Home Lahkhom Naocy Haokip NEI NGAIDAMIN BOI-V Final

NEI NGAIDAMIN BOI-V Final

126
0
NEI NGAIDAMIN BOI
NEI NGAIDAMIN BOI

(Crime and Love Story)

Arrange By:- Naocy Haokip

By: S.Lien

(5th Episode)

Ajingin whatsapp news jouse’ah a viral lheh-in comments ho’ah, kamu kha e kiti aum sao saovin hijongleh deljui thei jengna ding aumpoi.

Chochong toh ka room lhon’ah ka houlim jiuvin, Kanu’u mukit kanop dan lhon ka sei jiuvin, Chochongin, He-U Henu phatdan dan khu, ka nuthah ahilam helou tam ahi ,
Nang penna Nu ahi kahet a konin namel lhon akilo na ka mudoh-e, Henu jong melhoitah ahi,
Nupi ahi vanga ati jong nouchet intin, a tungtun meikah pon khubou melse jep a ahin tin,

KaNu kangaina asang cheh cheh jeng tan ahi.

Sutarday chu ahung lhung tan, ka Program gon chu iti chelhahding ham ti kagel’in koima hetpehlou chun kaboi lheh-in,

Ohh! kisei chaita adan dan umnante katin,
A dihtah a chu UThangboi sanga UMangboi chu ka FirstLove ahi jeh-in ka ngai jon, hijongleh UThangboi sei nop peh louding chu hithei kasa kit pon ahi, chuleh Kanaonu Chongboi toh kicheng sa ahijeh-in guh ngai thou nalai jongleng Ka Naonu toh akichen kit diuchu ka deisah jo tan ahi.

Mangboi chu ngailheh jongleng kakichenpi thei ahi tapon, Mangboi ka First love pa chu kakichenpi leh alang alanga melma kahao ding ahitai, ajeh chu kanaonu jipa lahpeh jong kahi ding, chule Uthangboi jong kachunga lhase ding, miho vetdia jong umchan kilom lou ahitah jeh chun Uthangboi sei joh sanpeh dingin kakigel lhatan ahi.

Thangboiyin kei ei ngai, Mangboiyin jong Chochong sanga kei toh kichending lung agel, Chochong jong Mangboi toh kichen kit ding asei ngamlou vanga nom thou kit,Thangboi leh Mangboi kiheto nailou, hung nom di hina hi, Haha kalung thima ti komin UThangboi joh ka call masa tai.

UThanboiyin jong suty alah ahitah thu ahin seiyin Gypsy khat’a hung din akisa joutai,
Chochong toh keini jong kaki go chai tauvin, Mangboi hungding chu ka seipeh poi.
Nilhahlam 2:00pm ahi phat’in UThangboi gari achun Chongboi toh kathumuvin, Gelzang resort lam chu ka jon phei taovin ahi.

Kalhun phat’uvin UThangboiyin theitwi gacho din Chochong a sol’in, ama changa acheding nom kasah lou jeh-in, ka juiyin ka choh jou phat’un Latrine’ah hunglut pa inge He-U nang ana che masan iloipan eina ngahlel khante atin, achuti leh oleh katin kache tai. UThangboi chun eihin galmu phat’in eingahlel thim chu hidi ahin eimu mu chun akhut ahin tung jot’in, Kenjong Theitwi chu kagah vetsah-in ahileh ame tit tet’in, UMangboi jong hunglhung man hidi ahin, thingphung noi khat’a chu eina vet dan ahi.

Ka galhun chun Chochong ngahnan ka houlim’un ahileh, UMangboi, chu lunghang tah-in ahung pheiyin ka khut’in eimanin kaidoh eihin gon,

Kenjong Angol thim mahimo.? kati jengleh eihinkoh san’in

Mangboi: Aleh ipi dinga Tunia kimuto dinga neitep hamo.? Ahin ti leh UThangboi chun kidang satah-in eive lap’in, ahileh, UMangboiyin, UThangboi jong chu a maichang tah a koh-in,

Mangboi: Nang koina,? Na thinom louleh kintah-in pot doh-in, ahin tileh

UThangboiyin, Nang bah koi nahi hija na chuti ki phausah hamo, koi kahi neihet nom’em atin, adip toh pistol ahin suto chot jeng tai, Kati aja val’in, akhut katuh-in Mangboi kom’ah, Koi ahi nahet nom leh Ka Pasal dingpa chu ahi, kagah ti le,

UThangboi chu a lunghang lheh hidi ahin, pot doh-in ka kaplih di ahi ahin ti laitah in UMangboi masanga chun Chochongin He-U Ngaidamo Kapasal ahi atin amasang’ah ahung kido chet’in ahileh, paolouvin a pistol chu a ko kit tan ahi.

