Home Crosby Haokip MOLSANG A BOIKIM-IV

MOLSANG A BOIKIM-IV

381
0
molsang
molsang

LOVE STORY

Story and Narrated by
Crosby Haokip

Crosby Haokip kwc
Crosby Haokip kwc

Tehsepi’n anasei bang chun hiche sihtwi lilaiya kachop lut jou chun aumna songko panga chun kahung thoudoh tan ahi. Chuin amasapenin hiche tehsepi umna muna chun kache tan kotpanga, “Hepi, hepi, kot neihon o,” tin kakouvin kot kakiu kiuvin ahileh kot ahin hong tan ahi. Eimu chun kajah a, “Boipu, naman gang nalom lom e. Hung touvin, hung touvin,” eitin chuin chatam eihin dop peh in mei kakioi lhonin katou lhon tan ahi. Chuin kenjong tehsepi jah a chun,

KEIMA: “Hepi, kaumlou kah a thilsoh ipi pi um em?”
TEHSEPI: “Nang nache doh jou jou chun pasal khat le numei khat jong kakoma ahung vahlut lhonin, nithum sung anichong lhonin apot lhon tai,” ati chun kaloi teni ahiding kagingmo tan ahi.
KEIMA: “Ahile Boikim thu najah khah lou ham?”
TEHSEPI: “Kaja khapoi. Amavang boina ato vang kaja jep e,” ati chun Boikim hol din kapot pai pai tan ahi. Tehsepu’n eihin solna lampi chu galkangin kajuipeh tan ahi. Aman kakoma hung kile talou dia eisei vang chun Boikim khankho ding gel nan thi le thi, dam le dam tin kache kittan ahi.

Lampi saotah kajot jou chun tehsepu umna mun chu kagalhung tan kot vangkah a pat’in kathimvet in ahileh koima aumpon ahi. Chutia kile heiya gamthip lam jot ding tia kakihei laiyin moltum khat’in eihung kiveiyin ahileh kho helouvin kalhutan ahi. Kahung khah doh chun mithi kikoi nalah mun khat’a kanaume. Anamset dan chu loh so so aume. Hichun kakihei le len ahileh bang ning langjep a Boikim leltah a akhut le akeng thih khaova kikansa a anaum chu kamun gahuh ding tia kache got leh keijong eina hen uvin kache thei tapoi. Hichun kenjong olchan kakouvin, “Boikim, Boikim,” katileh amit ahin hasahin hichun amajong lel sa san ahung kithol tholin kakom ahin phah chun akap tan ahi.

BOIKIM: “Heu, nahung kile louding hitam, tin kana kap kap e. Chule eini ikimuto jing lhon chu hiche gam vaipopan ahetdoh phat a einasuh gentheiyuva hilaiya hi eina hen u ahiye.”
KEIMA: “Nao, kicha hih-in kei kaumnai. Hilai mun hi idalhah thou thou ding ahi.”
BOIKIM: “Heu, pasal nahi, kei kicha ponge. Nahung kile kit hi keidia aval umlou ahitai. Kakipah val jenge.”
KEIMA: “Henge, kahin lungset behseh jeh a kahung kit ahitai,” katin chuin eikikanna thihkhao chu heicha khatin katu tanin chujouvin Boikim kihenna thihkhao jong kasut lhampeh in alel val jeh chun kajah a, “Heu, kalel vale, chomkhat neipom o,” ati jehin atha kido kahin kapomin ka-ang’ah nomtahin kaihmut sah tan ahi.

Boikim ahung khah chun hiche mithi kholna in chu kahin dalha lhonin gamnoiya thip chet in kahung lhon tan ahi. Chutia kahung jing lhon laiyin munkhat a mipi kitit kamu lhonin aguhin kave lhonin ahileh kaloiteni lhon agamsunga chenghon thadinga anagot pet u kamu lhon tan ahi. Chuin kenjong Boikim kadalhan aguhin kakithol’in chuin thalpi khat kasemin thingguiyin kakikhaiyin ajalah u chu meikongin kakap tan ahi. Chutah chun aja lah uvah chun mei akong jengin chuin kenjong kaloiteni chu kakaiyin kahin jamdoh pi tan ahi. Amanin keini eimu lhon chun akipah lheh jeng lhonin chuin kabonun kahung jam tauve. Ahinla keiho chu gopi le huipin eihin delvuh un kakikhen thangkit tauve. Hichun kei chu thilhapun (Alu vompi, atahsa mihem akonga pat noilam kelcha) eihin delvuhin kadah bulin eimanin eilhoh mang tan ahi. Sottah kho helouvin kaum tan ahi.

Kho kahin het chun amaho thutanna inmuna kaum tan ahi. Kavel chu kaven ahileh mitin kikhom kamun kamu jouse atamjo chu mihem toh abang pouvin, animation film a mihem kisemthu ho abang un ahi. Abang chu atahsa umlou tobang molkang a kisemthu abang un, abang chu amel-u kichat umtah tah jong aumuve. Chomkhat chu kichat nan eibomin hijongleh pasal hinan kakihat sah nah nah in ahi. Hichun mi phabep in Boikim aman-un kei koma ahin puiyun ahi. Hichun alah uva mikhat chun eihin houvin kajah a, “Boikim hi nangtoh umkhom thei nahi lhon poi. Amahi lhagao ahibouvin nangtoh nakimatna ima aumpoi. Sohcha’inge natileh tuhin dalhan lang nang che tan, achuti louleh hilai muna hi nathi ding ahitai,” eitin kalol a chempong angam tan ahi. Hichun kap pum pumin Boikimin kajah a,

BOIKIM: “Heu, che jeng ta o, nagimna kave joupoi. Tahbeh a seidin keijong mihem kahipoi. Lhagaova hing kahibouve. Chetan kamitmua nagimna kamu be ding kangampoi.”
KEIMA: “Ibola chutia thu nasei ham? Hichan a kagimna ho hi tua leivui banga panna beiya themang jeng ding nati ham? Tua soldoh ding neitileh ibola neihin nungkou khoh khoh ham? Kache a chu kahung umden a pha hilou ham!” kati chun amajong lhase tahin hakan akap tan ahi. Chuin aman kajah a,
BOIKIM: “Heu, tahbeh a seidin kathusei jouse hi kahin lungset val behseh jeh joh ahiye neihe them tei teiyin, ahinla tua hichepa angsunga kona isochat lhon ding vang hahsa kasa ta e.”

