Home Crosby Haokip MARAM NUNGAHNU

MARAM NUNGAHNU

38
0

Published by Thusimbu




Crosby Haokip
Convenor KWC


MARAM NUNGAHNU THUSIM

EPISODE 1

Kuki Love Story

Gollhang chapang cha hijong leng kalung sunga nungah hel nomna lunggel kahin nei tan ahi. Insunga chapa changkhat she kahi jehin alung deilou lama kachon khah ding kanu adip dam lheh jenge, hijeh chun niseh leh kahinkho man ding dan eihil jinge. Hung gollhang kahi tah jehin ka-nungah hel kanun ahinja pan tan, niseh le eidong dong jengin, ahinla dihtaha kakilungset pi aum nailou jehin kaseinom jipon ahi. Kachenna kho Kangpokpi District Headquarter kon’in kaloiho toh Senapati Bazaar a von chon kache jiuvin, chuleh nungah hoi touna muna chun amanu vetnom na jalin thil chon kache jiuve. Chuleh asunga tou nungah ho katot jiuvin kaloi abangin ahel jiuvin ahi. Hiti chun Naga-Maram numei helin kache jiuvin ahi.

Naga numei ho chu alhangpin Maram jatmi ngen ahiuvin, amel u ahoiyin, akam them un, mi minsah dan aheuve. Chuleh alhangpia English le meilhei paovin kakihouvun ahi. Eimi ho toh akibah louna khat u chu amitin in English atho theiyun; nunao chapang toh English paovin akikihou theiye. Chuleh auto, bus driver chuleh Senapati-Maram kikah a lhai Tata Sumo driver hon jong English hoitahin atho theiyuve.

Nikhat kaloiho toh von cho dingin Senapati Bazaar a kache tauvin ahi. Kalhun un kamadon cheh uvin von kave tauvin kakikhen thang tauve. Chuin von kijohna mun lah’a kavah len ahileh munkhat’a nungah khangdong melhoi tah hi anatouvin, amel hoi kasah val jeh chun kalut in von ho kave tan ahi. Chuin amanu jong ahung ding dohin kajah a, “Bro, the price is 500 only. You can come in and look,” atin, a-aw nem dan le angei dan chu nervous nan kadim jeng tan ahi. Chuin kenjong sum kapen kakilah tai. Von kachoh jong chu kadei lheh jenge. Chuin kenjong nungahnu kadongin ajah a, “Sister, where are you from?” katileh aman kajah a, “I am from Maram?” tin eidonbut in, Maram nungah ahi ding chu kahe pai tan, chuin aman jong eihin dongin kajah a, “Then, bro you?” atin, chuin kadonbut in ajah a, “I am from Kangpokpi,” katileh eihin daiyin, “That mean you are Kuki,” atin, chuin tho mo sa san eipao ahin thon aseiyin, “Namin ipi ham?” atin, nui pum pumin, “Kamin Lenboi ahiye,” katileh me heu chan aseiyin, “It’s a sweet name?” atin, chuin kenjong kipahtahin ajah a, “Thank-you,” katin kanuiyin, chutah chun kaloihon eihung holdoh un eidaiyun, nungahnu lhalel tahin kakile tauve.

Nungahnu mel kamu nia pat chun kalung laiya acham jing tan, janseh le kagel khovah vah tan ahi. Amin kadoh hei chu kada lheh jengin, amin ipi ahiding kahet lou jeh chun amin kasem thun Jaria kasah tan ahi. Kamang sehleh kamu jin, nomtahin hinkho kamang khom ji lhone. Amanu jalin Senapati che kathanom doh tan, ama jeng kagel gel tan ahi. Amonga jong jat dang numei kanadeilou ahin, tun vang Jaria kasahnu kamu nia pat’in Maram nungah melhoi dan kahin hedoh tan ahi.

Amelhoi kasah val jehin kamu nomin nikhat kachangin Senapati Bazaar kajon kit tan ahi. Ahinla kalhunin ama anaum tapon, akhelin nungah dang anatou tan, chuin asunga tounu kadongin ahile amanjong a-phone no eihin pe tan ahi. A-phone no eipeh chu apat pat’in ka-call peiyin ahile, amanjong ahinla pai ngalin, chuin kenjong amanu jah a, “Hi Sis. I am Lenboi, whom you met at the store before,” katileh kipahtahin eihin donbutin kajah a, “Hello bro! How are you?” ahintin, chuin kadonbut in, “I am fine. Could you please tell me your good name?” tia kadoh leh amanjong kipahtahin eihin seipeh in, “My name is Jariana,” atin ahileh keiman amin kasem peh toh akilou chet in kati aja lheh jenge.

