Golcha hinkho thusim
Written By: Naocy Haokip
(“Thangset sumsel kiti hin eima chunga manthahna ahinlhutji ahibouve,”)
(3rd Episode)
Auto khat kakilah-in kachangin in kajontan ahi.
Insung kagalut le athipchet jengin, kenjong “Henu, tia kakoule Kanivah bed room a kon ahungpot doh-in, “nahunglhun hitam? Boinu” tin chibai eibol’in vailhun taona kasem ding ahi, tin taona asem loiyin, asemchai chaiyin “Heni, kanu la am? Tia kadoh le lupna langa eipuilut’in, kanu chu kagah mu leh…
Vokaden!!! Alu le amai jouse ana kitom (bandages) in, “Henu, tia kakou le amit jong ahah tapon, kalaina val’in kanu chu kakol’in hakan kakap tan ahi.
“Henu, ipi dinga hitia hi neivailhun jeng ham? Ipi ti nahiham, henu hungthouvo kahunglhung tai, tia iti kakouva kalo vangin amit beh jong ahasah lou phat’in kani in “boi, houpi thei ahi tapoi,” atin.
Kei: Heni itih a kona hitia um hitam?
Kani: Nithum ahitai, hospital a kapui le sum umlou jeh a ajen nomlouvu ahi.
Kei: Heni, chen tumama in hospital jon taute, tia seipumin kahungna auto chu kagavet kit le auto tolpa chun an aneh jeh chun ana kile naipon hijeh chun gang tah-in kagongdoh-in hospital kajon tauvin ahi.
Kakholche na von jong khel manlouvin hospital kajonin lunggim tah a kaum laiyin KKL lamkaiho phabep in athu ahinjah-u hiding ahin, hospital a eihungvilun ahi.
Ipi ti ahi jong kahepon, chuin KKL lamkaiho chun kani komin thudoh aneiyun kakihou limun ahi.
KKL: Henu, ipi tia hitia um ham? Akisukha ham? Ahiloule mi khut nung ham?
Kani: Kenjong ima kahe poiye, ajeh chu Khonomjol langa kaum ahin, nikhat Joicy nu chu anatohna a kon inlhung talou, jan asot phat’a khosunga pasal gamlenga chehon athisa banga agamudoh uva ina ahinpoh lut’u ahi, aboipi, asinsah ding umlou jeh a kei eihung kouvu ahin kei kahung jeng vanga aloje kahet lou ahi, hospital a pui dingla sumlepai umlou toh kachanu kapum nga tho jeng ahi.
KKL: Ohh!! Chuti ahile ama thu akidoh thei masanga boi ding dan ahi, ipi hile lungkham hih-un, keihon jong jochanin hin kithopi jingnau vinge.
Kani: Lamkaiho kakipah behseh jenguve, kachanu jong hi agenthei behseh jenge khola chea von jong khelman louva kahinpui doh jeng ahi, nangho jalin kalung among lheh-e.
Hitia kakihou lim jing laiyu chun emergency room a konin doctor ho ahungpot tauvin ipi tiham tia kadoh ule.
Doctor: Amahi akisuhkhahna a serious lheh jenge, atilum pet lai hile aje umding ahin, tua ati dap lhah nunga hung kipolut ahijeh-in jochanin pan kalauvin hijongle nanu uhi amit’in kho amu lou dingin aumtai, chule alungthim lam jong boijep jep nalai ding ahi.
Keivang hichan kajah phat’in kalhase val’in pam langin kajamdoh-in hakan kakap tan ahi,
“Kanu chu ka it nalome o, hibanga genthei tincheng thoh a eihin khoukhah a tua gentheina chom chom athoh be ding kadou jou poi, henu nacha kei nei ngailut val jeh joh ahi, tin lhase tah-in kakap kap tan ahi.
Chomkhat jouvin kani le KKL gollhang ni ahungun eipuilut kit’uvin kanu chu houpi thei ahilou lai jeh chun kangah jingun ahi, jankhovah-in ihmu louvin katoupiuvin ajing nikho 10:00am in checkups abolkit’un ahi.
Nilhah lang 3:00pm vel’in kho ahin hetan houpi thei ahung hiphat’in eina kou kou jeng ahitai, nurse khat ahungin “nanun nakouve” eihungti chu kaja manpon kalhailut le kanunga ho jong ahungun, kanu chu amit teni le alu jong akitom nalaiyin ahi, hichun eihin kouvin.
Kanu: Boinu Joicy nahung hitam?
Kei: Kanu chu kakol chah kheh in, imajong seithei louvin kachuti ka tan ahi,
Kanu: Boi, ibol’a naka ham? Kapji hih-in, nahunglhun kana ngalel val ahi.
