Home Lahkhom NA GENTHEI NA KAVEJOUPOI 

NA GENTHEI NA KAVEJOUPOI 

279
0

L⭕VE ST⭕RY

MORAL

St kuki ✍
(7085383639)


Hiche vang hi thusim dang bang in episode in vang kah in bol tapon full a kahin sut ahie.

Khosung khatna hin Lamcy kiti nungah khat leh Thangboi kiti gollhang khat anaum’e. Amani chu aneova pat hung lhakhom lhonna ucha bang tah a hung kingai tou peh ahilhonin chule mipi vetjui thei tah khat chu ahilhon e.

Hijeh chun amani chu mipi hon asin thei lheh jing uvin, houbung lang a kivaihom na eja kai hijong leh amani chu khanglai lamkai ding chun anapan sah jing jiuvin mipi lunglhai umtah khat ana hilhonne. Hinla abuoi nakhat vang Thangboi techu mibang a bolthei leh hou ahilou jeh uchun, lamcy inkote chun Lamcy chu Thangboi toh alhat khom ding anadei pouvin ana jahnom peh pouve.

Hiche chu Thangboi injong akihetnin akipah thei mong-mong tapon, lamcy toh kilha kang ding chu adet thei mong-mong kitpon alang khatna Lamcy injong a uthangboi chutoh kikhen ding chu agelthei poi. Hiti ahijeh chun amani jong alunggel cheh lhon aseilhon in buoi na ejat umjong leh thoh hat tah a pang jing ding chun akigel lhalhon tai.

Lamcy chu a upa leh apa jong Officer cheh cheh ahilhon jeh chun insung a hahsa loubeh chun akimang chauvin, Lamcy jong College akai sah sah nalai uvin nomtah a akoi uchu ahi. Hinla Thangboi vang insung genthei leh hahsa te ahijeh uchun akiha bol jeh chun lekha chu M.A. chan chu ahin kichaiyin ama lungtup chu I.A.S. ahin hijeh chun hiche exam peh thei nading chun Coaching lah nading hoi aum lou jeh chun munchuom a lah ding angaito vang in hinla a insung adinmun avet leh khochan gam a chejou ding chu ahah salheh jing in ama jong lhase tah chun lunggel genthei tah chun akingaito jing tan, hitia genthei tah a sum leh pai ahahsat jeh a chethei lou ahichu a lungset Lamcy chun ahet phat chun alungthim anom kit tapon, ahet het chun gangchel in a bank a sang somthum umchu abon chan a u thangboi exam peh thei nading chun aga petan hiche athil peh chu Thangboi in amuchun akiphatlam behseh in aseitai, “Nao! Eda keiding nahiti gelkhoh ham?

Kinung choiyin lang chetan, na insung mite ang’a keijeh a pho nachan ding kanom poi keima genthei lheh jong leng thagum in kihol thu tange” atitai. Hinla Lamcy chun ajahnom pon nakilah lou leh kahin khon nomsa ponge atiphat chun Thangboi in jong chutia akiha lhaset behseh phat chun alahtan, lamcy chu a ang koiyin mitlhi pum chun “nao nang in kahahsat kagenthei na neihetpi jiho hi genthei kahijeh in kakiphat lamjin kalanom jipoi, hinla tunia nang kithopi nahi kahin khon sumil ponge kalungset jilheh vang in na sinsung mite mitvet invang ema kahitapoi hinla ven! Khat vei levang lolhing tah a kahung kipui thou thou ding nahi” atitai, Lamcy injong “heu! Keiman jong nang nahung lolhin na jeep leh car a na guard hotoh nahung diu chu kangah lel e na lekha simna a hung lolhing in taonan kahin gel doh jing ding nahie” atin mit lhi twi vachut chut chun akikoi lhon e.

