Mihem hi mitoh kitimatlou a ki um thei em?
Asun:
N.Lhungdim
Thangting House
Molnom-West
3rd September, 2020.
English te thuchih khat in “ No Man is an island” kiti chungchang ahin lekhabu 2 aum in khat chu Thomas Merton jih ahin khat chu John Donne jih ahi. Hiche hin asei nom pen chu mihi amachanga tuikol kah island tobang ahipoi api main khat to kimat ahin mihem khat cheh hi continent gamlen khat a lei hal piece khat tobang ahi tina tobang ahi.
Shiv Khera in ‘You can win” kiti lekhabu million 2 copy kijohdoh leiset chunga tilkhouna motivation thusei thempen khat a kithang pa chun Human Resource tihi most Valuable Asset gou lah a mantampen ahi atin ahi. HIche gou hi phatah a mangthei pa chu Sumkol veina hihenlang Govt. service bolna hihen lang Houbung lamkaina hihenlang ipi lang hijongleh lolhing lou a amu lou heldi ahi. Mi anatoh na a lolhing lou kiti hi anatoh na jeh ahipon a mihem kitimatna Human Relation lhahsam jeh joh ahi. Mihem kiti hi English ten, Man is a Social Animal mito kitimat lou a ki umtheilou insung neocha hihen Vengsung Khosung hijongleh Houbung sung hijongleh midang to hingbom theilou ahilou leh mi dangtoh hin hahsa sa chu ahinkho a lolhing theilou ding tihi hetsa ahi. Mihing keo hilou in gamsa ho jeng jong achang in ahing aum behseh pon sakhi ho jong sagol ho jong hiti chun ahon hon alup lup in aum uvin ahi. Achang a vah kiti hi kahet khel lou leh ngalchang ahi.
Achang a ava nalam in mihem to akisuh khah leh ama ahilou leh mihem joh athi in ahi.
Tolphei a kachen lai 1946-1959 lai in kol langa kipat a hung gollhang Ngulkhomang kiti khat aum in lasah pontho tah gollhang phatah ahi. Ama lasah kahet miltheilou chu Houbung La a, Tuikhanglen pang a invah kison bang in, ti la ana saji in kana ngainom lheh in ahi. Tolphei kho a khat te khat in thang akam leh ngalchang a oh in ahinla akipil in khopi pumpi akithing in inkhat a pasal khat khat kon ding Ngalchang nungchu ajui uleh gamjang noi ah hetman lou in ngalchang chu ahung leng in gollhang Ngulkhomang chu aha in a op ahin jep kha in Ngulkhomang chu in a ahinpo uvin Old Churachand Mission Hospital ah jankhat agepi uvin kahet khel louleh hiche kum chu 1950 chu hinte. Ajingkah in athi in Ngalchang jong chu anakap lih uvin asa ahon uvin ngalchang sa hi namse a tuilou akitin ahi. Ipi khohtah a ngalchang khat chu khopi kithing a aga jui uva mikhat thilo ham? Masang a khopi kithin ho jong hi thildih lou leh thilhoilou nop le da umlou a thulhuh kisem ahibou in ahi.
Tuni a iseinom uchu hiche khat leh khat kitimatna Human Relation hi akiman khel akiman dihlou leh mihem te dinga thina manna sohthei kinah boutam na ahibou in ahi.
Shiv Khera in aseichu ipi ham iti leh mi lolhing ho in anatoh uhi thilchom atoh uh ahipon thilchu achom jep a atoh uh ahibou e atin ahi. English in successful man do not do different things only they do things differently atin ahi.
Hiche achunga isei bang uvin keima tah in lhinlal na lhahsamna, chihna, thepna, mimu bang leh minei bang neihih jongleng Pathen in kei thumna jeh hilou a keima kahinkho a man chah ding apeh Human Relation Skill ho kamang in Gandhi Memorial High School a kum 9 katoh na ban a
India Govt. Service kum 28 katoh na a hiche Human Realtion mihem to kitimat na hoitah kanei jehin midang sangin katam tohdoh jo in keima kalung lhai keo hilou in midang jong kakitimatpi jouse 100 lah a100 alunglhai e kiti leh dih joulou ding ahi in 99% vang alunglhai in akipah inhiche hi kahinkho a kagou English a Asset atiu alenpen leh aphapen chuleh ahoipen ahi.
Koiman eilahpeh theilou gucha in jong aguh mang theilou kagou ahi. Hinkho a mi tamtah toh kimat a na tamtah kitong ahi. achen achai in kiseijou pontin Govt. Service Indian Revenue Service, Income Tax, November 26th 1973 a kipat a Frbruary 28th 2002 chan a katoh sung in hiche Human Relation Skill hi phatah in kamang in kanatoh na Jorhat a kum 8, Tezpur a kum 1 leh akeh, Calcutta a kum 3 Shillong a kum 4, Dibrugarh a kum 10 tobang katoh sung in kalung lhaina ding leh kakitimatpi miho lung lhaina dingin na katong in kakipah lheh in ahi.
