Crosby Haokip
Chuleh lamkai hon nisehin eipatep jing uvin, koihile aum chan hoilou chun mol anen ahi. Hijeh chun chingthei tahin hinkho akimangin, discipline vang akhou lheh jenge. Nam sepai khat dingin umchan khan chan apoimon ahi. Ajeh chu umchan khan chan helou chu koiman amunom pon, koima jabolna achang pon ahi. Hijeh chun chun hatmo lheh jong leng kachunga ho jabol dan kahung kithem chuh tan, chuleh kalamkai ho von nisehin kasop in ahi. Chuleh amahon jong nisehin vonsop ding eihin pe jing un, kenjong phun tamlou behin luikhuh a kaga sop lha jin ahi. Hijeh chun kalamkai hon eilungsetin, eitilkhou jing uve.
Chuleh nisehin an honin kapangin, kaneova pat’a an hon jing mi kahi jehin ka-an hon chunga kalamkai ho le kaloi ho alunglhai lheh un, hijeh chun an hon lang chu kei toh dingin aum sah jing tauvin ahi. Kenjong kabol thei chanin mipi neh dingin an kahon jing tan ahi. Chuleh an kahon tengle masanga kain uva Naoshi toh an kana hon ji lhon kageldohin, ama kangaiyin kalunghelin kalhisoh ji tan ahi. Nam sepaiya pan’a dongma ngai vang ahahdan te pi thei ahipoi. Hijeh chun nam sepai ho hi lungset um tah kahiuve. Chuleh kanam numei ho koma kasei nom chu ahile, nampi sepai gollhang toh nakingai khah le hoitahin kingaipin lang mittam le kamthep bol hih’in. Keiho nang ho jal’a lungmong ham ham kahiuvin, nang hon kalung thim u nahin natsah teng ule kagentheinau akibe ji e. Na-Nam sepai ho ngailuvin lang, jabol un. Lungsetna dihtah kahin chan nahiuvin, nang ho jong lungdet taha nahung pan uva, keiho dia taona nahin mang jing diu kadeisah lheh uve. Patrolling a kache teng u le hoilaiya galmi anaumin, kahinkho abei khan kalungset nang mel mulouvin kaum kha dem, tia nakingai jing u ahi. Hijongle keiho jong nampia dingin hangsan tahin galmi kano jing uve.
Gamsung thu ahung boi jing tan, ibe teu khansetna apung tul tul tai. Muntina kanam mite thisan lon akija jing tan, in le lou amang gam tan ahile kalung u ana val tan ahi. Hiche phat chun training jong hoitahin kabol thei tapouvin, muntina kanam mite huh’in kalhai jing tauvin ahi. Chuleh muntin a galmi toh kakikap uvin, Pathen lungset jalin melma kano jing un, kho tampi kahuhdoh un ahi.
Nikhat jong Phaijang(Khomin tah ki im) kho ahin hal tauvin ahile, keiho jong kakigong un khomun del dingin kaum tauve. Kache kon uvin kihan lhona thugol kaseiyun,
“Keiman kahPathen le Kagam a din hang tah’in natong inge.
Keiman Nampi ngailutna jal’in dan le thupeh kitah tah in jui jing inge.
Keiman Nampi ngailutna jal’in hahsatna jousea mano jing inge.
Keiman Nampi ngailutna jal’in mollemsa natong galhang ho chunga kitahna neijing inge.
Keiman Nampi ngailutna jal’in gal dou ingting, imatih chan’in gal masang a khut dom ponge.
Nakikou le hung in.
Nakisolna a chen
Nung donbut hih’in
Nathohhat le nachanvou umding ahi
Meichang changkhat melma khat
Ulsa tam lon thisan so lhom,” katiuvin, chujouvin keiho jong nam mite huhdoh dingin kahung kipandoh tauve.
