Crosby Haokip
Chuin Naoshi’n kajah a,
NAOSHI: “Heu, damsel a nahung lhun hi kakipahe. Pakai koma tang louvin kahin tao peh jinge.”
KEIMA: “Nao, kakipahe. Keidin tang louvin hung tao jing o.”
NAOSHI: “Heu, kanu le kapa jong ahung e,” atin, chuin keini jong kache lhonin, anu le apa toh kakimu to lhon in, dam le damlou thu chuleh khosung dinmun thu kakihou tauvin ahi. Chuin Naoshi nun kajah a,
NAOSHINU: “Boi, khosung mihon nahin ngaicha lheh uve. Chuleh nahin doh thu jong melma hon ahe tauvin, nang holin melma ho khosung ahung lut jing un, nang kasel doh danin agelun khosung a pasal ho ahung eng bol un, eigih gih jeng uve. Hijeh chun naloi hotoh hung tei teiyuvo.”
KEIMA: “Henge henu, kalamkai pa koma hinsei nange.”
NAOSHINU: “Khosung mite kagenthei lheh un, kanam sepai ho mel la kimu khalou. Hiche melma ho kin kabol chim tauve. Kanam sepai ho kin joh kabol nom uve,” atin ahile, athusei chu dih kasa valin keijong kaum na lang u kajon tai.
Chuin kalamkai pa koma kakho sung dinmun u aboidan kasei nom lheh jengin, hijongle gal lamkai kahilou jehin kalunggel kapo doh theipon ahi. Sei ding chula kanom lheh jengin, ahinlah keima kin ahilou jeh chun ima kasei ngam pon ahi. Ahinlah kakhosung mite ding gelnan kalunggim lheh tan ahi. Kalamkai pa masanga lung himo kha lou kahin, chuin hiche nilhah chun ka lamkai pan kajah a,
LAMKAI PU: “Crosby, ipiti nahim? Ipi lungnop mona nanei ham?” ahintin ahile kati ja tan, chuin kenjong,
KEIMA: “Sir, kakho mite melma ho ki-chatna jeha lung lengvaiyuva, kei ibola lungmong a kaum thei ding ham?”
LAMKAI PU: “Ahile nangaichat ipi um ham? Na lunggel ipi ham hinsei tem o.”
KEIMA: “Sir, kakho mite gentheina kave joupoi. Hijeh chun mi them khat kakho languva um dingin neisol tauvin. Achuti loule kakho mite thoh gentheina iti kavet ngam ding ham?”
LAMKAI PU: “Chutia boi ahile mi themkhat toh nache tah hih ding u ham,”atin, chutia kakho lang uva kache ding lamkai pa anop phatin kakipah valin kipathu kasei tan ahi.
Chuin keijong kanu koma kachen thu umdan ho kaga hetsah tan ahile, amaho jong akipah un alungmong tauve. Chuin kenjong Naoshi jah a,
KEIMA: “Nao, kei le kaloi hon khosung kaga chut lut diu, khosung lungmonga ahung um tengle nang ho kahung pui ding nahiuve.”
NAOSHI: “Kikipah vale heu. Kahin kisonpin kahin ngaisang lheh e,” atin, chutah chun kakoma Nengcha ahung lhailut in, chuin kakhup teni achumin lhisoh pumin kajah a,
NENGCHA: “Heu, khatvei beh kimupi dinga jong geldoh kham kahilou hitam? Nache ding thu kajan athi kabange,” atin ahile, Naoshi jong lungnom mo tahin apotdoh tan ahi. Chutah chun kajah a, “Heu, minute khatbeh hijongle munkhat’a neitou khompi tango, nang ngaiyin kakap e heu.”
KEIMA: “Nao, kasei hitalou ham nakoma? Neilungset bangin kenjong kahin lungset e. Hijongle ikimu masang lhona Naoshi toh anakingai kahi lhon jehin kahinkou theipoi.”
NENGCHA: “Hijongle phat chomkhat beh hinkho neiman khom pi o. Achuti louleh kei kachunga thinan vai ahom ding ahitai.”
KEIMA: “Iba ilo ding ham? Eini themmo ahipoi. Lungset in naumna muna kile mei tan,” katile akap in, kachunga akingaiyin, sottah alhisoh in ahi. Kaven kalungset lheh jenge. Ahin Naoshi toh kicheng dia kanakitep tah jehin, Nengcha lungset lheh jong leng kakou thei tapoi.
