Kihilna thei thusim chomcha
By: Naocy Haokip
_________________________________
Pathen chu hao le vai jeh-a ngailut ding ahipoi, keiman ka ngailut masangin aman angailutna bukimin eina ngailu tai.
Khosung khat’a hin mi haosa tah nupa khat hin, chanu melhoi tah khat ana nei lhone.
Anu le apa hi Christian ahi lhon nai, ahinla alungsung lhona Pathen ngailut na achengpoi, amanin ahaosatna lhon le anei agou ho kisonpin kiletsah na hinkho ana mang lhone.
Chanu chang khat seh anei lhon chu, amel-hoi toh achih toh aki thang-at pi lhon lheh jengin, akiletsah na lhon chungvuma akiletsah be kit lhonin ahi.
Apa hi tohmun lentah nei ahin, anu jong hin tohmun lentah ma anei ahi, achanu lhon hi lekha asim sah lhonin, alung himo sah khah lhon hih hel’e.
Phat le nikho ahung chal jingin, achanu lhon chu ahung nungah tan, mipi japi vetnom nom ahung hitan, gollhang mel-hoi tah tah officer len tah tah ho chu amanu mitmun amai lhai thei lheh jenguvin ahi.Hijongle nungah nu chu akiletsah lheh toh abang jengin, officer lentah tah ho chu koima jong ahoupi pon, donin jong anei poi, anu le apan nadei dei kilhenin aboncha milen milal jeng ahiuvin nang dia gotsa jeng ahiuve, atipeh lhone.
Hijongle aman milen milal ho toh loupi tah a tou khoma houlim sangin, mivaicha genthei nulou palou ho avil jin, mihon akidah le atham nom lou mi damlou lampi pam lah a umho, Dustbin hoa neh kihol ho khotona le lainatna neitah in avil jingin ahileh, mi vaichate din ama nu chu nulepa tobang ahung hitan, gari chunga nomtah le navah sel’a vale sangin gamlha pipi hijongle kengin ajotjin muntin gamtina mi genthei ho avil jingin, Pathen thu ahiljin, ama a konin mi tamtah in huhhingna akisan tan ahi.
Hitia aman kineosah na hinkho aman jing chu anu le apa alunghang ji lhonin, ol olin aphoh lhonin ahil jing lhonin, mi genthei vaicha ho avil a aboipi ji chu angah doh din aseipeh lhontai.
Hijongle aman nga chom louvin abol ngai abol jingin ahileh, nikhat chu apa alunghang tan, ina konin achanu changkhat chu anodoh tai, achanu chun anungjui (tichu ama soh ho) komin neijui tahih-un, nangho kile tauvin, keima mi genthei vaicha ho dinga nulepa kahin keima ei guard ding kangaicha poi, tin anungsol tai.
Nikhat chu lamlen panga athisa banga lum gollhang khat amudoh in, ama chu ajenin Pathen thu ahilin Pathen koma lunglut tah in ataopeh jingin ahileh ahung damdoh tai, hiche gollhang pa chutoh kilhonin Pathen thu ahil le ji lhonin mi damlou ho ataopeh ji lhonin, in le lou neilouvin Pathena din hinkho phal ngamin atongkhom jing lhontan ahi.
Nikhat anu le apa chun lampi panga damlou ajen pet in amun, inlanga hungtan na jinei ding leng chapa khat toh kicheng ding nahitai atipeh lhone, hinla aman henu hepa Leng chapa toh kichenna leiset’a hinkho nom iti kaman nahlai ding ham? Ven, gam lentah toh ding kanei nalaiye, Keiman kangailut masanga eingailu jingsa Ka Pathen ngailut na ka damsunga ka nungsun lou ding ahi tin anu le apa nungjui ding adatai, hichun anu le apa chu alunghangin na hung genthei nikho leh nikho leh heno hepa neiti thei lhon lou ding ahitai, tin adalha lhontai.
Anu le apan Pathen mi ngailutna ahet them thei lhon nadin an-ngolin mitlhi longpumin taona ahin mang jingin, anu le apan leiset haosatna ho akiletsahpi jouse anungsun thei lhon nadin ataopeh jingtan ahi.
Phat sotpi ahung chetan nikhat hi mel hetlou mi khat’in lekhathot khat ahungpe tai, hichun aman jong lekha chu asimtan ahileh, angailut pen apa chu TB natna jeh-a damdoh jou talou ding ahi dan asimdoh tan ahi.
Chuin akilhonpi aloi pasal pa toh hospital lam adel tan ahileh, doctor hon napa chu akama thisan alongin koima vet ding akiphal tapoi, phat chomcha bou hing ding ahitai, tin aseipeh uvin hijongle aman kimuto ding aseiya atao tei tei phat chun 2minutes aphal peh uvin, hiche jong chu natna kilason thei ahijeh in khut tomle maitom puma nache ding ahi, atipeh uvin, chuti chun muthim noiya um apa kom lama chun khut tomle maitom pumin achelut tauve.
Apa kom alhun chun anadup lha jengtan, houpi thei jong ahi tapoi, chuin aman jong apa chu akol’in, akhut tom amaitom ho chu aladoh in Pathen koma taona amanpeh in, *Vo,Pathen nacha kei dinga khotona neokhatbeh umlou hitam? Tun kapa hi thile tonsot gama kikhen ding kahi lhontai, Kapa hi atahsa damsah inlang alhagao mit hasah in* tin lunglut tah in ataopeh in ahileh, phat chomkhat jouvin apa chu amit ahung hah-in, doctor pun aven tun ahai dan ahung hoi domtai tin jen din apodoh tauve.
Ajingin achanu chu hospital a agalut kit le apa chun maiso lhaiselin analemin, ka chanu, na chunga kakipah lheh jenge, tunvang eingailu Pathen chu kahechen tai, Keiman kangailut jeh-a eingailut ahipoi, kangailut masanga eina ngailut ahitai tun kahe chen tai, ka chanu, Pathena din thilpha tamtah hin bolin, tin akipah lheh jeng tauvin ahi.
Apa ahungdam doh jouvin, ahaosatnau neile gou sumle pai ho itcha lou helin neilou genthei chagate ahop peh uvin, muntinin damlou avil’un, abonchauvin MISSIONARY in akimang chauvin, mi tampi Missionary in asemdoh’un Lhagao gam len tah akeh doh tauvin ahi.
♾ MORAL ♾
Leiset’a haosat naho jouse tonsot gama ipoh lut diu khatcha aumpoi, leiset’a lengle lal ahao, avai jouse jong pel theilou thina nikho hung lhung tei ding ahi, hiche thina nikho hung lhun kah-a hi Pakaiya dinga natong ding ihiuve.
NUMEI MISSIONARY phatah nu banga khangdon lai nikhoa haosatna ho gel thupi louva Pathen mingailutna samphong le dingin khangdong ho Pakaiyin mopohna lentah eipeuve, tunia nache loule phat aum tapoi._
Nakhang hoilai Pakaiyin amangcha nome, na Huhhingpu na chu tongin, na Sanakgang hoi laiyin.
NUMEI MISSIONARY thusima kona hichan ikihil khom nauva adihlou seikhel, alhinglel ho jouse Christa minin kingaidam khom’u hite.
Asimdoh jouse chunga kakipah in, asimdoh jousen ikhantoupi theina diuvin Pathenin phatthei boh jinghen.
• THANK YOU •
__________________________________
•• SANAKHANG MANTAM ••
•• WhatsApp Group ••
