Home Sasat Baite NGOLNA THEIKHOP LUNGSET PART II(two)

NGOLNA THEIKHOP LUNGSET PART II(two)

186
0
HEU, NEI DALHA HIH TA O
HEU, NEI DALHA HIH TA O

Sasat Baite


banmasa jom……….
(Kikim jong inlang u jonin ache touvin Helhai le Sutvun jong Helhaite in jonin ache phei lhon tan ahi)

Sutvum le Helhai in jong dongkot akal lhah lhonin ahile Helhainu damlouva tapsah a analup chu amu lhonin ahi. Anun ahin hou pai in he kate!!! boi ipi da tutah a nahung jengham? napu tein a nahung gejengle itiham jannoiya lam nahin jot, naki chat kouham ? tia adohle Helhai in henu nadamlou kajah a kalung khamtoh boldi thamdi kahet theita hih a kicha pumpum a kahung lhonle kagolpa Sutvum in eihung thah lhonna ageiphat a chilai hi gehtan kati ahite ati. Anun apha e boi ajal nading in khun a chun ponpha peh o atin ahile Helhai in jong jalkhun ho asemtup peh tan ahi. Nomtah in samang ajal taovin ahile jan khangkim in Helhainu natna chu ahung sang in khohelouvin akithing thing tan ahi. Koiman jong ana hepha pouvin hinla Sutvum jana juntha dingin ahung dohin ahile Helhainu kithin thin chu amun apet a chun boldi jong ahethei tapon boldi hetlou manin atungtun chu amoh jutjut in ahile chomkhat jouvin ahung hainemin ahi.

Insunga lumho jouse chu ahung khang un ipi tiham?? tin akidong touvin ahi. Helhainu jeh a Sutvum in pan alah nale akhohsah a anubang a ageljeng chu amun ahile Helhai’n koima koma aseilou vangin Sutvum chu amoh lungset in ahi. Ah-masah khonin Helhainu jong ahung ol lhain nomsella a e mut kit phat in adanghon jong ajalna khun cheh ajon kittaovin ahi. Jingkah matah in Helhai akithouvin an ahonin twi athal dimin chu jouvin agolpa Sutvum aga sukhangin ahi. Sutvum jong ahung thouvin ahikle jingvai hamset ana hitan ahi.Helhaiin heu jingkah a hintho ding katile jana nalel valla kahin tholou nahi tai atin ahile Sutvum jong akiphatlam in kate! keipa jonghi kathaithut cheh cheh jenghi o.. ipi pusal kihi ham atin ahi. Sutvum jong intom lang a agah vah lelen ahile Helhaipan ting ana lemmin, hichun Sutvummin hepa ipi ding hitam atile Helhaipan eh.. jan nilhah a kholhang ahin sap uva tuni a pat a koiman vohcha atollha theilou ding gan neijousen aki kulkhup cheh ding ahi atiuva le akan nading tia kagah lem ahe atin ahi.



‌ Anneh phat ahitan mijouse an neding in dokhang ahin um gamtaovin ahi. Annehtoh kihoulim athouvin ahi. Helhaipan Sutvum koma chun akiman chah danho chule ain chen u phatah in adong in ahile Sutvum in im umlou vin imajouse chu aseipeh tan ahi. Helhaipan hitiho ajah phat chun alung anommo pantan ahi ajeh chu inchen kibang ahijeh uva joule kachanu to hung kilungset intin gentheitah in hung khosah unte ati ahi. Sutvum in Helhaipa maiso kikhel dan hole alung nopmo thim chu amun ahile aman jong anneh chu ipi aneh a huilai ahet ham jong akihetthe tapon ahi. Anneh jouvin Sutvum in Helhai nukoma henu keijong inlang jon tange nisa jong asang tai atin ahile Helhainun boi ana khongai tadin atin a ahcha hen chu aga ladoh in boi pehtheila kaneipon hichi hi kipoh inlang nain kote toh ana nekhomin tin apen ahi. Sutvum in la alah nompon hinla Helhaiin kilah o heu ima cha hihih jongle tin nuiseuvin ahin jollin ahile Sutvum injong Helhaivet toh alah akopin chujouvin inlang ahin jontan ahi. Lamkah in Sutvum jong amale ama akihouvin chinu tah chi mainah sanin kadei hih beh e atin ahi(chinu tah chu kadei val jenge ati na ahi). Lamsuh lamtou helouvin kipah tah in ahung in ahile gulngongsan in alampi chu apal tan pehtan ahile ama jong alungthim anompon apot le a ahcha akoiin gul chu aga that khoh tenin ahi.


