Home NUIBOM NUIBOM-41

NUIBOM-41

435
0

FOUR IDIOTS of ZALENGAM:

(Just for Laugh, Short Comedy)
Thangboi Lhungdim

Zalengam kho nom tah khat ah golcha kingaitah pasal li (04 idiot) ana um uvin, amaho min chu Pache, Chepu, Chedul le Pakeng ahi. Amaho thusim chu hiti hi ahi.

Nikhat Chepu, Chedul le Pakeng avaleu leh lampam a ahpin ahtui athah 4 amu uvin, ahtui chu akibang chet a kihom din, Chedul in hiti hin ahin hom tai.

Chedul: Hiche Pakeng a, hichehi, Chepu a, hichehi kei’a, hichehi Pakeng a. (heiha Pakeng 02 chang ta hila)
Chepu: Hithei hih vehta! Iti Pakeng chu 02 changthei di. Hiche kisen akibanga homthei lou mi mimo, hiti hin hom tang tin ahin hom tai. Hiche kei a, hiche Chedul a hiche Pakeng a, hiche kei a. Phajeng talou ha na?
Chedul: Eh! Hoi’a hichu hithei ding nang 02 nachan man a.
Pakeng: Ahihih e, iti nahop hon vangin khat aval jingin kei amu kahijeh in aval chu kei chang leng kitoh talou ding ham?
Chepu: Ahtui chu namit ching jeh a namu naki hisah ha. Amasa nahi jeh a namu masat thu ahin, nangin muhih jong lechun kin kamu thou2 di ahi.
Chedul: Tahbeh ahe. (hiche pettah hin Pache ahung vahlut in)
Pache: Ahem2 nangho loihin hilai a ipi nathim bolkit u hita.
Pakeng: Pache ahtui 4 kamu uvin akibangin kakihom mo kei tauve, i ilodiu hitam.
Pache: iti hiche tahbah jong chu kihom theilou, kin hinhom inge tin. Hechehi Pakeng a, hichehi Chepu a, hichehi Chedul a, hichehi kin kahop man kei’a. Kitohchet talou ha.
Chepu: kapathra! Keihola kakihommo kei uvin iti nahop a kitoh chet a nahin hopdoh ha, nathem tama.
Pache: Nangho nalhoh u kichemlou kompi. Ilhoh ikichepsah leh leiset a ahimo ima umlou ahi.

NAMPON:

Hiti chun ahtui khat2 ahin kichoi uvin kholai a ahung suh u leh khatte leitol ah pon tampi ana kiphou amu uvin amaho jong hiti hin ahung kihou tauve.

Chedul: Hichelai a pon kiphou hochu ahoithei tave dei2 aum e na? Hichehi ipi pon hita?
Chepu: Hichu Vaiphei pon kiti-ti chu hichula.
Chedul: Hiche pon jong chu ahoi neh e, koi jatpon hikit ta?
Pache: Hmar pon hichuo, hiche kisan theilou, mimo dehduh ji hih in.
Pakeng: Ahileh hichehi koi nampon hikit ta.
Chepu: Hichehi eiho Thadou nampon saipikhup kitichu hichula, nanam pon tahbah jong kihet lou mingol.
Pache: Hang! Ipi kasei e? Nabeng leng ahlungvai bang naveh tachun. Hinsei kitte “Thadou nampon” hichehi kuki nampon dihtah saipikhup kiti chu hihi mem.
Chedul: Eh! Najah hon chalou ham? Hiche pon hi thadou pon jong ahipon, kuki pon jong ahipon Mate nampon dihtah joh ahi e.
Chepu: Kinemsen behbuh tang, jum le ja helou banga hiche eitih a pat Thadou pon tia hung kihe khat, janhi guse tedoh nang Mate pon nahinti ngam nalaiset ahinti leh.

