(Part-1)
(Kihilna thei Thusim)
A story by :- Thangboi Kips
(9531808617)
Story arranger :- Ngul Kipgen
THUSIM THUMAKAI
Sopite ho, hiche thusim hi tulai igamsung-uva monpi um tah tah leh son um tah tah minu, mipa aji acha chunga amopohna gelkhoh louva; nungah gollhan lai banga aji ang’a guhthim a joldei, ahilou leh jolsai ho gelkhohna jala hung kisun thusim ahi tihi ana hemasa din kahin tem uve.
Thusim chu anapan tao hite..
Keihi kho kahin het masang apat kanu leh kapan eina mollem san hon a kaninu’n ama cha bang banga eihin kisin ahin, nule pa anglum chang joulou sen sangga kana hin ahi. 2010 kum chun Pathen lungset jalin class-x kahin simthei tan, gollhang hinkho kahin mang pan tai. Chaga kahi vangin, Pathen lungset jalin miho mitvet din kamel jong ahoimo sampon ahi. Mihaosa cha gollhang bolthei tahtah ho sangin ima neijoulou keichu kaloi hon einalungset uvin, ka school uva chun kana luck lheh in ahi.
2010, kumlhun ding kon hin, kanin “ahipoi lalboi, kumhei von naki choh nading”_ atin thinglhang langa chang at a sum kilodin einasol tan ahi. Tujangvaichong a kapaneo te komah kapansan, chang at a sumlo din lom kahung kon pan tai. Chapang kahi vangin kalom ho lah a chun nungah khat hoi kasa mama jengin ama ahung kon lou nileh, kanilhum jou mongmong ji tapon, guhthima kalungsung lengnu anahi dan ahitai. Lungset kiti ipi ham jong kana henaipon, aman jong eingai bon hilou guhthima kangai jeh chun adamlou bangin kagong teltul jengin, kangai dan moh sei ding lah chaga kahi jeh in jachat leh kisonlel nan pon bangin eitom jin seidoh ngam louvin adamlou chu kahi mai jitan ahi.
Nilhah khat kaloipa Mangboi toh kalungsetnu koma lai kaga leng lhon tan ahileh a inkote vang anaum pon, aman bu anahon in kiphalam tah a touna eihin peh lhon a katou lhon leh kaloipan, _”kei gapot inge”_ atin eida lha lhon tai. Kahoupi nom vang chun kakipat doh thei mong mong pon, phat lah che tultul jeng; kenjong seitange tin kamoh patchop tai.
*KEIMA:* _”Nao, janhia ipi itia lou nahung kon lou ham? Nang naumlou leh anopmo jidan,_
*LHINGNEO:* _”Toh ding kahao val intin ulal, kahung kon theilou ahi. Ahim hima kei umlou vanga ipi dinga nop nasah lou ong ulal, kiphat lam sah a.”_
*KEIMA:* _”Neo, mi ijat in tamjong leh kingaipi leh lungset kananei khapon, nang vang kamunia pat christian insung khat semkhom pi din kahin lungset e, nang din vang kahe pon keidia ka first love nahi”_ kati tai.
*LHINGNEO:* _”Heu lal, nahet themlou jeh a neilungset ahi, khonunga nakisih louna din laidang leng jengin, ven keihi kaneo laijin kanu leh kapa anaki khen lhon in numei kahi jeh in kapan eina la nompon, kanu toh kapute in a kaum lhon leh kanun ma eijineisan kit in tua hi soh banga mi in a um kahi bove. Theng tahin kenjong kandeimo pon kahin ngaimo poi, hinlah,_ atin amoh lhiso tai.
*KEIMA:* _”Neo, lhisoh hih in keijong nang banga chaga kahi, chaga hinkho mang dia eihin sem lhon Pathen ahin, sangga hinkho kile sah ding jong ama aum nai”_ kati leh
*LHINGNEO:* _”Heulal kenjong dongma kananei khapoi, neilungset mong mong leh tunia pat nanga hi tang’e, inu ipan eidalha jongleh nangin vang neidalha hih in ong,”_ atin.
*KEIMA:* _”Neo, thinan eikhen lhon lou vin khen poite tin,”_ kilungset hinkho kahin mang pan lhon tai.
