NUNGAH KAHI TAPOI

Life Story

By: Naocy Haokip (9957110489)

(~Part-VIII)

Recap: Tia kasei toh aka toh atao toh katho phat’in amaho jong akipah uvin hijeh chun hapta kit sunga married bolpeh din ei phatsah peh tauvin ahi.

Hiti chun cha nei nung hita jongle kichenna kin’a din phatah in kigot tupna kanei tauvin, anikho hung lhung ding koncha ahitai, lhunkimni ahung hitan mipi chu atamlheh jengin hiche ni chun Kauboilen’in hitin aseiyin.

Boilen: Keinao, mi het din “NUNGAH NAHI TAPOI” hijongle keidin nungah thengsel ho sangin naman tamjo e, ka nunlui eina bol genthei tah mikhat aumin hung ding ahi, kakouve, hijeh chun hichenu mu din ama ima ahilou dan akihetdoh nadin tunin ahoi theipenin hung kijem tem’o, makeup jong nagel khoh jipon, tunin mini kahin kouvin amani chu nakijep hoisah tei ding ahi o..?
Kei: Heuboilen, kahoimo toh tave nasei dan chu..! Ole kigom nailouva nakisih hitam?
Boilen: Keinao, kalungsetpen, hiti chu hilouvin kasei dan chu gah mantoh jeng tango.
Kei: Heuboilen, nalung lhaina ding ahipoule mit tungke leuvin hung kisem nange.
Boilen: Khohlou nakisem poule, Keinao nang ahoisa nahinai hijongle ka nunlui nu mu dinga ama suhjum kanop ahibouve, eibolna kalhase val ahi.
Kei: Einin koi kisuh jum jou poite, nungah beh kihile pha dinga..!
Boilen: Boinu keidia itih a jong kalung sunga nungah nahi jinge,
Tin kidai le kihoulim kakop lhonin ahi.

Kichen nikho golvah ni

Kichen nikho golvah ni ahung hitan, keijong ahoi theipenin kakisemin mouvon thahlih leh Kauboilen’in eichoh peh chu kivonin ka-Ugin in eituh in mipi masanga katou tan, mipi chu atam lheh jengin stage chunga konin among lang akimupha nai pon ahi, hichun katehpu ahung houlimin hitin aseiye

Tunia hung kikhom sopi ulenao teho jouse chungin kakipah e, ka chateni hi akichengsa chanu melhoitah Margaret jong ahing lhon tan,kum thum lhing ahitai, hijongle tunia married kibol hi ipi jeh ham? Pathen janggop lou chu kicheng theilou ahi, kamounu Naocy hi “NUNGAH AHI TAPOI” hijongle Pathen janggop mong hinaa tunia hi kichenna kintheng kachapa Boilen toh kabolpeh ahitai, akichengsa hijongleu kamounu tahsa dammo jeh-a kintheng ana kigong doh louva chanei nung hijongle kintheng kajon’u ahi, tin thu tampi aseiyin ahi.

Chule ahung kikhom mipi houlim hon jong Nungah kahi tia asunga la nupi, nuthoi hisa mi hijat lah a “NUNGAH KAHI TAPOI” tia mi kitup tahle mi kitah mounu a nakisem khah u avangphajo nahiuve, tin kipathu le thilpeh tampi eipeuvin ahi.

Inlang kajot diu phat’in Ka-Ugin in phatthei eiboh uvin,
Ka-Ugin: Kanao deitah Boinu, nakeng neinan Pathenin phatthei boh hung changin lang, Israel insung tungdoh teni Leah le Rachel bangin Pathenin cha le nao hin thalhin sah-in.
Tin phatthei eiboh uvin maicham asemin keiho jong kipah tah-in inlang kahin jon tauve.

Masanga ka gentheina ho kageldoh

Katehpi le katehpu ahin Kauboilen ahin masanga sangin eingailu be cheh uvin, ka genthei ding him him aphal pouvin kalung himona din jong kamse khat jong akeh kha pouvin kahinkho chu kagel leh masanga ka gentheina ho kageldoh teng lainat lhasetnan kadimjin hinla Pathenin hibanga eingailua eikhoto ding mi gonpehsa eikoipeh jeh-a hichan genthei le lengvai hin thoh kahijoi, tin masanga kagentheina ho kagel le tunvang avat aum tapoi katin ahi.