Kei: Henu, kahunglhun nangalel leh ibol’a kahung lhuna kona neikasah ham? Kahung lhuna kona kakou kou jeng ibol’a neihoulou onk? Mi anuten airport a hung vailhunuva kipah tah a kikol to uva, ibol’a kei koimachan eivailhun lou, in kahunglhuna jong kani bouvin eivailhun ahi, nangin neivailhun poi, kalha ase e.
Hitia kap puma kanu kakol’a kasei ho chun kakoma um jouse jong akasah tan ahi, chomkhat jouvin KKL lamkaipu chun eihin houvin.
KKL: Joicy phat chomkhat neipeh thei diu ham? Thudoh kanei nomuve.
Kei: Ole Sir, katin kanu lupna mong langin kakikhin doh tan ahi.
Chuin KKL lamkaipu chun kanu khut chu atuh-in, thudoh aneiye.
KKL: Heu, kei kahileh KKL (Kuki khanglai lompi) president pu kahin, nangma vedia hung kahiuvin thudoh themkhat kanei thei diu ham???
Kanu: Henge, eidongin, keima ima hilou hichangeiya ngailutna neitah a neihungvil jeh-uvin kakipah-e.
KKL: Ahile Heu hitia serious tah a nahung kisuh khah hi details nasei thei ding ham? Chule ipi nabolna a nahung kisuh khah ham?
Kanu: Ninga masanga chun jingvai kakon kit tan, hiche nia kanatoh chu gamlah noiya thing (wood) katan ahi, sunkim donin kakicholin nilhah 2:00pm lah a kakipat kit le kavel lah chu mi husa tobang kajan, kavel ho kavet lela ima kamupon lungmong tah a kathingtan katan jing laiyin kanunga konin thingtum khat’in katuhkhuh tah ahung kiveiyin, tol’a kalhun ima kahe tapoi, hichun kamit kahah a kavet le kavel’a chun pasal thum amai, amuh kitom tobang kamun, numei khat jong chutima chun akitomin kamun, chujouvin abon chauvin akengin eichonun aban vang kahe tapoi.
KKL: Ahile hiche ho chu nahet tahbeh hinam? Koi ahi mi khatbeh a awso hoa jong nahet lou ham?
Kanu: Koi ahiu kahepoi, mi tahbeh ahiuve vang kati ahin, ole kalu nat val jeh a chu kavel’a thingphung ho chu mihem lima kamu ahidemla kahepon, atin ahi.
Keivang chun kaginchat danin college akon kahung kilea eina lamtin hochu hidin kagingmo pai jengtan ahi, kanu jong ahung oldom phat’in hospital akon in kahinjon tauve, KKL hon inmun gei eihungthah-un kanu vang chu amit’in kho amu tapon asun ajanin kakai tho lele tan ahi.
Class-XI exam kabol ding nikho ahung hitan, kanu dalhah ding kanop tahlou jeh-in exam bol loudin kaumtan ahi, pon kakhongjin kanu kaumpi jin kadalha nom tapon ahi, alangkhat’a kani injong sot tah eiumpi lhon ahitan, hospital akon kahung doh doh uvin inlang ajontan ahi.
Phat le nikho ahung che jingin nikhat kani le kagang ahung lhonin ka-Uchonin service amutah jeh a lopna kin nei ding ahin, bazaar a thil ima kagachoh diu, kahung kile tengleu thinglhang gari kahinpui diu ahin, kigosan anaum lhonin eiti lhonin hiti chun kakigongun thinglhang gari chun kache tauvin ahi.
Haptakhat kaga um lhonin kin jong thupi tah-in kamangun thinglhang kho hijongle officer khat aumtah jeh chun government hetpeh ahung hitan, kakipah lheh jengin ahi, ajeh chu “Khonomjol hi kapa haosa hina akon ahijeh-in kapa minin kangailun ka-Uchon jala government hetpeh ahung hichu jakipana asangin ahi.”
Ka-Uchon jong atohna langa akile kit tan, kanu toh keijong inlang kahinjon lhontai, lam hahsa lai ahiteng kapojin, anomlai ahiteng akhut’in kakaiyin hitia kache lhon chu kagangin nom asapon khosung gollhang ni eihungthah sah lhonin ahi.
Keiho chenna molcham kho gamgi kaphah-un chomkhat kachebe leu pasal khat athisa bangin ana lumin mi khutnung mong mong ahichu kaheuvin kaloi pasal teni chu akicha lhonin dalhah pai ding katileu pasalpa chu ahaidot dot nalaiyin hijeh chun kaloi pasal teni chu apodin katemin ken kanu chu kakaiyin in kahinpo lhung tauvin ahi.
