Home Lahkhom MASANGLAI KUKITE CHONNA

MASANGLAI KUKITE CHONNA

24
0

-Haopu Changsan

A. KICHEN DAN HO:
(i) Chongmou hailam: Hiche hi athupi pen ahi. Hiche hi Haosa len ho le u-pa ten bou anabolin ahi akiti e. Haosat man le neijou mana kibolthei ahipoi. Chongmou kiti chu achongjou te chanu kipui tina ahin, hailam kiti chu “sathao um” tina ahi.
Hetbai dingin loupi tah le lultah a kipui tina ahibouve.

MOU KIPUI NILEH-

a) Bontol kho a, bon kinu a kibon diu, jinte ahat le aphai akitin, inneite lam ahat leh aphapoi akiti e.
b) Lom kivah, nulam kivah, lompi lomlhang kivah kibol ahi.
c) Sapum jon, sahap jon, sakong jon akiboljin ahi.
d) Mounu chu anih gopi keh-a kikil peh a aveilama ponve akive ding.
e) Apot teng aveilama Sangkil akal lhah ding, alut lamteng ajet lama Sangkil akal lhah ding ahi akiti e.

ii. Sahap lema kipui(sahap sat): Hiche hi kipuina nemjep ahi. Sapum jon, Sakong jon, mounu nih gopi keh-a kil, hicheng hi kibollou ding ahi.(chunga point i. c,d,e kibollou ding, adangse- kibot, lom kivah, nulam kivah ho vang bolthei ahi).

iii. JOLLHAH A KICHEN:
Nu le pate kiheto a guhthim’a kipuitona hi Jollhah a kichen akiti.

iv. SAINA PO:
a) Kijam, kigai, kiguh tho ho hi kicham chen akiti e.
b) Pasal’n numei agaija akipui lou leh sel khat a leu ding, salam asat ding ahi.
c) Pasal’n numei agaija anu jong acha jong alah lou le, acha chu numeite chang ding,ami-a akisem ding ahi.
d) Pasal’n nungah agaija, anumeinu akipui/kichen ding ada-hel leh anumeiten jollei jon man aseithei louding, numeinu da a kisei ding ahi. Kicham chen ho chunga dan mong mong aumpoi. kihou dan’in apoh ahi.
e) Nungah khat pasal tamtah in ajonpi a agai tah le anunung pen pen chang ding ahi.

B. MOU KIJON DAN-
Malai pi le pu ten Mou ahol tengule aneinu/pute chanu ahol jiuve. Neinu neilouten bou midang ahol jiuve. Mou dingnu amuteng khaokhi na in khichong/khival a o-peh in kakhao khi nahi atijiuve. Mi khao khisa midangin akipui leh apuimangpa chu sel khat a leu ding ahi.

C. SUMTAN SA-
Sumtan sa kiti chu mou kithum chu apeh tengule numeiten aboljiu ahi. Numeiten vohcha atha a man le mol aseijiuva thukhamna anei ding ahi. Pasalten apalkeh le selpi khat a leu ding, sa kithat jong chu ale diu ahi. Hichu selkhao sattan man ahi. Numeiten apalkeh leh sel khat a leu ding ahi.

D. NUMEI MAN KILAH DAN-
Man kilah dan hi atam’in, alhangpi pen chu hiti ahi:
i) Sel som manloi, Sel sagi manloi, sel sagi sanga lhom jong aume. Chule Khichong, Khichang, Dahpi, Dahbu chule pondum ponlhe kiseitha jong aume.
ii) Sel somthum kiti hi man mong mong hilou, custom in ahoplou ahi. Kideichomna le kithupisahna ahibouvin, abang aki-eng bolna ahibouve.
iii) Naopa sumsan kiti hi aneopenpa bou kila ahi. Ajineinu naopa tina ahi.
iv) Numei man hi adamsungin akichai ngaipoi. Damlou sel, sel khat kikoi teiji ahi.
v) Numei nungkih aman sel khat lhading.