Kauboilen office a natong ahi ji jeh chun, sun le katehpin kachanu Margaret adonjin katehpu jong office a natong ma ahikit’in kei chu sun le Kauboilen office a bu kagathah peh jin ahi, nikhat hitia bu thah dinga kache got chun katehpi jong mun choma mithina a thigal ding ahin, bazaar chan kakilhon uvin, kei le ka chanu Margaret bazaar in kakum lhonin katehpi chu achepai tan ahi, Kauboilen in kei kahung ding ahin bazaar in eina ngah lhonin ati jeh chun restaurant maiya katou lhonin kangah lhon tan ahi, hitia katou pet chun nungah han thim khat ahungin eihin houvin

Nungah: Hiii, Naocy nahi hilou ham na?
Kei: Ummm kahiye, ipi ti ham?
Nungah: Naocy, nao nakoma chu koi nao hita..?
Kei: Kei chanu ahiye.
Nungah: Amin ipi ham na chanu chu…!
Kei: Api le apun deichomin Margaret akisah lhone.
Nungah: Koi hita api le apu chu..!
Kei: Katehpi le katehpu la.
Nungah: Naocy na phone khatvei neiman sah temo..!
Kei: Ipi ding nati hammo? Tin phone chu kapetai, chuin ama phone chu a call in eihin lepeh tan ahi
Nungah: Naocy, najipa Haopu chu lhamasa chun ahungdoh in nahol hol jenge, hijeh a chu na number kalah ahi.
Kei: Ipi dinga hitia chu kisa nahi ham? Ipi ding tia tua eihol nahlai ham? “NUNGAH KAHI TAPOI” eihin hol hol da tahen.
Nungah: Cy, natehpin achapa aha tilset dan khu o, nangjoh chu miphalou danin nasei jingin, nachanu Margaret jonghi kholai miho cha ahibouve ati peh jie.
Kei: Hiche phat chesa ho chu sei sei lou ding ahitai, tin ka mitlhi kakitheh in kachanu kakipomin kadalha tan ahi.

Haopu in eihin call

Hiche nilhah jan 8;30pm velin number keu khat’in call ahung hung jengin, kagah pickup leh Haopu chu ana hitai, a awso injong kahe jengin ahi.
Haopu: Hello, ipi dinga hijatvei ki call a na pickup lou ham?
Kei: Kaboiye, neihin call kit tahih-in.
Haopu: Koi kahi neihet m?
Kei: Kahet vangin kahe e kati nompon, kahin hekha poi, nang koi nahi ham?
Haopu: Cy, nasenji kei neimil jeng vang nakidange na.?
Kei: Koi ham kasenji ken nang kahe khapoi tin phone kathat in lhase tah-in kakap tan ahi.

Hitia kaka pet chun avel velin eihin call jingin ajonan ka phone chu switch off kabol tan ahi, kamitlhi chu kagah kitheh hul leh Kauboilen ahunglut chet’in
Boilen: Keinao ipi da naka ham? Ipi ham nalhaset na?
Kei: Kakap poiye Heuboilen.
Boilen: Naka loule ipi dinga namitlhi long ham?
Kei: Nang nahung gei jeh hivehta, tin lep mo sa san kalep in ahi.

Nalungsetna changlel ding mong mong kahi hitam

Nikhat jong chu Haopu in avel velin eihin call kit tan, katha peh jing phat chun hitin message ahin thot’e
Cy, nalungsetna changlel ding mong mong kahi hitam? Tuni mama in bazaar koma park neokhat’a hin kangah jingin hung loiyin, nahung loule nahinkhoa nasuhmil tahlou ding gotna kapeh ding nahi.
Tin message ahin thot tan, kachanu kavet le api toh akidonin, hijeh chun keijong katehpi komin bazaar kagaphah nome tin auto kakilah-in kache tai, kaga lhun le dinmunin eina nung ngat’in, mu jong kamu ngam tapon kati akithing jengin ahi, aman eihin mu phat chun akhut’in eihin sangin eikoi go in kakom ahinjon e, hijongle kei kaji um ahitah jeh-in kanung ngat kit tai, hichun eihin houvin

