Home Shonkhogin Haokip NACHAN DINGA LOM LOU KHAT CHU AHOI- MAN APHATMAN IN KEIDING AHI...

NACHAN DINGA LOM LOU KHAT CHU AHOI- MAN APHATMAN IN KEIDING AHI TIN MOH CHUU JENG HIH IN..

146
0

Bro.Shonkhogin(Hegin) Haokip
Maranatha Cottage, Hebron Veng, Phaipijang, Langol, Imphal West, Manipur

Lhagao beija tahsa athisa ahibanga chu, natoh beija tahsan chu athisa ahi. Jacob.2:26._

Sopiteho, tulaijin mi tamtah in Pathen thuhi decoration ahilouleh kiselnan ineigam taovin, abangloi khat deh deh hin Pathen thuhi kiselna ham ahilouleh idei deijun claim iboltaovin. Tekah in, ibible u Mat.28:20b. *“Keiman nangho vannoi leiset kichaini geijin kaumpi jingnaove”* atihi, Pathen natonglou khat’in iti claim(achu) abol thei ding ham ? Boljongleh Pathenin aumpi thei ding hinam ? Hiche a Pathenin aumpi dinga lomho chu koikoi ham itileh, Pathen tahsan na, gospel kipana thupha a kisalal ho jouse chu hithei(eligible) ahiuve. Pathen thujong gut lou, holjong hol lou ahivanga Christian maimai ahi mana hitabang promise ho tahsan kei mi tamtah aume.Hiche ho chu amale ama ki lhem lha ahi. Achan dinga lomlou khat kinema amulouphat leh Pathen mo-sah jong umthei ahi.

Anichan na a, Psalm 91:10 in, “Thilphalou him himin nalhun khum pon tin, hise himhim in jong nachenna in hin pha ponte”, akiti. Mitamtah in hiche bible changhi tulai tah in akisipchah kheh uvin, achang dinga lom kahi hinam ti imacha ki kholna aumpoi. Chang ko chu ivetna ahileh ajehchu nangman Pakaichu kisel nan naneijin, Hatchung nung chu cheen nan naneitai hijeh a chu, nachunga thilse hung lhung lou ding ahi ati ahi. Sopiteho, hiche lai muna hi evetle, amahi Pakaija aumjehleh Pakaichu ama koma achenjeha hita bang thilse chu hung lhung louding ahi ati ahibouve.

Athumna a *,” Keiman thina phaicham lim jotpa jongleng, thilse kaging tapoi, ajeh chu nangman neilhonpinai”..* Ps.23:4. Hiche bible changhi ahoi man na mijousen amoh kineppi thei ahipoi, adih tah a ama jong Pathen tahsana dihtah aneija Pathen mi ahileh hichehi Pathenin akilhonpi ding tina ahitai. Pathen thuhi lottery tabang ahipoi. 1992-93 vel lai Kuki-Naga boilai tah Mao-gate eimite dinga lhanmol ahi akiti laitah in, Chennai a Retreat a chena dinga Pathen koma katao leh Pathenin hiche Bible changhi eina pen,hiche promise claim pumin kana chen, kidangtah khat chu kichat-lam cha jong kahepon, noptah in akichen, Mao-vah An kanepaovin, koimachan imacha jong eidong aumpon ahi. Hichu Pathen in eiumpina kichentah chu kana mun ahi. Eiman Pathen dihtah a inei-loule vang athu hoi lheh jongleh na atoh(it’s not working) thei lou ahi.

Achaina in, ibible un, *“Ajehchu Pathenin hi bang a hi vannoi angailut ahin, koihijongleh atah- san chanchu mangthah louva tonsot hinkemlou anei thei na dingin, Achapa changkhat chu apetan ahi.”* John.3:16. Hilai muna atahsan chanchu, tina hi katah- sane tijeh a tonsot hinna kimohmu a ahipoi. Ama tahsan theina dinga eima part ngaijah ahi. Tahsan hi Pathen thu ngaija kona hung ahi.Rom10:17. Pathen thu jah a kona michonse kahi ti kihet dohna, chonset kihetdoh a kona kisihnale kiphon doh nomna, kisuhtheng nomna hiche ho jouse hin Pathens dettaha tahsana lampi asem ahi. Hiche a kona tahsan chun naa ahintoh ding ahibouve. Lhagao beija tahsa athisa ahibanga chu, natoh beija tahsan chu athisa ahi.Pathen athu phatthei eiboipih taohen.

Previous articleLUNGSET MASAPEN (FIRST LOVE) (1)
Next articlePAKAI LAMPI JENGIN BOU NAKOM EILHUT DING AHI