Che phat chun keiman hitin kahin sei tai,

Nei ngaidamuvin ima jouse chu keibol ahi, UMangboi toh Kanao kimuto sah ding kanop jeh a UMangboi chelai muna hi kakou ahin, Chongboi min kisei leh hungda khante kati jeh a che tobang ki het khelna chu lhungkha ahi,

UThangboi toh sot’a kona kana kitep nau ahin ama koma jong athu ka seipeh lou jeh ahibouve,, Kati phat’in UThangboiyin,

Mangboi kom’ah, Nei ngaidamo Bhai kei hi milungchom tah Police lah a jong athuchen he masa louva mi moh voh phut phut ho khu kahin Najinu um lou hileh ka khut kalhah manding ahitai.

Ahinti leh UMangboyin Bhai kei mo masa jo kahi e, Nei ngaidamin atin aki chibaiyuvin,

Mangboiyin ahin sei jomin…

Kei miphalou tah Kajinu amo najong umlouva ka deldoh sa Chongboiyin kahinkho ei huhdoh peh jeh-in Chongboi chunga jong kakipah val’e “NEI NGAIDAMIN BOI,” atileh Chongboiyin akol’in a chuti ka jeng tai,

Che lai tah chun unknown number khat’ah call ahungin ka gah pick leh,,

Pasal aw khat’in Chehi Lhingneivah number hamo Hmar paovin ahung kitin

Umm ahi e Ipi hamo kati leh..

Hapta chejouva mimang napost kaNu nati chu hinte chelaiya hin aumin adammo hileh akilom’e hungve o, ihoupi jongleh a paopoi ahung kitin,

Oh!! Hoilai hamo chelai chu

Kamu nao chu Saikot khel’a gamlah khu ahin Hospital kalhut taove ahin tin,

Oo, kipa aumval’e, ka hunglhun tokah eina ngahdoh tei teiyuvo kati leh

Ole ole atin call atan tai.

Chongboiyin Henu Henu atin ahung pengjah jengin ahileh Mangboiyin Kap hih-in Henu imu kitdiu hita chula atin, Gari achun ka kaldoh uvin Keileh UThangboi amasang’ah Mangboi leh Chongboi anung’ah katou uvin eujel’in Hospital kadel’uvin, Kanu leh Kapa jong ka call in ka seipeh-in Hospital kalhung taovin ahi.

A muho chun varanda’ah eina ngah-uvin, ka umchanu chu avet uleh eiginnmou hiding ahin, Hmar paovin ahin seiyuvin amudan hou chu Keihon jong Thadou paovin kipathu kaseiyuvin Lamka mi cheh kahi jeh uvin apao kitho them hih jongleh ka thuseiyu chu kaki heto mamauvin, Ward ah eihung thah lhunguvin a che tauvin ahi.

Ka galut uleh Kanu chu ana gop sitset jengin Henu katileh olchan amit ahin hah in Mailhaisel’in eihin ven, Henu ve O Kanaote ni jong, amahi hi Ka Pasal ding ahi kati leh, Hoi tah-in ahinve kol’in mailhaisel’in alu asun, Chongboiyin Henu atin ahung kap’in ahileh Kap hih-in ati hileh kilomin akhut ahungchat’in, a sangkhol kahoh-in atungtun vet kagot leh a phal pon ka vet tei tei leh Meikah na pon kamu phat’in ka kituh joupon, Henu Nei NGAIDAMO katin kakap jah-in ahileh alhi ahunglong doh-in, a jetlang khut’in kakhut ahintuh-in aveilamin Chongboi khut atuh-in, mailhaisel’in eidalha taovin ahi.

