Home Crosby Haokip NAMPI KOTKHAH BUL(6)

NAMPI KOTKHAH BUL(6)

361
0

Crosby Haokip


Gamsung a thu le la anop nailou jeh chun kanu le Naoshi kakou naipon ahi. Hijeh chun amanin jong kachunga thilse khat tou lhung hintin hiche jeha chu eihin kou thei lhon lou hitan te, tin agel lhonin, amani jong alungnop lhon lou phatin kahin kou ding ngah doh talouvin inlang ahin jon lhontai.

Keiho jong lunghem tahin hinkho kamang tauvin, chuleh kaloipau John jabolnan kaleitol uva mei katih kong tauvin ahi. Chuin kabon uvin kadilsu cheh uvin Pathen henga taona kamang uvin, keima ho le keima Pa henga kaki lhandoh uvin ahi. Chuin kaloi ho katilkhouvin,
“Tunia Nampi a dinga genthei thoh pasal galhang ho, nahet ding u chu ahile, nalungin hoitahin gel uvin ium nau hoikom mun ham? Nop na vang um ponte. Gentheina le kana’n nanung juiyin te. Hahsatna tampi chuleh ingai cheng toh kikhenna kolni soh nante. Hijongle puitu Pathen dong jing ute. Tua nagentheinau sumil a kipana jing kho hung vah ding ahitai. Igam le inama dingin lungkhat kisan pang khom ute. Naote ho, toni lhangkai ding ahitai. Hijeh chun kipan taute. Vaigei poute. Inam gentheina sutlham dingin ling le khao tam jongleh kalsong jing ute,” katin, chuin kap pum pumin vanlam kasangin, “Pakai hinven kahinkhou hi, soh bang vul’in, lung ngapna ding beiyin dolchung twivei bang bep kahiuve. Kanam mite dingin kipana jingkho hinvah sah loiyin, kagenthei val tauve. Mite bon noma jalen tauva, kanam mite ipi ti ahidem Pakai,” katin, mitlhi long chut chutin kakap tan ahi. Chuphatin kanao te ho jong alung u asuthou tan, chuin amahon jong thakhat tahin, “Kanam le kagama dia thisan long ding mong kahi,” atiuvin, chuin keihon jong kihan lhona thugol kasei kit tauvin ahi. Chuin keiho jong gam konin kache kit tauve.

Keiho jong khomol a kakal tou tauvin masanga melma ho umna mun kagave tauve. Kalhun uvin melma ho anaum tapouvin, abon uvin anapotdoh tauve. Chuin keiho jong asung kalut un ahile thisan gep tol laha lha thang adimset in, melma ho thisan ahi ding katahsanin, chuin keiho jong kache phei kit tauvin ahile, munkhat’a hin ami thisa ho anavuiyun, achunga song len tah tah tampi ana sekhom uvin ahi. Chuin lhan chu kaven ahile mi 10 vel kivuina ahi ding kaging cha e. Chuin kaloihon mikhat ahin man uvin kakoma, “Sir, amahi melma ho ahiye. Katha diu tam?” atiuvin ahile, kanom pon kakoma ahin pui diuvin kagahsei peh un kakoma ahin puiyun, chuin kenjong kama sanga kadin sahin,
KEIMA: “Namin ipi ham? Koimi nahi ham chuleh hilaiya ipi nabol ham?”
MELMA: “Sir, kei kamin Andy ahin, kadamlou jeha kaloite kaphah joulou phat’a amahon eidalhah u ahita e.”
KEIMA: “Naloi ho hoiya um u hitam?”
ANDY: “Nasei peh leng nei tha lou ding hinam?”
KEIMA: “Nasei le nathat ponge. Ahinlah keiho chunga thil dihlou nahin bol le vang nathi tei tei ding ahi,” katin kagih tan ahi.
ANDY: “Tu le tu hin gunpang a aum uve. Chuleh nang ho toh kidou dinga kigong jing sa ahitauve.”
KEIMA: “Ahile amun a chu neipui lut thei diu ham?”
ANDY: “Napui lut thei nange. Hijongle nahet chula sir, vetang thi deh deh a kium a tua gam khu chan a kache jou nah lai ding ham? Ipi hile nei jendam un lang chutengle che naute,” ati phatin keihon jong inlanga kahin pui tauve.

