Home Chaga Thusim MEITHAINU LE ACHAPA TENI

MEITHAINU LE ACHAPA TENI

365
0

Gospel coloumn story

(Lekha sim hi asimlou sangin aphachom joi.)

Written By:- Naocy Haokip

Masang laiyin meithaipi khat’in chapa ni aneiye, meithaipi chun achateni kom’ah “Boi nani lhonin lekha sim lhonin keiman na kahintoh ding ahi,” ati.

Ahinla achapa neopa chun a-Upa jah’ah “He-u, lekhasim hi aphachom ding aumpoi, sum la kimu lou ding chusanga keivang natoh ding kakihol’a na katoh ding ahi, lekha sim ponge,” atitai.

Alenjopan anu jah’ah “Henu nacha ken nasei sei ngai nange, neisimsah jou ding ahipoule nasei chan chanin lunglut tah-in hin sim jing nange, ajeh chu nang kanu nahin nangin keidia aphachom ding chu nahenai,” ati tai.

Chuin anaopa jah’ah “Boi eini meithai cha ihi, Henu in eihilna lhon banga ichon ding hilou ham? Tun einin aphachom ding hehih jongle hen henu in ahet ahi,” atile anaopa chu anom tapon natoh ding bou ageltan ahi.

Hijeh chun meithaipi chun achateni chu amani nopna bangtah a umsah din ageltan hiti chun aumna diu mun cheh chu akihom tauvin ahi, achapa lenpa school kaidin achetan, achapa neopa jong natohna kiholdin avaikon doh tan ahi, chujouvin meithaipi jong akivahna diu ngaiton natohna mun ajon tan ahi.

Akivailhah nauchu atohnau aumnau mun cheh-a kona kum som (10 years) joule kimuto din akithutoh uvin akikhen tauvin ahi.

Phat le nikho ache jingin kum som ahung lhing tan hiti chun aumnau mun cheh-a konin kimuto din ahung khom tauvin ahi, hiti chun damsel’in akimuto tauvin atohnau chung changa ahinkhoman dan hou akiseipeh to tauvin ahi.

Meithaipi: Chateni tunia dama ikimuto kit theiyu hi Pathen phatna jal ahin Pathen thangvahna ipeuve, jingkah nilhah in taona kamangjin nangni din jong kataopeh jing lhone, Pathenin kataona asangin kateh nung hita jongle kachateni mel kamu kit jeh-in kakipana achamkime.

Nilhum keiyin na katongjin lou laiya muchi katujin nisa alhum teng kakicholjin katohga ho ahung lhuna aga ho kalo khom tengle sum le pai kamu ho kakhol khom khomjin Pathena dingin hopsom kapedoh jin, tunia kum som sunga katohga chu hijat ahi.

Midang bat le tham kala pon, hopsom alhing keiyin kapen keiman kaman doh jat hijat ahin, tua eiho mankhom ding chu hijat hi ahi, tin atohga jouse ahin koi tai.

Abanin achapa lenpan ahinkhoman dan aseiyin.
Keima kavaikon doh nia pat Pathenin eilhonpin lamkah twikah injong toset katoh poi, jingpi tah-in kathoujin Pathen kalhai jin, khovah masangin lekha kasimjin kho ahungvah tengle kaumna hotel neite kithopin na katongjin, school che phat ahile school kachejin phaten lekha kasim jingin an le twi kitup tah-in kaumna ten eigonpeh jiuvin tunin ka lekhasim nan BA kahin chai tai.

Metric kajo chun Pathen lungset’in ka school kaina ten teacher din eina deisah-un, teacher pan toh college kai kakop’in kalodoh jat ho chu ka college fee in kapejin ka anneh man dingin hotel’a inneite kakithopi jin tunin bat le tham kaneipon Pathenin kataona le kanu taona asan jeh-in katohga BA kahin chai hi ahijenge.

Ima hinpoh lut ding vang kalamdoh jou poi, ati.

Athumnan achapa neopenin ahinkhoman dan chu ahin sei tai.
Keima natohna ding hol’a kavai kon chun mihaosa tah nupa khat anaum lhonin soh le kol tampi anei lhonin kenjong natohna ding hol’a hung kahi natoh ding aumle neitohsah lhonin kati.

Hichun mihaopa chun natoh ding aume, ahin najo lou ding ahi, eiti.

Hijongle ken itohle ipi kijoulel ding ham? tin kasei tei tei tan ahile katoh ding chu eiseipeh tai.

  1. Kolbu Bag khat dimset nikhat sunga natu chai ding.
  2. Nilhah le sa sel khat (1 kg) nahin choh ding.
  3. Thing poh khat nahinpoh ding.
  4. Nabuneh na ding (nado) leaf nadei te te nahin kilo ding.

