Home Lahkhom Naocy Haokip MEL MULOU LANU-II

MEL MULOU LANU-II

249
0
MEL MULOU LANU
MEL MULOU LANU

(The Ghost Angel)

Writer: S.Lien

Arrange By:- Naocy Haokip

(Episode – Two)

Hitin ahin seitai….

Na lunggel chu ka henai, hijongleh, Kei ho leh Nang ho hi kikibang lou ahijeh-in, ahithei lou khat um ahi, Kei hi Lynda lhagao kahipoi, nang banga chu hinna nei thou kahin hijongleh Pathenin aki tongkha thei loudinga eina sem’u ahijeh-in, iki tohkhah thei nadinga chu bolding khat um ahi, hijongleh che thil bolna dinga chu Pathenin thanei na ei pepon, nang nop leh noplou thu a kingam jo ding ahi.
Na koma ngaidam thum ding khat kaneiyin….

Atin kisonglel melpu tah in ahung umin, adonbut je jong helouvin, amel hoi kasah toh, kamoh vet den jeng phat’in,

Ahin sei jomin, William nang hi sot’a pat’a lungsetna kahin nei ahitai, ka neolaiya a thidinglai neina huhdoh ahin, ihung khanlet phat’in inveng tobang jong ihi jeh-in, phat tinin nakom’ah ka um jingin, kamel muhih jong lechun ka husa jong najah ji di ahi, kahin ngai cheh cheh phat’in nang leh Pathen chung’ah bolkhel lentah khat ka na nei tai,

Ahin tin a thusei chu ka het them lou jeh-in angol ka bang leovin, ahi, Ipi hamo ka chunga bol khel nanei kahe naisai poi, kati leh..

ahin sei kit’in…

Vanleh Leiset sempa Pathenin keiho hi ei deilouvu ahin, hiche Leiset hi keiho thunei nadinga eipeh-u ahi, hijongleh mihem bolkhel neilou chunga chonset kabol diu vang aphal dehpoi,
Hiti nasa sa chun Lynda toh na kilungsetnao ka vet leh ka thangse val in, mona neilou, achung’ah kakhut kana lha tan ahi, che jeh a chu nachunga ngaidam thumding kanei ahi, nei ngaidam jou dingleh, hiche Twikhanglen chung leh akimvel’a gam hokhu ka Pa haosatna gam ahin abona nang thuneina hiding ahi, nei ngaidam joulou jongleh hin oimo ponge ajeh chu na lungset pen toh kahin khen ahijeh-in, ka ki phalam val’e, phattheina, vangphatna khat kahin peh thou thou ding ahi, hijongleh kamel vang namu kit tahlou ding ahi ahin titai.

Athuchu kajah-in ka thangtom mama jengin hijongleh amel ka mua akhut katoh khah a kon chun ka lungthim leh ka tahsa ahin, nol jou louna khat aumtan, a khut ka tuhkhah sah chu kakisih lheh jengin, kalungthim khat’in, chebang melhoi hi mihem ama tobang hoija kimu dingham, Thilha hijongleh…kadei val’e, ti khat’in kalung amoh boilhah jeng tai.

Che phat chun, aman hitin ahin seiyin..

Tu jan phatah-in hung kigel inlang nikhat na deihen chu eisei peh in o atin ei dalha kit tai.

Kamang ham kati lela katah ahin angol kabang leu tan ahi. nei huhdoh ati chu ka gel gel leh chapang cha ka hilaiya Twi pama bonlhoh lah a Penguin nou ohden ka ladoh a twi lah a ka lhalut chu hidin ka gingchan, ka thom najah ji di ahi, ati jongchu, ka nunglama kona eijui khat um hile kiloma kahetji a kavet leh koima kamu jilou chu kahin geldoh in ahi.

Keijong in kajonin insung kaga lut leh ka inkoten TV ana veovin, Ka nun janseh leh hoilaiya navadoh ji hamo William eitin,

Keiman Henu ka loiho koma kaga che ahibouve, katileh Kanao Monica in, Nungah hel hivehta, namtui sel’a hi ahinti leh, ka king dot’in ahi.

Che jan chun mang kidang tah khat kaneiyin,
Twikhanglen chunga kong innei asan khat ahung kitol’in ka khel jep a chun ahung kinga’n, mike (Loud speaker) ah thu ahung kiseiyin jingleh Lengpa hungding ahin, koima khosunga ana um hih-un kiti khat chu Ka kho’uh Stainford street lam nga chun thong jeju in ahung kiseiyin kong chu a kile kit tai.

Jingkah kahung khah phat’in ka mangchu ka sei leh Kapan thil phalou khat lhung di hinte khosunga atin, ka khosung miho koma asei leh khosung mihon,
Dream is nothing” che mang pou chu a tiuvin Kapan eiho umda ute atin Ka inkouvin car ah London khopi lam’ah Bazaar kai togomin ka pot doh tauvin ahileh Sun pung 12:30 vel’in Tsunami nasa tah in ka khou leh a komnaiya kho ho chu ahin lonkhum’e ti thuso chu Restaurant khat’ah nehthei kaneh pet’un asei sao saovun Local channel TV khat’a ahung soh ngal tan ahi, chephat chun ka kholamu chu eujel’in kadel phei kit’un Police Rescue team ho leh Kakho mite hou khopam’ah ana dimset uvin, Upa khat Wesley Clinton chun kapa amu mu in kap komin ahung kol’in “Na thusei ka tahsan lou jeh-in ka Chanu kachan tai,” atin lhase tah-in akap hut hut in ahi.
Homtho na thulouvin khosung mi Wesley chanu Cindy pum chun tehse khat toh mi 4 bou a thiuvin ahi.

