Home Sasat Baite NGOLNA THEI KHOP LUNGSET(III)

NGOLNA THEI KHOP LUNGSET(III)

212
0

BY:Sasat Baite


banmasa jom…….

(Sutvum teni jong Pal a chun akingai lhonin Helhai hungdoh ding chu angah lhontan ahi.)

Kikim jong kelkot agah lutle Helhai twithal dingin ahungpot doh chetnin chuin Helhai in Kikim koma chun Kim ipi thu um hitam tua nahung chu akilom mo na e … atin ahile Kikim hi ama masa a eihung thah lhonpa chu ahungin nang chu kaki mupi nomme atichula atile Helhaiin huiya um ta oo atin ahile Kikim in lamlhongpi a khun aum lhonne aloipa to ati. Helhai jong atwi thal ding don talouvin gang chellin adel pai pai tai. Sutvumle Helhai akimuto lhon chu kilungset sa to abang jeng lhonnin akipah lheh lhon jenge. Abonnun lamlhongpi a konin akijot tou un jao loulam jotna jaolampi pang Theipi phungnoi song chunga chun Sutvum chu atou lhonin aloite ni chun lampi panga angah lhonne. Atou lhonna pat chun koima apaopen aum lhon tapon, kiphatlam tahin Sutvum in Thing chunga vakhu toute ni kidai chu aven ahi. Sutvum chun Helhai chu alung set maman hinla lungset ana neikha lou mitojong kibou khalou ahijehin seipat ding chu agelle iti patna iti chai ding ham chu ahethei tapon ahi. Alangkhatna Helhai jong numei ahitoh numei in hitobangho gahpat ding chu nom asa theipon bolding het lou manin alol akhongin ahemm…. atijin, alung gel a chu Sutvum in seinom anei a ahile hinsei jengle ativang chun akhatpa atipbeh jengin ahi.

Asotval jeng phat chun nungahnun ahipoi heu hibang pahhoi tamlah a alingnei keikoma hung nahim ipi seipeh nom nanei ham ati tan ahile gollhang pan ahinai pahhoi atamme hinla
“pahcha pahhoi le anamtui tam jongle tangpan alingnei cju adei in alungset ne, koiman apah alolhah ding chu adeipoi ati”

Helhai:Heu kaling atam lheh e loule chun alingin nasut lou dingham?
Sutvum:Ahinai aling chu tam nante, hinla aling umlou hile itiba pahsot ding ham?
aling chun eisut dingmong ahi, aling chu apah veng bit a pang ahi ati (aling atihi inkote nule pa teho aseina ahi)

Hitia asei phat chun Helhai in heu imasang lhonna boina ding atam lheh e ipal jou hin ding hinam atile Sutvum in ipi dia lung kham nahim kachanga ima cha bol jou hih jongleng nangtoh bolmo ibol doh lhon ding ahi ati.
Helhai:Ahile heu dettah a pang jing hite ikilungset nahi moh hisah poite…
Sutvum:Lungkham hih in kei kaum nai ati

Asotval phat chun Lena ahung tuhsan ahile amani jong kiphel thethun ahung doh lhonin ahile vai hai phat ahijeh in loukon ho tampi toh akisuto un ahi. Helhai kholjin mito hitia akijot jengchu khomi pihon amun ahile adatmo un ahi, ajehchu milah a lhakhalou chule apa jong mikhoh mi noiya kun nomlou ahi.
Sutvumle Helhai chu aki lhalel lheh jeng lhonin hinla aloutheilou ahijen chun Sutvum jong aloipa to akho lang u ahin jon kittan ahi.
Lenan aloipa koma ikholjin na lhon chu itobang nam atile Sutvum in alolhin na hetsah nan ahung nuiheu vin ahi.

Jan kho muchip chep in akhou chu agalhung pan lhonin in alut joh agah toulhon le ananu ahin houpai in
Sutvum nu:Huilang a nache lhonna tu a nahung bep lhonha?
Lena:Henu gollhang nungah koma lai kileng nah ta nang jong chu…
Sutvum nu: Chamchah hikit veh ta na?
Lena: Eeeh!!! henu nangin jong nahet ham tin lung dong tahin adong in ahi.
Sutvum nu: Tulai toh ding atam toh huilai nava lele sang in napute channu Nenghoikim khu kivet ngapto thusei lasah ahah e, napa umlouto chomchou chunga chem ahemme ati.
Sutvum: Ashii… tiho hi sei ji hih aw.. iti ilungset loutoh kiki cheng ding ham? ahah bouve ipi hile buhin thuh doh o Neng tin anaonu bu thuh din asol tan ahi.
Sutvum le Lena chun an ane lhonin chujouvin sominn lang ajon tou lhon tan ahi.