In kalhun uvin kain uva Naoshi ana umin, kei eimu mu chun akipah valin, eina lamton salam eibolin ahi. Chuin kei le kaloi ho jong insunga kalut un, damsel a kavailhun jeh un, Pakai koma kipathu kaseiyun ahi.

Nilhah langin keijong Naoshi te in a kachen ahile, Naoshi’n hoitahin eina lemin kajah a,
NAOSHI: “Heu, hung touvo. Nang ma ma kahin kisonpi ji vale.”
KEIMA: “Kakipahe nao, nang henu le hepa hung nailou ham?”
NAOSHI: “Heu, amani hung ol hung lhonin te. Ajeh chu hepan toh le tham tampi aneiya, chuleh KSO langa jong panmun atuh leh, tulai thuboi ho sutlham dinga lhai lhai jeng ahiye.”
KEIMA: “Ahile nang koitoh naum khom ding ong?”
NAOSHI: “Heu, itehpi toh kium hih ta la,” tin ahung tot in ahile kenjong kalungset valin,
KEIMA: “Kaji ding nu cha hi akamthem ji tave o.”
NAOSHI: “Heu, ki no ta. Ajole hung teh leng nei deimo ding ahiye,” atin anuiyin,
KEIMA: “Nateh leh achom kikihol tah tah,” katile ahung nuhin akhutin eihin vo’n,
NAOSHI: “Heu, neihin dalhah pou pou le ka lhase ding ahiye.”
KEIMA: “Nao, kahin tot nahi bouve,” katin kalhem lungmong nah nahin ahi. Chuin kenjong, “Nao, henu toh um khom lhonin lang, an vang keiho koma nahung neh ji lhon ding ahiye,” katin, chuin Naoshi le kanu aum khom lhonin, neh le chah vang chu kane khom tauvin ahi.

Abangle an hon in apang jin, kanao te hon jong alungset un, Naoshi chapang cha ahivangin keitoh kaki ngai jeh chun kanao te hon heu, tin akou jiuvin ahi. Hijongle keivang gam le nam a kaboi tah jehin Naoshi jong adei bangin kahoupi jou tapon ahi. Chuphatin khatvei Naoshi’n kakoma,
NAOSHI: “Heu, kicheng ta hite. Phatsehin nomin hinkho mang khom lhon hih jongle hen naji kahi mi jousen he le kanom e.”
KEIMA: “Nao, ibola hibanga hi kino nahim? Phat le nikho hung chal lou ding dan dan a.”
NAOSHI: “Heu, ahinai. Hijongle midang hon naji kahi ahet ding kal ka ngahlel e. Chujongle henu jong alhasam tan, lhakang lou behin keiman kaumpi nom e.”
KEIMA: “Tule tun kicheng jongle hen keiman nahin umpi jing jou ponge. Hijeh chun gamsung a thu le la ahung nop dom phat leh thupi taha kichenna inei ding ahi.”
NAOSHI: “Heu, geisang val talou ding ham mo?”
KEIMA:“Geisang ponte. Nam mite zalen na ding nikho anaitai,” katin, Naoshi kalhem lungmong nah nahin ahi.

Ajingin kami mat pau toh gamkonin kache kit tauvin ahile, aseina muna melma ho anaum ta pouvin, keiho jong kahung kile tauve. Amapa jong adam phatin ainkoteu kakouvin ahile amaho jong ahung un kipahtahin ahung kipui tauve. Chuleh amapan kakoma, “Sir, nikhat le neilungset jala kahin kithopi thou thou ding nahiye,” atin, chuin amaho jong ache tauve.

Lhakhat jouvin lamkai pan kabon uvin Head quarter langa din eihin kou tauvin ahi. Chuphatin lunghel lheh jongleng che lou thei kahi tapon ahi. Chuphatin kaloi hotoh che dingin kakipatdoh tauve. Chuin Naoshi’n kanung ahin jui tan ahile kenjong amakoma,
KEIMA: “Nao, geisang ponte anangah hat o. Kahung kile tengle ikichen ding ahitai. Ven, nampi dinga kipana jingkho vah ding ahitai.”
NAOSHI: “Heu, hin ngai lheh jongleng nampi natong nahi jehin kalsong lou thei nahipon, hijongle naum nachan uva nang nahin, naloite jouse Pathenin naum pi jing u hen.”
KEIMA: “Nao, nangin jong henu phate chan ana umpi jing ta o,” katin, Naoshi le kanu kahin vailhahin camp lang jon dingin kahung kipatdoh tauve. Keiho jong ajingin kaga lhung tauvin ahile ka-camp u kanung mu chun training kabol laiyu kageldohin kalunghel lhehin ahi.

