MIHEM NAHI LE HINGAL IN THILHA NAHI LE HINGAL IN

Thilha thusim

Written by: Haokholen

Sun nisa sat khat ahin meilou(gun powder) kaki suh in nilhah le gam leng nading katin sun nilhum in meilou chu kasu tan ahi. Chomkhat jouin chunto nisan jong alhum nading lang ajon tan louvai kon ho jong inlam ahi jon tao vin ahi.

Kenjong ka pummei kaki put in gamlah kahin jon tai. Kache2 in ahile gamlha thim pi kalhung tan vaopah phung khat kamun hichu chang dingin kaum tai.

Mu ahung thim tan ka sivah 🔦 kalah doh in ka chang pan tai. Sot thim pi katou tan ema cha husan kaja doh pon ahi. Pung 8:30 lam ahin sa cha gin kahin jan tan kave lhi pan tai husan chu ahung nai cheh2 jeng tan kalungel a chun tunilhah vang sa alen e katin kaki nem thou e.🤭

Husan kajah dan achu sa hi mong2 ahin olchan tourch light in kagah khon ahile henu hoi lang sa malah2 in mi khat ana ding jang pet put e.

Mi khat kakho doh achun kati aja lheh jenge. Ama pa chun in hou pi pai in hey…. Mihing kahi e inlha khum hih o atin apen tho jengin ahi. Kei jong kading doh in  mipa kom chu kache tai.

Mipa komma chun kasei in “hilai a pi nahung bolla hita chu na moh hung jeng ham” katin ahile mipan jong in donbut in “ken jong sa kahung chan ahi e” atin ahi. Kenjong kadong kit in “nang koi nahi hija ham hoi lai ho nahi” tin kadong kitta ahile mipan jong “kei moreh lang ho kahi e hilang gam ahi sa atam e ati uva hijeh a chu katha noma kahung ahi e” atin kei jong kalung ahung nom dom tan ahi. “ale nachang a nahung ham” kati kit in ahile mipa jong chun “kaloi minga to kahung u ahin kalah uva mikhat chu adam mo phat a inlang a kile u ahitai kei jong hichan gam2 a kihung a sakhat beh mulou a kile di chu kanop lou jeh a asun ajan a sa kahol ahe” atin kenjong “ohh achuti le mun chom lang ga chang tai hite” katin kahin pui doh tai. Saktiman lampi kahin jot honin kahung kihou lim2 peh honin ama sangin kei kama sa jon ahi. Chomkhat jou ahin keichu ama sangin kahung nu khah jo tan etih kah a chu eihin khel ham kahe pon kama sang achun jang pet in ache tai. Lha 🌘 them khat2 avah jeh chun aki ha mu chen thei pon ahi. Meibol in lha ahin khu tan ahung thim hel hul in ken jong kamasang chu kajui peh jeng tai. Meibol ahung kitol doh phat in kama sang kahin muthei kitan ahinla kami kilhon pipa kahol mo tan amun jong chu hoi lai a kaum ham ti jong kahe ta poi kanung che kit in ahile lamlen chu kahe pha mong2 tapon kalung agim lheh jeng tai. Lamlen chu kahin nung jui2 kit ahile kama sang lang achun mikhat ana tou in ken jong mikhat pa chu kahi sah in akoma kache tan ahile kamit phet kah in a um kita pon kati mul ahung thou tan chivang adih thei tapoi katin ka tourch light kavah in kahung tai. Lam pi jong kahe tapon agam mang chu kahi tai. Lamlen chu eti kahin jot vangin aki chai thei tapon kalungim to kalel lheh jeng tai. Mun khat a katou tan kaki cholin ahile thingphung chunglang achun husan khat ahung ging in tourch in kagah khon ahi le alu keh khat um ta lou meipung a kikap kha bang akhun thingphung a kon chun ahung kikhai lha in mittol let lut in eihin ve in kaki acha val jeng tan gamnoi achun apen to thon kahung thi jam jeng tai kichat pet a jam vang kihat thou ahi. Thil umdan chu dih kasa mong2 tapon kahung lhai2 nan katha achol lheh tai. Hai ket kut in lampi chu kahung pei2 kittan ahile injou a kamu tabang2 achun lam lai achun mikhat ana ding kitan kei jong kichat toh kiging sa demin ka meipum kakao in mipa chu kadoi tan ajah a “mihem nahi le hingal in thilha nahi le hingal in” katin kakap jeng tan ahi le ka meipum akai kit tapoi kakao kit in kakap kit jong le akai deh pon ka chemkon kasat doh in sat dingin kadel lut tan ahi le kanung lang peh a konin mikhat ahung tuh sa in (kouu….) Ahin tin kagah nung vet kah in kama sang apa chu ana um kitapon ahi.

