By:-Shonkhogin (Hegin) Haokip
Maranatha Cottage Hebron Veng
Phaipijang Langol Imphal West.
📲 9774096152.
Ka in chu taona in kiti ding ahi, ahivangin nanghon gucha michom kokhuhle sumkol veina inn nasotaove.
Matt.21: 13, John.2: 16.& Mark.11:17.
Jerusalem houin chu Pathen henga taona dingle Ama Thule la a kimanchahna dinga kisa anahin, ahinla, Houbung lamkai hon gucha, michom kokhuh leh sumkolveina munin ana semdohtaove. Gucha kitihin ipi avetsah ham itia ahileh amahohi toh hahsa tonglouva phatchomna kimuding thanom ho chu ahiuve. Anina a amaho hin thudih thutah akhoh sah pouve, adei angai khat u chu amu pou pouva aphatchom pou uleh hichu ahijenge. Tulai in jong mitamtah adihlouva nehguh chahguh kilah a nopsahnom Christian tamtah aumdapoi.
Jerusalem hou-in chu Pathen lunglam bolna sanga, sumkolveina tichu sumlama phat chom na dingin thiljoh thilchoh chuleh sumlhe-na in ana mangtaove. Hitabang chun, tuhinkho in jong Houin hi Taona Inn le Pathen lenggam kehletna dingleh lhagao mangthah ho matna dinga kisa ahin, ahinla tuhin houbung miten chuche ho sangin sumlepai veikan na munle tahsa a kivah-hingna maimaija mangcha jong aumdatapoi. Houbung mi mimal lhagao lama kisemtup sangin kivaipohna kisemtup a sumlepai konna kisuhtup hi mijousen Pathen lama khantou na in alajo taove.
Hitabangbang chun, itahsau jonghi Pathenin anneh twi-don kiholna maimai dingleh sumle pai hola haona le nopsahna muna ding maimaija hung kisem ahipon, hicheho jong chu ahidapon, ahinla adehsetna nahung kisemlona pentah chu ahileh Amasa penna Ama gamle achonphatna kiholdoh masat ding chujouteng chuleh adang na-ngaichat ho jong chu kipeh tha ding nahi kiti ahi. Pathen dihtah a houte din Itahsau hi Pathena dinga Taona Inn chu ihisah thei lou uleh ithilgon dangho jouse chu mohseh hiding ahi. Ajeh chu amasapena Pathen cha himasatpena abana thilpha bolding tina ahin, chuti henlang hileh ithilpha bol jouse chu, eima account a lutchetchet ding ahi.
Amavang Pathen chadih tah ihilouleh ithilpha bolho jouse chu direct a eima account a lut loulaitabang ahi. Account naneiphat phat leh hunglut bepding ahi ti iheuve. Amavang achutileh peh angaipoi natimai thei ahi, chutiponte, nathilpeh ho jouse jong hin nahetlouvanga Pathen koma dinga ol-olla napui ahi ti jong sumil hih in. Hijeh chun, itahsau hi anneh twidon ahilou leh neile gou kiholna ding mai maija kisem ihipouve, Pathen manchah dingleh Ama lunglam boldoh nadinga a kisem ihi uve ti sumil pou hite. Hijeh chun sopiteho, eiho hi Pathen intheng ihiuvin, Pathen in ka-in chu taona inn kiti ding ahi ati. Chuleh aman aseibena a chun, ka intheng suboh a chu keiman ama kasuh mangding ahi ati.
Pathenin athutheng simho jouse phatthei boh tahen.
KAKIPAH-E!
“God Loves You!
And
Wants You To Love Him Back”
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