Haopu: Cy, dama hinkho naman jing hinam?
Kei: Ithi lou nah le adam aki hi jenge, ipi dinga neihin kou khoh ham?
Haopu: Ipi dinga kakouda ding ham? Phat hitih chan kahin hol jing hilou ham?
Kei: Uhaopu “NUNGAH KAHI TAPOI” hol jong neihol hol tahih-in, kou jong neihin kou tahih-in, phat chesa ho avel’a geldoh sah a lhiso sah kit ding neiti ham?
Haopu: Cy, hiti chun gel hih-o, lungset tah-in hung kile kit tan, nanga din mun ong lentah aumjinge.
Kei: Hung kile thei kahi tapoi, tunia pat’in call jong hinvel bol tahih-in, kanun einahol mo tante kile tange.
Tin kap pum pumin kadalha tan ahi.

Nilhah khat hi kachanga inna TV kavet le call ahinbol bol bol jengin, katehpi naocha toh room khel’a aumjeh chun ka pickup in pao louva kaumle hitin aseiye
Cy, keijong ichanu mel mu nomlou neihi sah ham?
Atin phone katha peh tai, hichun Kauboilen hung lhun toh akitoh in a bag ho kaga koilut peh kah chun ka phone call hung chu ana pickup in hinla ama apaodeh poi, kenjong avon khel ho kalahpeh-in akengchot ho kasutpeh leh ama chun kei chu eiven amitlhi ana kitheh in ahi, hijongle kenvang kahe phapon ahi.

Nikhat Haopu in eihin call in mun khat’a sotpi einga ahidan ahin seiyin hijeh chun nopmo kasan keijong ka phone kaki choiyin auto a kagah lut chun Kauboilen chu office off ahijeh a hung kile kit’a eina mudan anahin, ken kana hepoi, keijong Haopu umna chu kagalhun le hitin ahin seiye

NUNGAH KAHI TAPOI

Haopu: Cy, tunia hi nangpui dia hung kahitai, tin eihin koi go jengtan, hichun kaki nung chonin
Kei: Uhaopu, tin kakap’in kap pumin “NUNGAH KAHI TAPOI” nei koi tahih-in, kei miji kahi tai.
Haopu: Anung chon thut jengin, alu akisip in, Cy, nalung mol val’e na? Ipi jeh a nei hiti bol jeng ham? Tin lhase tah-in akaptan
Kei: Uhaopu, ipi ken kabolsetna um ham? Ipi dinga tua naka ham? Nei deimoa nei lhimlhah a napute chanu toh hinkho nom nagaman hilou ham?
Haopu: Koiham kapute chanu, ibol’a ka thisanna peng kacha jong Kei cha hilouva nana seiya hitia chon chavai jeng nahi ham? Nang nahung tahlou ding jongle kachanu beh neipen, ahin tichun kalung ahung hangin
Kei: Najah chalouva kachanu kisan nathum nahlai ham? Tin thudang seithei louvin kap puma kadalhan kalhai doh le Kauboilen toh kakisuto chet’in kanung lang kaven ajole Haopu hin eihin del le mukhante katin kati ajalheh in ahi.