Hitichun Thangboi injong Lamcy in kithopi na a apeh jat toh aman anaki kholdoh hochu asim leh chethei ding dinmun in aum tan, I.A.S themvet na atouding ahijeh chun amun hoipen ding chun Delhi munna Coaching lah ding chun akigel lhatai hijeh chun amajong ajeng a kipatdoh peiding chun akigong tai. Alang khatna Thangboi chu anu toh bou cheng khom ahilhon jeh chun a anu adalhah ding chu alhangai kit jin lunggel genthei tah chun emuthei louvin aum kitjin hitobang ahijeh chun Thangboi jong ajal khun chung a nom in jong acholdo thei dih poi.Jing kho ahung vah in Thangboi jong akigel lhah dungjui in insung hahsa genthei ahijeh uchun mi nuoise a aumdiu adeilou jeh chun amajong lunglen tah chun cheding akisa tan, a chunnu anglaiya mit twi pum chun “heno! Nacha keiman khonung leh ahunglhung ding hoa egenthei diu kanom poi,mi vet nim leh mi nuoise a eum um diu kanom thei poi, kapot doh sung in damsel in anaum in onk!!” tin alhi akitheh in anu chu akoitai.

A chunnun jong aneova genthei tah a ahinvah ho ageldoh leh tunia Thangboi in hitobang tah a hangsan tah leh thangtom tah a lekhasim dia akipeh chu agelle alung alhai lheh in amajong agenthei val jeh uva mibang a anasot jou behseh lou jeh chun alhin achup peitan acha Thangboi komma “boi, thangboi!! Nanu keiman nanu keiman midang bang in nathemjil nalam a phaten kahin khoukhah jou but tapon hinla kakipah e tunin nang injong etobang a insung dinmun umham?tihi nang man namua napoh nat hohi nahin geldoh jing a chung Pathen ang a kineosah tah leh gunchu tah a eum leh alolhing lou aumpoi tihi sumil hih in boi” atin anu chun Thangboi chu athumop in hichun Thangboi jong anu masang a adil sun anuchun taona amanpeh in kilhalel tah chun ahung kikhen lhonin Thangboi jong airport lang jonin achetai.

Thangboi jong airport alhung tan, alunggel chun Lamcy chun lhah beh eihung lhahdoh ding ham?tin kinem tahchun angah thim in hinla akinepna bang louvin, lamcy melchu apum muphah tapoi. Hiche ni chu Lamcy injong a u thangboi gahthah doh ding atin ache gut leh a inkoten ana jahdau vin Lamcy chu a room a kot ana khakhum den uvin a phone jong analah peh uvin a uthangboi toh kimuto thei louvin anakoi tauve, lamcy jong alha ase behseh in a jalkhun chung’a a u thangboi lhangai nan akap kap tai. Hitia Thangboi in jong eihung thah doh ding ham tia anagel vang in lamcy mel amulou phat chun amajong pung alhin phat chun atouna huikong sung a alut tan akipan doh tauve.

Huikong jong akipatdoh phat chun Lamcy te inn chung ahin ahin phah in Lamcy jong lhase tah chun lenna gin ajah jah chun a window akon chun a u thangboi in mupha tahih jong leh akhot in mangpha athot in mitlhi long pum chun, “Heu thangboi! Lhaolha seloujen in na lekha simna a hung lolhing tei tan” atin lhasetah chun alhadoh tai,
Lang khatna Thangboi jong chu lungthim nommo tah chun aum e. Hinla damsel chan amajong aum nading mun Delhi chu agalhung tan a room a alutnin Lamcy chu phone abolloiyin ahile switch off in aumtan alung anom mo cheh-cheh kit jing tai hinla amanjong hitia aum peh leh a lekha sim asuhbuoi ding peh ahi ahet jeh chun aphalam tah in akilah kitnin lungthim nommo lheh jong leh polam a somai kipah tah in aum jing tai.