Kache tauvin ahile, amasang pen’a kei kachen, kanunga lamkai pa le mi phabep ahung un, anung langa mi 10 ahung un, hitichun sepai 20 galkon din kache tauve. Chuleh galkon a iche tengle het ding khat chu, boina ahung umle eijong kihuh ding, thal jong huh ding chuleh ilamkai pa jong huh ding ahin ahi. Chuin keiho jong kahung tauvin ahile kalung sung lo dim chu Naoshi ahi jingin ahi. Kalunghel chom jin, kangai lheh jengin ahi. Kahung tauvin ahile, Phaijang kom kahin pha tauvin, khosung a in kihalna meikhu vanlam a akitung tan ahi. Chuphatin khosung kadel loiyuvin, khogal a kapan sa tauve. Kaveuvin ahile, melma ho avah le le un, chuleh khosung mi athisa tahsa long kijam jong kamuvuvin, chuin gal lamkai pan thal ahin lhatan ahile, kabon un kalha cheh tauve. Chuin melma ho toh kakikap tauvin, amaho jong ajam un, khopam langa akisel doh tauve. Chuin keihon jong khosung kahin nailut tauvin, khosung vel lah hoitahin operation kabol un ahile, melma tahsa kijam 5 kamu doh un, keiho vang Pathen lungsetin ima kati pouvin ahi. Chuin khosung mipi ho kasu tup un, khosung mipi hon eimu mu-u chun kachung uva akikhaiyun akap tauvin ahi. Pasal hangsan tah galmun hin jon kahi vang uvin kanam mite ka ogin kangai ngam pouvin, alhisoh lou kaum pouvin ahi. Chuin kalhem lungmong un, melma ten ahal lhah manlouvu inthum a chun ahithei dan danin mipi kaum sah tauve.
Chuin keihon jong gamlah’a thing le go kapouvin, lhambuh tampi kasong tauvin, khosung mipi ho kaum sah tauve. Keiho ding jong lhambuh neo khat kakison un, khosung miho lungmon thei na dingin kaum pi tauve. Keiho kaum jal u chun khosung mipi ho alungmong un, hijongle mitam lou kahi jeh uvin maban a kho le veng ho vettup ding angai kittan, chuphatin khosunga kon’a potdoh dingin kaum tauvin ahi. Chuphatin khosunga nupi ho akap tauvin ahile, haosa pun kache doh nalou diuvin atao tan, hijongle kho dang jong melma hon ahin no khum masanga ventup angai jeh chun kakihom khen uvin, mi akeh khat tobang khosunga kadalhauvin, mi akeh khat kei pumin khosung kahin dalha tauve.
Kahung tauvin ahile, nilhah langin Nengcha te kho kahin pha tauve. Khosung kalut lut u chun amaho jong akipah val uvin, hoitahin eilem un, neh le chah sil le chen ding eipeuvin, keiho jong khosunga kaum tauvin ahi. Chuin keijong Nengcha nu koma kachen ahile, aman eihin mu phat chun akipah valin chibai eibohin ahi. Chuin keijong amanu koma,
KEIMA: “Henu, Nengcha hoiya um ham?”
NENGCHA NU: “Boi, aloi ho koma kholai lenga che hichu o. Nahin ngai ji dan chu. Nathu asei sei jenga, nang dinga jong taona aman man jeng ahiye.”
KEIMA: “Henu, taona a neihin geldoh jing jeh uva tuchan a hi boina kato lou ahiye. Nachung uva kakipahe.”
NENGCHA NU: “Boi, pasal hat tah bangin um inlang nanam a dingin hang tahin hung pang ta o. Kei le napan jong kajo chan lhonin nahin panpi lhon nange,” atin eilhamonin, chuin Nengcha ahung lutin kei eimu mu chun akipah valin, chuin amajong ahung lhaiyin kakong teni a akikhaiyin eikoiyin ahi. Chuin aman kajah a,
NENGCHA: “Heu, nang vang nakilom mong mong e, navon toh chun. Genthei lheh jongle chun hang tahin gal hin sat tang o. Nanao keiman kahin kisonpi’n nang dingin taona kamang jinge, ti sumil hih ta o.”
KEIMA: “Nao, kakipahe. Nang taona jal’a damsel a kahung kile thei ahi. Lungmong taha naum ding chu o.”
NENGCHA: “Heu, nang naum jalin kalung among e. Henu le hepan jong nampi sepai, tia nahin kisonpi lhon dan o.”
