Home Lahkhom MIHEM KUM IJAT HING DING HAM.

MIHEM KUM IJAT HING DING HAM.

61
0

~ Elkay Mate

Leiset a mihem jouse ahung penguin chule athisoh kei kit in ahi. Pathen in mihem ahin sem lah a asem masat pen epu ADAM chu kum 930 ahinge akitin ahi (Genesis 5:3-5) chule Bible a kimu dungjui ya mihem ahinglah a akum tampen chu METHUSELAH ahin Kum 969 ahinge akitin ahi.( Genesis 5:27).

Phat chal dungjui le khang hung chal dungjui in mihem hinkho Jong ahung chom jep jepdan in akilangin ahi. Hinlah hiche ho chu Pathen lekhabun anaseisa ngen ahi tithei kit ahitai.
Leiset chunga aging sot pen a ana kimelcheh chu ahile numeiya France mi Jeanne Calment,(1875-2013) 122yrs 164days ahin chule pasal a Japan mi Jiroemon Kimura,(1897-2013) 116 years 54 days ahin ahi. Ivetle mihem hinkho ijat a Science & Technology a akhantou bangin, hinkho achomdeu drive tithei ahi.

Hetthei khat chu Albert Einstein College of Medicine Researchers, USA ho seidan in mihem hinkho atampen a Kum 115yrs hing thei ding ahi atiuvin ahi.(USA Today, June 29,2017) Ahinla amaho thusei chu adeilou aum in Canadian Researchers hon mihem hinkho sot dan seithei ahilou dan le hiche sanga tamjo hing thei dingin asei uvin ahi. Ipi chu hitale tunikho chom cha in Bible dungjuiya mihem hinkho itih chan hingthei dinga kiseiyem ana veu hite.

Pathen lekhabun mihem te achi pung ding tia anaseina akimun ahi.[Genesis 1:22,28, Psalms 127:3-5] Hijeh a chu Pathen in mihem hi achipunga vannoi leiset jouse lodinga eidei u ahi. Hijeh chun cha le nao tamnei hi Pathen vangboh ahin phatthei na lenpen ahi.
(Hiche hi tulai numei hon cha deiloujeh a nao suhmang abol u chonset tithei ahi ajeh chu Pathen thutoh kikal ahi)

Chule Pathen in mihem te hinkho kum 120 bou hiding tin ana seiye. (Gen 6:3)
Chubang in tuchan a (Bible tailou) mihem ahing nalai akum tampen a kihe chu Japan mi KANE TANAKA, 118yrs ahi. University of Washing seidan in Kum 120s chan vel hing maitheiyin aseikit un ahi.(UW NEWS, 1 July 2021). Hinlah ichan a adih le adihlou akiseitheipon, athusei u ijat a aseidih le dihlou ivet maidiu ahitan ahi.

Hinla Bible sunga isim kit le hitin akisun e-
Nalunghanin kahinkhou achomlon, Hai khat’in abeiji tai! Kum somsagi bep kahing jiuvin, Damthei lheh jongleu, Kum somget bang bou kahingui! Kahin laiyun chol le nangin ka-umun, Hinkho alhing loi jin, kabeipaitauve!
[Psalms 90:9-10]

Mihem kum lhon nahi Bible a kimu dungjuiya Pathen kamcheng a kimu gaosap na jeh hi hung hipen din tahsan aum in ahi. Alangkhat a Mihem Kum tamle lhon hi Pathen in alungset le adeisah dungjuiya mihem hinkho kikhel ahi tithei ahi. Pathen in eina gaosap jeh uva epu ipa teu METHUSELAH banga ihin jou lou u ahitan ahi. Hichehoa kona akichenpen a mudoh theichu Pathen hi eisem pau ahin ehinkhou asuhchom chule asaosah thei ahi to kicheh tah-in akilange.

Ahivangin Pakaiyin, “Kalhagao mihem sunga tonsot’in chengden deh ponte; mihem hi tahsaphe bou ahin, ahinkho jong kum jakhat le som ni bou hiding ahi,” ati. ( Genesis 6:3) Hiche la hin kicheh tah a Kum 120 hing ding ahi atin ahi.
Tua Jong kum 120 val mihem hing ponte. Hingal jongle Pathen phatsah deh a mikhat mini a deitah a hinsah hidin tahsan aume Chule Psalms sunga kijih banga mihem kum 80 vel hing ding ahi atitoh tukhang hi akibang lheh tan ahi. ajeh chu Vannoiyin gam khangtou pen a ahet America te jeng Jong life Expectancy 77.3 yrs in aseiyin ahi.( Wall Street Journal, 21 July 2021).

Tunia isei nom uchu ahile Pathen thusei jouse guilhung ahijeh in sottah hingdinga kigel thei ihipoi. Hijeh chun idam sung uhin Pathen deiyin chon hiutin tonsot hinna ichan thei nadiuvin ama lungdei hol u hitin Pathen kom bel tao hite Ajeh chu mihem ahin ding Kum jeng Jong sottah a kitep peh ahipoi. Adamtheipen jong Kum 120 bep hing ding in Bible le Science & Technology akon photchet ahi. Nahinkho phatechan mangin ajehchu thiljouse chunga thanei Pathenin nahinkho tua jong alahthei, Kum 120 val a Jong nadamsah thei ahi. Hijeh chun phat ineisung uhin Pathen kom bel tao hite.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKAKINEPNA JOUSE ABEI NUNGIN-III
Next articleHENU, NEI NGAIDAM AW-I

LEAVE A REPLY

Please enter your comment!
Please enter your name here