Hiche nia pat chun kahung kihou jing lhon tan ahi. Kalungset na ka-im jou tah lou jehin nikhat kajol tan ahi. Chuin kenjong alungthim lah nan kaseiyin,
KEIMA: “Sis, have you ever been in love with someone.”
JARIANA: “No bro, I hate love.”
KEIMA: “Why do you hate love?”
JARIANA: “Because, till now I have never been come across about true love. Love
is liar.”
KEIMA: “Sis, you might have had mistaken since everyone is different.”
JARIANA: “Different? I can’t believe you. I hate love story,” atin, athusei dan chu lungsetna lama alungthim kehsa ahiding chu kahe tan ahi. Chuin ajah a kalungsetna kaseiyin,
KEIMA: “Jaria, someone may treat you badly by acting as true love. But I love you and my love is a true love,” katileh anom pon, chuin eipaovin eihin donbutin kajah a,
JARIANA: “Heu, dongma nei talou dinga kigellha kahitai. Ajeh chu khatvei jinei sa kahitan, lungset lhem jehin gentheina tampi kato lo tai,” atin, eipao atho jeng chu kalung adongin, chuin kadong paiyin,
KEIMA: “Keiho pao nahet ham?” katile kajah a,
JARIANA: “Kaphung kachang Maram ahibouve. Chuleh Kuki pao jong kahei. Chule kapute chu Kuki ahi. Chomkhat Maram a kana jineiyin, kalhunna ten eidei loujeh leh kajipan eilungset tah lou jeha kakinungle a chomkhat kaloiho von johna muna na katoh mai mai ahiye,” atin, ahinkho thusim chu kaponan chuin kaseiyin,
KEIMA: “Nao, chutia lungthim kehsa hijongle chun kahin nol deh poi. Nalungthim kena laitah chu keiman khuibit ing ting, nom tahin hinkho naman khompi nange.”
JARIANA: “Heu, neikhoto jehin kakipah-e. Hijongle kei jinei sa toh nakichen sangin nungah dang dang joh kihol in, kenvang kagel theipoi.”
KEIMA: “Jinei sa kahi tin, kisonglel hih in,” katin anop theina dingin akoma keijong jinei san kakiseiyin, “Keijong jinei sa kahibouve. Nagentheina banga keijong anagenthei kahin, nalunggel ding dan kahe soh keiye,” katin, chuin amajong akap tai. Chuin kajah a aseiyin,
JARIANA: “Heu, tujan hung kingaito inge o,” atin janin nomtahin ka-ihmu tan ahi.



EPISODE-2

Kuki Love Story

Ajinga pat’in a-phone no ache tapon kalung anommo lheh jenge. Ijatvei ka-call vangin ache thei deh pon, lhaset le lunghan kakop tai. Eilungset hih jongle hoitahin eihin seipeh jengle pha dinga, tua athip mang kei kagelle kapona lheh jenge. Eimi ahilou vangin kalungsetna asang cheh cheh jeng tan, hoitaha kihoupi ding kanom lheh jenge. Hijeh chun nikhat Senapati Bazaar a kache kitin masanga anatou numei nu chu kaga dong kittai. Chuin a-phone no thah khat eihin pen, chuin kenjong apat pat’in ka-call tan ahi. Chuin ahin lan, kenjong kaseipaiyin,
KEIMA: “Jaria, hoiya naum hitam?” katileh eihin donbutin kajah a,
JARIANA: “Heu, ina kaume. Akidang tave! Hoilanga kona ka-number nahin kilah ham?” atin, kalung ahan jehin ajah a,
KEIMA: “Hoilai muna jam jongle chun kaholdoh mo nahipoi. Ibola masanga kathudoh donbut louva na-number nakhel jeng ham?”
JARIANA: “Heu, kenjong kahin houpi nom lheh e. Ka-phone kakimansah jeha na-number kanei tah hih a le kahin contact thei lou nahiye. Lunghang hih o.”
KEIMA: “Tun seiyo, masanga kathudoh chu. Nanop lou leh ikinung hou tah lou ding ahi.”
JARIANA: “Heu, kei Kuki bon kihilouva, eini kilungset lheh jongle hen inu ipa ten phal lou dinga.”
KEIMA: “Lungset nan jat le nam akhen poi. Ken kalungset chu kainkoten jong adeiyu ahijenge.”
JARIANA: “Heu, kanom theipoi. Kei kainkoten ka-u te khattoh eikichen sah got-u ahibouve,” atin, anom mong mong tapon kapona lheh jenge.

Amala kalungset lheh jengin, kakingai nai lhon lou vangin kangai lheh jengin, kaum thim thei tapon ahi. Chuin eilhahin kajah a, “Heu, neingaidam o. Chuti lou hile kagelmo poi. Ipi pi hile kainkote thu kangai angaiye,” atin eilhah tan ahi. Chuphatin apul kadouvin kagenthei lheh jeng tan ahi. Nungah dang kahel vangin apha chom pon, ijat toh kakingai vangin Maram nungah nu bou kalunga aum jing tan ahi. Houpi lou ding kati vangin kalungsetna asan jeh chun WhatsApp a message kathot jingin, kaki-text jing lhone. Lungsetna thu kasei tengle angainom jipon, eihou ji tapon ahi. Hijeh chun phat sottah pi loile paiyin kaum lhonin, loile paiya kaum mai mai lhonin jong ichan ham in kalung among lheh jenge. Kilungset pi tei ding ngaito nan lungthim jat jat kakeng in, lungsetna thu neo neovin kahoulim jin ahi. Hijongle tah tah ding kati tengle anom ji pon, alung hang ji e. Amavang aphan ichanin lunghang jongle mi houpi louvin aumpoi. Alunghan tengle kajol lungdam kit jin niseh in kakihou jing lhonin ahi. Chuleh kimuto pi dingin kajol tan, kimuto ding vang chu amajong anome. Ahinla kimuto tah tah ding kati kit tengle aboidan aseikit jin ahi.

Hapta thum jouvin nikhat kanao nu Don Bosco College, Maram a kai chu sumle pai avat jehin avil dingin kagache tan ahi. Senapati Bazaar a masanga Jariana toh kakimuto na muna a kaga chen asunga tounu koma Jariana kalungset dan kaseiyin, chuin Tata Sumo in Maram kajon tan ahi. Senapati a pat Maram chan chu 22Km vel a gamla ahin pungkal khat val alut jouve. Gari a katoudoh-in Maram kajon tan ahi. Chuin lamkim kapha na laiyuvin kamasang uva gari accident khat anaumin; chuin kakinga-uvin koiham, tin amun kadel cheh tauve. Kaven ahileh kalungset Maram nungahnu, Jariana chu ahitan, chuphatin avela umho jah a chun kanao ahi, tin kaseiyin apat pat’in Senapati Hospital khat kalhut tan ahi.