Hitia Lamcy toh akijah matto thei louna jong asot tahjeh chun Thangboi injong aha gelbehseh tapon a lekha sim nalang joh a ahung kiha boljoh tan a coaching lah najong ahung sot thim tan a U.P.S.C exam pihding jong ahung nailam tan amanjong aloi agol hoa konin ahung kikangse peh jing in, hoilaiya party umhen numei ejat mujong leh akimumo sah jin anun athumop naleh angaipen lhingcha ding jong gelnan numei dang jong velouvin hinkho ahin mang peh in alekha sim thaset nikom leh hiche ho chu kitil khounan aneijin thangtom tah in lekha ahin kisim in ahile a U.P.S.C exam jong lolhing tah in ahin chai thei tan, aman a result nga tohgom in atin innlang aphah louna najong ahungsot tah jeh chun inn lang kile ding in akigong tan, kipah tahchun a nu leh angaipen Lamcy mel muding kal chu ngalel nan adim e. Inn alhunin anun jong kipahtah in anavailhun in damsella a exam teho chaitheiya aumjeh chun ahcha athapeh in anuchun maicham asem peh kitne.

Thangboi injong inn lang hung lhung pan-pan ahijeh chun Lamcy peh dia thil ahin choh peh chu amatah in apeh ngam loujeh chun aloi teho khat peh sah ding atin aloite inn lang jonin agachen athil choi chu aloinu chu apen kiphatlam tah in, “Lamcy eina peh pih aw” ahinti chun aloinu chu ema seingam louvin akun mang jeltan hichun Thangboi chu alung atheh in epiti ham? Epithu umma hitia kun mangjel nahiu ham? Tia lungdong tah a adoh jeng phat chun aloinu chun “U thangboi athu emacha nahet loulai na?”ahinti tan, hichun Thangboi jong chun “Seiyo!! Epi hitam? Emacha kapum hetphah poi? Epithu ham?”tia adoh jing phat chun aloinu chun aseipeh tai— “nang napot doh doh chun Lamcy chu a inkoten nangtoh kimuto ding injong aphal peh pouvin a room sung’a kot akil khum den uvin, lhasetah in aum jing in nang napotdoh sung in a inkoten Lamcy chu nang na hung pot kitkah in atiuvin, Lamcy chu jinei doh sah ding atiuvin a bon chauvin akitho khom uvin ada sasan police inspector khat toh akichensah tauve”. Hiche ahin seitah chun Thangboi jong akipa najouse abeisoh tan emacha thanop na anei tapon thip beh chan lhase tah chun inn lang ahin lejut tan inn alhunin anuchun lungthim nommo tah a aumchu ahet phat chun adong in ahile Thangboi jong kitim lelval hintin anu masang a mitlhi long pum chun “heno!! Kahin khon vel jinei taponge onk” atin athu ema seilouvin alhi akitheh theh tai.

Hichun anu jong chun ahetthem in Thangboi chu alhi atheh peh in alhem tai. Thangboi in Lamcy ajinei ahi ahetphat chun akom in akithah tapon phatsao tah amulou na ahung sot tan a result jong ahung kiphung tan pachanna sang tah ahin neitai.

Nikhat hi Lamcy hin a private Oja panna mun akon inn lang jonna lampi ahin jotlaiyin, a masang a jeep leh car a sepoy guard jaopum a amasang hung kikham chu in guard ho khatnin Car khat chu akot agahong in ahile Lamcy chu alung adong in phaten agah ven ahile kidang tah chun hiche guard hokhatnin kot agahot na akon chun masang a angaipen a U thangboi chu hiche Car akon chun ahung kum lhan coat hoitah kivonin spect vom khat kibeh a ahung kum chu amu chun lamcy chu ajah achalheh jing in tuol nuoi lang aven a u thangboi lang chu vengam talou vin lampi chu ajot tan ahile akom aphah chun Thangboi chun “Cy!! Khongai tadin ” atin ahile Lamcy chun U thangboi mivet din akilom thei poi miphung changsa kahitai” atin ahile thangboi chun “ahipoi, naphat phat lhon hinam?”atileh Lamcyn jong “henge! Kapha pha lhon nai e” nang lah agah tileh thangboi chun “achang a vaitham den ding a eikikoi kahin kho hi tuchanin ji kaneipon, jijong nei taponge nang in hitidia neibol hilou ham? Hinla kakipah e Cy!! Nang jalla hichan kaphah ahibouve nanghi mibol theitah nahie kapap pujou dia naki gelmong hinam?”atin Thangboi jong chun a engkap jing tan alhaset naho anamoh sei leh Lamcy thoh hat naho ema hepha kit talouvin anop nop anasei kittan ahile hichun Lamcy jong ajahchat toh lhaset kop chun inn lang ahin del tan, inn alhunin alup nachung a akisep lhan achuti kaa kit tai.

