Crosby Haokip
Chuin Naoshi hoitahin kaven ahile, kalungset valin kangai ma ma jengin ahi. Kithodoh a koi jeng ding kanom lheh jengin, hijongle mipi laha kium ahijehin, koi jeng ding chu Naoshi jahchan te, katin hijongle Naoshi khut teni kalan ka op chunga kasip behin, kiss kabol in ahi. Chuin Naoshi le anun eipui lhonin aumna lang lhon a kache tauve. In kalhun uvin lupna a kalumin, chuin Naoshi’n keitoh chance amunom chu ainkoten ahet phat un, munchom cheh a ache mang tauvin ahi.
Amaho ache mang phat un Naoshi kakoma ahung kikhin naiyin eikoiyin alhisoh tan ahi. Chuin kakoma,
NAOSHI: “Heu, nagenthei vale, hijeh chun nampi natoh nga’n lang nomtahin insung sem tahite.”
KEIMA: “Nao, khongai hite, nampi galjona ponlap akikhai sang naipoi. Kamelma pa chunga phuba kala chai nai hih e,” katile Naoshi’n eingong koiyin kajah a,
NAOSHI: “Heu, nampi natong nahi jehin kahin suboi nom jipoi. Phat tin’in nang koma um ding bou kanome.”
KEIMA: “Nao, nampi gal jona ponlap akikhai doh ni le, insung mite le sopi ngaite jouse toh nomtah a ikichen na lhon kintheng iman diu ahi. Hijeh chun lungmong tahin um’in.”
NAOSHI: “Heu, kei kahi lam neihet lou tah tah ham ong?”
KEIMA: “Henge, namel akikhel dan, tun navouso anangou tan, nasam jong nakong chan apha tae. Masanga sang chun vetnom nom naume nao.”
NAOSHI: “Heu, kakipahe. Kahung nungah cheh cheh phat a kahung kisem pan pan ahiye. Kasam kakihoi saova niseha twi ha don a kadon jing phat’a kavouso kikhel ahiye. Ahile nei he doh hih le chun Nengcha toh nakingai ding, ahile ama chu koiham?” atin eihin dongin ahile, chuin kenjong,
KEIMA: “Hilaiya um naote khat ahiye. Amanjong tuchung thidinga kaumna chunga anu le pa toh kithoa einajem dam u ahiye,” katile akipah in,
NAOSHI: “Kipa aum vale heu Nengcha chunga chun,” atin, chutah chun Nengcha ahung lut in ahile, keini eimu phat in akiphat lamin kotbenga ading den in, chuphat in kenjong kakou lutin ahile amajong ahung lut tan ahi. Chuin Nengchan kajah a,
NENGCHA: “Heu, nahung phat hinam? Nakisuh khah kajah chun boina khat kanei jehin kahung manpoi,” atin chuin kenjong ajah a,
KEIMA: “Nao, kapha na e. Na-u Naoshi le anu ahungin eihung umpi lhon na e.”
NENGCHA: “Apha e, lungmon aum ta e tun, ahile kei inlanga che tange,” atin lungthim nommo thimtahin apotdoh tan ahi.
Ache nungin Naoshin kajah a,
NAOSHI: “Heu, Nengcha koma chun kipathu kisei hen kiti apot doh in, jingle kisei ta hen o.”
KEIMA: “Akhoh poi nao. Ahin Nengcha koma imasei hih tang o.”
NAOSHI: Henge heu, imasei ponge,” atin, chuin kadaiyin, chuin lupna chunga tangkhap in kakivei to lhonin ahi.
Chuin keijong hahsa lheh jongle ol ol in kading dohin kavah le len ahi. Naoshi kajet lamin apangin, eituhin hitichun lam kahin jot pan tan ahi. Chuin kenjong Naoshi koma,
KEIMA: “Nao, tua naum nate khu nang dinga ipi ham?”