‌ In alhunin anun boi ipi dinga nache nava na ding seiji louva namoh pot jiham? atile Sutvum in eh….. ima jong ahipoi jan nilhah a chu CHAMCHAH khoa kona numei minin kapu Sehthang koma hung hina kile ngam lhon hih a kaga thah le jan asot phat a kahung ge pai2 ahitai atin athil toho chu anu koma asei in ahile apha e boi ipu ipan “mipaipeh a ahet masatle eima paipeh jong adime” ati chu atin chujouvin akongvo akibu tokitnin aponkhon chu akhong jom kittan ahi. Ajing jingkah in Khupjathang in Lomlhang ahin samin ahile Sutvum in jong gang chellin akigongin agolpa Nengtinlen toh ana mache lhon tan ahi. Nidang bangin Sutvum in akam akeh tapon thipbeh chan aki chol nau bung a chun atou lhontan ahi. Agolpa Nengtinlen in adatmo tan agolpa koma chun ipi nati ham tuni chu nathip beh e ole boina nanei ham atin ahile Sutvum eh.. ima hilou pi chutin alung sunga thil umho chu alep tan ahi.

Alomho u jong ahung kim phat uvin atou na u bung a konin akipat doh kit tao vin ahi. Anatoh u chu tha kibang cheh ahijeh un matah in ahin joutaovin ahile ama jong athangkam chu aga vepan ahile sakhinou khat ana oh in aman jong kipah tahin ahin kipoh tan ahi. Janin agolho toh lhavah noiya avah lele un ahinla ama chu nidang tobang in alung mong joutapon ahi. Agolho hetkou kahin Theithup phungnoi kem kido noiya chun aga touvin agosem akadoh in ama ding a la akisem ho chu asain ahi.
Sutvum lomgoi phat ahijeh in matahin athouvin akigon ama ana jinglha masatan ahi. Anneh jouvin Lomlamkai pa Khupjathang in kholhang ahin sam tan hiti ati

“Hungkon un Hungkon un hitih chen ipi bolden nahiuvem ? Selvun Saivun hona nahiuvem! nisa sangkit ding ahitai ati” .

Lomho jong ahung kondoh un aw kibang chetin heijam asam un loulam ajon taovin ahi. Sun atou tou un Sutvum le aloipa chun thinglong chunga pashi ho chu aga lhoh lhonin ahi. Sutvum in agolpa koma golpa nakoma tuni thilkhat kasei nom e atile seitang ipi thu hitam boina nanei ham atin ahi. Masang a pat a seiding kati le hiti ho a kikihou khalou ikihi ji jeh a kakiphatlam ji ahin hinla tuni vang jahcha helouva kahin sei ding ahitai ati.Golpa masang a CHAMCHAH khoa nungah teni kaga thah teni chu asangjep heunu chu kalungse in kalungin akilang lang jengin kasumil thei tahih e ipi kati ditam hahsa kasa lheh e atin ahile agolpa Lenen in chichuba hivehta naum chan gei in akikhel jenge kiti! olmo hih ta tua ilom juihi jouhitin khatveibeh ini lhona igavil na hih diham ati. Hiti a akihoulim lhon chun Sitvum naonu Chinlhai in heu u hung lhono kipat phat ahitai atin ahile ama ni jong maban agajom lhonkittai.

Phatchom khat jouvin Sutvum injong alom ahinjui lhung tan kipah tahle thanom tah in agolpa to CHAMCHAH kho jonin ache lhontan ahi. Khosung alut lhonle inmasa pen tein mai a chun chapang honkhat kangchong ana kichemun ahi. Jang jella Helhaitein jotjeng di chu nopmo asah jeh chun chapangho lah a alen penpa chu akouvin Helhai loinu Kikim tein akihil sah in ahi. Kikim tein aphah phat lhonin kelkot a pat in asamin ahile anun ahin houvin “ama aumpoi intomlang a vohan pehin ache e ahin tin ahi”. Amani jong alut pai lhonin chomkhat atou lhonin ahile Kikim ahunglut pai in aman jong adatmo lhehin ahi. Anun jong boi ana kihoulim uvo lhanga malcha me ding sii gasuh inge atin apot dohin ahi. Chuin Kikim in Sutvum koma heu ipi dingaba nahung hinham? boina umham atile eh…. ima umloupi moh a kimu louna asot val phat a kahung khol jin lhon ahi ati. Kikimte in a konin ahung pot doh un lam lhongpi chu ahin juisuh un ahile Haithei phungnoi khat aphah phatnun Sutvum in Kim among a Helhai huiya um g hita, ole ipi ti hitam atile Kikim in ima atipoi naki mupi nomham? a um lhon ta oo ken gokou inge atin Helhai tein ajonin achein Sutvum teni jong Pal a chun akingai lhonin Helhai hungdoh ding chu angah lhontan ahi.
~ Sasat Baite
banjom kitding

Previous articleHENU, NA ANGLUM KAKOI NOMME PART I(ONE)
Next articlePathen Laitan Hidin Kagel Thei poi-I