Home Lahkhom Naocy Haokip MEL MULOU LANU-I

MEL MULOU LANU-I

201
0
MEL MULOU LANU
MEL MULOU LANU

(The Ghost Angel)

Writer: S.Lien

Arrange By:- Naocy Haokip

(Episode – One)

Lhavah hoilai jankhat hi ka thomhao behseh jeh-in, ka kho kom’uva Twikhanglen pam ho a ka changin ka vah le le in, Lhakhat masanga ka lungsetpen Lynda in natna kidang tah jeh a ei dalhah (ei thisan) danho ka gel leh ka pona val jengin kalung kagel sao sao leh, kahin tha jong asoh tapon, twikhanglen pama Lynda Smith toh kana toukhomji na lhon, songpi lentah chunga chun ka kaldoh-in thomhao tah in ka changin ka toutai.,

Ka lungset Lynda, kei jong nakom’ah kahung nom taiye, hiche leiset gentheina gama nang puldouva ka hin sangin nang umnagam, akisei minthang Paradise achun nei hungpui jeng tango Boi” tin mitlhi va chut chut’in ka seiyin ka kap tan ahi.

Twikhanlen chung chu Chollha vah in a kho em sil sel’in, gamlha tah a ngaman miho kong meivah ho chu akimu jet jet’in, vandum chunglama valpa ahsi ho de let let ho chu ve a lung lengvaiya ka um laiyin, tha khat’in ka lhagao lengdoh hileh kilomin…van chung lama leng lele danin ka kihen, noilam kahin vetsuh leh Kakho’uh London khopia pat a 23 kilometre Vel’a gamlha Standford street chu mei-am hoi laitah kithaija bangin a a vah thethu in akoma Songpi chunga pasal khat tou jong chu ka gah mutheiyin, akoma chun, Nungah khat Lynda tobang khat’in akhut’a pahcha choiya ding khat jong ka muta’n, che phat chun ka king dot’in ahileh songpi chunga tou ka nahin, ka jet ka vei kave kol thethu-in, koima ka mupoi, hijongleh ka koma mikhat thil namtui khat choi um hile kilomin pahcha namtui gim akija heu heuvin abang kom leh neldi lah a mi vahle gin tobang jong kaja jin ahi.

Chephat chun keiman hitin ka sei tai…

Ka itpen Lynda kei na lungset na-U William chu kahi, Nangin jong nei lhahlel thou hamo Boi, Kahin Ngai na lom lome, hungo che songpi chunga hin veikhat toukhom kit hite, tahmel’in ei ki musah jengo veikhat senlai naobangin hin pomkit inge kati leh kei lang jonin neldi chu ahung kichon ging chet chet’in, songpi pama chun mutheiyin ahung dingin, amel ei musah pon hijong leh a kivon dana kon chun Nungah ahiding chu kahe theiyin, a pahcha choi chu songpi chunga ka masang laitah a chun ahin koiyin ei dalha tai.

Lynda lhagao hitei dinga ka gel jeh-in, kichat na ka neipon, ka ngai mama jengin ahi, apahcha chu kagah khoi leh pahcha tahbeh a nahi thouvin, Rose pah leh Leihao pah ahin, a nam chu ka gah nah leh, injouva anam kajah chutoh a kibang chet’in, ka kou kou vangin ka nungmu tapon ahusa chajong kaja kit tapoi, aki mukit khahleh tia ka tou tou nalam ah jan pung 11:00pm ana lhing tan, a lhagao hijongleh ka ngai lheh jengin, phat danga mukit ding kinemin inlang chu lungthomhao tah in ka jon tai.

Ka inkote jong a na ihmu gam tauvin, ka room ah kalut’in, ka lup vangin ka thilmu jeh chun ka ihmu theipon, Lynda mel mukit danin kakigel’in, a lhagao hijong leh lungmon nakhat ka neiyin ahi….

Nilhah khat nilhum kona hin, Twikhanglen pam mama mun khat’a hin, Nungah khat a melhoi dan chu a seije umlou vantil (Angel) hung kumlha bangjeng khat’in, William, na chanchin ka najan, Lynda ngaiya lung lengvaiya na um thu kahet’in, , kahin lungset val val’in, Lynda mel’a neimu din keitoh Lungset hinkho mangkhom taite, eitin eihin koijin, kamuh ahin chop leh, kahung khangin, kamang ahi kahet phat’a, hoikasah val’intin ki ihmukit henlang kamang ma ma chu kimu jom leh kati leh ka lim cheh cheh-in imulouvin ka khovah tan ahi.