In kalhun lhunin kanu le gollhang khat chu ina kadalhan gollhang khatpa chutoh akisukha pa chu hospital in kapui lhon tai, koi ahijong kihelou ahijeh chun ainkote jong akihol theipon KKL lamkaiho kahetsah le ahindel lut’uvin amaho khut’in kadalha tan ahi.
Phat le nikho ache jingin nikhat hi phaiya Vengnom kiti kho khat’a “Diamond Jubilee” Kimanna dingin kouna eihin neikit tauvin, katha anomin hijongle ka-insung boina ho jeh-in keidin ahahsajin ahi.
Kanu in “Boinu, gache tan min kineppi tah a nahin kouva ajole min akiletsah nahin tinte,” eiti jeh chun keijong kapa damlaiya becha a analhen kapa Sempu chanu Bemshy chu kanu umpi dia kagasei leh anomuvin hijeh chun keijong kache tai.
Bazaar kaphah chun KKL lamkaipu chun eikimupin, “Joicy, hospital a nahin puipa chu thu jong kidong man louvin asuhna kahe tapouve, hiche mobile (samsung galaxy) hi choiyin lang emergency thukhoh aumteng neihin hetsahjin,” atin smartphone neocha khat chu eipen ahi.
Kalah nomlou ahin hijongle aman thukhoh kijahmatna dia eipeh jeh chun kenjong kakilah tan ahi, a sim card thah activate bol loulai khat toh eipen bazaar sung mama chun activate kabolun number kakipetouvin kenjong Vengnom kajontan tan ahi.
Kipah tah-in kin chu kahin mang chaiyun Pathen vahchoila ngeitah tah kahin sauvin kin kichai phat’in mipi chu ama ama inlang cheh ajon tauvin lunghel aumlheh jengin ahi.
Kei chu “Jubilee committee” hon car khat eihinsolpeh-un, bazaar chan eihungthah diuvin gollhang ni in atol lhonin kahung tauvin ahi.
Bazaar kahin phah diu konin police check post lah in gari tampi akitang/akinga den jengin kei chun ka phone a la kangaiyin Lhainei Haokip in asah “Kapa deium, kavahchoi chimlou, Kapa ngaium kathangvah chimlou, itih hijongle nangma vahchoina la sahchim tih neilou ding, kadamlai sungin,” tila kahin ngaiyin lungmong sel’in car sunga chun katouvin ahi.
Phat sot thimpi kakingah jouvun Police khat’in keiho gari chu ahung dongin kei eimu phat chun akile kit’in amasanga gari jouse chu aban lhaisah tan ahi.
Keiho jong lhai ding kagot leu eikhamuvin, police station maiya kei touna car chu atol lut sah tan ahi, kalung anommo lheh-in hijongle athu ala ipi jeh ahi akihet lou jeh chun ima akisei theipon ahi.
Chomkhat jouvin SL sap khat’in car sunga konin hung potdoh-un, ahintin kapotdoh leu.
Police: Nang hi Joicy kitinu chu nahim?
Kei: Henge Sir kei kahi, ipi thu um ham?
Police: Ahile amani hi koi ham?
Kei: Jubilee committee in kei bazaar chan eihungthah dia ahinsol lhon ahi, gari tol ahilhon bouve.
Police: Ahile tun amani hi kilesah tan, nang office a thudoh themkhat kanei diu ahin nachepai ding ahitai, ima thuboi val aumpoi, ati phat’in kenjong gollhang teni chu kanung sol tan ahi.
Amani chedoh doh-in keichu lockup a eiumsah uvin, athu ala ima kahet lou vangin akihou danu chu kangai ngaileh aphat toh lou phat’in KKL lamkaipu chu message kathot’in.
“Sir, athu ala ajeh kihe louvin Police station kalhungtai, tuhin lockup a eikoiyuve, neihin kithopi thei ding ham?” tia message kathot le a delivered paiyin chomkhat jouvin KKL ho chu ahung lhung pai tauvin ahi.
Chuin ipi jeh a Joicy namat’u ham? tia adoh le office a eihin koulut’uvin kalut’in KKL lamkaiho toh police Sl pa toh katou tauvin ahi.
KKL lamkaipu: Ipi suhset aneiya ipi case a namat’u ham?
Police: Hiche lim hohi veuvin, tol that case jong ahi, chule dangka sang somni jong agu e, tia Fir ahung kibol jeh a kiman ahi.
Kei: Ipi lim hija?? Tia lim ho chu kagah vet leh “Khonomjol langa kona kahung kile languva lampia athisa banga lumpa kaphoh thoupet lim hochu ana hitai.”