Kaki chat na alen cheh2 jeng tan milungneo dingia thi nathei ahi tai. Kalungel achun injou a hung tuh sapa chu mi hinte katin lampi pang achun kangah tai. Chomkhat jou phat ahin gam leng a che hon sa ahin kap teng ule sa ahin aii ji bang akhun mi khat in aw thong je junin thumvei tah ho…..hoh……hoo….. Ahin tin ken jong ka tourch in kagah khon ahi le hoilang mihem malah2 in thilong(coffin) khat ahung kitol in achunga chun injou a kamu pa amai se pa chu ahung tou kit nalai in ahi. Kei jong kadip kalai kidop in gamnoi achun ling lah khao lah um lou in kahung lhai tan ahile hoilai kagei kit hitam kahe kitan pon ka gammang cheh kittan ahi.

Kamei pum jong hoi lai achu kase lhah hitam kahe tapon ka tourch le chempong seh2 kana kipoh tai. Kapung kagah ven ahile pung 11:30 lam ana hitai. Gamnoi a thingphung ho chu kahung2 na a chun kahin sat pop soh kei in lampi kahin kihol tai. Pungkhat val lampi hol nan ahung che tan lampi kasoh doh thei mong2 tapoi. Chomkhat jou lang pi in vangphat pi in kakho twineh nao bul a kahung soh doh in kalungel ahung nom chom tai.

Thi le nang in khosung kaga lut in mi ana thip del jeng tai. Kainko te jong ana emu tao vin pung kagah ven ahile pung 1 lam ana hikit tai. Kanu kathou doh in kanu chun ei mu2 achun ahung peng jah jengin kanu ahung pen achun kakom a mithi gim nam ahung nam lah jenge. Ka inkote adang jong ahung khang shou2 tao vin insung a eipui lut uvin kanu chu ana kap doh jeng ahi tai. Kaki sil nading twisa ei om pih uvin kei chu epi kabol ham ti cha jong kahe tapoi. Aum dan chu kati kithing2 jeng kamit tol let luta mi kana vet a khat vei2 le thil khat kicha banga kicha tah a kana um jidan ahi. Kalel val jeh chun ka emu mildel tan kainkote chun ei na tou kho vah pi udan ahitai.

Jing kah lam ahin kamang ase in kamang achun ka mi mu pa chu kamu kit in akoma kache got jong le kache lhung thei pon chomkhat jouhin chung lang a konin songtum khat ahung leng lha in ei se khah ding kon ahin kami mu pa chun ei hung son doh in songtum chun mipa chu asep lih tan hakan kakap tan ahile atah in kahung kap doh jah jeng tai.

Hipet chun katahsa pumpi akonin kachat vah thei poi. Chomkhat joulang pi in kahung hai nem in houpi thei kahung hi tai. Kakoma a mi ana dim set jengun ahi. Kanu in ei hin houpi in “boi janlhah a epi nahin to ham aban le in nahung lhun a nahin kilhon lut pi chu koi ham” atin kenjong “janlhah a kagam len na a toset kahin to ahi e ina vang koi ma kahin kilhon lut pipoi” tin kanu chu kadon but in kanu injong “ahipoi boi janna nei hinkou a kahung pot achun nakoma alu keh khat umlou khat adinge” atin kenjong “hiche pa chun ei hin engbol ahi e” katin kathil to jouse chu abon chan kasei pih tai. Kasei jouin upa khat in “ohh tu masang a chu moreh lang ho gamleng a ahung uvin alah a mikhat chu mu khel jeh a aki kap lih uve atiu chu o hiche pa chun nahung lhep hitei2 ding ahi” atin mijouse chu aki chathei lheh jeng uve.

Katah sa ho chu vet thei jong ahi tapon ajeh chu ling lah khao lah a kahung jam na a chu ei koi chen u ahitai. Katah sa jong ana lheh jengin hapta khat valpi kadam mo doh leu jeng e.

AHIN SIM DOH HO CHUNGA KIPA THU KAHIN SEI E. THILHA THUSIM HI ANGAI NAN JONG KASUN DOH JOUPON NEI NA NGAIDAM DEU VIN KAHUNG TAO VE. PHAT KIT JONG LE AHOI JO LE ANGAI JO INA SIM KIT DEU VIN KAHUNG TAO VE.

KOI TABANG HICHE THUSIM A NGAIDAN SEI NOM NAUM ULE HICHE WHATSAPP NO AHI NEI HIN HOUPI JENG UVIN

WHATSAPP NO; 6909998008.

KAKI PAH E.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.