Aman vang kho ahe tapon, anat thoh lel puma atao chu ahin, kalungset lheh jenge. Sumle pai ima jong kanei pon kanao nu ding sum kapoh chu Jariana jennan kamang cha tan ahi. Nithum sungin kaum pin, alu akiha suh khah jehin amit a pat chung lam alu langse bandage in atom un ahi. Anithum lhin nin koima vethei hih jongle anu le pa aholin akou kou tan ahi. Koima dangin eiumpi lhon lou jehin ahahsa lheh jenge. Amaho paovin thu aseiyin ahinla ken kahe theipon ahi. Chuin kakoma nupi khat ahungin kajah a, “She wanted to know who is looking after her,” atin, athu umdan amanu koma chun kasei tan ahi. Chujouvin ainkote ahungun kanaboipi chu akipah lheh jeng uve. Anu le pan kakoma kipathu asei lhonin ahi. Chuin Jariana in amaho paovin anu le pa koma aseiyin, “Henu, koiyin eihin vetsui ham?” atin, chuin anun eihin ven eihet lou jeh chun, kenjong ajah a, “Masanga na-classmate ho khat ahiye,” tipeh in katin, chuin Jariana in anu jah a, “Henu, amel kamu nome. Ole ka-u Lenboi ham?” atin, ahinla kakihetsah nom pon kalep tan ahi.

Chujouvin kainlang uva kakile tan, in lhuna kanu le kapa toh kimuto ding chu kakicha lheh jeng tai. Ajeh chu genthei taha kanao thot dia sum ahol lhon Maram nungahnu jenna a kajahchai tah jeha eihouset lhon ding chu kahe tan ahi. In kilhunin kapan eina houvin kajah a, “Lenboi, nahung sot tave. Sum chu nanao nagapeh hinam?” tin eihin dongin seidoh ding chu kati aja lheh jenge. Chuin kaseiyin, “Hepa, kache leh lamkim a accident anaumin, chua chun nungah khat akisu khan thi dinga aum phatin kapoh sum jouse chu ama jennan kahin mang chai tai,” katileh alung hang valin molkhat ahin kilah in eivei tan ahi. Chuin kalha ase valin insunga konin kajam dohin ahile kanun einung kouvin, ahinla kinungle louvin Imphal langa kache tan ahi. Hiti chun Maram nungahnu kalungset jehin kainkote toh kakinah lon kakikhen tauve. Ajenna mai meaiya sum kasuh lut jong lung hang uva kingai lhon leng kainkoten eithadoh jeng mai theiyu ahi. Lhase tahin Checkon’a kaloiho koma kaum tan ahi. Kainkoten phone eihin bol bol jeng jenguvin kalha asen ka-sim kakhel in number chom kachoi tan ahi. Moh um sangin katin Sangai hotel, Nagamapal a natohna mun kakiholin katong tan ahi.

Katohna mun chu restaurant ahin server in kapang tai. Aphat phatleh Maram nungahnu kangaiyin, kainkote jong kangai lheh jenge. Maram nungahnu phone bol ding kati jongle achunga kalhaset jehin kakihetsah nom pon, hiti chun lhathum lang koima toh kihou louvin kaum tan ahi.
Kanu le kapan eihol thusoh jong kaja jingin, ahinla kakihetsah poi. Katoh khompi hon jong kathu ahepha pouvin ahi.



EPISODE-3

Kuki Love Story

Nikhat kakitim jou tah lou jehin Maram nungahnu ka-text in ajah a,
KEIMA: “Jaria, ipi nabol hitam?”
JARIANA: “Imphal kache got-u ahiye. Nang koi?”
KEIMA: “Thangboi kahiye. Masanga na-classmate ho kahiye,” katin kamin le kakhomin kalep tan ahi.
JARIANA: “Heu, garia ka-accident a hospital a eipui pa chu nahi ham?” atin, kenjong kaseiyin,
KEIMA: “Henge, kei kahiye,” katileh akipah valin chuin kajah a,
JARIANA: “Heu, kakipah vale. Nang umlou hile chun kadam joulou ding anahi,” atin, chuin kadaiyin,
KEIMA: “Hospital a kahin puiya chu namel hoi kasah dan,” katileh anuiyin,

JARIANA: “Kakipah-e heu,” atin niseh leh kakihou lhon tan ahi. Chuleh kilungsetna thua jong kalut ji lhonin, aman jong eilungset ahi kahe tan ahi. Ahinla mi kitah ahi ahilou kahet nom jehin kakihetsah nom pon kilungset tobangin kakihoulim jing lhon tan ahi.

Nikhat phone eihin bolin kajah a, “Heu, hoiya naum ham? Ipi nabol ham?” tin eidongin, chuin kenjong ajah a, “Nao, Checkon’a kaumin, Sangai hotel, Nagamapal a na katonge,” katin, chuin ahung nom dan aseiyin, “Heu, tunile kanu le kapa toh kihuilha a kahung diu ahiye,” atin, ahung diu jehin kalim le kamel kakhel loiyin mel chomin kakilep tan ahi. Sunin customer ho ahung uve, akitin customer ho serve dingin eisol tauvin ahi. Asunga kalut le Jariana kamun kapona lheh jengin guhthimin kakap tai. Chuin order lekha kagapen ahile ka-phone ahung gingin ahile Jariana in hoitahin eihinve tai. Chuin kajah a, “Heu, nang nahi ham Thangboi chu,” atin, ahinla adonbut ding dan kahe tapon ahi. Chuin polanga kapotdoh in kamel kakhelna jouse kala dohin kakap tan ahi.

