Bro.Shonkhogin(Hegin)Haokip, Maranatha Cottage, Phaipijang, Langol.
_…Nachonsetnan nikhatleh nahin holdoh tei tei ding ahi ti kihet chen in. Number 32:23b._
Sopiteho, hiche Bible changhi kanaja khapon, kajah nini chun, Pathenin nasatah in eitongkhan, ipijeh in em itileh hiche toh kilhon in thulem khat eikisei pih uvin, thulem khat chu ipiham itileh, mipa khat hin Auto- Rickshaw ahintollin ahileh, lamsih-a che mipakhat atat-lhutan, athi, ahin, akihepon, a ipi hijongleh aman aphoh doh angaijin, athileh alongman apeh ding, ahinleh doctor ajensah ding tichu ahijenge. Ahinla hitabanga bolna dinga chu sum imacha aneilou ahi. Hijeh chun, aman jong lungthimkhat ahinpodohin, eimanthei Police, sepai aumleh phonging kating aum louleh jamtang kate atitai.
Hichephat chun, avetlele leh, uniform a kivon mongmong amu tapon, kijamleh phapen inte tia ajamleh, police civil vonna kivon khat anung adelpeh in, aman la police,sepai koima chan eidel poi ati ahin, pungkhat tabang ache jouvin, munkhat na agari akhamtan ahileh anunga civil vona hindelpa jong chu ama kikhamna muna chun, ahungkikham in, anung ahinjuijin, Auto driverpa hin thilkhat cho inge tia agah bun chun, police pa chun, aleng kouva amanin, nanghi pungkhat masanga hiche lai mun(amun min chu aseijin) na mitangkha pa chu nahilou ham ? Kei police Inspector kahi tin a Identity card chu avetsah leh Auto-driver pan seiding changkhat cha aneipoi akiti.
Tunia nangin guh thima thil ijat naboldoh hitam, koimachan namupoi, nahejong nahepoi, nangman naseidoh louleh naman ding jong umponte. Ajehchu nangle Pathen bou ahi ahe ah. Ahinla, thilphalou iboldoh ho jouseu hin, nikhatleh nahinholdoh tei tei ding ahi tin, ibible uvin aseije. Mihemte khantou machal na toh kilhoin, tuhin mun thupi dom dom jouse hi CCTV Camera kikoi ahitai. Ahinla, Pathen vangchun, semtila patna aman hitabang record bolna, thilpha kiboljong amel chih jing, thilse kiboljong amelchih jing, munjouse hi aman amusoh kei ahi. Nikhatleh eiho kilep jong leuhen, aman pinpoint a eimat diu ahi tihi sumil pou hite. Hijeh a chu, nikhatleh eihungkiman doh thou thou ding akihi jeh a chu, tuahi eima eima kineo sah a phondoh thei thei, kiphondoh a, ngai dam thumthei ki-thuma pha hilouham. Tunia ikisel sel vangu va chu nikhatleh thupi tana anga eima eima tah in ikiphon doh u va, themmo ichanpi kit nah lai diu ahi.
Tunia nakineo sah a nahehpa chutoh nakihou toh leh nahehpan lha dohna le ngaidamna tha anei ahi ti sumil loujenin. Nikhat teng amahi thutan a pangding ahitan, aman thudih thutah a thu atan ding ahi. Themmo chang dinga thupi tanna anga nadin nomlouleh, tunin nahuhhingpu Pakai Jesun nahuhdoh din nangah ngah e. Na huhhingpu koma chen lang nahinaho jouse ahina bang bangin, kisih pumin a angsung belin, nakisihna alhinleh Pakai jin nangaidam ding ahi. I-kisihna hi alhin louleh Pathenin la ilalut lou, eimanla Pathena kapeng thah tai ti a kinemkhel jong mi tamtah aumdapoi. Hijeh a chu lungthima kisihna hi Pathen san theina level aphah angaije. Tichu Pathenin atah alhem ihi chu phatecha a ahet ahi. Pathenin athu phatthei eibohpih taohen.
Abanjom umding ahi..2