Akinil boidan uvin, akimoh pheng del u leh Chepu luchang asukeh uvin, a ahtui kichoi jouseu jong asukeh uvin. Akikhen tauve.

KIVETDA NA LUNGTHIM (DISUNITY):

Ajing nilhah in Chepu le Pakeng in ju adonkhom hon in, hiti hin ahung kihoulim kit hon tai.

Chepu: Pakeng! Janhi Pache le Chedul in eibol na mong2 hi kalung dam jong leh kathin vang dam hihbeh inte. Nupa tucha lam umlou’a hitia ikibol nahi. Tahchapa pasal kapa chapa anaonu jong hi kadadoh dapveh ding ahi. (Chepu jinu hi Pache naonu hi anahi ahi)
Pakeng: Angolthim le atanang thim ngan nahiuva, nabon uva hi bultuh thei ngap hileu chun, phangap ding ahin. Naloi napai (A-upa) toh nakinah vanga anaonu, nang dinga najinu suhkhel neilou chu nada got ham?
Chepu: Hilouve angol kihi naisai lou chu! Pache genthei na ding phot2 hi habol a bol a, hasuh a suh genthei ding kati joh ahi.
Pakeng: E! eiget tah leh naji nada leh nang chun nom saveh tachun ong.

Chepu in ajinu adagot thu hi Pache’n ahin hedoh tan, Pache jong alung nom thei him2 tapoi. Hiti hin Chedul toh a inn uva ana kihoulim kit hon tai.

Pache: Chedul! Chepu in ipi mong2 angaito a eiho golcha kinah vanga mona neilou kanaonu ada got mong2 ham? Ahin da tahbah leh hichepa hin ithei nante, katham gah ding ahi.
Chedul: Kathei tahih e, boi nalou ding khat in iboi uvin, aji khat amohda got jeng vang hi dihlou hichuo. Ipi hileh kihoutoh nading khat ngaito’a pha hilou ha.
Pache: kihoutoh thu umlou katham gah ding ahi tia akihoulim lai pet hon in.

(Chepu hin kahung kisen ding hitam atileh, Pakeng in khongai tadi’o tua nakisen pan leh natha cholval ding ahi kholai iphah phat leh ati’e. Kholai ahinphah hon in ahung kisen hon tan, koi ham ahat, tia lhang ahinsap hon leh. Pache le Chedul jong ahung potdoh hon in avet hon leh Chepu le Pakeng anahi e)

Pache: Koipa chapa nahi ham ahat hol, ahat nahi leh hung tang ikitham ding ahi.
Chepu: Chu’o! Kin itih a kidel hite katim. Koiham ahat kati hibou chu.
Pakeng: Hilou chu’o Pache, sum Rs 100 man lom2 a jukha hung kidon’a ikisen louleh koi in iti ahetdoh mong2 ding ham.
Chedul: Nalim2 nalai2 hon toh nakilomsel hon e, chen na inn kijot hon in tin asoldoh tai.

APHACHOM UMLOU’A KI ENGKAL:

Nikhat hi Pache jing lou kon ahin, Chedul chu bu thah ding’a anganse jeh in, Chedul buthah dinga ahung potdoh leh CHEPU scooty a hunglhei phei amu phat in akham in.

Chedul: Chepu khongai tadi aw, hoilang cheding nahim?
Chepu: Ipi thu hita Chedul, Tiffin khat jong nahin kikhai nalaiset in.
Chedul: Eh! Ima hiloupi gari nahin tol kit leh hoi’a cheding nahim kati hibou chu’o?
Chepu: Ash! Chedul kajinu umlou kalse, kaboidan pumboi in kaboi in bu hon toh, tui khai toh, ponsop toh tua jonghi bazaar a thil khat chovah a chego kahi hichuo. Ahihih e kajinu naga nungpui ngap ding hita?
Chedul: Hichu olsei na hite, koi in dan nati’a nada ham? Hiche tiffin hi Pache lampam phailei a bung ahin ana pepa tem in kati ahi.
Chepu: Pache tiffin chu ikhoh tah a kin kapoh ding ong, napeh nom leh nangin ga kipeh tang?
Chedul: Hilou chuo kei khuchen kenga chol2 a kache sanga nangin najotpa thou2 ding hija napehpa leh hijeng Chula. iti mi tupa, khuti leh najinu thu jong alampi2 hung um nah tah.
Chepu: Ahi jong leh kipoh peh jeng hen aw tin ahin pohpeh tai.