KEIMA: “Nang, henu le hepa lungmong taha naum diu, nakichat lou diu chu o,” katile akipahin, chuin kaloi hon eihin sam tan ahile, keijong kakile tan ahi.
Chuin kaki houvun, khosung ventup ding dan khosung lamkai hotoh kakihouvuvin ahi. Chuin kakihou lhahna bang uvin kho kimvel’a pal kakai tauvin ahi. Chuin khosung pasal ho galsat dan kakichuh sah un, hitichun keihon jong khosung chu kaumpi tauvin ahi. Hiche a chun kei galsat mihil in kapang tan ahi.
Kakoma Nengcha ahungin nomtahin hinkho kamang lhon tan ahi. Nengcha toh nomtaha hinkho kaman khom lhon vangin, hoitahin amel kave khapon, kalungsunga Naoshi bou aum jingin, abangle Naoshi mel’in kamu jin ahile, Nengcha jong kahin lungset doh tan ahi. Hijongle Naoshi toh kingai kahi jehin akoma lungsetna ima kasei pon ahi. Hijongle kalungmonna dingin Nengcha toh kahung kivop jing lhon tan ahi. Janle duty kapouvin, janseh le duty po ding kakikhel le leuvin ahi. Chuleh kei phat jong ahung lhing tan ahile, keijong ka-duty pohna mun kajon tan ahi. Chuin kenjong kameipum kasong toh chatin kiging jing san kaum tan ahi. Chule nam sepai hangsan duty po khat chun ahet ding a lom chu ahile, kakhut jetlamin melma kap na dingin meipum achoiyin, kavei lamin kahinkho atuhin, kasa khaova kamelma pa akisel e. Ahung chop lhah lhahleh kakhut teni, melma man ding sa dem a aum angaiye. Hitia chu galsat ding pan akhut jet le vei hoitaha apan khomsah angaiye. Chuin keijong kiging jing pumin duty kapo tan ahi. Mol le lhang kavet le muntina kalungset nu mel alangin kalunghel lheh tan ahi. Itih tah le kanu le Naoshi mel kamu ta dem, adam dam lhon na dem tin, keima le keima kakidong dong jengin ahi.
Gamlah ding tampi aum nalaiyin, hijongle keiho sepai lhom cha bou kahi jeh uvin lamkai pan camp langa mi koube dingin eisol tan ahi. Chuin kenjong kapot doh ding Nengcha jong kahet sah pon, camp lang jonin kache tan ahi. Camp kalhunin thilsoh umchan jouse kasei tan ahi. Chuin lamkai pan mi 20 toh eihin le sol tan, chuin keiho jong damselin kahung lhung kit tauve. Kalamkai pan kaloi ho laha mi 10 tobang khodang vengtup din asol dohin, amaho jong ache tauve. Hijongle kalamkai pa kachunga alung lhai jehin ama body guard in kapang tan ahi. Chuleh aman phat ong eipe jin, kaphat nei sun sun le Nengcha koma kholai lengin kache jin ahi. Ahinlah kahung boi phat uvin Nengcha koma kache na ding phat ahung vang tan ahi.
Nikhat hi kaloi mi 3 toh hin kalamkai ho von sop dingin luikhuh lang kajon tauve. Keihon jong von kasop masang uvin sang khol, toka sakhao lah kameiyun ahile, sum tampi kamu doh tauve. Chuin kaloihon sum chu akilah un, kenvang phaten kakoi tupin, kakile lamin kalamkai pa kape tan ahile, amajong akipahin ahi. Chuin nilhah khojin konin kalamkai hon eihin kou soh keiyuvin ahile, keiho jong lamkai ho masanga kading tauve. Chuin lamkai pan sum amansah dan ahin seitan keiho laha amu kha aum khah le, tin eihin dong tauvin ahi. Chuin kenjong kanung peh dan kaseiyin ahile lamkai pa akipahin, chuin aman jong kaloiho a-check tan ahile, asum sel doh hou ahin man doh tan ahi. Chuin kaloiho akicha tauvin ahi. Ahinlah kalamkai pauvin kajah uva, “Tunin mol ne pouvin nate. Sum chu kamansah u ahipoi. Sum a kapatep nahiuve. Tulai mi tampi suma kitah lou nam natong atam tan, hijeha chu kahin patep nahiuve,” atin chuin keikoma, “Crosby, kitah taha kakoma naum jehin kahin kipapi e. Hijeha chu tua pat a kanung juiya napan ding ahitai,” atin ahile kakipah valin, keijong kalamkai pa guard in kapang jing tan ahi.