Chuin keile kaloi ho jong che dingin kaum tauvin ahi. Gam he kahi jeh chun lamkai pan keiho laha lamkaiyin eipan sahin, chuleh kachunga kalamkai pa alung lhai jeh chun kapan mun akalsah tan ahi. Chuin keijong kaloi ho chunga kahung um tan ahi.
Jingkho ahungvah tan keiho jong che dingin kaum tauvin, chuin Naoshi nun eihung taopeh un, chujouvin keiho jong kahung kipan doh tauve. Kahung tauvin ahile, keiho gam lang kahin pha tauvin kalunghel lheh jengin, khosung mi ho mu ding ka-ngahlel lheh jengin ahi. Kakho lou jao kahin phah uvin, masanga melma hon tha dinga eihin pui ni jan chu kageldohin thangtom aum lhehin ahi.
Chuin keiho jong khosung kahung lut tauvin ahile, kakho mi te ka gin akithong leu tan ahi. Haosa pun eimu mu chun akipah valin phatthei eiboh tan ahi. Chuin aman jong keiho dingin uichal lentah khat athat in ahi. Chuin keihon jong tuitahin kaneuvin kain uva kapan sa tauvin ahi. Kain u vang alenin, hijeh chun kabon un kaum tauvin ahi.
Nilhahin houbung lamkai ho ahung un, keiho dingin maicham ahung sem uvin ahi. Chuin keiman amaho jong kalhamonin ahi.
Ajingin, jingkah matahin kakithouvin mol le lhang ho kaven, kaneo laiya kaloi ho toh thingnoimi te kana kichep laiyu kageldohin lunghel nan kadim tam ahi. Chuin keijong kaleitol uva um kemchunga katouvin ahile, masanga Naoshi toh lungset thim thu kana lel lhon lai kageldohin, Naoshi kangaiyin kalunghel tan ahi. Kalungset na asangin tua kichen pi ding kati jongle gamsung thu le la anop nailou jeh chun, hoitaha hinkho kaman khompi lou ding kahet jehin kakichen pi nom naipon ahi. Hijongle nikhat le kicheng tei dinga vang um lhon kahitai.
Nikhat kei ho jong gamnoiya patrolling dingin kache tauve. Chuin kaki gong uvin melma ho um na dinga kaginchat lai tah guhthimin kaga khol tauvin ahi. Kacheuvin ahile gamla taha konin melma ho ponbuh le lhangpheng kisong ho kamu tauvin ahi. Chuin agam alei kave toh un, melma ho del lut ding dan position kakihom toh un, meichang tampi kakichoi lou jeh uvin kakile tauve. Chuin keiho jong inlanga kahung kile un, kakisutheng uvin, chuin jan in kakihou khom tauve. Chuin kaloi ho Pathen lama kaphutdet tai. Chuin kaloi ho koma kaseiyin,
“Kanaote ho vetem uvin, lungin hoitahin gel ute iumnau hi hoikom ham? Nopna vang ahipoi. Hijongle vaikonin cheute. Igam inam a din ihinkhou it poute. Tua nathoh gentheina chu nikho khat leh nainsungmi, naji nacha lungmonna ding ahi. Inammi teu Zalen na ding mun del jing ute. Khat changin vang lhung jou ponte. Lungkhat kisan melma dou jing ute. Amasa pen in imasang uva Pakai lamkai sah ute. Aman eiho dingin galsat nante. Ajeh chu Bible in, `Nangho ding det pou pouvun, Pakaiyin nang ho dinga gal asat ding ahinai,ʼ tin, aseiye,” katin, chuin taona kamang khom un Pakai koma kakilhandoh tauve. Chuin jingle galsat dingin kaki gong tauve.
Jingkah matahin kakithouvun, galsat dingin kakon tauve. Kache kon un kakihanlho cheh un, “Pathen le kanam mite a dingin kathanei cha sunin galsat inge. Melma masanga kakhut dom him him ponge,” katiuvin kahung tauve.
Chuin galmun kahung lhung tauvin, panmun kahung kihom tauve. Chuleh kalah uva John jong ajaovin, lampi kahin jot jing laiyuvin kajah a,
JOHN: “Heu, ipi kati ham tuni chun kalung ahel tave,” atin ahile kenjong,
KEIMA: “John, pasal nahi lou ham? Ibola lunghel nahim? Tua nagentheina hi khonung le nanop sah na ding ahibouve.”
JOHN: “Heu, na dongma nu nangai ji em?”