Camp kalhun uvin keiho jong kakisutheng uvin, an kane un, nilhah in kikhop khomna khat kanei tauvin ahi. Chuin kakikhop pat uvin kalamkai pau ahung ding dohin keiho koma, “NAMPI KOTKHAH BUL a ding jing ihiuve. Nampi dinga thisan naisan phaldoh a galmi hinsat jouse nabon un kaja na salam kahin bol uve. Nangho hangsan na jalin tun igam leiset le inam mite tampi huhdohin aum tauve. Insung mi ngaicheng toh kikhen a, galmun jon gollhang thahat nang ho dingin taona kahin nei jing uve. Chuleh eiho laha kisonpi umtah le galhang, Crosby jong achunga kakipana kasei joupoi. Tunia hi ama promotion ina peh diu ahi,” atin, chuin mipi masanga eihin kou dohin ahile, keijong kachen ajanan salam kabol tan ahi. Chuin lamkai pan chibai eibolin, organisation sunga lamkai khat ahitai, tin aphongdoh tan ahi.

Chuin lamkai pan mipi masanga thusei na phat eipen, chuin kenjong kaseiyin, “Tunia hichan a lolhinna eihin pe hi Pathen, chuleh kaloi kapai ho jal ahi. Chuleh kalolhinna thuguh hi amasa pen in kachunnu taona le kanao Naoshi taona jal ahi, tin kasei nom e. Hijeh chun amani chunga kakipana thu kaphonge. Genthei tahin nampi a dingin gal ihinsat tauvin, insung mi le ingai cheng hou dalhan nampi a dingin ikalsong un, dang chah le kel thohin hinkho ihin mang un, chuleh nampi a dinga ahinkho ana pe doh ho, adeha John chunga kakipana kasei joupoi. Tun ama aum tapon, eiho khonung ding gelnan aman a-it tah ahinkho ana pe doh tai. Hijeh chun ainsung mite hon nikho khat leh kicholdona amutei diu ahi. Tun jong kaloi kapai kanao te koma kasei nom chu ahile, tua ithoh u hi eiho thoh hoi ahipoi. Hijongle galjona ponlap ahung kikhai doha nampi lhalim noiya ikimuto diu kinem a galsat jing ihiuve. Hijeh chun lungneo louva gal isat diu, tunia nagentheinau chu khonung a naji nacha, nainsungmi nopsah na ding ahi. Amavang tua genthei thoh nomlou din achan diu alhom e. Tah Chapa, Kuki Chapa hangsan taha ipan diu ahi,” katin, chuin keiho jong kakilha doh tauvin ahi.

Chuin kalamkai pan achomin eikou dohin hoitahin ei houlim pin, eitilkhou tan ahi. Hitichun chomkhat camp sunga kaum tauve. Alamkai lang kahin tuh phatin mihem hinan vang ka-ol lheh tan ahi. Hijongle kanoiya ho toh kingailu tah le homtho tah a kaum u nga louvin kanao te bang bangin kavop in ahi.

Lha khat lhingset kaum jouvuvin gamsung thu le la aboina aging jing nalaiyin ahi. Hijeh chun nikhat jong hi kalamkai pan naote ho mi 10 alheng doh un ajah uva aseiyin, kho le veng, vengtup din asol tan ahi. Ahinlah amaho anom pouvin lamkai pa jah a, “Sir, Sir Crosby toh neisol tha diu angaiye, ajehchu ama jalin keiho kalungmong un, kalhahsam pat u jongle eitilkhouvun, keiho dia lel pat laitah a twi vot jen eikitun peh tobang ahiye. Hijeh chun amatoh kilhon vinge,” atiuvin, chuphatin lamkai pan munchoma eikou dohin kajah a,
LAMKAI PU: “Ipi ti nagel em naote thusei chu?”
KEIMA: “Sir, chutia naote hon eingaichat theiya, keijala lungmonna anei theiyule, aval ipi kasei ding ham. Avangpha a kakisim jeng tah lou ding ham?”
LAMKAI PU: “Ahile nangin killhonpi jeng kit o na?”
KEIMA: “Henge, kilhonpi mei tange. Keiman phaten hin tilkhouna vinge.”
LAMKAI PU: “Apha e. Hangsan tahin, igam inam a din hung pang jing o,” atin chuin naote ho koma agasei tan ahile amaho jong akipah val uvin ahi. Chuin keiho jong che dingin kaum tauve.

