Home N Lhungdim MI CHUNGCHON KITI HI NAJAHKHAH TAH UVEM?

MI CHUNGCHON KITI HI NAJAHKHAH TAH UVEM?

33
0

Midang sanga ipi lam hileh ahina khat a mi chungnung chu mi chungchon ahi.

Asun
N.Lhungdim
Thangting House
Molnom-West

n lhungdim
N-Lhungdim

23rd September 2022

Leiset chungah mi tamtah apeng in alhangpi in mi jouse hi akibang e kiti jongleh atah tah in khat le khat hi akibangpon ahi. Mi kimkhat in chihna thepna aneipon kimkhat in thepna sangtah anei in ahi. Mi phabep khat chu IQ alhom in ahinla mi phabep khatchu IQ asang a sang ahi. Chukit leh mi phabep khat an nehding neilou aum vangin mi phabep khat ahao a hao um ahi. Tulai in India sunga mi haosa tah 2 aum in khat chu Gautam Ambani ahin amahi leiset chunga mihao lah a ani na ahi akitin ahi. Adangkhat chu ahileh Mukesh Ambani ahi. Thu kijadan in India sungah billionaire mi 70 val aum e akitin ahi. Hitobanga mihao aum vangin nikhat a nivei an nejoulou tamtah aumkit in ahi. Hiche ho chu Govt. in Below Poverty Line a umho ahi ati. BPL hilchenna phapen chu ahileh ama chun nisa leh go a kona kidaldoh nading in aneipon ani na ah nikhat leh an nivei nehding anei joupon ahi. Chukit leh medical facility mi tamtah in amu hi amahon amutheipon ahi. Ahinla kidangtah in tulai in BPL ho muding aum tamtah hi mihao tahtah jong aum dapon ahi.

Tuni a ithupi uh mi chungchon kiti hi mi tamtah lah a midang toh banglou leiset chungah atampon vetsahna dingin American President tamtah 40 val aumtan amaho lah a kisei jingchu Abraham Lincoln leh John F Kennedy chu ahi. Abraham Lincoln hi mi vaichatah insung akon ahin John F Kennedy chu mi haosa tah insung akon mi ahi. England gam a English ten Prime Minister tamtah ana nei in ahinla tamtah laha minthang penchu Winston Churchill 2nd World War lai a ana pangpa chu ahi. Hiche bangchun India ajong Prime Minister tampi ana umjongleh amaho laha minthang chu Pandit Jawaharlal Nehru ahi. Achunga iseibang uvin ama chu mi haosate insung akon ahin ahinla tulai a India a Prime Minister Narendra Modi hi railway station a cha joha ana pang ahi akitin ahi.

Pathen thusei leiset chungah tamtah aum in ahinla America gama Dr. Billy Graham chu aminthang pen in ahi. North East India a Pathen thusei minthang penchu Pu Rev. Dr. Vanlalngaka kitipa chu ahikit in ahi. Pu Vanlalngaka hi amel jong ahoi in lekha jong athem in college a akai lai in I.A exam ah 1st Division in a pass in chukit leh B.A exam English Hons. ah Gauhati University ah khatna ahi akitin ahi. Chukit leh Bibile study hilna ajong athempen hidingin katahsan in ahi. Keima tahsa tah jong Shillong a Nepali Church Pu Vanlalngaka in Bible study abolna ah khatvei kaga pangkha in Bible thu simding dan leh hetding dan akicheh lheh in ahi. Hiti chun Pathen thusei mi tamtah aum in ahinla Pu Vanlalngaka tobanga thusei them hi atampon ahi. Kum 77 alhin kum in Rev. Ramengliana leh Rochamliana in Festschrift kiti lekhabu peh 447 a sa khat THUHRIL TU ROPUI kiti khat ana sodoh lhon in hiche lekhabu achun mi 52 in Pu Vanlalngaka chungchang thu amaho mudan ana suncheh un ahi. Pu Vanlalngaka hi Shillong a Laitumkhrah a Wicket Gate kiti in ah aji leh acha toh achengin ahi. Shillong a ka umlai 1988-1992 lai chun mun tamtah ah vei tamtah kaki muto jui lhon in a in ajong kholai lengin kache khan ahi.

Achunga isei bang uvin mikhat in midang sanga achombeh a hitheina khat anei leh ama chu mi chungchon ahi.