Thangboi jong nommo asathim kitnin Lamcy loinu komma agathah chekit nin ahile lampi a akitopi ho thu chu aseiyin ahile aloinu chun hitihin ahinsei peh kit tai— “U thangboi, amakhu lungset umtah ahie masang chun ajipan lungset tah in anabollin khatvei nao avop laiyin ajipan adei lele leh step a ahung kibalhun hospital a apui leu anaobuh chu akisuh set e atiuvin akum kho a cha neithei lou dia doctor hon ahinsei peh uva patchun ajipan nilhahseh akham san inn agalhung jin Lamcy chu avojin cha neilou nu,cha kadeiye atin mihem khat kibol nadia lom louvin abol jing jin agenthei val jeh a a’ute nin amaho School a private oja khatna apansah lhon ahie ahung kile pet chu hinte naki suhto nalhon chu” ahinti tan ahile Thangboi chu alai analheh in kamngai lou thucheng analha khum chu akisih lheh in hiche malah in Lamcy hinkho mandan ahin het kit phat chun anungah lai sang chun ahin lungset johkit tan, aloinu komma “Lamcy chu kakimupi tei-tei angai e” atin lungthim nommo tah chun apot peitai.

Ajeng in Lamcy in ahin jot naji lampi achun Thangboi chu a guard hotoh ahung kit uvin, angah kittai anga jing laiyin Lamcy jong ahung kittan amumu chun “Cy!! Khongai tadin seinom khoh tah kaneiye jan ni hetkhel jeh a kaham ngailou naho neingai dam in, nahin kho thusim ho kaja soh tan nang jeh a hichanna sang tah kahung um ahin kahin lungset nalaiye kahin khon nang teilou koima dang kadeilhen naipoi hung kile jing tan” atin lainatah chun aseitai, hinla Lamcy chun “heu thangboi, ngaidam sa nahi tunin nang in kahin kho mandan nahe soh keiyin epi kaseibe ding ham?keidia alou thei louva kakimaito pi ding lampi chu ahitai, kei jeh a nang nacha mulouva nahung genthei ding kanompoi hiche pap hi keibouvin kipoh tange” atin mitlhi long pum chun Thangboi chu adalha tan ahile, anung in Thangboi chun “kenvang etih hijong leh nahung kile ding kal kangah jing’e ti sumil hih in onk Cy!!”tin ajah ding chun apeng jing tai.

Thangboi jong inn alhunin common room a atouvin Lamcy hinkho man ho leh ana kingailai hon hinkho chu agel jin ahile Thangboi chu angol bang in akom a dolly chu Lamcy mellin amujin akoijin akihoulim pin “Cy!!neida lhahih beh in ken nang lou koima dang kaneipoi hung kinung letan nagen theina kave joupoi” atin dolly chu Lamcy mitnin amun akoi jin achuti kaa pi tan ahile anu chun ahung mudoh in alainat pi lheh jing in Thangboi komma “boi ehinkho a khat vei leh vangset na kitoh intin khatvei leh hamphat na kitoh ding mong ahi kap-kap tahih in” atin achapa thangboi chu alhem in hichun Thangboi chun “henu kahinkho hi agenthei val e kamit mu cheng a kalungset khat genthei kamu jing hi” atin anu ang’a alhi asoh in achuti kilhaset jing tan ahile anu chun “boi, ken jong kagella kasei ahi tunvang nang in nadei pen khat nang in pha nasah nang adia nadei lhen numei chu ken jong pha kasah jing ding ahie seiyin nalunggel” ahin tiphat chun Thangboi injong “heno mou hijong leh nanom dem?”ahin titai. Hichun anu jong amit lhi ahung long in “boi!! Amajong numei hichumem ebola kida ding ham?”atin nu in cha lunggel ahet them jeh chun hitichun ahung kilhem lungmong lhontai.