Nam sepai kahi jehin Nengcha toh nomtahin hinkho kamang thei lhon pon, kakimuto lhon lou na jong ahung um tan ahi. Nilhah khat jong kei duty poh phat ahung lhung tan ahi. Chuin keijong duty kapon lunghel tahin kanu le Naoshi kanagel laitahin kakom laha ipi ham khat hung chet gin kajan, kenjong kameipum kakisontoh chetin kamu mu le kap jeng dingin kaum tan ahi. Chuin kenjong hoitaha kavet le numei abangin chuphatin kenjong ka-torch kakilah dohin kakho tan ahile Nengcha ahin, chuphatin kalunghang valin kakou lutin kahouse tan ahi. Chuin kenjong,
KEIMA:“Nao, hilaiya ipi nabol ham? Chen kinungle loiyin, kalamkai hon hin mudoh leh eibol gim diu ahiye,” katile ahung lungnom mon,
NENGCHA: “Heu, phat hitih chan nakingah taa tuchan a nang koma kalunggel kasei doh thei lou hi kapohnat ahiye.”
KEIMA: “Nao, kenjong kahe them e. Hijongle ka-on tengle kimuto nate. Tua hi duty kapoh ahin, kihou thei po hite.”
NENGCHA: “Heu, hitih chan a hi kahin nga a phat nanei chom loupi.”
KEIMA: “Ahile ipi ham seiyin,” katile kakom ahin naiyin kajah a,
NENGCHA: “Heu, tulah kahin ngaiye. Heu, nungah kilungset pi nanei hitam?”
KEIMA: “Kei nam sepai kahibouve. Nahin lungset jong leng nadei banga hinkho kahin man khompi jou lou ding ahin, nalung kahin suh nat bep ding ahie.”
NENGCHA: “Heu, thohhat taha kana nga jing ding nahiye.”
KEIMA: “Nao, nommo sa hih’in, nampi a dinga galjona ponlap kakhai doh kahsen dongma nei ponge.”
NENGCHA: “Heu, hiti chun sei hih o. Thohhat taha kana nga jing ding nahiye.”
KEIMA: “Nao, che tan. Ahithei lou ding thu ahi. Ki ol hou ta te. Kei nam natong a hung kahibouve,” katin ahile, amajong alhisohin, chuin Nengcha’n eikoiyin amajong akile tan ahi. Ama akile nungin lunggim nan kadim tan ahi. Hijongle dongma dang nei ding kanom pon, Naoshi bou kalunga aum jingin ahi.
Phat le nikho ahung che tan melma te jong ahung thip dom tauvin, chuin keihon jong gam le lei operation kabol jing tauvin ahi. Ahinlah chomkhat jouvin melma ho husan ahung namtui kittan ahile, keiho jong kakigong kittauve. Tunvang melma ho kengto chan geiya bulhu din kache tauve. Kache konin Nengcha ahungin lung nguitahin eihin ven ahi. Chuin keijong kakihetmo sahin velouvin kaum tan ahi. Ahinlah ama jong kamu mu nadin kama sang laha ahung jin, hijongle kakihetmo sah kitin kilepnan mitoh kakihou lim tan ahi. Chuphatin ama jong nommo sa tahin ache doh tan, chuin kenjong kaven ahile, ahung kinung hei chetin, huiyin asam ahin semin ahile, Naoshi mel’in kamun, chuin keijong kalunghel valin Naoshi ahi mong mong nai, katin kadel phei tan ahile kamu kit tapon ahi. Chuphatin kalung adong lheh tan ahi.