Lekha sutna lama mi chungchon a kana mu leh kana het khatchu Pu. Lalthamuanga Keivom achom lam a L.Keivom kiti Indian Foreign Service a na anatong pachu khat ahi. Ama lekhasut akon chun keima jong inspiration tichu tilkhounna tamtah kamu in ahi. Ama lekhaso article pou pou chu sinnom um ahi. Tun aum tapon a hin lai a a lekhasut minthang pen chu ZORAM KHAWVEL kiti volume 9 lang ana sun in ahi. A copy lhingin kanei nom in ahinla vangset umtah in bu khatbou kanei khan ahi.

Adang mi chungchon a kahet khat chu Molnom kho ana phutdoh Pu. Thanghem Lhungdim Kuki chu ahin ahi. Ama akidan nachu Kuki ho laha sim joulou mi sepai in ana pangin ahinla galbol han jeha Military Cross (MC) mu khatcha aumpon ahi. MC amu keo hilou in 1946 in sepai a kona ahung hai in Molnom kho ana phutdoh in tun in 400 lhingdeh ahitan ahi.

Adangkit khat chu ahileh Pu Thangkhopao Kipgen kitipa chu ahikit in ahi. Mi tamtah B.A, M.A hijongleh Pu Thangkhopao Kipgen banga chihna leh hetna Govt. natoh them minse loubeh a pension mu akitampon ahi.

Mi kidang laha kaseinom kit khatchu Pu Dr. T Lunkim hi ahikit in ahi. Ama chu Christian insung akon hilou mihao te insung akon jong hikitlou school kai tobang kailou tobang a ama leh ama kihil a lekha ana sim 1960 lai chun B.D simna in Serampore matriculation ana pass in 1960 kum in Pre B.D Serampore College ah ana lut in Pre B.D Distinction ah ana pass in Greek pao hi phatah in ana kithemchuh in ahi. Abanha Pre B.D Distinction a apass jehin B.D direct in alut in B.D asim kum in Hebrew akithemchuh in hiche ahetna chu mangin Kuki Bible Kuki pao in ana ledoh in Kuki Bible Pathen Lekhabu Theng hi North East a paochom chom a kiledoh Bible lah a Hebrew leh Greek them in aledoh Kuki Bible Pathen Lekhabu Theng bouhi ahi. Aban ah Kuki Christian Council ahin phutdoh in Kuki ten Imphal khopi a Christian Centre khat neiding ani na a Pathen Lekhabu Theng Kuki pao a kiledoh neiding ana gongin vangphat umtah in 1979 in Kuki Christian Council chu Kuki Christian Church tin ahin heidoh in tulai a Imphal Dewlahland a Trulock Theological Seminary leh Restoration Theological College leh Christian Hospital Imphal, Nursing School hokhu ama thunei naleh thanei najeh a kitungdoh ngen ahi. Serampore College in anatoh jehin Doctor of Divinity honorary ana peuvin chuleh USA a Lincoln Bible Seminary in a Pathen thuhil chombeh amujeh uvin Doctor of Divinity honorary ana pekit uvin ahi. North East gama D.D Degree double a mu ama bou ahin ahi.

Achaina in keima leh keima kiphatseina tobang hijongleh kachungchang a kaseidoh nomkhat aum in ahi. Kum ija ham masang chun Tengnoup District a Sita kho ah insung mikhat jinei na a kaga che in houin a kikhop na ah Sita haosapu Pu Paokholun Haokip in mipilah a introduction eibol na ah kei hi mi chungchon ahi atin ana phongdoh in ahi. Hiche kajahchun keijong kajah acha leu in ahi. Ahinla tua kanung gel gel leh michung chon kahi nakhat kanung mudoh in ahi. Hichu ipi ham iti leh kum 4 kum 5 lang hi thuso English a article kana sun in kasutdoh ho kasim lou vangin 1000 val lang hitan te katin ahi. 2019 lai a kasutho phabep khatjong press a publish ding phabep khat jong aum in kumkhat lhingdeh tahsa hatlou leh damlouna kanei jeha kana sutlou tilou tun jong niseh in khat khat kana sundoh thei jingin ahi. Ipi topic hijongleh hoitah leh kilomtah a sut theina Pathen in eipeh hi kahet naleh kachihna miho henga ka hopdoh thei ahi.

Kadam nahleh ka article sut hi volume 2 kisodoh leh katin ahi. Pathen in hinna damna eipe henlang khonung a ka umlou phatleh kadalhah ding gou mantam bu 2 dalhah ding tohgon kanei in ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleENGLISH PHRASE MAN IS A SOCIAL ANIMAL KITI AKO THUHTAH AHI NAHET KHAH EM?
Next articleITI HAO THEI DING HAM?

LEAVE A REPLY

Please enter your comment!
Please enter your name here