Chuphat’in KKL lamkaipu chun hiche hi jou ahi, hichepa hi aman lampia athisa banga amua hospital ahin lhut ahin, abanin keiho khut’a adalhan keihon kavet kol kit’u ahi, hinla hiche mipa chu thudoh kinei manlouva asuhna kihe talou ahi.
Kei: Sir tunia hi gucha case le tolthat case a neimat vangun suhkhel kanei poi, koiham Fir eihung bol chu hilaiya kouvin, keiman kihoupi nange.
Police: FIR hinbol hi amin Thangpu akitin, tua hoiya um ahi kahepouve, nang chu anaman teiyun tia sum jong sangsom adalhah tha ahi.
Kei: Tunia hi “Diamond Jubilee” kin manga special artist a che kahin kipaman dangka sang somni eipeh tailouvu adang koi sum kaga gupoi, natahsan loule kihoupin katin “Jubilee committee chairman” pa ka call in kahousah le amaho jong alung nommo lheh-un ahi.
Kathemmona ima amulou phat’un KKL lamkaiho chu toh kahung kilhonun kahung potdoh tauvin ahi, keiho hungpot doh nungin Jubilee Committee ho phabep police station ahungun hinla eihin lap tapouve.
Hijongle amaho chun thu anapeuvin “Joicy hi avel’a namat thei tahlou diu ahi, case aume tia Fir hungbol aumkit le KKL ho leh keiho joh neihin hetsah masat diu ahi,” tin anaseiyun ahile aban Police in eiman kha tapouvin ahi.
Keijong in kaga lhungin kathilto abonchan kanu komin kasei tan ahi, gentheina ho jeh-in mi musit le noise hijongleng kakipana pen chu “Jesu Christa huhhingna,” kakisan lut chu ahitan ahi.
Kanu jong apenthahna kum sagi lang ahitan, insung chu thomhao lheh jongle kanucha lhona kapenthah lhon jeh chun boina ho jong kipanan kachai thei lhonin ahi.
Jingkah matah-in kanu kapuijin houina taona kaga nei jing lhonin, tahsa in gentheina kisei jongle nelou chalou lom lomin kivat’in kaumji lhonpon Pathenin eiumpi jing lhon jeh-in ima jouse kangaichat chan lhon eipeji lhonin ahi.
Alang khat’a “Kahung minthan doh pat pat le social media facebook, whatsApp ho in tolthat le gucha ahi tin ahung kiso kit tan, hiche pet chun smartphone jong ahung tamjep jep tan ahile kaminset thu chu jou ahivangin atahsan tah tah jong mi tampi aumtan ahi.
Hijeh chun miseiset le vetda kahung chang pan, aguh-in facebook le whatsApp hoa comment ho kasimjin ahile thudih hehon jouthu ahidan le suhminset ding eitiu ahidan asei jiuvin kaguh vet jin hinla koima kadonbut jipon ahi.
Hitia eiseise, eidem ding mi akichu tho jing laiyin jong mun tinin kouna kamu jingin hijongle kakihetmo sah jitan ahi, ajeh chu ahethemlou mi tampin “Nampi suminse ahi,” tichangei thu aseijeh’uvin milah a galhat ding jong kalungneo lotan ahi.
Hoilai munin kouna einei jongleu kacheji tapon, kanu joh phaten kakivet tup’in, katoh thei thei tongin kakhosa mai mai lhonin ahi, ichangei minsetna toh jongleng thutah ahilou jeh-in kapona pon, nikhat le Pathen loupi kiphonna hung hinte, tin kageljin ahi.
Itobangin ka gentheiye, kahahsa e, tijongleng Jesu Christaa lungmonna kanei jeh chun kanitin hinkho chu kipanan bou kaman nom jingin ahi, chubanin “NAHIN DALHA PONGE,” tia kitep Pathen chu ajoulou jeh-in phat jousen eiumpi jingin ahi.
Nilhah khat kaloinu Lhainu anule apa ahung kholai leng lhonin maicham eisempeh lhonin kagolnu thu kadoh le anun hitin aseiye.
“Joicy, nagolnu hi anopsah behseh-in sum le paiya kichem ahitai, class-X afail jouvin asimpha kit’in hinla lekhasim louva school isimle itiba ki lolhing ding ham, ama hi tuhin singapore a aume, atiuvin company a um hinte.” atitan ahi.
Kenjong “Henu, kapa toh nangni themmo kachan lhone, ajeh chu chate hinkho semtupna ding hi nulepa mopoh ahi,” katile dih asa lhonin hijongle aphat vang chu akikhel tai.
To be continue next episode IV.
Lunglut tah a einasim chaipeh jouse chungin kakipana thu kahin phonge, asim jouse Pathenin phatthei naboh cheh-u hen.
Aban jingle simkhom kit taute.
©️Copyright
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