Chuin kanung langa pat’in, “Heu,” eihung kitin kakiheiyin ahile Jariana in eihin mu chun kidang asa valin mitlhi long leovin tija tahin eive tan ahi. Chomkhat pi aham poh jo sang um louvin thip chet in kakiveto lhonin, chuin Jaria ahung nuiyin kajah a, “Bro, nice to meet you again,” atin, English paovin ngeitah in ahin seiyin, chuin kenjong ajah a, “Napao kitho in,” katin kadaiyin ahile anuiyin kajah a, “Kapao katho leh nangin hethem talou ding chu,” atin, chuin kenjong kadaiyin ajah a, “Thadou pao chu napao ahiye,” katileh kiphat lamtahin kajah a, “Heu, MARAM NUNGAH NU hi nadei mong mong hinam?” atin, kenjong ajah a kaseiyin, “Maram nungah nu kalungset ahipon, nitin a eikipasah kakoma lanu khat ding hi kalungset ahijoi,” katileh anuiyin, chuin amanjong kajah a, “Heu, kenvang kahin munom poi,” atin anuiyin, chuin kakinuh sahin kapot tan ahile kajah a, “Heu, potdoh naihih tang o,” atin anuiyin, chuin kenjong order nehthei kachoiyin Jaria inkote masanga kagalui peh tan ahi.

Chuin Jaria jong ahung touvin kajah a, “Heu, nang jong hung touvo?” atin ahile, ainkoten hoitahin aveuvin, chuin Jaria in anule pa koma amaho paovin aseiyin, “Henu, koiham hoitahin velhon tang o,” atin, chuin anule pa ahung kiheiyin eivelhonin ahile kei kahi eihe doh lhon tai.



EPISODE 4

Kuki Love Story

Chujouvin Jaria in a-phone no thah khat eihin pe kit in ahile kadaiyin, “Phone no nanakhel man kit hitam?” katin amajong anuiyin kajah a, “Heu, tukal khel kit taponge,” atin amaho jong ache tauve. Chujouvin toh thei thei kakitohin ka-on phatin nomin kakichol tan ahi. Chuin WhatsApp kalut paiyin ahile, Jaria status kamu paiyin, a-status a hitin asunin, “Today, I have meet my new Heart, who replace a broken heart,” atin, chuin comment kabol paiyin, “Oh! That’s a sweet memory. I wish I could be that memory,” katin ahile smiley eihin thot in kajah a, “Bro, thank-you for your kindness. I might be lost if you were not there for me,” atin chuin kadaiyin, “Hey! Sweet heart , napao kithon,” katile nuina smiley eihin thot in kajah a, “Heu, tunia pat’in Kuki Nungah nu hi tange,” atin kipahtahin ajah a, “Kalungset na hi neisan peh louleh hithei pon nate,” katin kadaiyin, chuin phone eihin bolin kajah a,
JARIANA: “Heu, lungset kahin chan lou thei nahi tapoi. Ajeh chu nangin neihuh doh ahin, hiche nia chu kadongmapa tahin einungsun ahiye,” atin amitlhi along tan ahi. Chuin kalhamon in ajah a,
KEIMA: “Nao, lhase hih’in. Mihemin aselam chu ithet bola, apha chu ikolchah joh leh hamphatna kichang ahiye. Kenvang nalhaset sah him him ponge.”
JARIANA: “Heu, hichan a neilungset na hethem louva kanasuh gentheina ho abonin ngaidam kahin thume.”
KEIMA: “Ngaidam thum angaipoi. Namona aumpoi. Kilungset hinkho hoitaha iman khom lhon ding bou kanome.”
JARIANA: “Heu, kahin lungset e. Kalungset na hi kalai cha geiyin hejing nange,” atin, lungset thimthu mim bangin kakihom lhonin, khenna thu seilouva kilungset hinkho mang khom dingin kakitem lhon tan ahi.

Nikhat kimuto dingin kakitem lhonin Eco Park kajon lhon tan ahi. Kalhunin anaum naipon kangah lel lheh jenge. Chuin sottah jouvin ahung chu kamu tan gal’a pat a kavet jengin jong atahsa poh kadei lheh jenge. Ahung lhunin kiphat lam tahin kajah a aseiyin, “Heu, neinanga lel a?”atin, chuin kale daiyin, “Bus nga sangin anop jep nai,” katile ka-op ahinson in kajah a, “Heu, nang vang napha vale. Keila kakiphat lam dan chu,” atin, chuin hamhing chung a nom tahin katou khom lhonin kakihou lim lhonin ahi. Chuin Jaria jah a kaseiyin kadongin,
KEIMA: “Jaria, keiho pao iti nahet ham?”
JARIANA: “Heu, keiho Maram kahi vangun kanu khu nangho jat mi ahiye.
Ka-insung uva jong kah lah leh Thadou pao kamang jiuve.”
KEIMA: “School nakai talou ham?”
JARIANA: “Heu, school kanakai nop laitah a kanajinei khah ahi. Ahinla kavangset lo tai.”
KEIMA: “Nao, lhase hih’in. Mihem koima alhing jou aki-um poi.”
JARIANA: “Heu, nangla ichan nasim ham?”
KEIMA: “BA kachaiyin aban kajop tapoi. Hitia tohna neo cha cha kakihola insung kavet ahiye.”
JARIANA: “Heu, nang jong jinei sa nahi tam?”
KEIMA: “Henge, kana jineiye. Nang’a tobang hinkho kanato ahi. Hijeh-a chu kahin lungset chom chom nahiye,” katin jinei naihih jong leng kakoma akiphat lamna lou dingin jinei san kakiseiyin ahi.
JARIANA: “Heu, midang hile chun, jinei sa ho pou, eiti ding ahin, nangin vang neilungset jehin kakipah-e,” atin, chujouvin compound sunga nom tahin kavah khom lhonin ahi.