Hinlah amaho kikah a rivalry jeh chun khat jong –khat jong lung lhei lou ahi tauvin. Hijeh chun Pache hin hitia hi lung anagel ahitai. Hiche Chepu hi kimitsah tah in niseh leh scooty khat ah suhlhei toulhei athon, mi anoisen tuni vang ithei nante tin Chepu gari puncture nadin lampi selai agengsung khat ah jotpi ngat ho khu athe thanga (sou anado peh ahitai). Chepu kho helou’a scooty eojen-jen a ahintol leh a gari puncture jeh in imbalance ahin a accident tan, bon anatdeh in, Pache tiffin jong akibujah tai. Pache’n gal a pat in CHEPU accident chu aven, ama Tiffin kibuh lhah lam helou in kipah in anui2 tan, hitihin ahinsei tai.

Pache: Um! nakithei nah, nakimit sah kei in tuchun ba netang.
Chepu: ka ingap mangthah kei e hiche laitah a itijong kahi hija tin a gari chu avetleh puncture (tyre flat) ana hitan.

Chepu in jong check abol leh jotpi ngat neocha2 amudoh phat in. Oh! Hiche vang hi koima dang kisahna hiponte, Pache kisahna hitei ding ahin, apha e keijong bazaar chetalou nang jong jing-an nangol ding tin tiffin chu asepmangin, agari chu akisot in innlam ajon tai. Hinlah buthah ding Chedul ahunglou beh phat in, Pache agil la akiel ma2 tan hiphat chun phone aboltai)

Pache: Na ingaplha naboldan a, igil kielta hitih chan hunglou nahim?
Chedul: Chepu kahinpoh sah tah Chula na tiffin namu lou lai ong?
Pache: Najongsan dia nangin hungthah in kati hilou, Chepu hinpohsah in katim. Ithei nan nate. Nangpa hi ima nganse theilou tin agilkiel behseh jeh in, inn lang ahin kijot kit tai.

Hitia Chepu bon nat dehduh a, ulsa kai leng lunga gari ahin kisot chu Chedul in amu phat in ipi natiham, Pache tiffin napeh lou hitam phone eihin bol in alung hange atileh. Chepu’n thil umdan chu aseipeh in Chepu le Chedul jong hitihin ana kihou som kit hon in, planning chombeh khat anagong kit hon tai.

Chepu: Chedul vetang Pache kisah umchan hi adih thei mong2 tahih beh e.
Chedul: Tahbeh ahi e, hunom henhun in mi abol in, theichim aum mong2 tai.
Chepu: um! Pache hi lesson phatah khat peh ngai ahitai.

(Chedul phaten ngai in, Pache hin sakhao khat akipoh jing ahin, a sakhao khu nahin thim lah doh ding. Mikhoh tah a kisei Kilthang loulai a changmai kolbu idei2 ikilo diu thangdeh a ilha diu, amun a Pache sakhao idalhah diu. Khutileh Kilthang in sakhao jeh a chu Pache ahin mat ding, aki tham hon eihon nomtah a lila vet a ivet diu ahi).

Chedul: Very good idia Chepu. Ibol tei ding ahi.