Chuin Kauboilen in kakhut’in eikaiyin inlanga eipuitan in kalhun chan lhonin eikailut tho in, kakicha lheh jengin chuin akenga kaboh khup’in
Kei: Heuboilen, nei Ngaidamin lungset tah-in lunghang hih-o, tin lhase tah-in kinuh dut dut’in kakap’in ahile, amajong akap’in kabanin eikai dingin
Boilen: Hoija nachea ipi nagabol ham?
Kei: Kap pumin, Heuboilen nakoma kasei ngamlou ahi, kaji masa Haopu toh kakimu to ahiye.
Boilen: Ahile ipi seinom neiya nahin kou dan ham?
Kei: Amanjong phat chesa einabol nau thu imacha ahet phah lou ahin, anu le apan Kei themmo thua ajol lhah lhon ahi, hijongle Heuboilen thil umdan ho kaseipeh nomin lungset tah-in khatvei nei kimuto sah lhono.
Boilen: Keinao, Ahile kei le ama koijoh bel ding neiti lhon ham?
Kei: Kakin dot jengin, kakol chah kheh-in Heuboilen kahinlai damsungin nang dalha taponge, lungset tah-in hiti chu seikit tahih-o, ama kasenji ahinai hijongle kalung sunga amadin mun ong aum tapoi, hinla kakimupi nomna jeh chu kachanu mollemsa Margaret chung chang thua hin seinom tampi kaneiye, Heuboilen lungset tah-in kalung nopmo na jouse kaseidoh theina din nei kimuto sah lhonin,
Tin mitlhi long pumin kataotan ahile
Boilen: Nao, ibol’a chuti lhiso nahim? Lhisoh tahih-in Boinu, nasei bangin jingle phaten kimupin lang lungdam selin hin vailhah tan, nimasa vel’a na phone call hung hung jeh-a kagah recive leh hitin ahin seiye
Cy, “kakouna nahsah louva nahung loule nopmo sahih-in, kachanu kamu munaa kalah thou thou ding ahi, chuteng themmo neihin chan hih-in, hiche ding chu nanop loule tun kasei ngaiyin” Tin phone kathapeh tai

Kauboilen kakol chah kheh-in kakap’in ahi

Nao, ipi hijongle ichanu damna dingle bitna din lung hin ngaiton, nasei bang le nathum bangin kaphal peh-e, eiti chun kipa le lhaset kop’in Kauboilen kakol chah kheh-in kakap’in ahi.

Hijeh chun keijong ajing nikhon Haopu toh kimuto dingin kache tai, kakimuto nalhon chu mi in ahin, hinla inneite koima aumpon keini bou kahi lhon ahi, hichun Haopun eihin mu chun
Haopu: Nachanga na hung ham?
Kei: Kachanga kahung loule koitoh kahung ding ham?
Haopu: Nao, thil jouse kahethem soh tai, ima jouse kei themmo ahi, hijongle kanu le kapa lungthim phatlou jeh a hichangeiya genthei ithoh joh ahi, khatveini kakile chun insunga kakitomin hitin kasei tai
Haopu: Ipi dinga kasenji koma apute chanu toh akichenge natiu ham? Itih a ama dalha a koitoh kakichen namu beh uvem? Kajinu naga nungpui lhon loule insunga hin um taponge.
Anu: Boi, kei themmo ahi, chaga ahijeh in kana deimo in, chujongle itih a nanghi napute chanu toh kicheng dia bou kadeisah nahi.
Haopu: Kasenji tailou jidang neiponge, amabou kahinkhoa kaji hiding ahi neiga puipeh uvin, ama tailou mou dang mudin kinemda jeng uvin, kati phat’in naumna langa ahung lhonin hijongle jidang aneitai eitipeh lhon ahitai.

Cy, tunin nangla jidang naneitan hijeh chun ka thisanna peng kacha beh chu neipetan, tia kathum ahi

Kei: Uhaopu, na chanu aum tapoi, tin lhase tah-in kakap tai.
Haopu: Ipi dinga em? Na it jeh a aumlou dan a nasei ham?
Kei: Kachanu chu kenjong kadeilou le kalungset lou ahipoi, ka oisunga kavop’a pat genthei tincheng kathohpia nanu le napa jeh-a jumleja tin cheng kana thohpi ahi, hijongle kalung aneopon kachanu damna ding ahipoule tin kathoh jinge, hichun nanu le napa in Haopun jidang aneitai, nao suhlhah peh tauvin ati’e, tin kanao suhmangpeh ding eigo tauve, hijongle kanom mong mong poi, hijeh chun
“Haopu cha ahipoi” Tin kada sasan soi eibol sah uvin insunga konin einodoh tauve kachanu chu genthei tah-in kahin khou khah in, hinla kumthum alhin ding konin gari accident in eina dalha tai, tua kacha khu nang thisanna peng ahi tapoi, Kauboilen toh kacha ahibouve, kakomin kachanu hin thum kit tahih-in, nangho gitlou lungput jeh a kei le kacha nei gaosap sap nauva kachanu deilai kachan lo a kachanu kangaival jeh a kumni lhing deh mi-ngol banga hinkho kaman lo ahi.