Ajeng in Lamcy chu ajipa lunglhai lou na ngen ahiphat chun athoh lel val tan, ama inn lang a ale jam tan inn agalhun leh koima ana um pon, varanda a kikoi hampa lou amu chun Lamcy jong leiset a keidin nopna him-him aum tapoi atin poison chu don ding atin agah hondoh a adon gut chetnin a ute ni inn hung lhung pan-pan lhon chu hiche Lamcy thilbot gut amu lhon phat chun a upa chun lou chu ahung sa lhah peh in “epi ham? Nang dia alhinglel na u nanao, nasopi umlouva nagel hitam?”atin ale pho kittan ahile anu leh apa insung miho ahung lhei lut sou-sou uvin epi thilsoh um hitam? Tia ahindel leu Lamcy in ana dongut hampa lou amu uchun atija lheh uvin hichun lamcy nu leh pa chun “boinu, epi nangaito a hibang a hi kisago jing nahim?”ati leu Lamcy chu ahung kap jah jing in “nang hon tunia kadinmun ding hi nadei uva kanop nalouva ji ninei sah u hilou ham? Tunia kadin mun hi nang holoi jeh hilou ham?”atin kap pum-pum chun kilhaset tah chun a inkote masang achun aseitai, anu leh apa, a ute jong chu themmo akisalheh jing uvin ajipa chung a tahsan tah anei nau chung a alung ahang jing tauvin apet pet chun Lamcy upa chun ajipa chu phone abollin jeng nikho pung 9:30am don tah leh divorce ding a (kikhen theng ding’a) lekha court masang a soi nahung kai ding ahie atin lunghang tah chun aseitai.

Hiche ni chun Thangboi chu kino tah in bank a sum kaidoh ding in ahung in ahile Lamcy loinu chutoh akitoh khau vin ahile aloinu chun Thangboi amuchun “U thangboi epi nabol na hilaiya?”atin akihou lim-lim leu aloinu chun “ahile “U thangboi Lamcy thu khat najah tam?anommo lheh e” atile Thangboi chun a’he nom ma-ma jing in “epi thu ham?epi tiham? Sei tadin kahet nom e”atin kino tah chun adong loi jing in ahile hichun aloi nu chun “Lamcy chu ajipa toh kikhen theng nadia(divorce) nadia jeng leh court na soi aga kaidiu vin asei lha tauve”.

Hiche thu ajah jah chun mitvet dia lungthim nommo tah a aum vang chun alung sung in vang ahinkho kithah lekit thei nading chance kipe bang in agellin akipah lheh e. Ajeng in Lamcy toh a jipa hou chu court mai a hearing alunggel u ngai lhahna anei uvin Lamcy houlim na achun “keihi kanop na a jinei kahi pon, ka inkote, ka insung mi ho ngel ngellin kanop nalouva ji einei sah u ahin tunia hichan kalhun jong hi kanop nalouvin ebol hih leu hiti louding ahi chule kajipa seh seh jong chadei lou ahipoi anu ding ken jong kadei ahi cha neithei loudia kaum hi kei ki bolthu ham?kei cha deilou danna ham? Ebola aman cha kadei e, nao neipen ati jing thei ham?sir, kei hitobang mi a ding jong khankho gellouva amading bou kigel ho komma umthei kahi tapoi” atin milhi pum chun divorce lekha achun soi akai tan ajipa vang chun ajahchat pitan soi jong abol ngam tapoi. Court in jong kikhen theng ding chun thu atan lhah peh tan, ahung kikhen tauve aning lang a Thangboi in anathim ngai lhi jing in amadin athah beh in kipanan alodim jing e divorce lekha a soi akai chu Thangboi chun amalang a apang tobang tobang chun agellin alungthim in akipah lheh jing’e.