Keijong class-(Xll) kachai jou Pathen lungset in Coast guard a interview kabol leh kahung lolhing in training kahin chai chai in kadam sunga din, kalungset pen lhingneo kaga kipui tai. Kumkhat jouvin aman jong chanu melhoi tah Mercy, eihin peh tan ahi.
Keijong kaum na a ju le sa khamna thei ima kabol lou jeh chun ka officer len pan eilungset in aniseh in ama gari kahin tol tai. Kumkhat val lang kahin tol ahi tan, nikhat ka officer pan _”Minlal chapang ho park a picnic che diu ahin, gari’a naga puile ngai inte”_ atin, ajing in ken jong sap pa chanu Neha, class-Xll simlai leh aloi mi 8 ho chu garin picnic chedin park a kahin pui tai. Park kalhun phat un aloiloi jin avah tauvin ahi.
Chomkhat jouvin Neha ahung in kakhut atuh in _”Heu eini vah khom hite”_ tin eikai tai..
*KEIMA:* _”Keitoh ikilhon leh min nanui sat inte, naloiho toh gavah un kei anaum nange,”_ kati vangin anompon eikai nahnah phat chun kavah khom lhon tai. Hichun,
*NEHA:* _”Heu, thu khat kasei di?”_
*KEIMA:* _”Sei tango pi ham”_ kati leh..
*NEHA:* _”Heu, college kikhen kah kangalel jin tin, in kahung lhun a nana um jilou leh katha aset jidan, ka bag lupna sena a kanei jia ima jong kabol nom jilou. Hepa gari’a nahin poh a namel mu ding chu guhthima kangalel jidan. Heu aguh in kahin ngai valle.”_
*KEIMA:* _”Neha, angol nahim? Simlai nahin nanu leh napa kinepna nahi; kei maimai toh kingai thei nahi poi. Ven hamle pao kibang ihipon, ihou pathen jong aki bang poi, nang officer cha nahin, kei chaga kahi. Aban leh nang nungah nahin kei kaji kacha um ahitai, na u bang bang in neigel jon”_ kati tai.
*NEHA:* _”Nasei khai heu, angol ma kahitai, lungset nan jumle ja ahe pon, ima datkhen jong anei poi. Hindu leh christian akichen mo na ipi um em? Jineisa hijong lechun kahin ngai valle; Heu, keijong naji dia neigel thei a kamut kon katho kon seh a kangai pen namel kamu jinga, kahinkho’a nakoma kaum ding pou leh; Na pathen chu kei pathen jong hia; Nahina jouse jong keima hina hin tin, najinu ka u in asoh banga eibol ding hijong leh ngailut jaliin pang jing nang e. Heu, lungset kiti nanga kona kahet ahin, nangin jong neihet peh teitei jin ong. Kangai pen in eihet them lou leh leiset na ipi dinga kahin khoh khoh ding ham?”_ Ahin titan ahi.
Chapang a kagel vang chun, hinkho phal ngam a athusei chu kaki cha kit in, tot na a moh gel thei ahi tapoi. Phat ahung che chen, aniseh a ain u ma kaphah jing jeh chun, gelphah lou helin kenjong kahin lungset doh khatan ahi. Kahung kingai tahtah lhon phat chun inlang jong kache nom ji tapon; Jile cha gelkhoh na ana lhasam lheh tan ahi. Inlang kache ji jong leh nilhum lhuma ju le sa a ngol a kachagat lam kihet talouva, Lhingneo hi kahin suh genthei pan ahi tai. Pathenni jingkah a houin kikhop ding asei ji jong leh, aw ngeilou tah in, _”naki khop nom leh gaki khom tang”_ tin kahou jin ahi.
Khatvei kahung kham val in, Bon nat deh duh pumin in kalhun lhun in Lhingneo komah _”na in ah kichen”_ tia kabeh jeng leh ahung ki hei chet toh aki toh in anahthi kabeh doh peh tai. Ahi vangin kap pumpum chun, _”heu, nang leh naosen dalha din neisol hih beh in, khen pong’e neiti hilou ham?”_ tin akap tai. Lhingneo hi alung genthei val jeh in nikung lhakung abang jengin, hinlah a insung leh aji acha ngailut na dihtah nei ahi jeh chun Pathen songin thoh tuntun in anapang in ahi.
