Story By
Nick Hangshing
Masang lai achun khosung neokhat hi ana um in ahi. Hichi khosung chung tah achun moul lentah khat aum in ahi, chuleh hichi kho chu khothah ana hi nalai jeh chun acheng a mi ana tambeh set naipon ahi. Mi atam lou wang uchun hichi khosunga cheng ho se2 chu kilungtoh tah in acheng khom uvin ahi. Phat ahung chi2 in ahileh nikhat hi go hattah in aju in ahi, hichi gojuh chu thip talou in ni ijat ham khat chu aju2 jeng tan ahileh, khosung mite hojong a inn uva kon a pot doh thei talou in, a inn cheh uvin aum thim tao un ahi. Hiti chun jaan khat hi khosung miho a emut pet lai tah un, go hat wal leh thip man lou a ajuh2 jeh chun, akho kom uva moul len tah chu ahung chim lhatan ahi. Ahung chim lhah chun khosung mipi te emut pet laitah ahijeh chun koima ahingdoh umlou in abon in achim khum uvin, chuleh khosung kisan jong chu bon nang in atol mang tan ahi.
Hichi khosung chu kho thah ahitoh kilhon in, khosung neo cha ahijeh chun moul in achim khum leh asuh mang gam chu koiman ana hedoh pon ahi. Hiti chun phat ahung chi2 leh nikho jong ahung hoi kit tan ahi. Kum ijat ham khat jouin hichi moul in achim khum na mun chu phaicham bang in aum doh in, anum lheh jeng tan ahi. Chuleh amun a chun hampa hojong ahin set2 jeng in, anum lheh jeng in ahi. Hichi jou kum ijat hamkhat jou in, akom avel achun mi jong ahung cheng sao2 tao un ahi. Hichi lai mun jong chu ahin sutheng um amun chu ahin sunam un, khosung ding in ahin gong toh tao un ahi. Chomlou kah in hichi moul in achim khum namun achun innjong ahin kisah sao2 un, acheng a mi jong ahung tam cheh2 tan ahi.
Asunga cheng hojong num tah leh kipah tah in acheng khom jing uvin ahi. Ahin hichi nia kipat hin hichi moul in achim khum na mun, khosunga cheng ho jouse din akipa nao chu kichat nan ahin lodim pan tao un ahi. Nikhat hi nungah khat ana toh namun akon in ahung kile kang hin, lampi ahin jot lai in, amasang a alampi chi nadi lai tah achun akanga thenset a kivon numei khat ana din chu amu tan ahi. Hichi amu achun nungah nujong alungthim anum pai tapon, aum na achun adingden tan ahin, chom khat jou in hichi akang set a kivon nuchun nungah nu lam ahin vet chun, nungah nun jong koi ahi phata vet ding ati wang chun, amai chu phata avet chan in ahung kikhel cheh2 tan ahi.
Hichun nungah nun jong mihem hilou a thilha ahi ding ahet phat in ama jong aum na mun achun akichat val jeh chun akimoh thin den tan ahi. Alang khat a thilha nujong nungah nu um nalang chu hat thim tah in ahinjon tan ahileh, nungah nujong anung jam got leh anunga song khat achun akipal in alhu tan ahi. Amajong apet2 in akithou doh loichel in thilha nu chu ave in ahileh aum talou phat chun, aman jong phat hoipet cha atin thilha nu aumlou phat chun inn lam a din ha jam in ajam tan ahi. Ajam pet lai tah a thilha nu ana din nachu aphah2 chun, akom avel chu kaa gin akithong leu jeng in ahi. Hichun nungah nun jong thilha nu um d ham tin akom avel hochu ave le2 jeng tan ahi. Ahin koima amu lou phat in kigin dem san ol2 in achi phei kit tan ahi.