Hiti chun nikhat kilthang loulai a thilgu dia alut u leh, agelphah loubeh uvin louneipa ana um in, kilthang in gucha ahunglut e ti ahet phat in ahindal uvin meithal a blank fired ahinbol jeng leh, koi thil guh malah atoke2 in ahung jam uvin, a songkhol keh loi, bonlhoh lah a lheilut loi. Nahchang sal in ahung jamdoh uvin, lal tah a hai theithu’a ahung u leh lampi ah Pache toh ana kitoh kit uve.

Pache: Nangho loi hi nakijon kop leu vin, ipi nahin jampi uva, hibanga chu hai thethua hung nahiu hita.
Pakeng: Hampoh hih aw, Vompi hang khat kaga kisuhdoh uva ihindel u leh, kalubuh u kahin jampiu ahin, nahchang sal a hung jamdoh kahiuve.
Pache: Phasel a chu, kalung damsel, khatbeh jong chu nan pet u leh pha hija.

COMMUNITY HALL:

Nikhat hi Pache kholai dunga ahung vasuh leh thingphung lim noi khat ah Chepu, Chedul le Pakeng ana toukhom uvin, Pakeng in hitihin ahinkou tai.

Pakeng: Pache hoia cheding nahimo?
Pache: Hoi’a cheding neihisah ong, lamlen a che kahihi namu lou ham?

Ipi hileh nana kikimsel uvin apha e kihoulim nading khohtah khat um ahi tin hitihin ahinsei tai. Khatte ho thil umdan hiti ahi janhi BDO office kagache leh akho2 a tribe wise a community hall sahna ding 1crore scheme aum e atiuvin. Eihon jong iki ngaito uva pha hilou ham?

Chedul: Nang maman hinsei masa tem aw, khutia Tribe min a sahding ahileh ipi tribe min a sah ding nati ham?
Pache: Eipi hileh ipu ipa a kipat vannoi in eihetna KUKI ahin. Kuki min a isah jeng tah lou diu ha.
Chepu: Hoija hichu hithei ding ham? Khutia min eihetna iti ding leh Govt in ei recognised na Thadou min a isah diu hilou ha.
Chedul: khutia recognised hol nahiu leh Mate jong Govt recognised ahin Mate tribe min a isah u leh hijeng Chula.
Pache: Vansam lha kisei hinah tah! Kapu kapa jouse kuki anahin Tintong kuki, Chengjapao kuki akiti bou. Kuki lou adangse hi nangho politics kichepna ahin, kei’a dia itih hijong leh unacceptable! Kiti chu ahi.
Pakeng: kathei tahih e tu chakhat a community hall sahdoh nading chance hung um’a. khat in Kuki, khat in Thadou, khat in ma Mate nati kit u leh. Nahiti peh u leh Latrine jong kisahdoh hih uvin nate.

(Akinil boutam dan uvin kihou lhahna umthei lou in, khodang hon community hall hoitah akisahdoh uvin amahon vang ima jong akisahdoh tapouve).

ALL INDIA RADIO:

Nilhah khat Pache, Chedul leh Pakeng ana toukhom u leh Chepu in radio khat ging deng2 in, ahin ngai in ahung kihot pheipeh e. hiphat chun:

Chedul: Chepu hung tou tem aw thusoh chu ngaikhom diu hite. (Chepu jong alah uvah ahung tou tan. Radio a thusoh sim pan hichehi all india radio thadou programme thadou pao a thusoh alhingin ngai tau hite ahinti leh)

Pache: Radio jong chu kapeimang sangin thatmit doh uvin. Thu kisei sun jong nakol a thol lou ngan, thadou pao’a thusoh hinti nalai set. ka pao hi koima pao ahipon kuki pao thengsel ahe.
Chedul: Hasei hih uvo kinjong koima pao katho khapon, kapao tho hi Mate pao thengset ahi ti kihet uvin, gamtin sei hih uvin.
Chepu: Thadou pao ahijeh a thadou pao kiti hichula, eipi laitah chu nupi phunse ho banga chubangse soh nahiu ham nuijatsah a, najahdau leh thoda jing tau.