Naote mi 10 toh Hengshi kiti kho khat jon dingin kahung tauve. Nithum lhinnin kalhung tauvin ahile, khosung mihon eina lem uvin neh le chah sil le chen ding eingaito peh un ahi. Chuin janin khosung VA hotoh kakihouvun khosung dimun thu le aventup ding dan kaseiyun ahi. Jan asot phatin keiho jong kakichol tauvin, jingle gamsung khol dingin kaum tauve.

Jingkah niso hoitah melmun ahung um tan ahile keiho jong gam kon dingin kache tauve. Lel vang aum lheh e, ajeh chu agam alei he kaum pouvin, keiho jong melma ho nung kahin jui tauve. Chuin aum chan u guhthimin kahin melchih uvin kahung kile tauve. Kahung kile lam uvin kho koma nungah phabep in thing ana tan uvin keiho jong akom uva kache tauve. Chuin keijong kadang achah valin ahile nungah khatin twi apon, chuin kenjong akoma,
KEIMA: “Nao, lungset tahin natwi themkhat nei donsah ta di o.”
NUNGAH: “Henge heu, donin,” atin, chuin kenjong kakilahin kadon tai. Chuin amanun hoitahin eihin ven,
KEIMA: “Nao namin ipi ham?” katile amajong ahung kap tan ahi. Chuphatin kalungdongin, ajah a, “Nao, ibola naka ham? Ipi boina nanei ham?”
NUNGAH: “Heu, neihet lou ham ong? Kamin Lhingneo ahiye. Masanga ahinkho anatoh doh pa chu kadongmapa ahiye,” ati phatin kahung khang hutin kalungset lheh jengin ahi. Chuin kalhemin,
KEIMA: “Nao, lungkham hihin Pakaiyin nang dingin nalampi hin sem thou thou nante.”
LHINGNEO: “Heu, nang ho mel kamu le kalung amongin kalung ahel e. Ka-u Lenboi kageldoh e. Nadam dam u hinam?”
KEIMA: “Pathen lungset in kadam dam nauve. Nangla ji nanei nailou ham?”
LHINGNEO: “Heu, jinei ding vang kanom ta hih e. Kadongmapa bon kimil nai louva.”
KEIMA: “Hijongle na u Lenboiyin jinei tei tei dingin nana vailhah e,” katin, athi kona Lenboiyin athusei jouse kasei peh tai. Chuin amanun jong kakoma,
LHINGNEO: “Heu, Pathen phatsah himei ta hen,” atin, chuin kabon un khosung kahin jon tauvin ahi. Chuleh Lhingneo in jong nisehin eikithopi jing un, vonsop an honin ahung pang jingin ahi. Hitichun loi phatah kahung hitauve.

Nikhat keiho jong gamvah din kache kit tauve. Kacheuvin ahile melma hon eina lamtin tauve. Kahet phat un lam chom a kacheuvin amaho joh kale khel un kachang pang tauvin ahi. Chuin galmuna kapang un kakikap tauve. Keiho jong kapan na thei sun sun un kapang uvin, thisan naisan long pumin kapang tauve. Melma te vang atam uvin hon lhingset ahiuve. Ahinlah keiho mi 10 bou kahiuvin, mikhat khosunga kahin dalhah u ahi. Hijongle gam le nama din hangsan tahin kapang un ahile keihon kahin no tauve. Chutah chun hakap in kakikap tauvin ahile melma hon eihin kap khatan ahi. Eihin kap khah phat un kathang ahung tom chehin kakipan kitin melma ho lang chu moh kap in kakap jeng tan ahi. Kathal kap chu alhom pen a mi 10 beh athi ding katahsan in ahi. Kakiha suh khah phatin kaloi hon eimat tho un, chuin kathal eilah peh tauve. Chuin kanao te laha Ginneo kiti pan eihousen
GINNEO: “Heu, angol toh na kilou ta e. Gam le nam ngailut ding ahinai, hijongle hinkho jong poimo ahiye. Tun thi ta le chun nanao te keihon koi kabel diu ham?”
KEIMA: “Naote ho kalung nat val jeha ahiye, nei he them uvin,” katile kanao te ho jong alunghang uvin kakoma, “Tukal keiho toh galkona nahung tah lou ding, in a naum joh ding ahi,” atiuvin ahi.