Kakile lamin kain uva che pa ding kanom lhehin, ahinla kainkote chunga lhasetna kanei jehin katha ase tan ahi. Kainkote toh kakinah Jaria koma kaseinom pon kichehin Imphal kajon tan ahi. Kahinkho che dan kagelle lhasetnan kadimin, chuin ka-status a hitin kajih in, “Hitia hinkho man sangin khulsin chan ding kanom jotai,” tin ka-upload tan ahi. Chuin Jaria in eihin text peiyin kajah a, “Heu, ipi boina nanei ham?” atin, chuin kenjong thil umdan jouse kaseidoh tan ahi. Aman jong nommo asa lheh jenge. Chuin kiphat lam tahin kajah a, “Heu, neingaidam o. Kei jeha hichan geiya gentheina nato lo ahitan, kakiphat lam lheh jenge,” atin, ahinla kalhamonin, amajong kalhamonna thuchenga konin akipah lheh jenge.

Kilung hang hen lang kilhase lheh jongleh, kanu le kapa chu kanol thei lou ahi jehin, kanu le kapa koma che dingin kakigellha tan ahi. Kalhunin kanu anaumin eimu mu chun alhisohin kajah a, “Boi, lhase lheh jongle chun idinga nanu kei neidalhah ham?” atin kanu thusei chun kalung sung asuna lheh jenge. Chuin kanu koma, “Henu, neingaidam o. Kenjong kahin ngaiye. Kahin ngai jeha tua hi kahung ahiye,” katin, kanun kajah a, “Boi, ipi pi hileh napa koma ngaidam thum phot-in, napa alung lhai pouleh nadei deiyin um thei nan nate,” atin, kanun sei bangin kachen kapa jaha ngaidam kathumin kaseiyin, “Hepa, neingaidam o. Tukal nathun nung tange,” katin, chuin kapan anne dingin eisol tan ahi. Hiti chun kanu le kapa koma kaum tan; kanu le kapa koma kaum Jaria kaseipeh leh amajong akipah lheh jenge.



EPISODE 5

Kuki Love Story

Nikhat kapu koma kache leh eihin daiyin kajah a, “Alen, nang ding nungah khat hol taute,” atin, chuin kenjong kale totin ajah a, “Hepu, itobang nungah nadei ham mo?” katileh aman kajah a, “Kipgen chanu kadeiye. Haipi a khun Kipgen numei aumin amaho ho khu nakivet tei ding ahiye,” atin, kapun jong kakoma numei lama alunggel aseiyin ahi. Kapu thusei le tule tua keima dinmun akikhe del jengin lungdonnan kadim tan ahi. Kenla Maram nungah nu kalungset cheh cheh tan; kakingai lhon kainkoten heleu ajahda diu chu kahe tan ahi. Kanu le kapa koma kaseingam lou jeh chun nikhat kapu koma kaseiyin, “Hepu, nanghon numei Kuki chanu nadeiyuvin, keivang tule tun Maram nungah khat toh kakingai lhone,” katileh lung dong tahin eiven kajah a, “Tupa, jat dang numei toh nakichen leh pha ding hinam mo?” atin, chuin kenjong ajah a, “Hepu, eimi numei sangin Maram numei ho hi alung thengun, akineosah jouve. Koijat hijongleh Pathen sem cheh ihiuvin, jat le namin khentum neipou hite,” katin kapu kahil jo tan ahi. Chuin aman kajah a, “Alen, nasei chu adih in apha nai. Aphat pat leh aphanan, amavang ahung boi tengleh custom kibang lou ahijehin thule la sei ahah e. Ijat numei ikilhen chu apha pen e,” atin, ahinla kapu thusei chu kagel thei him him pon ajah a, “Hepu, kakilungset lhon pouleh aphat phatna um nan te,” katin, ahinla kapun ima aseibe tapon ahi. Ahinla kathusei chu kapun kanu le kapa koma anasei doh tan boina sang tah kahin nei tan ahi.

Jingkah khat an kaneh laiyun kapan eihin houvin kajah a, “Lenboi, napun nang chu Maram numei khattoh akingaiye, atin atah tah ham?” atin eihin dongin, chuin kapa koma kasei jengin, “Henge hepa, kakingai lhone. Amavang mipha ahin, eimi numei ho toh tethei ahipoi,” katileh alung hang tan, chuin eihousen, “Nama don dona nava a khu che Naga numei ho poutoh nahung kingai ham! Hinjom sot tang, in a nahung lut thei lou ding ahi,” atin eigih tan, chuin kapa koma kaseiyin, “Pathen thilsem khat kihiya ibola jat le nam a mi kithet ding ham? Eimi numei ho sanga amaho jat mi gamchenga phajo le hoijo ahi,” katin, chuin kapan eikohin, lung hang tahin eigih in, “Jat dang numei toh nahung kichen pou pouleh anakivet-in, insunga nachen theilou ding ahi,” atin, kapa thusei chu kama valin lung hang tahin ankonga konin kading dohin ajah a, “Kalungset pen toh kakichen pouleh hilaiya um hih jong leng khoh kasa poi,” katin kalupna kajon in lunggim tahin kangaito tan ahi. Jaria la kakhen nom pon, kakhen loule la kanu le kapa anom thei pon, kakigel gel nan lung khamnan kadim tan ahi.

Kahinkho a kanu le kapa kachunga alhaset sangin, katin Jaria khen ding lunggel kahin nei tan ahi. Ahinla athoh hah lheh jenge. Chuin gollhang chapang khat kakoma ahungin kajah a, “U Lenboi, waiting shed a numei khatin nangah e,” ahung tin, chuin kachen ahileh Jaria anahin, eihin mu mu chun me heu chan eiven ahile, kalung sunga kipanan kadimin ahi. Chuin aman kajah a, “Heu, hotel khat a chadon hitin kihoulim hite,” atin kanitah lhonin kol ho hotel khat a kalut lhonin cha le nehthei kane lhonin kakihoulim lhonin ahi. Chuin aman kajah a,
JARIANA: “Heu, ikingai lhon kanu le kapa koma kaseile akipa lhon dan. Nang nu le pan ipi agel lhon em?” tin kipahtahin eidongin, kamelso kipahtah dana kaum vangin kalung sung thimpi bangin ajing tan ahi. Chuin kenjong kipahtah bangin ajah a,
KEIMA: “Nao, kei henu le hepa jong akipah lhone.”
JARIANA: “Heu, nangho in a che hite. Henu le hepa jong kamu nome,” atin, ahinla kanom mong mong pon ahi.
KEIMA: “Nao, henu le hepa aum lhon poi. Keibou kaume,” katin kalep tan, chuin eihin daiyin,
JARIANA: “Heu, nangbou naum le nom ding chula. Ale keijong kaum pai pai ding hitam?” atin anuiyin, chuin ajah a,
KEIMA: “Nao, nidang le che nate. Ajeh chu kakisuh beh hih uve tulah hi.”