Pakeng: kithip uvin mingol gol. Tonna pat ipu, ipan kilungtoh tah’a ahintho khom a tua nangho pao nahiti kichu u, najah u jong chalou. Hiche pao hi nang pao jong hilou, ama pao jong hilou athokhom jouse pao ahi ti kihet uvin. Naum chan u, nalung put u kavet2 leh ngalgumsie tetoh thakhat chet, kitona ding le machal nading gel khat jong umlou. Hilang ah hin hung tem uvin thu khat naseipeh u vinge tin class abolpeh tai.

PAKENG CLASS:

Pakeng in lekha khat ah 3 lim tobang khat ajih in, khat2 in ahin dong tan, amasapen in Chepu adong e.

Pakeng: Chepu hichehi ipi ham? Hinsei tem aw.
Chepu: Hichu koi hetmo ding dantah a ‘W’ hichula.
Pakeng: Pache hiche hi ipi ham? Nangin hinsei kit tem aw.
Pache: ‘M’ hichula, hiche pentah jong chu neidong in.
Pakeng: Chedul hichehi ipi hikit hitam?
Chedul: ‘3’ hihila.

Pakeng: Tun nabon uvin hung ding khom tiu. (Abon uvin munkhat ah adingkhom uvin). Hichehi ipi ham? tun hinthah sei kit uvo.

Pache, Chepu, Chedul: kitoh chet in W ahi aticheh tauve.
Pakeng: Tun nabon uvin hilangah hung uvin lang hinsei kit tem uvo?
Pache, Chepu, Chedul: kitoh chet in M ahi atisoh kit tauve.
Pakeng: tun hilanga pat hinve kit tem uvo?
Pache, Chepu, Chedul: Oho! 3 hibou hila.
Pakeng: Hichu ahi nanghon number chom2 a nasei u number chu achom2 hilou a khat bou ahin. Na umna position, angle le namudan dungjui uva chu achom2 nahisah thu u bou ahi. Hibanga chu Thadou, kuki le Mate jong chu achom2 nahisah vang uva ‘khat’ bou hi ahi.

Tun nathum uvin hiche mitbeh hi hin kibeh kit uvin. Thilkhat kavetsah diu a colour nahin sei cheh diu ahi tin sun glasses Mitbeh colour chom cheh akibehsah tan ahi.

Pakeng: Hiche hi ipi colour ham hinsei uvo.
Chepu: Hiche vang hi blue mong2 ahi bou e.
Pache: Asanpeh e red colour ahi e.
Chedul: Hoilah hiche colour vang green mong2 ahibouve.

Pakeng: Ahileh tun namitbeh u ladoh uvin lang hinve tiu? (amitbeh u aladoh uva avet u leh blue, red, green atiu chu white joh anahi e)

Pakeng: Hiche tobang chet a chu nangma ho pomdan le min nabehpeh u mitbeh dungjui a achom2 a namu u ahin, namu’u chu achom hiloubeh “khat” ahi. Nakikit2 vang uva akikhan theilou khat nahiu hi kihet uvin.

Chepu: Pakeng nang angolpen nahi vang nathusei hi logic alutbou. Mohseh a ikitomo, ikikit2 uva kajitoh kaki khanlo vang, khat mong2 akikhen theilou mite ihiu kahe chen tai.
Chedul: Nahet hon nah! Akikhan theilou khat ihidiu kana ginmo peh2 a va.
Pache: Na ingam lhadia hitih chan na-im a, nahin masei doh lou ham. Chandia lom, chanvou jouse akichan nunga nahin seidoh bep. Hung hon in ikinah2 vang uva akikhan theilou tipum khat mong2 ihibou uve tin akikoi uvin, akipah uvin, alam khom tauve.

THE END
🤣😂🤣😂🤣

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articleTHEI CHANG PHUNG KIGAOSAP THUA KIHILNA
Next articleTHE LAND OF GHOST-I