Hiche joukal chu Thangboi chun Lamcy chu masang a alungset na sang a sang jon alung setna akibe cheh jing in achang in a guard ho jaolou vin kineosah tah in masang a bang in Lamcy chu angah pan tan akihoupi jing jin ahile Lamcy injong amadia a U thangboi hichan geiya apan naho athah gelle amajong ahin lungset doh kittan akam cheng lhon tah a akisei doh kit nailhon lou jeh chun abuoi kit in, hitia thangboi in Lamcy anga jing chu Lamcy upa hin ahin mudoh kittan aga che in Thangboi chu thi kai leuvin aga voh lo in hinla Thangboi invang kile thuh ding vang apum gel poi, Lamcy chun hitia a u Thangboi thoh chu avet joulou phat chun a upa jah a “heo!! Amachu vohih in kenjong ama kalungset sa ahi” ahin tichun Thangboi jong athoh vang chun ahung mae seuseu vin Lamcy upan jong hiche phat chun Thangboi jah a “Kanao nu hi nalungset mong-mong nam?
Thangboi: henge, eitih a kalungset amabou ahin kalungset jing ding ahi.

Lamcy upa: ahile, amajalla thingam ding nahi nam?

Thangboi: amajal a thiding changei hijong leh kahin kho hi kaphal ahitai.

Ahin tichun, a upa lungthim atong kha lheh in hichun a upa chun Lamcy chu akhot in ahin kaiyin Thangboi masang a akhot lhon akitu to sah in apedoh tai.
Chomkhat jouvin Thangboi toh Lamcy puiding chun security Thangboi guard ho chu ahung jeep leh car in ahung leng lut sou-sou tauvin ahile, Lamcy upa jong chu alung adong in koi manding hiuvin tem tia lungdong tah a agellai yin guard ho lah a khat chun Thangboi masang a akengto ahung tatnin “Sir!! Naha kisuh khah em? Hospital eche diu ham?”ahung ti chun Thangboi I.A.S.officer ahi chu ahin hedoh bep uvin hichun gary a eu sesu jeh chun Lamcy nu leh pa, a inkote jong chu mipi alhei doh sou-sou jeh chun ahung lheidoh uvin ahile achanu u Lamcy chu Officer lentah khat Car sung’a alut pet chu amu man nah nah uvin adel gut leu Lamcy upa chun akham in “del angai poi amadia akingap nading munna che ahitai” atin lungmong sel chun gary che doh chu a gal vettho tauvin chomkhat jouvin a pau phone ahung ging in “na inn uva mou dong ding kahung uve ana kigong uvin” tin ahung kiseiyin call chu atan pei-pei tai, koi ahi chu hetsa ahitan hiche jouva patchun Lamcy toh Thangboi in marriage abol lhonin cha neithei lhon tahih jong leh orphanage home a cha te khat lungset um tah in amani cha bang in akivah lhonin genthei loubeh in nomsatah in hinkho amang lhon tai…..

…~beita~kakipah’e

Epi ejil doh uvem: Mihem akihi cheh vang in lunggel akibang pon, nungah/gollhang hinkho mang hohi nu leh pa ten phatea a etil khou uva eima lunggel pa seh-seh hi adih e tia namphu a cha te son louvin, epi ham ka chaten agel diu jong hi ti a amaho lunggel ding jong hi hetpeh angaiyin chuleh, insung a khat leh khat lunggel kihet them peh to kalvalla apha ding aum poi. Kihetthem to peh louva eima lunggel jing pa bou bol ding chun khonung a chate hinkho aselam a alhut nathei ding mun jong atam in mi nu mipa mo chan thei nading jong aum’e. Nungah/gollhang kilungset hohi phaten kholchil masautin ami hi nau etobang mi hiunam?tipa joh hi hetpeh in aphai ajeh chu akilungset nauhi thipi ding changei injong aum nomji hiche chu nabol khel leh nacha mitmo sang a nangjoh mimo ding nahi.

From Author: Lunglut tah a eihin sim peh ho jouse chung a kipathu kahin seiyin asim jousen jong phatchuom nan nei tauhen, jih nasung a jihkhel, alhinglel,.lunggel kibah louna ho aum leh kingaidam ute. Thusim chung chang a Comment ahilou leh feedback bolnom hon ka contact number 7085383639 whatsapp a neihin houpi jing theiyu ahie..

Kakipah’e

©©© Copyright

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articlePATHEN LENGGAM JALLEH AMA MINJALLA IPIPI NACHAAN HITAM ?
Next articlePUSSY CAT, PUSSY CAT