumhih e, ati ji lhonin, keinin jong kihambol tah a pangute, keini lunggela hi all subject a letter mark mu d katup lhone, nangni jong hatah in hung pang lhono tin katem ji lhonin, nidang sangin akihambol jep lhonin kahe lhonin ahi.
Exam ahung hitan Hslc final chu board a exam kahin bol uvin, boilou helin kahin chai tauvin ahi, exam chaini chun Haopu le Jacob toh hotel a katouvun akhoh le college join hi munchom cheh hung hi ding ahitan, hijeh chun hoilai college join a pha ham tiho kaki houlim uvin nilhah lang ahi phat chun kilhalel tah in kahung kikhen tauvin, phone number kakipeto uvin ahi.
Hiche nia pat chun result out kahsen kimuto talouvin phone in kakihou mat tho ji tauvin ahi.
Nikhat Haopu in video call eihin bolin kabon chauvin kakihou khom kit uvin ahile Haopu chun phone ahin that in, kenjong ipi da natha jeng hammo? Tia message kathot leh ki text tho hite “Cy, phatsot a kon lunggel sei ding kati ahitan, ajole loilegol hina tan khante ti kagelin, chule exam sunga kahin suhboi nomlou jeh chun phat sotpi kahin tep chon jinge, tunia kasei loule phat dang um talou ahijeh chun hin sei jeng inge, Cy, kamunia pat kahin lungset nahitai, hijongle hou jong kana hou ngampon, phat sotpi genthei kana thoh e, neina ki friendship jong kakipah e, nanga din friendship ana hijongleng keiya din kalung laiya pah jing lungset dihtah chu nahitai, hijeh chun kalungsetna cheng apilhing tai, nanga dia lhinglel ahile vang kahepon, kalungsetna neisanpeh di kinemin kangah jinge.
Tin whatsApp a message ahinthot in, ka reply jeng theipon kakivop sung uva eina khohsah jiho danle aumchan ahoulimna hoa konin eilungset ahichu kana hetan, hijongle aseidoh nomlou ahichu kana hetsa ahitai.
Hitia message ka reply vahlou phat chun khat ahinthot kit’in.
Cy, nalunghang kit hita, ahijongle iba kilo ding ham na..! Lungguh a kachanga kapoh jing sanga nakoma kapohgih kaselhah a kachung ajan dom jongle kakipana ahimaiye, nagel theilou jongle kam khat beh hin donbut tango….! Ahin tin, kenjong…
Uhaopu, naseidoh masanga neilungset hi naumchan hoa kanahet soh ahitaiye, hijongle phat chomkhat hung kingaito inge, kakingaito na ding phat sung chu result out masangse hi hitante, result ahung out tengle kakigel lhahna pen chu ase hihen apha hijongle hin hetsah ding kahi, kahung kigel lhahna pen chu kipana hihih jongle lhase hih inlang nakipana theiya kahung kigel lhah jongle apha ahijenge na…?
Tin ka reply in ahile, ipi khoh ding ham Cy, hibang loma nang ngaina a genthei kithoh a, lhisona a neihin le jongle nangma ki oi thu hitan tin, kisan ding ahimaiye, hinla hiche kahlah sunga jong neinol hih beh o, masang bangin friendship in neihin gel jingo na..🙏
Ati’n kenjong henge Uhaopu, kahin gel jinge,” Tin kadon but’in result out na ding nikho chu kangah lel cheh tauvin ahi, kaloinu teni vang chu akah le si le bal abang jilhonin akah le ui le kel abangkit lhonin, akihou loule umthei lhon lou, akihou pou pou le kinah bou hikit jeng hitichun akingaival lhon jeh ham chun kitoh theilouvin chapang bangin aumji lhonin ahi.
Kinem tah a kangalel jingu result ahung out tan, kali uvin top rank kahi cheh uvin kaloinu toh kei chu kasang jep lhonin ahi, kakipah thei lheh jeng uvin, kaugin injong phone a pachatna thu ahin seiyin, kadei lhon kichohna din sum sang nga cheh eithot lhonin, kapa in bazaar a sa agachon maicham eisempeh lhonin, phatthei eiboh lhonin ahi.
Result out jou ni thum jouvin Haopu in eihin call in, Cy, result out ahitan kakipana ding hihen kaka na ding hijongle nalunggel kangah jing nalaiye ahin tin, kenjong phone ka that in ki text hite, tin hiti hin message kathot tan ahi.
Uhaopu,
Neilungset jeh-in kakipah e, lungset chan din jong kalompoi, genthei chaga kahin, hichana neihin lungset hi kakipah in, kidang jong kasa e, Uhaopu kalungset neitile ibola kalungset da ding ham? Neilungsetna sangjoa kahin lungset nahi, hinla ajole nadinga lhinglel kahikhah ding ham tin kalaidip adap e, loikhat a iumkhom jing sung uvin jong kahin lungset nahi tai, nei lungset le alhinglel alhingjou aumpoi, damsunga din nei lungsetna kasange, ka genthei nading vang hingel hih o ka first love nahi,
Tin kathot in ahile akipah valin alhi anap akai leuvin ahi, 😂
Chuin
Cy, ka exam bol kalolhin jong nangjal ahin, tukum hi keidia kipana kum ahitaiye, tulha sunga kakipana sanga sangjon kakipah kha hih laiye, kalungset pen nang genthei sah ponge, nadinga gonoi meinoi hijongle pal banga kisong jingdin kahin lungset e, kahinkho phal ngama kahin lungset nahi, boi.
Tin lungset khaogui jamchu abul kaphutdet chet lhontan ahi.
Niseh in kakihou jing lhonin, mabana college khat join khom tei ding tin kasei khom ji lhonin, kaki lungset lhon jeh chun hinkho chu anomchom lheh jeng tan ahi.

NUNGAH KAHI TAPOI (Part-1) hichan hin kichaisah tau hite, lunglut tah a simchai jouse chunga kakipah e, thusim chung changa lunggel le ngaidan nanei le nahin sei thei ahi, asim jouse Pathenin phatthei naboh cheh uhen._

Part-2
*HINKHO HAHSAT HUNG KIPAT*