KEIMA: “Adongma ngailou ding pasal koi um in te tia nagel em? Hijongle galmuna che ihijeh uvin, kihetmo sahin, lunghel bol hih’in.”
JOHN: “Heu, ahina e. Gal kona iche tengle idongma nu akingai chom chom e na? Kadongmanu min Lhingneo akitin, tun Sadar hill lang Leikot kiti kho a aum e. Kipgen ho ahiye.”
KEIMA: “Apha e. Lungtup molso tei tei lhonin.”
JOHN: “Heu, lhathah le danthenga kakhouva kichenna kanei lhon ding ahitae.”
KEIMA: “Ahile pha chula. Anikho nile iche nah hih diu ham.”
JOHN: “Heu, chu nitengle VVIP napan ding ahiye. Janhi chun kakichen na lhon ding marriage card jong eihin thot uvin kamu ta e.”
KEIMA: “Henge, iche diu nomtah a iman diu ahi,” katin, chuin keiho jong galmi toh kikap dingin kapang tauve.
Chuin melma te camp hoitahin kaven, kanai pheiyin pam langa duty po pa chalpang tah kakap peh tan ahile amapa jong tol langa eh khe’n akhe tan ahi. Chuin kaloi hon thal ahinlha cheh tauvin ahile melma te toh kakikap tauvin thal chang vang chu go julha abang jeng tan ahi. Chuin keihon jong mitampi kathat un kano jing tauvin ahi. Chuleh John jong lhem lhung chung khat a panga melma ho akap ahin mi tampi jong akap lih’in ahi. Hijongle vangset um tahin akomcha a bomb khat ahung poh jah tan ahile, amajong apengin athisan laha akisai sai tan ahi. Chuin kenjong kadellutin kapo dohin athisan long doh ho kasip peh tan ahi. Chuin kaloi ho laha medical lama pan la ho kakouvin ahile amahon jong ajen tauvin ahi. Chuphatin keiho jong kakinung khin uvin John kajen tauve. Hijongle John vang adamdoh ding kaging cha tapon, athi ding konin eihin houvin kajah a,
JOHN: “Heu, kalungset kanao Lhingneo koma ngaidam nei na thum peh o. Tunin alungtup kamolso peh jou tapoi,” atin ahile kapona valin,
KEIMA: “John, nampi sepai nahi lou ham? Ibola nalungneo ham? Nadam thou thou ding ahi.”
JOHN: “Heu, nang toh ikimanchah sung uvin nei lungset lhehin, kachun le kajo in eina dalha ta jongle nangkom a kaum sungin kanu le kapa bangin kahin monpi e,” atin, chuin khiba khat ahin la dohin, “Heu, tuni kathi konin Lhingneo ima peh jou nei hih jong leng hiche khiba hi kamel a akichin dingin ana pe tei teiyo,” atin ahile kaloi ho akap lha tauvin ahi. Chuin aman kajah a, “Heu, lunglha dai louvin gal hin sat jing uvo. Nikhat le melma ijo tei ding u ahi,” atin, chuin kakoma, “Heu, kanao Lhingneo kangaivale. Amel khatvei beh kamu nom e heu,” atin ahile kapona valin keijong kakap doh tan ahi. Chuin aman adongmanu, Lhingneo alhahdohin, “Nao, gam le nam ngailutna jalin tunin kahinkho kape tai. Mingol thi a thi louva kanam le kagam a dinga thi kahi jehin kalung among in, Kuki chapa keima kaki hanlho e. Nao, nalungtup kahin molso peh joulou hi lungset tahin neingaidamin. Kalungset lou jong nahipoi. Tunin nang malam khan kho ding gelnan kahinkho kana phal tai. Na senngai kilungset pi keima toh nomin lungtup molso jou tahih jongle chun ang dang jon louvin hung um hih beh o,” atin, chuin ahai adong tan ahi. Chuin kajah a, “Heu, kadang achah vale,” atin, chujouvin ahai tapon ahi.