Haopu: Hitheilou ding ahi, kachanu mel beh neimusah in, nang gelkhoh jeh a ichan genthei kathoh ham jong nahepha poi, nasil nachen beh jong second hand khat jong kachoh peh khapoi, ipi dinga tunia kachanu mel mulouva hitia nei donbut jeng thei ham?
Kei: Kalung ahung soujah jengtan, ka pon del sil chu kasat lhan hin kilah-in, ipi ham kathemmo na, hiche nathilpha bol napaome pi ngam nahlai ham? Kilah tang kaji kacha kangailu e natileh gamdanga nadalhah ding ham? Nanu le napa chunga jong kalungdam nailou nang kisanin themmo neihung chanin nahi nalaiye, jum helou nangho insunga hunglut hih leng hitobang lom hin vangse pong katin, genthei thoh ponge, tin kalhaset val jeh chun ipi pi kaseidoh ahijong kahe tapon chuin kavet le le leh table a chemcha neokhat kamun kala in kisut lih jeng ding katile eilah peh in apai mangin, kaponsil jong chu alan eihin silpeh in ahi.

Haopu: Nao, keinop a kadalhah jong nahipoi, ipi mong mong nagel a phat chomkhat beh jong neinga joulou ham? Ipi ding mong monga najamdoh jeng ham? Neilungsetna adet lou jeh ahimaiye.
Kei: Ipi dinga kajam ding ham? Itih a kajam namu ham? Tin akatoh akisen kakop in, najah u chalou ham? Jankhang janvaiya kasagoh keuva insunga kona kasam buchinga neigah kaidoh uva nangho jeh a dap kathoh, gilkel dangchah kathoh naho hi mohseh a nagel ham? Neibol nauhi thil neocha ahi poi, midang kitokhah leu chun na inkal kichoi leuva nagap diu ahitai, ipi dinga nang kisanin themmo neihung chan nahlai ham?
Tin thuseimo leuvin kakap tan ahi, hitia kaka laiyin ka-Ugin in eihin call in ka phone agin phat chun kathip in
Kei: Hello he-U
Ka-Ugin: Boinu hoija naum ham?
Kei: He-U, bazaar koma in neokhat’in kaume.
Ka-Ugin: Boinu, Haopu nulepa ahungin kalung anom mo behseh in insunga jong kalut sah poi.
Kei: He-U, nang thu ahiye, nadei deiyin ana houpi tan keijong Haopu koma kaume.
Ka-Ugin: Haopu ahung loule insunga kilutsah ponte hin solin tunia hi thuchaina kasem ding ahi.
Kei: Ole he-U, tin phone kakoi tai.

Kivailhahna

Chuin Haopu komin hitin kaseiyin kavailhah tai
Kei: Uhaopu, genthei chaga kanahi jeh in nalung lhainau kachang jou tapoi, hijongle tunvang kagentheina ho Pathenin ahen jipha, nulepa pha eipen kagentheina ho eimilsah tai,
Lhase hih-in lang na chun le jo lunglhaina napute chanu toh lungtup hin molso tan, tunia nathum na thisanna peng nachanu Margaret chu nang chungin jong lhase lheh inte, hijongle lungdam selin gavailhah inlang ngaidam gakithum tan, tua kachanu hi nang cha ahi tapoi, chen kinungle tan avelin kimu kit din neihin koudatan, kei “NUNGAH KAHI TAPOI” miji kahitai, hichan kaseiyin kahung pot doh gotle eihin kouvin