JARIANA: “Heu, nain a neilut sah nom lou hiveh ta na?” atin atotin, chuin nilhah lamin kaumna mun cheh kajon lhon tan ahi.

Jaria khen ding kagot chanin kalungset na asang cheh cheh jotan, khen ding thu kasei thei mong mong tapoi. Hijongle kaneova pat eihin genthei pi kanu le kapa lhaset ding kanop lou jehin Jaria khen tei dingin kakigellha kit tai. Nikhat Jariana message kathot in kaseiyin, “Nao, eini kilungset jongle hen, kachun le kajon aphal lou jehin kikhen ta hite. Lungset tahin neihe them o,” katin, chuin eihin replyin, “Heu, athi kabange nathusei chu,” atin, chuin eihin call in kala ngam tapon ahi. Avelin eihin call in, chuin kamitlhi kakithehin kadonbut tan ahi. Chuin aman kap pum pumin kajah a ahinseiyin, “Heu, kakigellhah nunga ibola khenna thu nahin sei jeng ham? Kapo joupoi heu,” atin kalung sunga kapona lheh jenge.
KEIMA: “Nao, kahin lungset lou nahipoi. Kanu le kapan jat dang numei adei poi.”
JARIANA
: “Heu, kanu le kapan nadei nante, neina ti hilou ham ong?”
KEIMA: “Henge, lungset tahin neingaidam o.”
JARIANA: “Heu, nangtoh kicheng dia kigellha kahitan, chuleh kanu le kapa jong eini kichen ding kipah thanom a um ahilhone, chutia kanu le kapa jachatna ding bep ahileh kei hing jou ponge. Heu, ikikhen lhon ding ahile keima le keima kithat tange.”
KEIMA: “Nao, ibola hitia chu nasei ham? Eini kilungset mo ihipoi kati hilou ham?”
JARIANA: “Heu, khen ding thu sei hih o. Kenvang nakhen jou him him ponge. Nangho jat mi numeiyin ipi agel ding vang kahe pon, keiho vang kigellhahna kanei tenguleh kamolso masang uvin kakihei mang pouve. Kamolso loule keiya dia hinlo aumpoi. Kanu le kapan ahet lou beh hileh pha ding,” atin, kahinkho man lhon kapona lheh jenge. Chuin kap pum pumin kajah a, “Heu, tule tua hi kahung kigot ding nang kom kahin jot ding ahitai,” atin kalunggimna asang lheh tan ahi. Ahinlah ajah a kaseiyin,
KEIMA: “Nao, ahipoi. Khongaiyin,” katin ahinlah aman aseiyin,
JARIANA: “Heu, kanu le kapan eihin sol ahiye,” atin, iti kakham vangin ahung tan ahi. Hiti chun ahung kigongin Eco Park a kimuto dingin kaum lhon tai.



EPISODE 6

Kuki Love Story

Khojing ding ahitan keijong Jaria toh kimuto dingin Eco Park kajon tan ahi. Kho athim tan lampia katouvin ahile auto khat hung lhai chu kamun, kakom ahung lhun chun akingan, auto sunga konin Jaria ahung kum lhan kakom ahin jon tan ahi. Amel kamu chun hoi kasa lheh jengin eimi numei amatobanga melhoi kamu hih laiye. Kakom ahin phah in khutjem khat ahinla dohin eibu peh in kap pum pumin kajah a, “Heu, ikikah lhon’a ipi soh jongleh kikhen lou dinga kahin jot nahitai,” atin kap pum pumin khutjem eibu pehin, chuin eikoiyin, “Heu, nakhen jou ponge,” atin kachunga akiloiyin akap tan ahi.
Hichun kalungsetna asang chomin, kakoiyin ajah a,
KEIMA: “Nao, hinkhoa dia neihin jot hitam?”
JARIANA: “Henge heu, kahin jot nahitan, kinungle dingin neisol hih beh o.”

KEIMA: “Nao, kenjong kananga jing nahiye. Tunia pat a nomtaha kakoma naum ding ahitai,” katin akipahin, chuin lampi koma sa-tin kakikhuh khom lhonin katou lhonin ahi. Chuin Jaria kachunga akingaiyin,
JARIANA: “Heu, in a chele hen henu le hepan einasang na dem?”
KEIMA: “Sang tei nante. Sang hih jongle eini dingin umna ding avat poi.”

JARIANA: “Heu, mol lheh jong leng numei kahinan najabol jing nange,” atin, chuin inlanga che dingin kakipandoh lhon tan ahi. Lampi kalhun lhonin Imphal bus khat ahung lhai pai paiyin, kakham lhonin katoudoh lhon tan ahi. Jaria puiya kainuva che ding chu kakikhoto lheh jenge.

