By:-Shonkhogin (Hegin) Haokip
Maranatha Cottage Hebron Veng
Phaipijang Langol Imphal West.
# 9774096152.
Tahsana um nahi nahilouvu nangho kikhol lun; photchetna dingin nang maho kikholun.Ahi louleh Jesu Christa nang hoa aum nangho tahin helou nahiuvem? Achutia a nahetlou uleh alhinglou nahitaove. 2.Cor.13:5.
Pathen natahsana hi dih nakisah hinam, na lung oihinam, nalung lhai hinam ? nangma tah kikhol chen in, natahsan nahi adih a ahileh na sung a Christa lhagao theng achen nahet ding ahi. Ahinla nasunga Christa achen louleh, Pathen natahsana chu lhinglou ahi. Ajehchu Christa lhagao neilou chu Christian ahipoi. Tahsa hi lhagao beija athisa ahibanga, Christian hi Christa lhagao aumlou leh athisa ahi. Hijeh a chu, tahsana um nahi nahilou nangma nangma kikhollun ati ahi. Natoh beija tahsan athisa ahi banga chu katahsan e itia aga khatcha aumlou leh itahsan chu athisa hithei ahi.
Tulaijin, tahsan thisa atambeh seh jeh in, Pathen tahsan dingdan jong mi aboigamtai. Tah sana dihtah neichun, Pathen atahsan ding angaijin, Pathen atahsan leh Pathen thu angai angaijin, athupeh ho angaija ahileh amadeile deilou thu umtapontin, Pathenin adeidei chu abol ding, Pathenin adeilou lou chu abol louding tina ahi. Tunin vang Christian kahi tijousen Pathen katah san e atin, ahinla, Pathen thujui alhome. Mitamtah a din tahsan kitihi fashion tichu kijepna dan in aumtai. Christian khat nahija Pathenin adeiho nabol nomlouleh katah sane natina hi nangmale nangma kilhemlha nahi ding ahi.
Hijehchun, sopiteho, tunin kigelphao hite, ihat ihatlou u chu achomin umtaleh, Pathenin adeiho hi boldinga nagut hinam ahilouleh natahsana chu nalunglhai jengham ? Katahsan e tia achon phatna khohsahlou Christian atambehseh jeh a hi Christian machal thei lou ahitai. Mikhat chun, Pakai Jesu hi keima thikhela thia kathoh ding jouse eithohpih jeh a tunia keiman khonunga dinga kinepna kanei ahi chuleh ama athokitjalla keijong thijongleng kathokit ding, ama apa koma nomtaha aumbanga keijong nikhat leh ama koma nomtah a ka umding ahi tia tahsan jouse chu, ama umbang banga amajong umding dol ahi. Hiche hetnahi ineiphah lou jeh uva, tuhinkhoa eima nopnop a umding ithinung phatleh Pathen koma noptah Abraham angsunga touding igot u ahin, hithei lou ahi. Mihemin atutu chu a aat ding ahi, nang in nabolbol ho chubou namu ding ahi.
Achaina in, Pathen katahsane itiuva Pathen in adeile adeilou thil ho ihetkhen theilou uva ahileh mivangsetah chu ihidiu ahi. Ajehchu I conscience tichu asele apha hetkhentheina lungthim hi athenlouleh imacha kihethei lou ahi. Mitamtahhi thilphalou tamtah boljongleh kioimo lou aumin, ahinla alungthim thengho vang chu, thilneokhat abol khelleh alungthimin themmo ahin chanpai pai jeng ahi. Pathen lhagao theng chu nasunga achenleh ase-apha het khenna chu gang yet ahi. Hiche kioimona a kona chu kisihna le kisemphat na bai lamtah umthei ahi. Pathenhi lungthen na kona kimuding ahibouve.
Pathenin asimho jouse phatthei eiboh peh tao hen.
KAKIPAH -E!
“God Loves You!
And
Wants You To Love Him Back”
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