NAOSHI: “Kei dinga ka nuneo ahiye. Lamka langa nang henu toh kaum khom lhonin, hijongle henun nang nangaival jeha inlanga kile kit ahiye. Kachanga kaum ding phat’a hilaiya henuneo koma kana che ahiye. Nakisuh khah nia kahin mu chu kapohnat dan chu nangin la he lou. Kahin koiyin tin nachunga haka a kaka ahiye. Ahivanga neihet lou chu ken na kihet mo sah kahi saha keijong kaki seidoh deh lou ahiye. Chuphat in kei kapot ding jehin kanuneo koma kasei leh aman Nengcha te koma aseiya, nang chu nanavet suiyu ahiye.”
KEIMA: “Kakipahe nao. Tua nang le henu toh kaki nung mu lhon hi kagelle kakipana asange.”
NAOSHI: “Heu, nang kipana sangin kei kipana alen jo e. Ajeh chu athisa hing doh nahi jehin,” atin, chuin keijong kichol dingin kalum kittan ahi. Naoshi’n sun nilhum lhumin eiumpi in, kaboina le hahsatna kanei jousea aman hoitahin eive suiyin ahi. Keijong Pathen lungset jalin kahung dam doh tan ahi. Kahung dam doh phatin keijong kaloi ho kom kajon kittai.
Keijong kaloi ho koma kaum tan ka-duty ho kabol jing kittan ahi. Kachunga lamkai ho alunglhai jehin eingailu theiyun, chuleh Naoshi toh kakingai ahet jeh uvin niseh le phat chomkhat eilha ong un, keijong phat hom tho tahin Naoshi koma kaga lai lengin, lungsetna thim thu kaga sei jin ahi.
Hijongle nam natong kahi jehin nam mite huhnaa muntina kache jing ahung ngai kittan ahi.
Chuin nikhat hi lamkai pan Sajik Tampak lang che ding ahin som tan ahile kaka nom jengin ahi. Hijongle lamkai ho thusei nel thei ahipon, chuin keijong che dingin kaki gong tai. Khosung kadalhah ding kanu le Naoshi’n ajah lhon phatin alunghel lhon tan, adehin Naoshi’n ei ka ka kittan ahi. Chuphatin nikhat Naoshi koma kachen kaga kihoupi tan ahi. Chuin kenjong Naoshi koma,
KEIMA: “Nao, nampi natong dinga kipe doh kahi tah jehin, lamkai hon eisol naa che lou thei kahipoi, hijongle nangin henu hoitahin ana ve tup ta o.”
NAOSHI: “Heu, kahe them na e. Hijongle nache masangin neikichenpi o. Chutile lungmong dom ing kate.”
KEIMA: “Nao, nakoma kasei sa hi talou ham? Nei ngah jingin, nikho khat le nomtah a ilenkhom lhon ding ahi.”
NAOSHI: “Heu, ahina e. Hijongle galmuna setna hin toh tale chun nang toh hinkho kaman man lou ding ahin, na ji kahi vetsah nan khatvei beh hinkho nei man khompi tang o. Chutile nang bei jongle chun kalai gil ga naosen jala lhamonna kanei ding ahi.”
KEIMA: “Nao, chutin kalungneo sah go hih’in. Ngah hat in, melma pa luchang kahin poh thou thou ding ahiye. Lungmong tahin neina ngahin lang keidin henu toh taona hin mang jing lhon o,” katin ahile Naoshi’n eihin koiyin kajah a,
NAOSHI: “Heu, kahin it valjeha kahin sei ahibouve. Pakaiyin namelma te jouse keng chot phan neisoh kei hen,” atin chuin keijong kahung potdoh tan ahile kanun lampia eina lamton kajah a,
KANU: “Boi, che da kom tang o. Naoshi kipuiyin lang eiho nomtahin cheng khom tau hite.”
KEIMA: “Henu, chutin sei hih’in. Nampi dinga thisan longsa kahitan, melma chunga phuba kalah kahsea kalsong ding kahiye. Nampi dinga thi ding kahi.”