Khatvei in a pat kanatoh na mun jon dia lenna a katou laitah uhin, huipi leh gopi ahungki thon vanlai jolah pung kah 2 tobang nungche theilou mache theilouva kaum phat un, numei chapang ho ahung kap pan tauvin ahi. Hiche chungchon achun lenna alha lang khat 3MTR tobang ahung chombong kit tan ahileh; balance aum thei tapon huile go lah akhoh cheh cheh jengin, Katounao ahungki bungbu tun jap in kahen! Aum dan chu lenna aset phat na tolsu dinga leiset kahin jotsuh dan u ahitai. Hiche tah chun mi lhem lungmong dia um air hostage hojong ahungkap jahjeng un ahileh; keijong chu salamin eitha a ana thimil dan kanahitai.
Upai aum tahlou phat in pilot tenin kap pumin, _”kangailut tah u le naote ho, neingaidam uvin, hiche kalval a hi kabol thei lhon lou ahi tai, tol isuh nadiu MINUTE 2 ni bouseh aum tai, nangma nangma pathen komah kitao taovin”_ ahinti lhonne. “MINUTE 2 BOUSEH HINKHO” kanei kahet doh tahtah chun, kaden hinkho mantam dan leh phat mantam dan kahe chen beh seh jengin; Akhon ni le vang isenji akimil deh poi. Keijong kathi ding tahtah phat chun, nu le pa toh ji kigoma kanei, kana suh genthei jing kaloinu Lhingneo kalungmit ah ahung kilang masa pen in lhilong chutchut in kalung thim ah ngaidam kathum in, _”o neo minute ni jouleh na-u keilah um tapong ting, kalong damsa chunga lung na chima ka pi ding lah ka tahsa helsi jong hinmu tapona tin; hibang kasuh genthei nunga jong kache nia bus parking chan neihung thah a, Heu, hung sot hih in nati chu sot hilou va tonsot a dia kana dalhah joh dan nahi tai boi. Leiset na kimu kit thei ding chu ihi tapoi. Nakom hungkit thei ding hi poupou leng o, kana suh genthei na jouse ngaidam kathum nom’e. Hinlah, keidin phat jouse akikhel tai. Hijong leh kalungset kangailut vetsah na in kahai hu kichai kon na kakama kon hung pot thu cheng nukhah pen chu nangma min bou hi ding ahi”_ katin; Len nan tol ahin suh ding tah tah phat chun! Ken jong _”neingaidam in boi, Lhingneo,”_ tia hapen na kapen jah jeng leh kahung peng khang doh in! Kaloinun light ahin vah a eihin vet leh kicha tah leh tija pumpum a kamai mitlhin anachup deh chu ahin mu phat in alai ana val in, _”Heu, ipiti nahim? Nabenga mit tui khat jong valha dia kaphal lou nahi ibola chuti lhiso jeng nahim? Na mang nom lou ham ong? Ole nakichat ham? Ibola neikou ham? Nasei nomnom seijin nasei jouse ngai dia nakoma um kahi”_ ahinti tai.
Kaden kaloinu ken kanasuh genthei a lhilong nap longa kanalha ji vanga, aman mit tui khat jong long dia eiphal lou kati leh kadip kalai akha jengin, ima seitheilouva mit tol keo kou va mit phe louva ama kana chuti vet phat chun, _”heu heu,”_ tin eihin loh in ahi leh kahung kin dot in ahi.
*KEIMA:* _”Neo, nalungset ngaidamna chang hoi jong kahi tapoi, kachagat lam kihet lou vin, nopsah na lam saotah ah kana dalhan lung lengvai tah in nana um e. Tun vang nalungset na he chen in dalha kit talou din nakom kahin bel e. Leiset chunga numei ijat in tam jong leh nang banga melhoi leh eilungset eikhoto ding kanei poi, kana suhgenthei na jouse ngaidam hoi hi hih jong leng, tunin nang leh i-Pathen angah ngaidam kathum’ e.”_ Katia kamoh lhiso jeng leh;
*LHINGNEO:* _”Heu, aban ima sei tahih in kangaidam sa nahi”_ atin, _”Aw Pakai amangsa ka ulal neinung peh kit jeh in namin kathang vah’e”_ tin eimoh ngong koi jengin ahi. Chapang banga kana chuti kika jeng lhon leh, kachanu Mercy, ahung khang in eivet lhon leh tija val hintin ama jong amoh ka tan ahi.
*_Aban umnalai ding ahi….._*