Hichengse nabol doh loule an naneh lou ding, nalunghan leh nabilkol le nanah (ear & nose) ki at lha ding ahi, eitipeh tai.

Hiti chun kavaikon doh tan nilhum keiyin langkon khat’in lou kakaiyin kolbu chu katutan ahile, khojin konin jong akimgei katulut naipoi.

Thing kahol kit le gamgo lah ahin thing ago malah ahing jeng jong akimupon ahi.

Sa sel khat hoija kalah kit ding ham, bunehna ding nado jeng jong ahing mel mel akimu pha kitpon kavai kon doh nikhoa pat gilkel dang chah kathoh-in sum le pai kamudoh khapon mi vohcha them them kavahna ho in vohcha an ho pou kanejin nah nah a hingdoh a hungjam doh tho kahi, hinpoh lut ding malah kahinkho jeng jong kachanlo deh ahi.

Hiti chun aneopen pa chun agentheina thu jeng aseiyin anu le a-Upa mai vengam louvin akap tan ahi.

Chephat chun anu le a-Upa chun alhem lungmong lhonin anu in atohga anakhol khom ho chu kivahnan aneiyun achengkhom tauvin ahi.

Achapa lenjopa chu lekha them tah le mi ching tah ahin nikhat anaopa hetsah louvin anu komin “Henu kanaopa natohna te koma chu ga kholjin ding kahi, itih phat’a kahung kile ding kaseithei poi, kanaopa hi phaten anavephan,” atileh anun “Boi ajole nang jong nanaopa bangin hung genthei khan nate chedatan,” ati.

Hijongle achapa lenjopa chun “Henu neisonglel hih-in, kahung kile tengle ipi kahinto em seipeh nange,” tin avaikon doh tan ahi.

Agache le anaopa abolnao bang bangin anaseipeh uvin, atoh ding ijakai chu aseipeh tauvin ama jong anomin hitichun natong dingin aumtan ahi.

Atohpat masangin Pathen koma taona amangin anaopa toh molso joulou chengse chu tong din aumtan, achaina chun akigel lhahna khat ahung umtai.

Itohna chunga vaihom ho hile atongpa kei hijongleng alunghang aumle abilkol le anah (ear and nose) ki at lha ding ahi,” ti chu ahin geldoh tan, achihna le alungthim mang chan natoh ahinpan tai.

Kolbu bag khat chu apon, langkon khat’in lou akaiyin, chemkon neocha chun lei alaiyin anunga chun uicha khat’in ahinjuiyin ahi.

Chuin lou alhunin kolbu bag khat apoh chu chemkon chun abag to chu atuvangin ahile kolbu chu alongjah chai tai.

Thing go (fire wood) ahol le amujou tapon langkon lou kaina chu aban tan tanin thing poh khat alhing kit tai.

Sa sel khat ahol kit tan ahile amujoulou ding ahetsa ahin anunga hung uicha chu athat’in asa asemin sa jong (kg 1) amu kit tan ahi.

Bunehna ding nado akihol kit angaitan gamgo ahijeh chun na hing akimu joupon inkoma komla (orange leaf) tilou adang umlou ahi.

Hijeh chun alungthim asuto to in komla do tampi alouvin aling ho a chun akilmat mat in lentah asosah tan ahi, alet jeh chun ol ol’in alhep neovin abag a chun akipoh-in nilhah ahung hitan inlam ahinjon tai.

In alhunin inneipan kolbu natuchai hinam?
Gollhangpa: Henge katu chaiye.

Inneipa: Hoiche ham sa sel khat?
Gollhangpa: Hiche ahi tin sa chu apetai.

Inneipa: Hoiche ham thinggo nahin poh.
Gollhangpa: In tol’a kabunglha e.

Inneipa alhaijel’in agavet le langkon ho chu ahitai.

Gollhangpa chun hepu nalung hangem? atile “Ahangpoi,” ati.

Anneh phat ahung hitan inneipan hoiche ham nabuneh na ding na nahin kilo chu!!? atile gollhangpa chun nado ho chu ahinladoh-in akilmat mat’in lhong laiya ahin pha le insung jong chun aket/adol tapon ahi.

Inneipa soh ho chun bu iti athuh vangun nado alet jeh chun adim thei tapon inneipa chu gollhangpa kom chun atao tho tan ahi,

Gollhangpa chun achihna jouse mangchan mihao kiletsahpa chu athunun tan ahi.

Ajing nikhon inneipa chun gollhangpa komin “Boipu, tunile napute kho langa iche ding ahi. Nang jong kanung hin juiyin, kilhon hitin kanung nahinjui ding ahi ati.

Hitichun akigong lhonin ahungpot doh lhontai, inmai lang gate pam aphah lhonin apupa chun gollhangpa jah a “Boipu kakeng chot kahai tai, lhai loiyin lang eigalah peh vah-in,” atileh amajong alhai tai.