E. MANKANG KILAH DAN-
Mankang hi manpi lah a kona kiladoh a sel khat hi jol le gol dei, be le gol kipe a kisan sahji ahi. Chule naote lah a alhumpen kisansahloi jong aume. Mankang sangpa hin khatvei sahap akipohsah ding ahi.

F. SAHAP SATNA CHANU MOUVA KILHAH DOHNA A CHONNA-
a) Mou sapang akibolji e.
b) Indel chan khat akikoijin ahi.
c) Sa sa: Gamkonte tuchapa le Bechapa chule inneite langa Becha aninapa, amaho thum ankonga chu tou diu ahi. Bechapan Manthu- akikhum jat, abat jat u aseilhah ding ahi.
d) Sa sa kibol hi man chung changa kihahsel/kitepna a kibol ahin, ahetoh dinga Haosa upa ho kipansah a ahi.
e) Chanu akilhadoh dingnu chun nulam akhop a, nulam sa anehkhompi ahi. Anulam hon jong thil akichin thei ding aken peh jiuve.
f) Sumken selken: Sumken kiti hi asum monga hilouva Ju pemo Va pemo kiti khat, Bel hijongle akikenpeh e. Sel(selpi nucha) alut lou leh selken akibol poi.
g) Sahap khu kiti hi pondum ponlhe athah himong hih jongle alui jong akimang theije Sa selna(tuchapun sahap apoh selna) a kimang ahibouve. Hiche sa selna ponkhu chu tuchapa, sahap popa changji a ahi.
h) Sahap pohna a kimang ho chu a innei ten alelah ngailou ahi.
i) Sahap pohna pon chu khangthah in akivon/akisil ngailou ahi.
j) Sahap kenga chun sachan khat akikhitbeh in, salap khat jong akisemtha in ahi.

G. SAHAP KIPOHNA A CHONNA-
a) Tucha samal jetlam akipei.
b) Sahap chu akihon min tengle hal thum, hal li a sachan na kithil ahi. Sa kihonna twi a chu atwi noi kihonna, satwi noi le sachan chu nupi upa ho le lhacha ho kinehsahji a ahi. Hichea hin chapang akihop jipoi.
c) Insung lhacha ho ahung theilou aum le sachan akithahjin ahi.
d) Sahap a hin ahoi akilan, jol le gol akipen, chule haosa jong akipen, indel khat akikoijin, amei pupen chu Bebulpa a ahi.
e) Abanhin Inlut,mankhum le naopuo akop jiuvin ahi.
f) Inlut hihen naopui hijongle ache jat jat chu kimkeija ahung kipatdoh nauva lhung soh hel jiuva ahi. Ache nau sul chu ale pal kit jiu ahi.
g) Thi nunga mankhum aumleh Sahap hi umtheilou ahi. ajeh chu Sahap po di nu umlouva ahitai.
Hilchet-
Mou sahap kipohni a Samal jetlam kipeh lona chu, tuchapu hi Naonung del ahin, chule mipi nung dal jong ahina a samal jetlam kipeji ahi

H. U-NU DALHAH MAN-
U-nu dalhah man hi, numei aneojo hon a U-nu sanga ji anei masah le kila ahi. Ajineinu chunga numei ni le thum jinei loulai ana um jongle alenpennu dalhah man bou kila ahi. U-nu dalhah man chu Khichang khat a alhep ding, Khivuija chu a U-nu mitlhi atheh ding ahi. U-nu dalhah man sel khat kiti hi ki-engbolna, sel val ahi bouve.

I. SUL LE-
Sul le kiti chu dan thenga, chongmouva kipui ho sul le na ahi. Inlut akiti poi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleTULAI SOCIAL MEDIA THUSEI DOH ATAM JO HO KHU CYNICAL NGEN A HIO VIN AHI.
Next articleKAKINEPNA JOUSE ABEI NUNGIN-II

LEAVE A REPLY

Please enter your comment!
Please enter your name here