KANU: “Boi, nache nungle keidinga hahsa ji val chula.”
KEIMA: “Henu, kei dingin lunggim hih’in. Pohnat na imacha nei hih’in. Hisang chun inam mite thisan long ho dingin ibol thei chan u bol ute.”
KANU: “Boi, atong dingle, phula dingin midang aum nai. Nang nomtahin kichol jeng o.”
KEIMA: “Henu, kei kache loule koi ham ache ding? Keiman kapat lou le koi ham apan ding? Nam sepai kahin, mimoh moh kahipoi,” katin kahung tan ahi.
Chuin kakipatdoh kon uvin kanun eihin nung delin kapumin eikoiyin akap tan, “Boi, nang thoh hoi ahipoi, hung kile tan,” atin, kache na lou dingin kalamkai ho koma athum tan ahile kanom pon kahung thou thou tai. Chuin kanun eihin del kittan ahile Naoshi’n kanu anung kaiyin ale pui tan ahi. Chuin kanu kanung vet le kap pum pumin keilam ahin ven kapona lheh e. Hijongle nampi galjona ding gelkhoh na jalin kakihetmo sahin kache tan ahi. Chuin lekha khat kajihin, “Henu, neikou kou da tan, hepa nei hol hol ta hih’in, nampi natong dingin kakal song tan, kahung kile thei tapoi. Gamle nam ngailutna jalin, thisan long pumin kakal song tai. Henu, kei thoh hoi ahipoi ti kahei, hijongle nung chon thei kahipoi, Tah Chapa kahi,” tin kajihin ka dalha tan ahile Naoshi’n lekha ahung la tan ahi.
Chuin keiho jong lunghel tahin khosung kahin dalha tauve. Kanu le Naoshi kangaival’in, hijongle galmi toh kidou dinga kon kahi jehin puldou suhmil tei ding kago tai, hijongle ilungset khat suhmil sangin lekhasim louva exam pass nom jonte. Hitichun kei hon jong gammang lah a kahung tauvin ahi. Ahin lhanmol koma kaphah uvin lampia Nengchan einangah in, eimu phatin akoma ahungin kajah a,
NENGCHA: “Heu, keihi ipiti hen neitia neikimu sah khoh khoh ham? Gentheina thoh dinga laitan kahi hitam? Nalungset na mim mu tebeh jong changlel kahi hitam?” atin akap tan ahi. Chuphatin akoma kaseiyin,
KEIMA: “Nao, nang le nainkote chunga seijou lou kipana thu kahin seiye. Nathusei chu vet chen ding katile, masanga kanasei bangin kanung jui aum tai. Iti ham a goltoh silungtup kalhasoh lhon khahleh nahung hol nange,” katin alhi katheh pehin kache tai. Kache konin kajah a,
NENGCHA: “Vannoi leiset mang jongleh kalungset na vang mang ponte heu,” tin ahinsam in kache tauve.
Keiho jong kengin lam kahin jot uvin kahung kalsong jing tauvin ahile, nilhum konin Pu Ngulbul khopi, Longya kahin pha tauvin ahi. Chuin khosung kalut uvin khosunga nupi hon an eihon peh uvin, keihon jong tui tahin kane tauvin ahi. Longya khoa ni thum sungin kani chong un, chuleh Thingsan a jong kaum un, chujouvin kache kit un Aishi kiti kho khat kapha tauve. Aishi khoa chun kakinga un kakichol tauve. Aishi khosung chu mol chunga kikhang ahijehin anomin mun gamla tah tah akimu pha pehin ahi.
Chuin nilhah kaki suhtheng jouvin keijong Houin langa katou kal tan, kajet kavei mol le lhang ho kaven ahile, Lonpi koma gamvet mol kahin mu tan ahile kalunghel valin Naoshi kangai lhehin ahi. Ajeh chu Naoshi um na khoa pat’a gamvet Mol hoitaha kimu ahi. Hijeh chun kalungthim a khu che mol a khun kikal doh hen lang Naoshi kigaldot le kanom lheh in ahi. Nisehin Naoshi ngaiyin kamao mao tan ahi.