Chuin along chunga kakap tauvin ahi. Hiche nia galmite tampi katha vang uvin, gal kajo lel ni bang un ka nan kadim tauvin ahi. Chuin kahin pouvin khosung kahung lhung tauvin ahile khosung chu ka le mao akithong tan ahi. Chuin nilhah ma man a inkote thu kahet sah tauvin ahi. Ainkote jong ajingin gari khatin khomun a ahung lhai lut tauvin ahile, ka le mao ogin akithong tan ahi. Chuin anuneo ahungin achapa long chunga, “Boi, ibola hitia neibol ham ong? Nanun iti kapoh jou ding ham? Nanao Lhingneo koma ipi kasei ding hitam ong? Hung thouvin boi. Hiti dingin nakilom poi. Nanao Lhingneo in nangah jinge. Nakichen na lhon ding marriage card namu lou ham? Kei ipi kati ding ham? Hung thouvin boi,” atin, achapa chunga akap kap tan ahi. Keiho jong akimvela kading un, nam sepai hangsan tah kahi vang uvin kaloipau chunga koima amitlhi sel jou kaum pouvin ahi. Chutah chun gari khat ahung lhai lut kit’in, chuin gari a konin nungah khat ahung kumlhan keiho lam chu ahin del tan, ahung lhun lhun in kaloipau, John longdamsa chunga akap tan ahi. Amanu ka chu kave jou kit ta pouvin chuphatin keiho jong kapotdoh tauve. Chuin amanun John akou kou tan, “Heu, hung thouvo. Lungtup molso tei ding nati hilou ham ong? Tunia i-nei lo got hitam? Nei dalha hih behin, nang louvin hinkho mang jou ponge. Heu! Heu! Kahin ngaivale. Ven hiche card hi, eini kichenna ding card hilou ham? Tua ipi a kaman ding hitam? Nanao keiman ikichen lhon na ding phat le nikho kanga jing hilou ham ong heu,” atin, adongmapa chunga hakan akap tan ahi. Amanu jong aha ka valin akap chet tan kho helouvin alum tan ahi. Chuphatin insunga adom lut un khosung nupi phabep in ajen in aumpi tauve.
Nilhahin kaloipa vailhah na program chomcha kaneiyun ahi. Chuin keijong mipi masanga ka ding dohin kahoulim-in, “Tunin kaloi ngaitah u John in ei dalhah na chung uva, aloi keiho din lunghemna asoh tai. Amahi mipha tah le galhang mi ahin, melma masanga anung chon ngeipon, nampia dingin hangsan tahin gal asat jinge. Aman tunia ahinkho it tah eiho dinga apeh doh hi kagelle mantam kasan amahi Nampi Songpi khat ahi, tin kaphongdoh e,” katin chuin kaloipa lhahnan kaseiyin, “Pasal, nam sepai hangsan John, lungmong tahin Pa kom jontan, nanam sepai ho dingin hung taovin lang keihon jong tunia nathisan lon hi moh’in umsah pouvinge,” katin, chuin kaloipau lhah doh na kin kamang un ahi.
Lunghel aume lheh jenge. Chuin keijong nungahnu koma kachen ahile aman eihin mu mu chun alhisohin,
KEIMA: “Nao, na u John’in nangkoma dingin thu tampi aseiye. Chuleh hiche khiba hi ama mel’a nakichin dinga nahin peh ahiye,” katile akilahin alhisohin, chuin kajah a,
LHINGNEO: “Heu, kanam sepai nang ho kahin ngaisang uvin, kahin jabol uve. Nang ho jeha lungmong kahiuvin, tunin ka u Lenboiyin(John) na dalha ta jongleu lunghem hih uvin. Igam le inam a dingin hangsan tahin hung pang uvin. Chuleh lungset tahin ka-u Lenboi thisan lon moh’in hin koi hih uvo.”
KEIMA: “Nao, na-u Lenboi jalin kalungthim u patchon nem a nem lha jeng chu tun hansanna kanei tauve. Gal hattah mi ahin apamai lheh jenge. Nang jong lungmong tahin hinkho mang ta o.”
LHINGNEO: “Heu, ka-u Lenboi ju le sa a thi ahile bou kiponan tin apul kidou hih ta. Hijongle ama nampi a dinga thisan phal ahijehin kakisonpin kalung among e. Ama tobang pasal hangsan nam natong ding akihole,” atin, athusei ho chu gil kasa lhehin ahi. Ama tobang nam nungah tamle pha lheh ding ahi. Chuin amahon jong John longdamsa inlanga apo tauvin ahi. John’in eidalhah phat un kalung u ahel cheh tan chomkhat akihou jo sang um louvin kakitung tung tauvin ahi.
Gammang noiya melma hotoh kakikap tou le sepai mikhat kathiu chu Naoshi le kanun aja tan ahile koi thi ahidem tin alung lhon ajing tan ahi.
Aban jingle anasim kit taute. Kakipahe asim jouse Pathen in phatthei boh tahen
©️2018, Crosby Haokip All Rights Reserved
*Published by _KILUNGSETNA THENG_ Whatsapp Group*
