Home N Lhungdim MIHEM EIMA SUM CHIN LEH HOUBUNG SUM CHIN AKIKHEHNA NAHET THEI UVEM?

MIHEM EIMA SUM CHIN LEH HOUBUNG SUM CHIN AKIKHEHNA NAHET THEI UVEM?

46
0

HOUBUNG SUM CHIN

Asun
N.Lhungdim
Thangting House
Molnom-West

n lhungdim
N-Lhungdim

6th December, 2022

Achomlam a seiding in eima sum chu abang leh adihlou in akimangkha jui in ahinla Houbung sum chin kiti hi Pathen sum chin tina ahi in Pathen sum nachin dihlou leh nachung a pohgih lentah naki luilut ahi tina tobang ahi.

Hiche toh kitoh dingin Bible chang phabep khat ve ute.

  1. Collosia 1:25 “Pathen thu subulhit soh dinga. nanghoa dinga Pathenin gouchinga panna eipeh dungjui bangtah a chuche lhachalea chu eikipan sah ahi.”
  2. 1 Peter 4:11. “Pathen lungsetna jatchom chom gouching phatah bangin ami takip in lhagao thilpeh akisan cheh chu kijen tonan mangcha uvin.”
  3. Titus 1:7. “Ijeh inem itileh Houbung lamkai chu Pathen gouching ahijeha nolna bei kichamsah lou, lungsa bailou, june lou, mi denglou, alamlou a kilose loumi hiding.”
  4. Collosians 1:25, “Whereof I am made a minister, according to the dispensation of God which is given to me for you, to fulfill the word of God;”

Gouching kiti hi English in stewardship jong akitin ahi. Stewardship kiti chu kichen jep in kisei leh ama nei hilou minei ching dinga kinei ho tina tobang ahi.

Houbung khat aum leh natoh jatchom chom in akihom in sum ching ding hi ama ho laha khat ahin ahi. Sum kiti hi mihem dinga tha le jung English a sinew pethei ahin ahi. Hiche bangchun Houbung jong sum atam leh na tamtah akitongdoh thei in sum alhom leh natoh tamtah tohding kigel jongleh ima akitongdoh joupon ahi. 2006-2011 kikah chun Molnom Christian Church a Chairman in kana pang in hiche lai chun Molnom Christian Church hi tulai toh abangpon soma khat kipe jong lhomcha ahin ajehchu ape dingjong mi ana lhom nalai in ahi. Ahinla chairman hina a katohdoh nom tamtah aum in ahinla sum langa lhahsam na aum jehin kadei bangin kana tongdoh pon ahi. Ka Houin kom uva mikhat inmun chohding kagong uvin kathil gon uchu itobang ham itileh hiche inmun chu lakh 3 a choh dinga kana kigon uh ahi. Kagon dan uvin bank a loan laha a inn neipa chu pehdoh a aman inthah khat akisah ding to tohgon ahi. Hiche he seihah tahkhat ahivangin bank a bank manager patoh kaki hetthem jehin kiseidoh nante tin kana gel in ahi. Ahinla hiche inmun neipa chun a bank account chu loan lahna thei bank a account aneiding angai in ahi. Ahinla vangset umtah in hiche inmun neipa chu aphatseh a judon a kham mikhat ana hijehin imacha ana bol tapon ahi. Ahinla Houbung lamkai ahung kikhel in summu na ahung tam in ajo na in hiche inmun mama chu cash payment in lakh 10 val in Houbung in ana chodoh tan ahi.