Hichun alah uva chemjam choipa chun kajah a, “Boikim kakilah ding ham? Nangjoh kakilah ding nahim?” tia eigih toh thoa ahin sei chun kadonbut in ajah a, “Kei hinkho joh latan, Boikim sanga kei kaphat joh hilou ham?” katin ka-eng hou chun tha jeng din achemjam ahin lam tan, chutia eitha got laiyin meikong thalpi chang khat’in amapa op phang tah ahin kha tan amapa jong alhu jeng tan ahi. Chutah chun kaloitenin nasatahin gal ahinbol lhonin kaumna mun-u chu meikong adimlha jeng tan ahi. Hichun Boikimin kakhut ahin tuhin kahung jam lhon tan ahi.

Chujouvin kaloiteni toh kakisutouvin kahung jam tauve. Hichun masanga kahin jotpa na mun-u songpeh jenga kisa fencing tobang mun chu kahin pha tauvin ahi. Hichun keiho jah din, “Namanthah nadin la san,” ahung kiti kit in, ken Boikim kapon hiche fencing chunga chun kalem tauvin ahi. Chutah chun kaloipan la akam bem bemin ahin sa tan ahileh kaumna mun-u chu chimlha din aum tan ahi. Chutah chun kaloiteni jong ading den lhon tai. Kaloiteni din den kamu chun ga pui ding katileh kaloitenin keini jah a, “Min, keini koma hung lhon hih-in, nangni nakihinso theina lhon ding bou kigel lhonin. Keini hilaiya umden ding kahi lhon tai. Ajeh chu keini kaum den lhon louleh nangni nasochat thei lhon louding ahi. Chen, jam loi lhonin,” ati lhon chun mitlhi longin kakikhen tauve. Hichun kei le Boikim jong kajam pai lhon tan ahi. Chutah chun thilha hon kaloiteni chu ahin delvuh uvin ahileh adinna mun-u song jouse achimin abonun akhe lha tauve.

Ahinlah lampi atop na kaphah lhon chun meibol tobang khatin Boikim chu ahin tom khumin van le lei kikah a akhaiyin Boikim chu thiding bangin aum tan ahi. Amitlhi alongin aban lang khatin eihin sangin akap tan ahi. Hiti chun kavet jou lou phat chun masanga tehsepin eihilna ho kageldoh in Boikim a din kalhim tan ahi. Hichun kadinna muna chun katouvin kalhim kit’in, “Saichang saina kahol in vanlam kakap kakap. Vanpi katume godal tum, godal tum tum bulet let, jongin tum ngaovin tum, inlhang langa Boikim jongin aka aka e,” kati chun leiset kolning li a konin jonghon tampi ahung khomun Boikim chu aka tauvin ahi. Chutah chun Boikim chu nisa le ahsi bangin havahin avah in vannoi pumpi asalvah soh hel e. Avah chu kavet theilou phat’in kamai kasel mang tan ahi. Chutah chun Boikim chu ahsi tampi akisohin vanlaijola alengtou tan ahi.

Boikim kamu lou phat chun song khikah dunga chun kakisel tan ahi. Chutah chun kaumna mun chu ling hatahin ahung kihot’in muntin gamtin, mol le lhangho achim soh tan ahi. Kaumna mun jong chu ahung chim tan ahile kol thuh tah sunga chun kakhe lut tan chutah chun kaumna mun jouse kho ajingin, chujouva kho kahin het chun sihtwi chunga katahsa akilep doh tan ahi. Hichun mihon katahsa chu aphong un inlanga eipo tauve. Sotpi eijen un katahsa chu thinglhang lou chi chom chom, in a hihen lang gam a hijongle abonin amang un eijen tauvin ahi. Hiti chun sottah kho helouvin kaum tan ahi.

Kho kahin het chun kalupna a konin katoudoh in kajet kavei, sah le lhang kaven kaumna mun chu Boikimte in ahi kahin hedoh tan ahi. Hichun Boikim kahin geldohin kalupna konin kathoudoh gon ahileh Boikim unun anu jah a agaseiyin, hichun abonun kakoma ahung tauve. Hichun anun kipahtahin eiven kajah a, “Boi, hung thouvo, nanao Boikim jong amit ahah tai,” atin ahileh kakipah val jengin ahi. Chuin eikaiyun Boikim koma eipuiyun ahi. Hichun Boikim kamu chun kipanan kadim jengin alupna chunga chun akhut katuhin ahileh amit ahin hasahin keilam me seu seuvin ahin ven kipanan adim jengin ahi. Hichun Boikimin kajah a, “Heu, Molsang gama nungche kit ta hite,” ahintin ahileh kakinuisat to lhon tan ahi.

The End.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Previous articleLUNGSETNA SUNGGIL-IV
Next articleMY FRIEND SUONKHOLAL