Hichi pet tah chun nungah nun jong atahsa chun chu gih ahin sa cheh2 tan ahi. Ama jing aban ho chu aki tham le2 in ahileh ema ati kit lou phat chun lungdong tah a achi2 leh Dukan mai a glass kitung ho khat akon a atun2 a thilha nun ana kipoh sah chu amu phat in ama jong thi pen in apeng tan ahileh, akom avel a cheng hon ahin del lut phat un ana hoidoh tan ahi. Ajing in golhang mini hi ju akham lhon in amani jong inn lang jon a ahung phei lhon leh, amasang lhon achun pusal mithum achi chu amu lhon in ahi. Hichun aloikhatpa chun amasanga chiho thum chu avet leh akeng un tol atoh khah lou, chuleh akeng jong chat lou ahiwanga chu achi banga aum jeh chun, aman jong akham wal jh a mulou amu akihi sah in aloipa kom achun asei tan ahileh aloipan jong ama mu bang2 a amu chu ahin sei p phat chun amani jong alim hut jeng hun tan ahi. Hichun aban chi be talou in ading den hun tan ahileh, amasanga chiho jong chu ading den tao un ahi.
Akichat thim2 hun phat chun amani jong anung chon hun in ahile hichi mithum hojong kihei lou in pusal teni um nalang chu ahin jui phei peh tao un ahi. Hichun amani Jong akijam tet hun tan ahileh, munkhat a dukan kihong khat ana um in, dukan a umho kom a chun athito hun chu asei pih hun tan ahileh, akham jeh hun a hibou inte tin koiman ana nahsah p po vin ahi. Hichi jou chun ni ijat hamkhat chu athip beh jeng tan ahi. Hiti chun nikho ahung chi2 tan ahileh nikhat hi houinn a kikhop na aum in, hichi kikhop nachu nilhah lam tah in aki chai bep in ahi. Aki chai2 chun mipi jouse houinn akon ahung pot2 uchun khosung chun kaa gin ngen2 akijatan ahi. Hichun amahon jong agel uleh, khosung mipi jouse houinn a kium a khosunga kaap hokhu koi ahitadeu m tin, ama hon jong lungdong tah in ave ding in achi tao un ahi.
Ahin amahon koima la amu po vin, ahin kaa gin chu akom chakhet uva ahung kaap tao un ahi. Amahon koima akap amulou utoh akom uva kaa gin akijah kit chu avet uleh thil pha ahungso lou ding chu akihet phat un houinn sung achun abon un ajam lut gam tao un ahi. Ahin kaa chu athip mong2 tapon ahi. Hiti chun khosung mipi ho jong emu talou in houinn sunga pat chun kaa gin chu angai khovah tho tao un ahi. Hichi nia pat chun nilhah leh inna pat in koima avah doh ngam jong aum ji tapo vin ahi. Hiti chun jaan seh leu a inn mai uva mi kaa gin ajah lou kah uleh a inn kot ileh window chu aki khot louleh aki beng choh lah2 jin ahi. Hiti ahijeh chun khosunga koima jong jaan num tah a kichol jong um thei talou in ahah khovah kei2 ji tao un ahi.
Thil umdan chu ahung khoh set cheh2 phat chun khosung mipi tejong khosunga umnum talou in khosung dalhan apot gam tao un ahi. Hichi thu hi alhang tin a aki than phat chun, amun2 a hou lamkai ho akikou khom un, hichi khosung sutheng ding in aki gotao un ahi. Amaho jong aki got nabang un nilhah khat hi aki tol lut un, khosung lailung tah achun atao pan tao un ahi. Hitia atao jing pet lai tah uchun akom avel a mi avah le2 bang khun ahe uvin, chuleh ahung namse ji in, anam set jong chu koima thot jousan ahipon ahi. Hichi jouchun khosung chu kaa gin in ahin chup kit tan ahi. Hichi phat chun khosung pumpi chu ling kiho bang khun ha kihot in ahung kihot kit tan ahi. Hichun houlamkai hojong atao thei um talou uvin abon un apet2 in ahung jam doh tao un ahi. Hichi nia kipat chun khosung chu sun kisan jong leh mei akai dim set2 ji in, sun kisan a jong koima alut ngam aum tapo vin ahi. Chuleh jaan leh lhavah nui apat chun khosunga moul in ama chim khum khosung mipi ho chu akaa pet aki mujin ahi. Ahin koima ema abol thei tapon ahi.. ni ijat hamjou in akom a kho a cheng khosung lamkai hon, hichi khosung chu bang akai khum un akom avel a jong koima ana lutsah tapo vin ahi.
~BEITA~