Houbung Chairman kahi lai a kana gelkhoh khat pen chu chapang ho Sunday School building sah ding kana gon chu alolhin nadingin chuphat lai a keiman loan kalahthei chu Rs. 70,000/- bou ana hi in hiche chu kala in hiche sum a chu kahung kipat uva class room 12 sahding kana gon uchu room 5 bou kahin sadoh uvin ajehchu Sunday School achu table leh benches nei angai in blackboard jong nei angai kit in hijeh chun aban kasah be jou tapouvin ahi. Ahinla masanga room sung khata class tamtah kila chu room chom chom a class akibolthei chu katohdoh laha thil phapen in kagel in ahi. Achunga kasei bangin chuche phatlai a Houbung in sum kinei chu Rs.40,000/- hobep balance a kinei ahi in tulai a adeh a 2022 a ka Houbung uh Molnom Christian Church hi hapta sehleh soma khat hung kipe jong kah lah lah leh lakh khat val kamu jui uvin ahi. Chairman kahisung a katohdoh khat chu ahileh Houin chung ceiling kabol sah chu thil phatah ahi tin jong kagel in ahi. Chukit leh Houin mai fencing jong kana bolsah in asum lhom toh toha kana toh chu kalung alhai mopon ahi. Kaboldoh kit khatchu latrine ni jong kana boldoh in Houin kai junsoh ehsoh hon pailhah na a akinei leh akijen lheh jengin ahi. Chuphat lai a Houbung Chairman chu 24×7 tobang a kipo ahin part time a pohthei ahipon ahi. Kaboldoh khat kitchu ahileh Christmas leh New Year hi Kuki te culture leh tradition dungjui a kahin manpan uh ahi. Masang in Christmas leh Kumthah in committee in mo apoh a hitia chu ana kimang jui ahi. Ahinla Kuki te culture leh tradition dungjui a kapoh phat uvin Houbung tucha kanei uvin tucha pa in jol anei kit in ama hochun mi akitep uva Christmas chu ama ho khut a ana kipedoh a kimang jui ahi. Christmas sumdon hi aphatchan koiman apejou pon ajehchu ama hon Christmas sumdon sang in aji achate vonthah chohpeh ding aboipiuvin ahi. Hijeh chun kum thah nileh hiche kum kit a Christmas man nading kitepna register khat a ama chamtah in hija toh ing kate ti kabolsah in hiti chun avat chu ana kiholbe in hiti chun Christmas leh New Year ana kimang jui ahi. Hitia hi Houbung hi iboipi leh akiboi vangin anom in Houbung miho jong alunglhai uvin ahi. Kum khat chu hatah in kaboipi in eima in a bu kihon a poha Houin a kihon sa toh kinejui khu anopna khat aum vangin keiman bu Houin compound a honding an neh phatleh in a kona bu kipoh umlou Houin a honsa bu le me nehthei dingin kana gong in hiche chu aneh nadingin table tobang jonsao in kasem sahin chuleh bu kong ding then naa bazar a kijoh kacho in ahi.

Tulai in Houbung kipohna jat chom chom aum ta in KCN hon bukong ding tamtah acho uvin hichu midang in alah leh a fee asan man ala uvin ahoilheh tan ahi. Houbung Chairman kapoh lai a kasemdoh kit khatchu Easter Sunday ni a Easter Eggs kiti ahtui kihon leh chana cha donkhomna kisem chu tulai a Houbung lamkai hohin ajui lou uh hitaleh akilom in ahi. Hiche Easter Eggs kahin hetdoh nachu March-June lhasung a Lal Bahadur Shastri Academy of Administration lai a Foundation Course kache na a chulai phat a director Rajeshwar Prasad leh Mess Committee hon Easter Sunday nileh Easter Egg ahin hom uva kona kahetdoh ahi. Civil Service a ilut leh India sunga miching mithem tamtah kikhopna ahi in thil phatah tah tamtah kahin hedoh in Chairman kahi lai in KCN holeh KCK ho workshop jong kana boldoh in aphatchompi lheh uvin ahi. Chukit leh Good Friday nikho hi sermon bol a kikhopna kana neisah pon Jesu Christa thingpel a nidan 12 akipat nidan 3 chan kikhopna kabolsah in Jesu Christa Cross chunga athusei 7 hochu Houbung lamkai mi 7 khat khat in kasei sah in chuleh 3 hours service chu nomtah in kana mansah in ahi. Hiche hi Calcutta a posting kahi lai a Lower Circular Baptist Church a kona kahin heddoh ahi.

Tuni a kaseinom chu kahet naleh kabolnom ho kaboldoh chu kalung alhai in ahinla Houbung miho hi alhasam jeh uvin Chairman kahi jou in ajui tapouvin ahi. Hiche abol uhi ka oimo pon ajehchu ahetnao leh thildang dang hochu lhahsam jeha sangtah a kipo chu houbung lamkai hoding leh Houbung mite hoding a hahsatah ana hijon ahi.

Tuni a iseinom pen uchu hiche langchu ahi behseh hih in Houbung sum hi iti chin a phatah a chinthei ham tijoh kihoulim ute. Achunga isei bang uvin mihem jousen eima sum akinei in eima sum jong adih achang in abang bang leh akimang juipon ahinla Houbung sum chin kiti hi thil hahtah leh integrity neitah mi ahiding angai in ahi. Kahet dan in Molnom kho ECA ho KCA a ana umlai in 1983 kum a KCC jop ding tia haosa pa Pu Thanghem MC in ahingot chun agongpa insung miho gampan a kona thunun na ana neijeh uvin ama insung leh KCA ho thunoi a umhon anungjam uvin haosa pa dingin minset naleh jachatna lentah ana sodoh in ahi. Kahet khel louleh chuche phatlai a Houbung sum ching pa chun asum chin chu aloi agol ho hahsat pet a bat ding a ana pehdoh jeha Houbung chu hung kikhel leh asum chin uchu kintah a anungmu lou ding jeh uva Houbung kikhel chu ana pomlou uh ahi.