Nikhat gamnoiya patrolling kache kit tauvin ahi. Kacheuvin ahile melma ho kho nung kamu tauvin, chu phatin keihon jong guhthimin kahin gem tauve. Saotah pi kahin gem tauvin, Khaokol kiti gamnoi kahin phah uvin melma hon ambush eina bol khum tave. Ahinlah keihon kana he doh vah pouvin, chuin amahon eihin kap tauvin ahile kalah uva mikhat ahin kap lhu tauvin, keiho jong pan mun kakihom tauvin melma ho kale thuh tauve. Hitichun phat sotpi kakikap tauvin ahile, amaho jong ajam tauvin, chuin keiho jong kapot doh un, galmun kakhol u le melma mini thilong kamu un, chuin kadom uvin holkhuh lentah khat sunga ani tahin kahin vui tauvin ahi.
Chuin keiho jong kakihan lho tei teiyuvin melma ho kahin nung del tauve. Keiho laha mikhat athin adangse vang alem umlou vin kadam uvin ahi. Melma ho vang mini athi akipho chen in, adang jong mi tampi akisu kha aum ding tahsan aumin ahi. Chuin keihon jong melma ho kahin del tauvin ahile Gunpang kahin pha tauvin, chua chun khoneo cha khat anaumin, hiche khosunga chun melma ho apansa tauve. Chuphatin khosung miho kasuh boi nomlou jeh u chun kakileuvin gammang noiya kapansauvin ahung kitol doh diu kangah tauvin ahi. Chuin lamkai pan eihin kou khom un kajah uva,
“Nampi sepai hangsan pasal ho, tunia hi akicha a kithing thing naum uvem?” tin, challenge eihin bol tauvin ahile keihon jong, “Tah chapa! Kuki chapa! Kichatna kanei pouve. Kagam le kanam mite a dinga hing kahi. Keivang nung chon ponge,” katiuvin, kakihan lhonau thugol avelin kasei kit un ahi.
Chuin jan laiyin khosung kagem tauvin ahile, melma ho khat le nin khosung adalhauvin ajamdoh tauve. Chuphatin keihon jong kadel phei kit un, chuin kadel phah phah uvin kakikap kittauvin ahi. Galmuna pan vang ahah ngeiye. Ajeh chu thi le hin kikaha kium ahin, ilunggel jong sang tah phaman ji ahi. Hijongle hangsan tahin galmi akikap jingin ahi. Chuleh keihon kalungtup thupi pen chu, keiho hi nampi kotkhah bul a ding jing kahiuvin, nampi zalenna ahung lhun na ding del jing kahiuve. Niseh le kiging jing pum a kium ahin, keiho dingin kipana ni jong asoh thei tapon, insung mite le sopi ngeite jouse ding ngaito na jalin genthei tahin kapang jing un ahi. Nam ngailutna jalin galmuna iche teng jongle i-inkote toh thu kamkhat behin jong a-kikihou man jipon, hitichun gamle nam ngailutna jalin, thisan long pumin gal kasat jing un ahi.