Kipamel putah-in eidalha jongleu “NEI NGAIDAMIN BOI,” tia kam cheng tah a anaseiji ho phatah a kana donbut lou jeh chun kapona dehset’in ahi, mithi kihoupi la phachom ahitahlou jeh chun along damsa chu ka inlanguva kapo pheiyun amaho inmun (Chongboi te inmun) chun ajithahpa lhan koma kalupsah tauvin ahi.

Kanu chu kangai lheh vangin kipahtah-a kana kivailhah man banuva along damsa jong ken kana kivui thei jeh chun kipana khat’in kakipah-in ahi.

Phat le ni ache jingin kanaonu Chongboi jong nao ahin vop tan, ajipa Umangboi toh kilungset tah-in achengkhom jing theiyin, kanu jala sopi a kanei jeh chun kalungset’in aman jong anu le apa bangin eimonpi in kaucha lhon chun kaki lungset lhehji lhonin ahi.

Kanu bei jouvin Uthangboi ten kapalen le kanulen komin mou dong dingin chabel ahin dom tauvin kanu le kapa chule kanaote hon jong eina phatsah sau ahijeh chun Uthangboi toh kicheng din kaum tauvin ahi.

Nikhat hi ka pasal ding Uthangboi gel jing puma ka room sunga la ka-ngai leh Mangboiyin eihin call in kenjong aboi khat tou um ahidem tin kati aja manin.

Kei: Hello… Mangboi kanao damlou ham?

Mangboi: Haha Vahboi nanao adamna e, tua chu kanu toh check up dingin hospital ajon lhone.

Kei: Ohh! Kipa aumna e, ahile ipi jeh-a neihin call hammo?

Mangboi: Vahboi nakoma ngaidam thum ding hi kabat jing ahin, kasei doh theiji poi, kei jeh a genthei tincheng nathoh ho kagelji le ngaidam chandin jong kalom jouji poi, hijongle “NEI NGAIDAMIN BOI,” tunia konin vang Chongboi jal’a sopi khat ihijo tai.

“Lungset masa lungset asange,” tichu mi jousen ahet ahi, phat chomcha hijongle lungset hinkho inaman sunga kakhelna ho chule kei selungmol jeh a kam cheng ngeilou tah a kana houva angdang kasanden kathemmo e, tilou seithei dang kanei tapoi, “NEI NGAIDAMIN BOI,”

Kei: Umangboi phat chesa sei seiya phachom ding ahitapoi, “KA-NGAIDAMSA NAHITAI,” naji jong kanaonu mama ahin Kei mel’in ven lang ahinkhon hin genthei sah hihbeh-o, ama nalungset le kei nei lungset ahijenge.

Ven, lhathah khu kengnei ding kahitan kanao Chongboi toh insung mite toh kim keiya kipahtah-a ilhat khomdiu ahi.

Mangboi: Vahboi ngaidam nei chan jeh-in kakipah-e! Nang mel’a kamu jing ding nanao Chongboi hi ahinkhoa kakipasah jing ding ahi, nakeng neinan Pathen vangboh hung changtan, tin ka aw tobangin ahin seiyin call a cut tan ahi.

Lhathah ahung hitan kalungset pen Uthangboi toh hinkhoa chengkhom din nulepa te kiphatsah dungjuiyin eigom tauvin ahi.

Uthangboi toh kakichen jou lhagup jouvin kanao Chongboiyin Mangboi toh chapa khat anei tan ahi, hiti chun insung cheh chaosa hita jongle Pathen phatna jalin kilungset khaogui ahung jamthah kit’in kilungset ki-ngailu tah-in kabon chauvin kakivil to jing tauvin ahi.

THE-END

“Ngailutnan ngaidamna thahat aneiye,”

NOTE:
NEI NGAIDAMIN BOI thusim part 1-5 chu hichan hin akichai tai, abul’a pat achaina geiya lunglut tah a einasim chaipeh jouse chungin kipathu kahin seiye, asimchai jouse Pathenin phatthei boh hen.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleHEPA KANEO LAIYIN NEINA HIL LE CHUN
Next articleKHOJIN A KICHATPHAT LEH PATHEN A UM E TI AKIHAGELDOH PEN E – Aribam Shyam Sarma