Haopu: Cy, thil jouse keiho themmo ahi, lungset tah-in nei ngaidam uvin, kei selung mol jeh le chunlejo lunggel themlou jeh a hichangei nang ngai puldou hinkho manglo kahi tai, nakoma kakitepna bangin nang tailou numei dang ji dingle dongma din vekit taponge, nao kabolkhel ho nei Ngaidamin, najitoh lung kitoh in hinkho hin mangin lang cha le nao tamtah hin neitan,
Cy, achaina ding hijongle khatvei neihin angkoi teijo tin akhut’in eihin sange

Ken kavet le angkoi ding kanome, hijongle Kauboilen kahin geldoh in nomtah a kaki angkoi lai lhon nikho ho kahin geldoh in, Haopu chu kanung ngat’in kahin dalha jotai, hichun tol’a chun adilsun othongjejun akap’in hinla kakinung hei tapon ahi.

Nikhat ka-Ugin ahungin katehpi katehpu le Kauboilen toh kachanu toh katou khompet’u ahin kei um jongleng Kauboilen joh ahouvin hitin ahin seiye
Ka-Ugin: Boilen, nikhat ni chun Boinu, chenna masate ahung uvin achapa’u Haopu ahung loule insunga lutsah lou ding kati ahin, achapa’u ahung phat’in insung kalutsah in ahile ngaidam ahung thum uvin acha, atu’u Margaret vuina ahung neiyuve.
Kauboilen: Ugin, apha jenge phatah a nahin vailhah ahitah le, Boinu jong hi ni ijat ham asuh gim jingu ahin, Boinu’n jong athu phatea aseipeh hitale akilom’e.
Ka-Ugin: Amasa a ahung uva chu, Boinu hi ahung thumu ahin kalunghan lheh vanga, hung suboi tahih’vin Boilen toh kaki chensah ahitai, joulenal nabol uva nasuh gimset nunguva nahung thah hol’u ham? Tin kana house e, tuchung vang chu imajong kasei tapoi.
Haopu chun Margaret lhan’a kikaona thu tampi aseiyin
Kachanu Margaret, namel beh jong muman louva khuldin neichan den jeng hitam? Nanu in hibanga nagimpia Boi, napa kahi, napi le napu phatlou jeh a jaocha banga kigel nahi, hijongle keima thisanna peng kacha nahi e, tin Boinu’n Haopu cha ahipoi tia sign abolna lekha chu abot tel’in Margaret lhan chunga chun ahalvam tai.

Anu le apa jong kisih’in kei koma ngaidam athum lhonin, kenjong
Ipi dinga sel thi nunga sel tho naget’u ham? Akichai ding jouse kichai ahitai, nachapa lhontoh naki ngaidam leu kei komin ngaidam thum tahih-un, tun kanaonu jong alungset tah khat toh Christian insung nom asemdoh tai, kile tauvin, kachungin lhase da uvinlang lungmong lhamongin nagam langu jon tauvin,
Tin kavai lhah tan ahi.

Achedoh nunguvin achapa’u Haopu chu gari khat’in nasatah a atakhah hile akilomin delhi langa jendin flight a apo tauve ti thu kaja e, ahin tichun kamitlhi ahung longlhan ka room sunga kalhai lut’in kaga ka le, phat chesa high school simlai ho kalungin achaina din hichejan chun Haopu pul kadou khovah keiyin ahi, aban kiti vang Haopu chu gel jong kageldoh tapon ameljong kamukit tapon, athi ham ahing ham jong kahe tapoi.

Chapa khat kaneibe kit lhontan

Tunvang Pathen lungset jal’in chapa khat kaneibe kit lhontan, amel chu apa akilo lheh jengin katehpun deichoma minsah din ka-Ugin asah sah in ahile
Ka-Ugin: Hiche naosen hi Samson bangin hung thahat henlang.
Mose bangin nunnem henlang
Job bangin thohhat henlang
Joseph bangin kitah jinghen
Israel leng David bangin alenggam achenna chan det thei hen tin phatthei aboh in amin dingin
David asah pai pai tan ahi.