Nam natong akihi jehin gal le tol bou kaboipi jehin Nengcha toh kakihou ji vangin amel hoitahin kave khapon ahi. Chuin phat che saa kana kivop lhon ho kagelle amel ol ol in kahin nung gel in ahile Naoshi mel bangin akilangin kalung aboi lhatan ahi. Naoshi dingin la kaging chapon, Naoshi ahi jongle hung kiphong doh teiyin te, katin Naoshi dingin katahsan mong mong pon ahi. Ahinlah khatvei beh amel hoitaha mu ding kanom kittan ahi. Hijongle janlai ahijehin kapot doh thei tapon guhthim a kahol vangin la kamu tapon, chuphatin lunghel tahin khosung kahin dalhauvin gammang lah kahin jon tauve.
Phalbi nai ahitah jehin adap lheh tan ahi. Genthei kakisa ma ma jenge. Abang komle kaki sih jin, hijongle kanam mite thisan lon kagel le kapo na kitin hansan na kahin nei be kit jin ahi. Kahung tauvin ahile lampi jong ahahin kom laha kahung kisep lhu pehin ahi. Chuin kahung tauvin ahile munkhat’a melma ho kamu tauvin, chuin keihon jong guhthimin kagem un akoma patin kakap tauve. Melma ho jong kiging lou ahijeh uvin aha thi lheh uve. Asohcha themkhat vang ajamdoh tauvin ahi. Chuin keiho jong kahung kit un jankhovah helin lam kahin jot tauvin ahi. Jingkah niso in vadung pang khat a kakichol uvin, keijong kalel val tah jeh chun munkhat’a banga kakinung ngeiyin kahinkho che dan ho kahin gel gel tai. Kanu koma kaum laiya chubanga nom kisa a, tua vang gilkel le dangchah thoh puma hinkho kaman kagelle kalhase jin ahi. Hijongle nampi thisan lon jalin hangsan tahin kapang ham hamin ahi.
Chuin kahung kipat doh kit un, sun nilhumin Ukhrul Dist langa melma ho camp khat kabulhu’uvin mi tampi jong kathat uvin ahi. Chutia kakikap to jing laiyuvin melma hon kakeng ahin kap kha tauvin ahi. Chuphatin kapang jou tapon kaloi hon eipouvin kahung kile tauvin ahi. Chuin kaloi hon thinglhang damdoi mang chan eijen un, keivang lamjot thei louvin kaum tai. “O! Kanun mu le laina lhehin te ong, kahinkho man hi. O he! Ana ngeiye kathoh joupoi anai, kei thoh hoi ahipoi, hijongle nampi galjona ponlap kikhai doh kahsen pang jing inge,” katin, mitlhi long pum pumin lam kahin jot tan ahi. Kaloihon eipoh got vang uvin kanom pon, hitichun kaloi mi thumin khosung langa eihung nung thah tauvin ahi.
Hitichun genthei tahin khosung kahung lhung tauvin ahile, khosung miho eive dingin ahung kijot lut un ahi. Chuin mikhatin, “Anu jong ahunge,” ati chu kajan keijong kakiheiyin kaven ahile kanu kamun, chuin kanun eihin del pheiyin eikoiyin akap tan ahi. Chuin kanun kajah a,
KANU: “Boi, damsel a kahin mu hi kakipah vale. Athia kahin gel na hitan, hijongle Pathenin damna hinkho napeh nahlai jehin kakipahe,” atin, chuin kenjong kanu jah a,
KEIMA: “Henu, Naoshi hoiya um ham?” katile kanun,
KANU: “Boi, kakoma aum e,” atin, keijong hah joulou sa san kaven ahile kanu koma numei khat kamun, chuin kenjong kanu koma,
KEIMA: “Henu, amachu Nengcha ahibouve. Ken kalungset Naoshi bou kahol e,” katile kanun kakoma,
KANU: “Boi, hoitahin ven, nanao Naoshi ahinai. Koi Nengcha nahol ham?” atin keNjong hoitahin kaven ahile Naoshi’n me hiu heu hin eihin ven ahile kangaivalin kakap doh tan ahi.
Aban jingle anasim kit taute. Kakipahe asim jouse Pathen in phatthei boh tahen.
©️2018, Crosby Haokip All Rights Reserved
*Published by _KILUNGSETNA THENG_ Whatsapp Group*