Chuin melma ho kadel del tauvin ahile mi themcha bou aum tauvin, keihon jong abon uva tha chai ding katiu ahi. Hitichun kahin del jing laiyuvin melma ho camp lentah kahin pha tauvin ahi. Chuphatin kanung chon jep un, munkhat’a pan mun kakisem tauve. Chuin melma ho ahung potdoh tauvin, sepai jat vang atam lheh ui. Meipum hoitah tah achoiyun, abangin chempong heicha achoiyun gammang laha ahung tauve. Chuin kageldoh khat chu, kanam mite chunga thisan so amaho ahiu kahin he tan, chuphatin kalai ana valtan, ban kap chai diu kalunga ahung um tan ahi. Ajeh chu amaho chu damsel a kalhadoh ule kho ijat ham khat asuhmang diu, mona bei mi tampi ahin tha diu kagingmo tan ahi. Ahinlah achunga thal lha ding chu melma ho mi atam jehin kaloi ho akicha tauve. Hijongle kaloi ho katilkhouvin, ahung kijot masa ho chu thalchang, me laha chi kiso bangin kalhah tauvin ahi. Chuin thal choi louva hem bou choi ho mitampi athiuvin, chuin amaho jong ahung kile thoh un kachuti kikap tauvin ahi. Melma te mi atam un, thal hoi tah tah achoiyun, hijongle hangsan tahin kakap tauvin ahi. Chutia kakikap jing laiyuvin kalah uva mikhat ahung kisu khatan ahile, kenjong amachu kaboipi tan kaloi dang hon melma ho akap thuh un ahi. Chuin kenjong kajen thei dan dan in kahin jen tan ahile kahet lou vangin kanung lhona melma mi themkhat in eihin gem lhontai. Kaloipan amu phatin lamlhanga eison lhan ading dohin amaho chu akap tan ahi. Apat pat’in aman jong mi thum akap lih in, hijongle achang ahijeh chun melma hon ahin kap kha un ahile amapa jong athi tai. Chuin kaloi hon ahin dellut un melma ho chu aban kap lih lih tauvin ahi.
Chuin keijong kaloipan eisot lhahna muna kakhut kakisuh hehin anah nahin kahung kal dohin ahi. Chuin melma ho ahung tam phat un, keiho la mi themcha bou kahiuvin, hijeh chun gal lamkai pa thupeh dung juiyin kakile tauvin ahi. Chuin keiho jong kahung un kalah uva athi teni jabolna le lhahna kaneiyun munkhat’a anitah lhonin kavui tauvin ahi. Chuin keihon jong kakihan lho’uvin pasal tahin kapang un ahi.
Janin phaicham khat a kakingauvin, an kakihon uvin kaneuvin kakichol tauvin ahi. Hijongle Naoshi kangai valin, amelmu ding kangahlel lheh tan ahi. Chuin vanlam a chung chollhanu kaven kalungset nu mel alangin ahi. Chung chollhanu toh kakihouvin, kalungset nu kangaidan kaseiyin, kamu nom dan kaseiyin, chuin mangpha kathot in kakichol tan ahi.
Jingkahin lamkai pan inlanga kinungle ding thu ahinsei tan ahile kakipah valin Naoshi melmu ding kanom lheh tan ahi. Chuin keijong gamlah’a pahcha hoitah khat Naoshi peh dingin kalouvin kahin kipoh tan ahi. Chuleh gamnoiya thei kahin hol un, aphunga kakal un kane’uvin kaloi ho dingin jong bag dimsetin kakhol un ahi.
Chuin kenjong Naoshi le kanu dingin ka-bag dimsetin theiga kahin lou tan ahi. Chuin keiho jong kahung tauvin, nilhum helin Lonpi lhang kahin jot tauve. Keivang kalam jot seh le gamvet mol kaven, kalhunna ding phat kasim peh tan ahi.
Keiho jong nilhah khojin in leltahin kaum na mun u kahung lhung tauvin ahi. Kahung lhun phat uvin khosung mipi ho keiho lamto din ahung potdoh un salam eibol tauve. Chuin keijong Naoshi kangai valin ainlam u kadeltho tan ahile aleitol uva Naoshi’n eina ngahin, chuin kalhun lhunin kaki ngaival lhonin kakikoi man chet lhon tan ahi.
Aban jingle anasim kit taute. Kakipahe asim jouse Pathen in phatthei boh tahen.
©️2018, Crosby Haokip All Rights Reserved
*Published by _KILUNGSETNA THENG_ Whatsapp Group*