Hiche chung chang a iseibe nom uchu Houbung in bank account phatah anei a Houbung sum jouse chu bank account a umding ahi ajehchu sum hi akhut a aum leh chohlou ding khatjong ana kicho jui a Houbung sum chin chu hung boijui ahi.

Achung a kasei Houbung sum ching pan aloi apai ho bat in ana pe in kati jong chu tulai phata dingin imacha ahipon chulai phata Rs.10,000,/- Rs.15,000/- kiti ho chu sum tamtah dan a ana um ahi.

Kadei dan kisei leh Houbung sum local a ching hohin bank a abon a akoisoh kei uvin aphan ahi. Hiche chung chang a kaseinom khatchu Chairman kapoh lou nungin half yearly audit statement khat eihin peuvin statement chu kavet leh Houbung in balance lakh 5 anei e akiti in Lakh 5 hi hoi a umham bank a nakoi uham katileh aseidoh nom tapouvin ahi. Adihtah achu Cash in bank, cash in hand tia kicheh taha koiding angai in ahi. Houbung in akhohna a jahding a Rs.5000/-, Rs.10000/- koichu khoh ponte. Chukitleh Molnom Christian Church adinga kana boldoh kit khatchu Houbung min a account honding hiche account achu polang a Houbung mi service bolhon lhalhun phatleh soma khat ahin thot nadiuva kana gondoh ahi. Ahinla vangset umtah in ka Houbung Secy. pa in kei ginmo jeha bank account nahon ahi ati in ama jong Houbung Secy. akon in ahai in ajo jo na in Houbung Secy. ginchat umtah a kinei pa chu ju le sa in ahungboi in matah in ana mollem tan ahi. Anaopa jaha iti dana na upa chu kintah a mollem ham katileh amachu athin ana mondoh ahitai atin ahi. Ju hadon jeha hi athohlal penchu thin hi ahin ahi. Hijeh achu tulai jong ju ana hadon ho athoh joulou a thi ana tam in ahi. Janni Pathenni chun Bible in ipi dinga judon louding atiham ti article khat kasun in mi kimkhat in Kitepna Thah a judon ding akihap poi tin comment ahinbol uvin ken kadonbut nachu judon louding tisangin jukham louding ajehchu ju kidon jongleh akikham louleh koiman setna abolpon ahi. Bible a imu dungjui uvin Lot kitipa chu achanu tenin ju adonkham saha aluppi a cha ahin nei ahi. Jukham lou hileh achanu toh cha aneilou ding ahi. England leh American gam ah Christian hon ju adon uvin ahinla koima akham e tin akimupon ahi. Mizoram Doctor C.Rosiama in kum 2 post graduate doctorate kaga sim in ahinla khatvei keo keo kholai ah jukham kamubep e atin ahi ahinla hiche jukham pa jongchu alungthim kisuhlou ahibou e atin ahi.

Imlou behin kisei leh European gam a Houbung lamkai hohi judon lou aumpon ahi. Ahinla koimacha jukham aumpon ahi. Ju hin setna abolpon jukham joh in setna ahin pohlut ahi. Ahinla Kuki Christian hokoma thumop ipeh nom uchu eiho thinglhang mi hi milhasam akihi jehin ju phabep don ti umtheilou akhamlou leh judon a kigellou mi ihijeh uva judon hih in tichu thumop hoipen joh ahi.

Bible in asei chu Houbung lamkai adeh a Houbung sum ching ho hi judon loumi hiding atihi ahoilheh jengin ahi.

Achaina in tuni a iseinom uchu Houbung kiloikhomna gambih ham ahilou leh gamkai ham ahilou leh Synod a sumching hohin Head Office a officer dan a atou uhi kadeipon ahi. Amahohi isei bang uva gouching ahiuvin tulai KCC Synod budget hi ija hitam kahe hih in crore 3 ahi kitileh Synod a sumching paleh aloiho hin gambih leh gamkai ho akhol uva sum iti tampeh ding ham ti seminar abolding uh kadei in ahi. Kamu dan leh kahetdan in masanga Synod a sum chinga kigense hon pastor ho sumpe tamho cha achohpeh uvin sumpe lhom ho ahouse jui uve ti kaja in pastor khatjong Synod office ah akithah nom tapon ahi. Synod office a sum ching hohin officer dan a kigel in vaihop dao hen. Pathen soh anei ching kahi tin kigel uhen.

Houbung sumching hohin chingthei tah in ching uvin Houbung sumchin a akisuhlou jeha minse leh Houbung a kona kipampai jong umlou ahipon ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleNUMEI MELHOI KITI HOKHU ITOBANG HOKHU HAM?
Next articleTUJAN ROUND OF 16 KICHEM DING HO:

LEAVE A REPLY

Please enter your comment!
Please enter your name here