By Shonkhogin (Hegin) Haokip
Maranatha Cottage
Hebron Veng Phaipijang
Langol, Imphal West.
Nanghon mi suh khel na ngaidam uva ahileh van na na Pau jongin nangho suhkhel angaidam ding ahi. Amavang nanghon mi suhkhel na ngaidam lou vang uleh, na Pauvin jong nangho suhkhel angai dam lou ding ahi. Mathew.6:14-15.
NGAIDAMNA
Sopiteho, ngaidam chungchang thudolla hin seiding tamtah aumin, hibang vannoi leiset khantouna lah a mihem chihna thepna in van aphah tah vangin, NGAIDAMNA kitihi mi tamtah in ipiham ti ahehih laije. Hiche vannoi leisetna hi Christa mingaidamna tabang ineilou jeh uvin, leiset hi kitha kimat kinah kibau, kivetdana kitihohi pum dima dimlha jeng ahitai. Hijeh a chu nangma jong Christian kahi nai tin ki moh nep hih behin, Christan nangma nangai dam banga hi nangin jong mi suhkhel nangai dam louleh iti nama jongleh Pathen lenggam nalut lou helding ahi.
Ajehchu Christa mi ngai damna chu itabang ham itileh, Aman nang nangaidamna hi ngaidam dinga nalom jeh ahilou leh naphat jeh a nangai dam ahinaisai poi. Chu titah sanga chu, Ama that le man a ipan laitah uva eiho chonsetnaho ngaidamna dinga thingpela hung kikhen beh a, thingpela athi dinga akikhai laitah a, Hepa amaho hi Ngai damin, ajeh chu amahon ahetlou jeh uva abol u ahibouve, ati ahi. Nangin jong nasopi khat nangai dam ding danhi, Pakai Jesun, nang nangaidam bangbang tichu ama aphatjeh, alomjeh thu hilouva ama chu nangai dam jengding hi ahi.
Pakai Jesu ngaidamna
Hiche ngaidamna hi Pakai Jesu ngaidamna tabang chu ahi. Pakai Jesun athat amanho dinga ngaidam athum peh chu thil hahsatah himaithei nante, ahinla hiche ngaidamna theng sella kona, tunia mi lakh som lakhja in chonset ngaidamna akimua tonsot vangam lut dinga aumhi amelmate angai dam jeh chu ahi. Nang jong tunia nasopi khat mitmona chu lungtheng sella nangaidam theileh, nikhatleh hiche ga chu nangman Pathen leng gam nalutpi ding sehseh chu ahipon, nanunga nachate natuten aga ahin neh nah lai diu ahi.
Amavang hiche thu guh hi nahet ahilouleh naneilouleh, hiche vannoi chena lhongpihi, mingai dam theilou dammona hi dimset ahitah jehin, mi ngaidamtheilouna lung thim, mivetdana ,lunghan lungsat,lethuhnomna, lungthimkha, lungdam theilou, hitiho jousehi nalungthim alodimset ding ahi. Hitabang lungthim neija kona ihinkho jong kikisuh mangthei ahi ti het angaije. Mi ngaidam theina lungthim ineilou kalse chu mingailut na lungthimjong umtheilou ahijenge.
THISAN LE TWISIH
Bible John 19:34 na aseijin, achuti vangin sepaiho laha khatchun, atengin anah agahsunin ahileh, chua chun THISAN LE TWISIH ahunglong lha paijen jeng in ahi ati. Thisanin avetsah chu ahileh Ngaidamna ahin, twisih in avetsah chu ahileh ngailutna ahi akiti. Pathen ngaidamna nachan leh amingailutna jong nachantha ding ahi. Ngailutna kitihi Pathena kon ahi. Ajeh chu Pathenhi ngailut ahi. Eihon ama ingailut masanguva Amajoh in eingailut u ahibouve. Hijehchun, Pathenin chutia chu eingailut uva ahileh, eiho jong khatle khat ikingailut ding dol u ahi. Pathenin asimho jouse phatthei boh tahen.