Khat leh ni sei ute. Nagpur a kum 1 Plrofessional training kanei laiuvin Probationer T.alk kiti khat ana um in merit list a anoilang a kipan in Chairman khat mikhat anapansah uvin merit list a kipat chunglang mi 4 alhengdoh uvin ama hetna leh thepna subject khat a thu aseisah uvin hiche talk a Chairman a kapan a meeting conduct kabol chu ginchat lou in ka batchmate mi 80 tobang leh Faculty member ho chun hoi asa lheh uvin hiche jeh keo keo chun keiho Batch a mi popular tahkhat kahung hidoh in tuchan gei in ka Batchmate lah uva thusei themtah Aswani Kumar kitipa in Mr. Chairman Sir eiti nalai in Chairman kahi tapoi kati jongleh kei ding a Chairman nahi jing ding ahi ati. Long lasting friendship kanei lhon in ka Aputobiography kisan Free in ei tapeh in English te poet khat in Friendship is a Sheltering Tree ati chu adih mong mong e.
Aban a Jorhat a ka posting lai 1975- 1983 lai in office a Ahom chapang melhoitah khat aum in mi tamtah in atoh nom behseh lou LTU Section kiti Local Treasury Unit ti hamkhat chuva tongding a kathupeh leh ka office ah ahung in alunghang in akiphin in LTU jong akhepon tong jong tong ponge atin tou in kihoulim hite katin katousah in kakiphoupi in tohding kiti hi koima ahesa a peng akiumpon keijong IRS Income Tax a kalut hi thinglhang mi in Income Tax a kihelou hel ahi idea jong kahetlou hel ahi. Nagpur a kum 1 training kabol jou in kahungdoh leh theory a kaki hil uleh practical a kitong hi achom chom ahin hicheva kaloi ITO leh Inspector ho kadoh a katoh ahi. LTU kiti a chun nang in nahe e tongin kiti ahipoi kajahdan a hiche office a hi natong them leh natongnom mi nahi kahet jeh a tong in kati ahi.
Hicheva khu na akiting den in back lock aumjeh a hiche ho chu sutheng in kati ahi. Sot tah tong in kati jong ahipoi ahet louleh Head Clerk pa aum in Inspector ho aumin amaho dong in tia kakihou limpi leh ajo na in Sir tong tange atin atong in ahi. Hiche chu ahi Human Relation Skill Kaman a kathu neina ka office chu kum 8 tah kisuh sel a run kabol a hiche a kon a Promotion Tezpur a kamu Calcutta leh Shillong a kaumlai in jong seiding tampi umjong leh Dibrugarh a kaum lai a human realtion Skill Kaman a kum 10 lhingdeh kapoh a office kasuh thengdan ,staff ho kipa dan, Tax payer ho kipa dan, gamsung a MLA leh MP chukit leh kachung a Commissioner ho leh Chief Commissioner ho lunglhai tah a kakoi chu seijou hiponte.
Khat keo keo sei ute. 1992 July lha in Shillong a kipat in transfer in Dibrugarh Range ah kahung in office join kabol ni a kipat in office kasutheng in kum 15 masang a file ho jouse kapohdoh sah in mei in kahal lha in hapta khat sung ahal uvin ahi. Office sunglang leh polang kasutheng in lavatory nivei kasuhtheng sah in Guest R.oom umlou kasemdoh in office pam a gamsung ah thingphung leh pahcha jat chom chom katu in Shillong a um ka Commissioner pa uh V. Tochhawng in Dibrugarh a che uvinlang N.Lhungdim in office asuhtheng khu ve uvin ka kom a jong sum athumpon a Lavatory khu athen dan khu an jong nehthei ahi tin asei in ahi. Dibrugarh a Tea Garden 10 val nei Mahadeb Jallan chapa Manoj Jallan in Dibrugarh Income Tax office hi Corporate office toh akikheh na aumpon atin ahi.
Achaina in Dibrugarh a katoh a kipat til lai thil tamtah kalheh le leh Staff Union ho ahung kicha uvin lekha khat eihin pe uvin kihouna dung agenda 4 leh 5 asei un ka office Chamber ah kakou khom in nasei nom uh aban ban in sei uvin tia kadoh leh aban ban in asei uvin asei jou uvin kanatoh dan leh katoh got ho phatah a kasei leh Sir masei le chun kihouna jong ngailou di atiuvin ken kadonbutna chu kei Dibrugarh Range a Head of Dept. kahin Administrator kahin katoh ding chu khatvei a hungkon ahipon aban ban a Dibrugarh Range in ahop Tinsukia, Digboi, Jorhat, Sibsagar, Golaghat ho abon a apha ding leh ahoi ding ho kagon ahin masei thei ahipoi tia kadonbut ah kum 10 lhingdeh kaum sungin Staff Union ho ka kom a lungnop louna leh ngaichat nei in kaki mukha tapouvin ahi.
Hiche hi Pathen in eipeh Human Relation Skill chu kana man a kanatoh ahin tuni chan in mihon sei uvin Sir naumlai 92-2002 chu Dibrugarh Incometax Golden Era ahi ati nalai uvin ahi.
Aneopen a insung neocha a jong chate tute toh kium bom jong hi Human Relation hi aphat phat na dinga kibol a kium bom ahi. Kathu thu tia vaihom theijong ahipoi office hileh in hileh ikitimatpi ho hibei sanga chingjo leh themjo ngen ahi.
Chihna thepna manga thu nun theijong ahipon ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