Ka-Ugin jong changa hinkho aman na atam lheh tan, hijeh chun kei deitah ka-Unu ding eilhensah in, kenjong Hatneu Pathena kipejou tahle thengsela hinkho mang mi ahijeh chun kadeiyin lekha them ahilou vangin michingtah ahin,Uhatneu komin kataovin ahile kataona einop peh jeh-in Uhatneu le ka-Ugin jong kichenna kin thupi tah chu kamang tauvin ahi.

Kachanu len jo Margaret jong school akaitan, nikhat ka-inna kauma kachapa toh kakichep jing laiyin inpam langa min eikou kajan kapot doh-a kagavet leh vo henu koibep ham kiti chu kakin dot jengin
Kaloinu Chingboi le Jacob chun naosen pasal khat ahin kipoh lhonin eina vegeh guh lhonin nupi kihi tajongle kalhai jelin kapum koi chah jengin kakingai lhon dan dan chu kainsung miteu alungdong leu uvin ahi.

Phat chesa kathilto ijakai kaseipeh in, nikho sotpi kaum khom uvin, ama jipa Jacob tohmun lentah ananei ahitan, atohna muna visa akisuh sau angaitah jeh-in aumnau Delhi langin akile kit tauvin ahi.

Phat le nikho ijat che jongle nopsahna le kipana mun chu kagal kaitan, masanga gentheina cheng kagel le tunvang imacha aum tapoi.
Kabon chauvin kachennay mun cheh-in nomsa tah-in kacheng uvin “CHRISTIAN INSUNG NOM” chu katungdoh cheh tauvin ahi.

The End (Akichai Tai)

NUNGAH KAHI TAPOI thusim chu hichan hin akichai tai, abul’a pat achaina chan lunglut tah a simchai jouse chungin kakipah-e, asim jouse Pathenin phatthei naboh cheh-u hen.

THUSIM CHUNG CHANG
Hiche thusim hi fiction a kahinjih ahi, atahbeh in keihi nungah kahin, jijong kanei khapoi, lekha jong kasim poi, college jong ka kai khapoi, hiche thusim hi phat sotpi kalunga alang jingin, jih dingla kalungjo pon, hinla kalunga aumjing phat’in article ho jih ding kati jongle kalung kihongmo leuva aumphat’a kahin jih ahi, tunvang kalunga um kajih chai theitan, damsel’a jihchai theiya eikoipa Pathen kathang vah-e.

HICHE THUSIM’A KON JILDOH NOM
Hiche thusim sim jouse koma kasei nom chu, mihem hinkho hi mitphet kah louva kichai jeng thei ahi, kum khat sung ani nia hahsat na nakimai topi ni umdalou ding ahi, hijongle hahsatna nikho itokhah mana eima hinkho man chatvai ding ahipoi, ihinkho suhset ding jong ahipoi, Pathena kingap lhah joh ding ahi, hahsatna jouse thohhat tah-a napan leh hahsatna khel’a nopna kipana aume, tichu geldoh angaiye, nulepa sopi ulenao kingaina ding kaneipoi iti nikho jongleu ikom uva nulepa sopi ulenaova pang jing Pathen chu aum jinge ti geldoh cheh-u hite.

KIPA THUPHON
Hiche thusim kijihna chunga abul’a pat thusim toh kilom sel’a man thei dinga photo edit a pan eilahpeh jing Sir @Ngul Kipgen chunga kakipana seijoulou kaphong doh-e.
Chule lunglut tah-a sima tilkhouna eihin nei jouse chungin jong kakipah-e.

TAONA
Thusim kijihna sunga mihem hijeh in jihkhel taminte, hijongle Christa minin ngaidam kathume, chule Spelling mistakes jong tampi umding ahi, hijongle simdan them maiyu hite.

LHANDOHNA
Hiche thusim hi igamsung inamsung’u choisang dingle Pathen loupi ki phondohna ahithei nadin jihdoh theina lungthim eipe ka-Pathen angsunga itih a manglou din kahin lhan’e.

Kakipah-e.
Keima: Naocy Haokip
Place: L.Gamhoi
District: Karbi Anglong
State: Assam

Thusimbu ahoi jing le aum jing thei nading pan analah cheh ute. Patron member hina ding hilai meh in