In alhunin apinu komin
Gollhangpa: Hepi kapu in nabil teni chu neipen ati e.
Apinu: Ipi ding tia kabil kisan athum ham? Napupa hin mi bilkol jouse atan chaiya tan di amulou phat’a keiya atan kit got hitante, tin abil khat chu atansah-in “Khat lang beh eikoipeh uvo,” atile gollhangpa chun apupa chu agah gal kouvin
“Hepu khat lang bou kahinlah diham?

Apupa: Khat langseh seh chu ipi ding natim? Ani chun hin choi tang.

Chuphat’in apinu bil chu ani in atan lhauvin mi mulou kah chun lupna noiya kengchot chu alan alhai kit tai, lampi kah chun apinu bil chu apaimang pa tai.

Apupan vang athilbol chu ahepha poi, hiti chun apute kholang chu ajon lhonin agalhung lhon tai, aputeu chun phatah-in analem’un an adu du honpeh dingin adongtan ahile

Gollhangpa chun alhunna nu komin
“Hepi, kapu in dal (Hawaii) me bou adu e,”

Apinun jong adu ahile honpeh nange tin Dal chu ahonpeh tai, hitia dal me aneh lhon chu janin apupa chu a-oi ahungna tai.

Apupa: Boipu ka-oi ana e thouvin pam che hite.

Gollhangpa: Hepu thuhkhuh khu thaiyin lang na-eh gatha tan, jingkah matah-in ken gahedoh tange, atile apupan jong vut ho chu athaidoh in eh athah jouvin vut avuh khumin agalum kit tai.

Aniveinan apupa chun
Boipu ka-oi ana e thouvin pam che hite, atikit le

Gollhangpa: Hepu twibel lenpa khu hongin lang eh gatha tan, jingkah matah-in ken gadom khel tange, atile apupan jong agatha kit tai.

Jingkah ahitan apinu ahung thouvin mei ti ding tia vut agah thai le eh akikhoi khah-in, alunghang tan,
Koijong hija thuhkhuh a ehtha, tia akhut sop dinga twibel agah hondoh le twibel jong eh adimset’in dal me ngensen ahiphat chun atupao ahiding ahin gingmo tan ahung kithodoh ding angah tan ahi.

Ahungtho phat’in apinun
Ipi bol’a thuhkhuh le twibel’a eh nathah ham?

Atupa: Hepi katupa hin tha jengin ken hedoh nange atia le kathah ahi.

Min tha in ati mana nathah jeng ham tin muntheh akimat’in del atin ahindel doh tho tai.

Lampia chun gollhangpa chun
Hepu nalung hangem?
Apupa: Ahang poi.

In alhun lhon le ajinu abil teni aumtah lou jeh chun ajinu chu ahaimil tan ahi, akoma ajinu uma akou kou jeng phat’in ajinun hilaiya kiuma ipi dinga nei chuti kou ham? atile phatea avet kitle ajinu ahi ahin hedoh tai.

Chuin ajinu komin nabil… Nabil atileh.
Ajinu: Nachedoh nikhoa khat lang beh neikoipeh-in katile “Khat langseh seh ipi ding natim ani chun hin choiyin,” natia kabil nakipoh a naneh chai phat’a kabil nahol ham? atitan ahi.

Apupa chun angaito le atupa thilbol ahi ding ahetan, lunghang lheh jongle alunghang aumle abil le anah ki at lha ding ahijeh chun alunghang ngampon ahi.

Chuin gollhangpa chun “Hepu nalung hangem?” atile ahang poi ati.

Hichun gollhangpa chun apupa chu aseipeh in hitin ati.
Hepu ven, nang hi midih lou nahi, nakho navenga um jouse pumhat sanin anei agou nachom gamin nangma changseh seh hahaovin nahaove, anei agou nachom peh miho hi nakoma neh kiloa ahung jongleu nabol gimin mihemin ajolou ding natoh hahsa sa napen, alunghang jouse abil le anah natan lhah peh-in, ahivangin nangma haona thil jouse hi nanga aumpon abil le anah natan lhah peh mihoa jeng ahi,”

Tunia hung kikhom miho jouse hi ven, bil le nah beiya nakoiya ngen ahin phat masa a hung kholjin kanaopa jong bil le nah kima ahung kinungle vangin namibolna adihlou dan kamu jeh a phula dinga hungkon kahi, hijongle ken nang bil le nah ka at lha nom poi, na it pen kapinu bil teni bou ka at lha in napona e, tunia mihem asang aja a sima abil le anah natan lhah miho hi nachunga kipah aum nadem?” ati.

Hichun ajinun jong ahousen
“Lamdih louva nathilbol ho sot’a konin ngadoh tan kati jingsa ahi, ahin nabol tei teiyin tun kei bil neilouvin neikoi lo tai, ajotengle kahinkho chan kachan ding ahinalaiye, tunia kona nangah loule ini lhona ihinsot lou ding ahitai,” ati.