Thisan a kaha lon phatin amahon jong khosunga eihin nung poh uvin eijen tauve. Chuleh Lhingneo vin hoitahin eijen in ahi. Kakisuh khah na chunga khosung miten eihung ve jing un ahi.

Chutia gamsung thu le laa kaboi laiyun nikhat kakoma naote khat ahungin kajah a, “Sir, mikhatin nahol in eihung kah sah ahi,” atin kenjong koiham, tia kagache le Nengcha anahin ahi. Akom kalhunin Nengcha jah a,
KEIMA: “Nao, hilaiya ipi nahung bol ham?” tia kadoh leh kakoma ahung naiyin,
NENGCHA: “Heu, lungset lama vang neilou kiti hi ahahdan nahet tah’em?”
KEIMA: “Hahsa lou ding koium ding ham? Hijongle nakoma kasei tah chu la’em, kei insungmi te phatsah na jal’a Naoshi toh kicheng dinga umlhon kahitai.”
NENGCHA: “Ahahsa nalom lom e nathusei chu. Chuti jongle chomkhat hinlai puldou khom hite,” atin phat sottah katou khom lhonin ahi.

Chuin nilhah konin ading dohin kajah a, “Heu, damsel hite. Nalungdei toh lungtup hin molso tan. Keijong laidang leng tange. Ahin kahinkhon nahinmil ponge. Ajeh chu kachun le jo deilam nahi,” atin ahile kalung asen kalhisoh tan ahi. Ngai lheh jong leng laidang lengthei kahitah lou jehin, hiche ni chun Nengcha toh kakikhen lhon tan ahi.

Inlanga kakisuhkhah thu anakithang tan ahile, Naoshi le kanu ana lunggim lhon tan ahi. Chuphatin amani jong ahung lhonin nilhah khojin konin ahung lhung lhon tan ahi. Lupna chunga kanalup pat laitahin Naoshi ahung lutin eimu mu chun eikoiyin akap tan ahi. Chuin aman kakoma,
NAOSHI: “Heu, na gentheina kave joupi. Hijeha chu nang toh kikhen lou dinga hung kahitai,” atin ahile kakipah valin,
KEIMA: “Nao, lungtup imolso na dinga jingle Nampi galjona ponlap kakhai sang ding ahitai.”
NAOSHI: “Heu, kakipah vale. Keiman kaum pi jing ding gentheina thoh ta pon nate,” atin, chuin insunga kanu le Naoshi nu le pa ahung lut lhonin keini eimu lhon phat uvin akihetmo sah uvin apotdoh kit tauvin ahi.

Chuin Naoshi’n kakoma, “Heu, insung mite jouse eini kichenna ding kina hung u ahitai,” atin ahile kakipah valin, chuin insungmite le khosung mite toh kakihou khom un jinga kei le Naoshi kichenna ding programme kamoh gon tauvin ahi.

Ajingin khosung mihon hall asauvin, kilung toh taha apan jeh un alolhing un ahi. Chuin nungah gollhang hon decoration abol un, hitichun keini kichenna program kanei tauve. Asakhi dingin Ginneo le Lhingneo kamang uvin, hitichun lolhing tahin kichenna kintheng kamang tauve. Chuleh ginchat phah lou behin Ginneo le Lhingneo jong ahung kingai lhonin akicheng lhontan ahi. Ajingin kaloite jouse acheuvin melma ho camp aga bulhu un, mi tampi ahin that un camp jong ahal tauvin ahi.

Hitichun Nampi na katohna konin, Thisan naisan pumin kapang in Nampi Galjona Ponlap kakhai sang tauve. Chule kajinei jou lhakhat jouvin Nengchan kakoma lekha khat ahinthot in kajah a, “Heu, chun le jo phatsah jalin keijong kakeng neiyin, tun lungmong tahin kaumuve. Hung damsel un lang vangphauvin, kahinkhon nahinmil jou him him ponge,” atin Nengcha toh kingaisa kahijehin ajinei kajah chun kalhisoh tan ahi.

The End

Kakipahe asim jouse Pathen in phatthei boh tahen. Amen

©️2018, Crosby Haokip All Rights Reserved

*Published by _KILUNGSETNA THENG_ Whatsapp Group*

Previous articleNAMPI KOTKHAH BUL(5)
Next articleIN–GO LE GAM–GO(Part-I)