Alang khatna Helhai umchan chu khomite amuhon ahilou louvin apa koma asei un ahile apan jong ima thu khol toh louvin miho thusei chu amoh tahsan tan ahi.Helhai pan alung agel gel jeng in kachanu hi keng ahin nei a keibang a genthei na ato lou nadin inchen hoi khattoh kichen sah inge tin akigel tan ahi.
Jingkah khat leito a vohkong ding ana suiin ahile haosate chapa lenpenpa Helthang chu ahung kholai leng in Helhaipa chuto atou lhonin ahi.
Laipao(Helhai pa): Thang itihle jinei di nati hi tam?
Helthang: Hepa kahe hih e inle loujong phaten kisemtoh in tin chutahle kiji nei nante.
Laipao: Apha e gollhang inle lou kivettup masah ngai mong ahe.


Thang nang dinga olmo ngailou, kachanu jong umna chu nadeile koima kipe ponte nang tailou atin ahile Helthang jong alungthim in akipah lheh in ahi.
Helthang; Kipa umme hepa nangin chutia neigel khoh atile.
Laipao: Olmo hih ta ken kabol thei chan nabol peh nang e ati.
Chuin Helthang jong lou kon ding ahijeh in inlang ajon tan ahi. Helthang jong alung thim in Helhaipa toh akihouna chu akilang lang jeng in ahi.Alou konna a agolpa Seipu koma chun Helhai pa thusei ho hu asein ahile agolpan iti danna chuti kitta Helhai chu mito kingai hilou ham? tin adong in ahi.
Helthang: Among mong a Helhai koito kingai ja ooo…..
Seipu: Amin vang kahetlou Mechangnung ho hile kilom a chu….
Helthang: Ooooo chuti dan joh chu ham tin akha sudot dot ne
Nikhat Helthang in anao nu toh sum chang ana suh in ahile Laipao jong aga kholai leng in Helthang chutoh aki houlim lhonin ahi.
Helthang: Hepa ipi thu hitam tuni tah atah a nahung kilommo sanna…
Laipao: Ima thu hiloupi moh a keijong in kivah doh kha talou phat a kahung va jap hibou hi.

Laipao: Among a Thang ama sa a nakoma kasei chu ipi ti nagel tam nanaonu Helhai chu.
Helthang: Hepa kahe ta hih e mi kama umsa lah doh a gah neh jeng di chu Chungmang pan jong phal deh ponte. Numei in angai lou ang akoi di chu ken jong kadei deh poi e, kenjong lungset dang kanei e atitai.
Laipao:Ipi thu um hita oo Thang?
Helthang:Hepa Helhai in jong lungset dang anei ahi, haosa khat jong kahiuvin mi kingailai gah suhkhen jeng ding chu anop theipoi tin apot doh tai.
Helhaipa lunggel le ngaito bangin thule la ache lhah thei lou phatin alung han na jouse chu Helhai chunga amoh chuh sahin Helhai chu insunga adei bangin jong aum thei tapon hinla Sutvum alungset jehin hahsatna tamjongle athoh kut kut tan ahi. Nikhat ma Helhai jong Mechangbung a agolpa koma che ding in akigon ahile ain lhang pa Lungougin in ana hedoh in ahile apa koma agasei doh tan ahi.(Ajeh chu masang a patna Helhai chu adei chat ahin aseingam lou ahi. Tua hi apa su lung lhai leng kaki chen thei lhon ahi tia kung agel ahi)
Apan ahet doh chun lunghang tahin insung alut in ima cha seibe louvin Helhai ngeiphe chu amoh beh jeng in ahile amai asan jeng in, akap dentan ahi. Chu chini a kipat chun in jong akhel sah tapon hinkho chu Helhai dingin ahah cheh cheh tan, chuban in Lungougin chu Helhai vetup ding in apan sah tan ahi.


Nikhat lunghel tah in inmai a atouvin ahile chapang hon khat ain mai uva kangchong kichem dingin ahung kikhom taovin ahi. Aman jong chom khat jouvin chapang ho chu akou vin, koi ham kolkai kapeh ding atile chapang hon kei.. kei…. kei….. tin asam taovin ahi. Helhai in chapang ho koma chun kathu sei nanop diu hinam atile chapanghon jong henge… henge…. ati phat uvin kolkai apein aneh sah tan ahi.
Aneh chai phatnun chapang ho koma chun Mechangbung a che uvin lang Sutvum kiti gollhang khat naga hol doh diu kanu ngah in nithum masang in hung tei tei in, kasei ding thil khoh tah aum e tia naga swi diu, ken balbut kana honpeh kit diu chu a… tin chapang ho kipa pa nadin asei in ahile chapang ho jong chu alhai jellun ahi. Chapangho Mechangbung alhun un suh na ding sah nading ahe tapouvin amoh va lele un ahile numei khatin chotlep a chang asuh aga toh khau vin ahi. Chapang hon jong chang sunu chu doh ding atiule adong ngampen aum tapouvin aki noto lele un ahi. Alah a alen pen pan kei donginge tin ache tai.
Chapangpa: He ngah Sutvum te in huilang ham?