Chuin tehsepu jong ahung kisih-in mipi jouse masanga ngaidam athumin anei agou abonchan khen louhel’in pumhat sana anachompeh miho chu ajatnia tamin ale hop peh tai, asohte jong chamlhat apen ajinu toh amani changseh chu lhambuh khat’a vaicha tah-in aumlhon tan ahi.

Chalenao jong neilou ahi lhonin mi jousen akichat le aginpen pa chu ahung kisemthah-in ahaona jouse mivaichate ahoppeh tan masanga an tuitah tah nea lengho anneh bang nepa chu in le lou neilou lhambuh khat maimaiya akhosa tai, hinla ahung kineosah tah jeh chun anabolgimsa mihon akhoto uvin neh le chah ape jingun ahi.

Gollhangpa jong inlanga anule anaopa komin akinungle kit’in thilsoh umchan abonchan aseipeh tan ahi.
Anu chun achapa lenpa komin “Boi lekhasim lou sangin lekhasim hi nasatah-in aphachome,” ti hi kichenin kamudoh-e, ati.

Anaopa chu amin jeng jong kisut theilou ahin ulsa longa natoh tilou amadin bolthei aum tapon anu le a-Upa thu ana ngailou akisih-in akap kap tan ahi.

Meithainu chapa lenjopa chu lekhathem tah ahibanin michingtah le atohna jousea kitah ahijeh chun Mijouse ngailut le homtho achangin aman jong alekhasim naa konin tohmun thupitah ahin kimutan ahi.

Atohnaa sumsan jong tampi pi ahin neidoh tan ahung minthang cheh cheh-in mijouse gin le jaumin apangtan ahi, aman jong muntina vaicha genthei ho akhoton anu le anaopa jong sum athot jingin ahile anaopa chu lekhasim lou ahichu akisih cheh cheh jin hinla amadin phat jouse anagei sang mantan ahi.

Hijeh chun bolthei dang ima kanei tapon anaumna inneiteni tehsepi le tehsepu chu umpi ingting vah tange tin akigel lhan api le apu jong akisemthah nung ahitah jeh chun aga kipuiyin nulepa bangin akivah tan ahi.

Meithainu jong achapa lenpa toh gentheina jouse nungsunin nomtah-in achengkhom tan, achapa neopa le api le apu jong sumle pai athot ji lhonin hitichun chihna lungthim kivop hatpa vangin abon chauvin nom asakhom thei tauvin ahi.

(- MORAL -)

Meithainu hinkhoa konin:- Meithai hijongle Pathen tahsana Pathen bel jing chule chate dia kitahna neiya hinkho manga atohna jousea kitah hijing chun nikhat le atoh phatga akisan teijie.

Achapa lenjopa hinkhoa konin:- Nulepa thu ngaiya ibol itohna jousea gunchu tah le kitahna neitah a gentheina ho gelkhoh louva toh hin nikhat le lolhinna ga lentah eisosah theiye.

Achapa neopa hinkhoa konin:- Nulepa thua nunglou agentheiye, gentheina thoh ding nomlouva nopsahna hol kiti hi gentheina chunga aga jong gentheina ma ahi nomji.

Chule chihna thepna sanga sum ngailutna kilhenjoh hi khonunga kisihna le da na ahungsohji e, aphatcha chihna joh kilhen ding ahi.

(Chihna thepna kiti hi sum le paiya choh thei ahipoi)

Tehsepu hinkhoa konin:- Alam louva haona le minthanna kihol kiti hi insung ding le eima hinkho dinga lamvaina lenpen ahi.

Mi jouse toh chan kibanga neikhom thei kalval’a pha aumpoi, jou le nal’a kilamdoh gou chu apungthei poi, mikhat ibolna chu nikho khat le eima chunga ahung kile teijie.

Lekhasim lou sangin lekhasim hi gamchengin aphachomjoi, lekhasim thei nahi pet’in thase hih-in, ajole kisihnan nahinlo dim khante, nakisih nikho le phat hoilai jouse ana kile ding ding ahitai.

Thusim chomcha lunggel suhtoa kahinjih hi ngeijou hih jongle abul’a pat hin simchai jouse chungin kakipah-e! Asim jouse Pathenin phatthei naboh cheh-u hen.

Asim maiya sim louva kihilna khatbeh ineidiu kadeisah e!

©️Copyright Naocy Haokip 24.02.2021

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un. Nahon teng u le Homescreen a add un kiti aum le allow ana bol un thusimbu apps na phone a hung um ding hichu offline a jong simthei ji ahi.

Previous article“SANGGA’MON” KA HINKHO KIKHELNA-III
Next articleBOIKIT TAPONGE