Jingkho ahungvah phat’in, Kanu, Kapa leh Kanaonu, Monica chu Walking din ahung kisaovin,

Kanu’n. William, na hung di hamo walkinga kache diu ahitai ahintin,

Keima; Henu Tujan ka ihmut anompon hungda inge tu jingkah chu nangho gacheuvin katin, ahileh a maho jong ache tauvin ahi,

Lupna chunga chun thoudoh louvin, jannilhah a ka thilmu chu ka gel gel jeng tan khulsin changsa Lynda ka ngaina chu asang cheh cheh jengtan, mithisa lhagao toh ki-ngai chu thil umthei ding khat’in kahin gel’in che Songpi chunga katouva kakoma pahcha hinchoi, Lynda Lhagao “MELMULOU LANU” ngaiyin kalunggel athahbeh-in ahung umtan, janseh a che Songpi chunga ga touva che Lhagao chutoh ga kivop jingding chu kanom tan ka lunggel chu masang toh kibang jeplou angol tobang thim khun ka hung um tan ahi.

Kanu leh Kapa chu Ka khouva Bank (European Union Bank) Branch neocha khat’a natong ahiuvin Kei leh kanao, Monica chu Saint Amthony College a kai kahi lhone,

Hiti chun keijong janseh leh Twikhanglen pama ka toujina Songpi a chun ka ga touji in Lynda chu ka kou ji in ahileh ahung tahbeh ji in, ahinla ka kom naiya hung um ding leh amel eiki musah ding anom jipon ahi. Amel kicheh tah-in muhih jongleng Lynda mel a kamu thou jeh-in ka mu mun chanin ka-ngai cheh cheh-in aman jong ei nel deu deuvin ka hen ahi, ka koma ahungding phatleh hoitah a hung kichei hileh kilomin namtui tah leh von hoitah a hung kivon’a bangin anam kajah masat pen pah namtui tobang chu kikhel hihjong leh avon chu ajat jat hoi tah in ahung kivon jin ahi.

Jan khat chu kakom chakhat’ah ahung dingin a mai vang ei vetsah dehpon a tahsa chu a nouchet’in, keiman hitin ka sei tai.

Ka ngaipen Lynda ipi dia mamel nei kimu sah nomlou hamo, hungo kakoma hung touvin kati phat’in, aw nemheu tham thim hiu heovin,

“Ka tahsa tongkha lechun ei kicha kham nate katia ahibouve, ka mel jong hi Lynda toh kilou eisa pon nate kati jeh a kahin kimu sah lou ahi bouve , nei munom tah tah leh kahin kimusah ding ahi,”

Ahinti phat’in kalung adongin ka ti ahung ja thim henhunin, hijongleh a melmu ding chu ka lungthim khat’in kanom lheh tan ahi,

Namel kamu nome ei musah o lungset tah-in kati, kati phat’in nakhut eihinpen leh atin, kenjong kagah sangin ahileh kakhut ahin tuh chu, anop dan sei theilouvin ka tahsa jouse a jelsoh hel’in, amai ei hin musah-in ahileh amel hoidan dan chu aseije umlou, Jankhat ka manga kamu nu chu anahitai, amelhoi na chun ka lungthim pumpi alodimin khut’a eituh a atahsa katohkhah phat chun mihem leh mihem ki-ngai nachu imacha ahipon, akhut ka toh khah seh seh jong chun katahsa pumpi ei jet soh hel’in gah kol’a abeng chop ding chu katha anom lheh-in, ahileh ka lungthim chu ahet hiding ahin, ,Khongaiyo thukhat sei tadi inge atin, hiti hin ahin seitai………

Waiting for next episode 2

NOTE:
Nasim chai jeh-in kakipah-e, aban jingle simkhom kit taute.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleHUNGKILE KITTAN-III
Next articleVACCINE KIKAPDING LEH KIKAPLOU DING HOI JOH NALHE N HAM ?

LEAVE A REPLY

Please enter your comment!
Please enter your name here