Kangpokpi kalhunin garia konin kakum lhonin in kajon lhonin ahi. Chuin kanun eimu lhonin ahung potdohin eihung lamton, chuin kajah a, “Boi, nadongmanu chu ham? Nahin kipui hitam?” atin einadongin, chuin kenjong kadonbutin kaseiyin, “Henge henu, kaji dinga kahin kipui ahitai,” katin, chuin kanun Jaria insunga akipuilut tan ahi. Chupet taha chu kapa ina umlou ahin, Jaria kahin kipuilut ajah chun lung hang tahin in ahinjon tai. In ahung lhun chun kachunga alung hangin kajah a, “Masanga kanasei banga chu ina naum thei lou ding, nahinna thei nakihol ding ahi jenge,” atin, chuin kapa koma kaseiyin, “Hepa, namou ahung lhun leh koijat mi hijongle kipah tang. Nang le kanu dinga kipa nikho ahibouve,” katin, chuin kapan eijon houvin, “Ka-eh pi hi kipa nikho. Najahcha lou ham?” eitin, chuin mol khat ahin kilahin eivei tan ahi. Chuin kalai ana valin kapa kakibot pi tan ahi.

Chutah chun kap pum pumin kanu le kapa koma Jaria ataovin, “Hepa, lungset tahin ka-u Lenboi vo lhon hih o. Kei themmona joh ahibouve. Jat dang numei nadei lou hena saa kahung lut khah ahin kei kile jo tange,” atin, chuin kakoma ahungin, “Heu, neingaidam o. Kei kile tange. Nanu le napa toh nakikhen sangin eini kikhen jo tahite,” atin, ahinla kanom pon kaseiyin, “Nao, kanom poi. Nang louvin hinkho mang jou ponge,” katin, chuin eikoiyin akap tan ahi. Chujouvin akile heiyin akile tan, ahinla anung kajuiyin akile louna dingin katao tan ahi. Bus a akaldoh ding konin kaseiyin, “Nao, `nakhen jou ponge,ʼ neiti hilou ham?” katin, chuin kakhut phang atuhin bus ache tan ahi. Kap pum pumin kanungvet pehin, kanu le kapan eibolna kalha ase valin injon talouvin Imphal lang kajon tan ahi. Chuin Jaria message kathotin ajaha kaseiyin, “Kikhen ding thu kanasei chun nanop lou jehin nanakithat gon, hijeh chun kikhen louvin lungtup molso dingin ikitem lhon me! Tua nangin baicha khen’a neikhen jehin, nang nahin kanu le kapa nahiuvin kamel nanungmu lou diu ahitai,” katin laina tahin kathot tan ahi. Chuin eihin replyin aseiyin, “Heu, kanom poi. Chutin hinkho mang go hih o. Ahile kikhen po hite. Eco park a kananga ding nahin lungset tahin hung tei teiyo,” eitin, ahinla kalhaset jeh chun kile talouvin Imphal lam kajon tan ahi. Jaria in Eco Park a einanga vangin kache tapon ahi. Asen golngai koiyin amilthei ding ham? Hijeh chun kalainatna asan val jehin kakichem chavei tan ahi. Jule sa nen hinkho kahin mang tan, kanu le kapa jehin kachonset lo tan ahi. Ka-phone jong kapaimang tan, lungset mitlhi long chut chut in hinkho kahin mang mang tai.

Kaumna jousea kamon deh lou phatin aguhin Maram kajonin Jaria holdoh ding kago tan ahi. Kalhunin ainu kahe kit pon, miho kadong le le tan ahi. Chutia Jaria koma thu kasei jeh chun amajong atija valin akinunglen kanu koma achen, kanun amu mu chun akap in ajah a, “Boi, napa thusei chu lhasetnan neidan, lungset tahin kachapa neiholdoh peh tei teiyo,” atin Jaria koma ataotho tan ahi. Chuin Jaria in kanu koma aseiyin, “Henu, najat mi kahilou jeha neidei lhon lou hijong leng thi dinga kaum laiya ka-u Lenboiyin asum nei sun sun mangchaa eina jen jeha kahung damdoh thei ahiye. Chuche jeh chun ka-u Lenboi kalungsetna asange,” atin mitlhi long leovin aseiyin ahi.

Chuin Jaria akhou Maram jonin ache tan lampia kakitoh pel lhon tan ahi. Chuphatin thi ding bou kanom tan, kahing nom tapoi. Chutia khamna thei puma hinkho kaman jing laiyin tahsa dammona kahin nei tai. Tahsa dammona kahin nei chun Jaria kangai chatna asang deh setin kanu le kapa chunga kalhasetna asang tai. Kadammona la asang cheh cheh tan, lou chohna ding sumla kanei pon kamoh ka ka tan ahi. Chutia kagenthei val phat chun Ccpur a kani kom kagabel tan ahi. Kanin
Hospital a eipuiyin, lou tampi eichoh pehin kaboina eidong tan ahi. Hichun kani koma kalhasetna thu jouse kaseiyin kakap leuvin ahi. Chuin kanin eilhamonin kanu le kapa koma kakile dingin eitemin, ahinla kanom tapoi.

Nikho sotpi kanu le kapan eihol mo lhon phatin Jaria toh kithoa kei hol dingin atem tan ahi. Chuin akitho khom un eihol tauve. Chuin miho thu ahinlhah sah un aseiyun, “Hung kile tan, Jaria toh nakichen lhon ding ahitai,” atiuvin ahinla koi chung koi chunga kalhaset jehin kakihetmo sah tan ahi. Kaloi khamna theiya lop ho toh kahung kivop in aneh neh u kanen, adon donu kadon tan ahi. Amaho koma kaumin mingol bangin hinkho kamange. Kahinkho man kaloihon apohnat jeh-un keidin nungah khat hel ding, atiuvin koi nungah nadei pen em, tin eidong jiuvin, chuin kham pum pumin kenjong ajah uva, “Maram nungah nu tailou adang koima kadei poi,” kati peh ji e. Kanungah dei chu eimi ahilou jehin kaloihon jong adatmo lheh uve.