Chenung hapta khat jouvin nilhah khat hi ka che na ji kakho khel jep u twilen pama songpi chunga gatouva Twikhanglen Nungah melhoinu chuto kimuto ding ka lunga ahung um vel vel kittan Ka inkote kom’ah Kaloiho ina kache di ahi, kahung gei leh eihin call hih-uvin o, EPL kavet diu ahi, Totemham leh Liverpool kichep na, katin ka che tai,

Songpi chunga chu ka kaldoh-in twipi kinong hochu kavet leh pahcha namtui nam kajah ji chu kaja kit tan, ka jet ka vei kavet le le leh Nungah nu chu kakoma ahung dingin Sangkhol chol blue colour ahin ki-ah in a mel chu avah sitset jengin, me hiuheovin akhut ahin tungin..

Hi..ahin tin songpi chunga chun ahung kaldoh-in kakom tah a ahung tou tai.

Kasei chu….atin mit ngat jim jemin beng koh tit tet’in ahung nuiyin,

Kasei chu,…ahin ti leh kahedoh chet’in,

Umm, Kahin ngaidame,,

Kati phat’in Oh! kakipah-e leh ka ina iche dihamo atin keiman, ash ka inko ten eiholmo khau vinte kati leh ka hung thah kit ding ahi ati phat’in Oo achuti lela kati phat’in.

Syringe khat ahin ladoh-in vaccines neocha khat’ah lou khat achop doh-in kaban ahin kap’in ahileh Twikhanglena kahet chu gam nomtah ahung soh tai.

Kakhut’in eituh in lampi nomtah khat kajot lhontan lampi pam ho achun thingphung ka mu khahlou hoitah tah leh Pahcha pah hoitahtah a kigol phei thethu jengin, gamsa dandeo Vacha toh la kilou kit jeplou chi chom chom jong tampi tah ahon honin akijot dup dup uvin, alha jong chom cha cha hijongleh a leng thei ngenchang kamun, kamu lam lam chu kave nomin ka dah lele jengin ahi leh eipui nuchun
Nom nasah hinam kagamuchu?

Kei; Henge anom val val’e, chelaiya sa ham vacha ham jat chom chom lhakhom dup dup hokhu ahoi theiye ipi ganhing hamo Miss ? kati leh..

Miss, eiti hih-o Keimin chu Cindarella ahi.seihahsa nasah leh Cin, eiti ta o, chea gamsa nati ho khu nang ho paova Fish (Nga) nati hou khu ahi atin, kidang kasan kagingcha behseh pon ahi.

Vanlam kagah vet leh Lenna khat ahung lengin a lha jong umlou , Wau!! che a Lenna pikhu a lha umlou akidange kati leh.

Ahung nui siuseuvin, Nangho a hikhume, Britian Navy ho Sub-Marine ahi e, ahin tin angol toh kabangin ka umna chu Twipi sunglam ahi chu kagel doh thei pon ahi.

Aman hitin ahin seiye,

Keiho gam hi anop a nom ahe, nangho gam banga galleh sa a kivet nagam ahipoi, police hon jong miphalou matding amujou pouvin, chuleh climate change tichom aumpon, alum a vot aphabep’a um ahi, hung cheng lechun nom nasah di ahi.

Oh!! Ka cheng nome ka inkote jong kipui henlang kicheng leh kanom tama, chebang gamnom naicha a uma iti dana keiho kana chen louvu hamo? kati leh..

Pathen Vanleh Leiset sempan keiho hi ei deilou jeh-uva nangho, ami deilhen, amatoh hinna kijop ho lah a ka lhat diu aphal lou jeh-a chelanga hi eikoiyu ahi, nangho chu nathi phat’uleh na lhagaovu vanlama Pathen koma chedi ahin kei hohi Leiset’a umdending kahi jeh uva Leiset haosatna leh nopsah na ho hi keiho khut’a eipeh lhah-u ahin Amitheng jouse akilah tou phat leh keiho genthei kipan bep ding ahi, hiche kah-a chu gentheina natna lunggim naho hi ka hetphah lou diu ahi. ahin ti phat’in, ka kingdot’in, vanlam kavet leh Kanu, Kapa leh Kanaovin Bible khat cheh vah sitset’a akichoiyu kamu phat’in,

Kei kile kit tange o
Kati leh, Umm nang thu ahi, hijongleh nachanga nache theilou ding ahin ipi ding chu hileh Ka insung hungmu mong mongin lang injou leh hungthah kit nange atin kamit ahin jut’in ahileh vanlam kavet jongleh imacha kamu kit tapon, Ole ole katin kache kit lhon leh Khopi sung nomtah ka lhung lhontan, mi hochu ahoi thei lheh uvin anou sitset’un ahi, a in hou jongchu anopthei toh lheh-in a fresh thet’in, vutvai khu leh nen kipai thang muding aumpoi, Khopi lailung lam jep’a chun In thupi tah London khopi a Buckingham Palace sanga jong thupi joding khat vah pempum jeng chu Cin. chun eikohmu-in chekhu ahe ka-in’u, atin, Wau !! Kamunom val e katin kakikou doh leuvin ahi…

Waiting for next episode 3

NOTE:
Lunglut tah a simchai jouse chungin kakipah-e! Aban jingle simkhom kit taute.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKALUNGSET MOINU-I
Next articleFLOOR-6,ROOM NO.6-VII

LEAVE A REPLY

Please enter your comment!
Please enter your name here