Changsunu: Chuilang khu he ipi tiham? tin ain lang u chu akhut muh in akoh in ahi.
Chapangpa: Kanu ngah in thil khat eihung sei sah uva…. ati
Changsunu: Ipi ham sei tao kei koma anao kahi chu, ama louva gageh a hungnai lou ati.
Chapangpa:Kanungah Lhalhai in nithum masang in hung tei teiin kasei ding thil khoh tah khat aumme atin chuin chapang hojong akile kittaovin ahi.Chapang ho akile lamun khosung lamboma a lhun leu Lungougin toh akitoh uvin ahi.
Lougougin:Hey!… nangho chu huilang a nava lele u haimo.
Chapangho: Kangngah Helhai in Mechangbunga thil sei a eisol u hichu.
Lungougin:Ipiham nasei sah u, Hang!seitao nasei loule mol a kajep diu chu atin hanon ano in ahile chapang hon jong aki chat manun thu umdol ho jouse chu asei taovin ahi.
Chutia thu ajah phatin Lungougin injong Helhaipa koma thu aga lhuttan ahi.Helhaipan Lungougin koma chun nanaonu hi phate chan kivet tuptan nang dinga kakoi ahitai, nangin nakivet phatle nangthu ahi, ijem tia Sutvum ahung kit a ahile voh thei ham ipi lothei ham naloi hoto ana ngaito taovin tin thupeh aneitan ahi.
Alang khat a


Chuchini a chun Sutvum ahung kile thei pon louva chun ahung vai tham dentan ahi.Ajingin louva patin inlang ahung leng lhatan meding Ansonglong, Tingdon, Thingthu, chule adangho ahinpon ahi.
In alhun jou anneh jouvin anao nu kipah tah in ahungin heu thil khat kasei peh di… atin ahi
Sutvum: Ipi thu ta tutah hin sei o ngangai inge?
Anaonu: Namoh ngai ngai di na?
Sutvum: ummm
Anaonu: Namoh ngai ngai dike kasei lou di….
Sutvum: Ole seita pha tah a kangai di chu
Anaonu:Oole….. Chamchah a Helhai in nithum sunga hin hung vei tei teiin thil khohtah khat aumme ati.
Thu kisei hochu Sutvum in atahsan pon ahi.Hinla thu umchan ho chu phatah a aseipeh phatin aman jong nah nahin atahsan tan ahi. Hitia kipah tah a Helhai koma che ding a chun akigel laitah in api ahungin boi tuni nahung lhun chu kipa aum valle keichunla nahung lou ding ham kattia kana lung kham keiyin, jingle naputen naopui nakin anei diu ahin, napa la aum tapon nangbeh nahung jao tei tei ding ahi ati. Sutvum in Hepi jinngle kaum theilou ding ahi atile apin huiya boi chuti nasei ham naum louva khoh ahi huima chan kigo hih in tin ache pai kittai.Sutvum chun huilanga penna che a ipi pen bol ding ham chu akigel lhathei tapon ahi(ajeh chu masang lai a chu puten tute chunga nganse na aneileu koiman apal keh thei jilou u ahi).


Helhai in vang kinem tahin nini ana ngah in ahungdeh pon ahile numei lunglhom ahito Sutvum hin kingaipi adang anei ngap hitam tin ana lung neu jin ahi. Nithum lhin ni beh le hung teitei nante tin kinem tah in angah tan ahi.
Sutvum chu pute kin ahijeh chun Helhai koma che lou dingin akigel lhatan ahi.Sunni lhum keiya apute kina apan vang chun alung anom theipon alung a Helhai kinep na athona akile ding chu agel in ahile nopmo asa lhel in ahi.
Nithum chan Helhai in Sutvum hung ding chu angah in hinla akinep na bang ahitapon , ama jong aki song lel pan tan, khatveile apa thusei chu nop ngap ding hitam tin akigel jin ahi. Nithum nilhah alhing tan Sutvum la ahung tapon jan a emu thei tapon jan khang kimin polang a apot dohin chunga ahsi somleng ho aven la hitin abolin asan ahi.
Ala chu;

“Ahsi somleng som alengtai,
Aw kalungsetpa jong som leng tante,
Genthei keiman ahung ding kinemin kangah jing e,
Aw laidip adapme gol na tongso kajah louhi,

Ashi somleng chenlang kalungsetpa koma
Keiman kalungset e gatin,
Lumsong chunga tongso nem heu cha neivai lhah na,
Awcheng chu lungmit in alang jing e.

Milni him2 kanei theipoi gol,
Milthei hileng sotin namil tange
Kumle lha kihei in phatle nijong kihei loiin,
Kagol ngai to noma kale na din.

Chunle joten khenna ding thimthu lel jongle,
Iti kalungset kamil jeng ding ham?
Ami kimim lai hungleng jongle ,
Kagol ngai lou ang koi ponge”
tin akap tan ahi.

ban jomkit ding………..

Previous articleMUNPHALOU
Next articleKaloipa te inn