Khamna thei avala kaneh tah jehin katahsa alhasam tan, kajom peh leh kathivah ding ahidan doctor hon eisei peh tan ahi. Kaloiho alunggim lheh un, ahinla kaloiho koma kaseiyin, “Kathi nungleh koima akap nahung um thei lou diu! Kathi leh keiya dia phajo ding ahi,” katin, kalhaset ham tan ahi. Chuin kaloi numei phabep in aseiyun, “Heu Len, pasal pi pi numei lama lungneo lou ding ahi. Numei kivat a nabol ham? Lungset nanei jongleh keihon napan hu nauvinge,” atiuvin, chuin avelin kaseiyin, “Ken Maram nungah nu tailou koima dang kadei poi,” katileh amaho jong alung dong thei lheh uve. Dongma dang nei ding chu kanom mong mong tapon, Jaria chunga ngol pei dingin kahung um tai.



EPISODE 7

Kuki Love Story

Nikhat kaloiho phone mang chan Jaria ka-call in amanjong ahinlan ahinlah kahou ngam tapon ahi. Hijongleh kahou pin ajah a, “Jaria, Maram nungah nu, nang ngaiya ngol pai ding kahi tai,” katin, chuin amanjong laina tahin kajah a,
JARIANA: “Heu, hoiya naum hitam? Kei henu le hepa alunggim lheh lhone,” atin kalai ana lheh jenge.
KEIMA: “Nao, thi le hin kikaha um kahi tai. Thilsen eilonvuh tan keiya dia hinlo aum tapoi.”
JARIANA: “Heu, chuti chu ahileh kei neilungset am?”
KEIMA: “Lungset kahin chan hi kahinkho a ding ahitai nao.”
JARIANA: “Heu, neilungset leh avelin neihung kipui kit kom o,” atin kakipahin avela Jaria kipui kit dingin kache tan ahi.

Eco Park a kimuto dingin kakitem kit lhonin kache tan ahi. Chuin amajong Maram a patin Eco Park ahin jonin ahinlah vangset um tahin Senapati le Eco Park kikaha gari toset na anei tan ahi. Chupet tah chun phone kabolin ahileh nupi khatin ahinlan athu um dan jouse eisei peh tan, chuphatin kalai ana valin bus chunga kamoh ka tan ahi. Chuphatin Senapati hospital kadel paiyin lunggim tahin kaga lhung e.

Kalhun chun mithem khat in anaum pin, aman vang kho ahi tapoi. Kamu mu chun kalai ana valin abeng kachop in kaseiyin, “Nao, kachun le jo silungmol hih leh hichan hin genthei na toh pon nate. Lhase hih in nao, na-u keima kaume,” katin alu kajutin kalhamon tan ahi. Chuin kavel a tou hon koi ahi eidong un, kenjong amaho jah a, “Kajinu ahiye,” kati. Chuin kaloiho ka-call in sum bat in kathum tan ahi. Amaho jong ahung lhung pai paiyun sum 20000/- ahin choiyun, hichu ajennan kamang tan ahi. Ajingin lunggim taha akoma katou jing laiyin Jaria in kakhut ahin tuhin eihin kouvin, “U-uu,” ahintin, chuin kakiheiyin kaven ahile, me heu chan eihin ven kajah a, “U-uu, Kuki kahi nom taiye,” atin, chuin akhut kameh pehin ajah a, “Nao, tunia pat a Kuki numei nahi ding ahitai. Maram chu keidia kapute hi ding ahitai,” katin, akipahin, chupet tah chun anu le pa ahungin akika tauvin ahi. Chuin Jaria in anu le pa jaha aseiyin, “Henu, kalung tup kamolso nom ta e. Kagenthei val tai,” atin, chuin anun amai ajut peh in, chuin apan kajah a aseiyin, “Boi, tunia pat a kachanu hi naji ahitai. Alhasetna ding bol peh hih in lang nangma tahsa bang bangin ngailun. Aman nahin lungsetna hi seijou ahi tapoi. Nivei nahuhdoh ahitan, ahinkho lhum keiya nahin huhdoh jing ding ahi na laiye,” atin, kakipah valin apa koma, “Hepa, kanao hi keidia kakipana ahibouve. Hin genthei sah him him ponge. Kenjong kalungsetna asange. Aman kahinkho akikhel sahin setna tampi kadalha e,” katin, chuin Jaria in kajah a, “Heu, hung o! kakoma hung touvo,” atin chuin akoma katouvin ahile, kachunga akingaiyin kajah a aseiyin, “Heu, kapen a pat a tuni hi kakipana pen nikho ahitai. Kalungdei pen toh janggop tei dinga Chung Pathen koma kanatao jing ahi,” atin kachunga nom tahin akingaiyin ahi. Chuin kanu le kapa ahung lutin Jaria nu le pa koma ngaidam athumin, chuin kanu le kapan Jaria koma ngaidam athum lhonin, “Boi, phat chesa thilsoh ho lhasetnan neihih beh o. Nanu le napa keini themmona ahi. Keinin jong kahin deilhen lhone,” ati lhonin, chuleh Jaria jong akipah valin ajaha, “Henu, Kakipah-e. Lhasam lheh jong leng nadei deiyin um nange,” atin, chuin kanun kajah a, “Boi, tunileh ibon uva kikim sel a ankong iso khom diu ahitai,” atin, chuin kapan apat pat in kainsung mite; katu kabe jouse akom khomin amaho jong hospital a ahung cheh tauve. Hiti chun pule pa dan dung juiyin kichenna kanei lhonin lungtup kamolso lhon tan ahi. Chujouvin hon lhingsetin hospital a patin car in inlam kajon tauve.



The End



Previous articleTHINGLHANG GAM
Next articleAW HE ADA KAHI!

LEAVE A REPLY

Please enter your comment!
Please enter your name here