Home Lahkhom LUNGSETNA SUNGGIL-IV

LUNGSETNA SUNGGIL-IV

138
0
lungset sunggil
lungset sunggil

LOVE STORY

By: William Lhonga Madrid.

(PART-4)

Sanglen potdoh phat’in, lekha chu kalhamin, kasimin ahile hiti hin thucheng akijih in ahi.

Heu, hiche lekha a kathucheng jih hohi nasimdoh teng, keima kamcheng bangin ana gelin lang, nakoma kataona thuhi neisanpeh teiyin. Lungset sangpen’a kana lungset chule damsung hinkhoa ding monga kana deilhen nahinai. Hijongle kakhohetthei masanga kona, genthei tah a eina sasah ka Chun le Jon nangto kikhen dinga eisol tah jeh in, kachun le jo thimthu kapalkeh ngam tapoi. Heu, koijoh dinga khending hahsa lheh jongle, Chun le Jo thupeh bangin kikhen mai hite. Lungsetna vang asangin, ngailutna jong alen’e. Hijongle lamlhung joulou ding chu ihi maitai. Heu, lungsetna thua kakamcheng sohsa ho, lungset’in nei ngaidam’in lang, neimil jengtan.

Milding hahsa lheh jongle kenjong namil ing ting, lengdang sangmai tange. Heu, nang jong laidang lengin lang, nalungset kei neihin mil jeng tan. Guilhung joulou ding lungset nahi, gil dehji ahinai tin gelthem hitin, kikhen mai hite. Kei sanga nahin lungset ding lanu tampi umin tin, kei sanga nalunghol ding kimu nan nate. Heu, ikilungsetna sunga kasuhkhel ho nei ngaidam’in lang, kathimthu cheng jong naselungin, mil jeng tan. Na-anglai lo joulou dinga chungmang Pa laitan kahi tin, kenjong gelmai tange. Heu, themmo neichan hih-in. Setlei chunga kilungset kikhen hi, eini bou ihi dehpoi. Namil ding hah lheh jongle, chun le jo lungdei banga kaum ding hi, keiya dinga apoimopen ahitah jeh a, tunia khenna thu kahin sei jeng ahi. Heu, kakhutjih nasim jou phatle achaina dingin neihin geldoh kit’in lang, nunlui din neihin lha maitan. Keijong tunia pat’in, lengdang sangdin lungthah keng tange. Heu, nanga dinga lhing joulou kahi maitai. Damsunga din kahin lhai. Mangpha”

Gelphah louva kalungsetnun khenna thu ahin seiya, Chithi eihin thot jeng chu kagelle lamdang kasan, kalai ana lheh jengin ahi. Chubang lungsetna sang ngaito bei hel’a, chun le jo jeh mai maiya, khenna thimthu ahinlel jeng chu kapona valin, kitim joulouvin, kakap tan ahi. “Vahnem, kei iti tang-em? Khatvei beh keiu tia neikou louding hitam? Na-singsungmi lunglhai lou jeh a, neinungsun ngam jeng vang hi, lungdon nan kadim’e. Anae khending nagel jenghi. Laichapet lunggel jong hibang lom’a, thohhah louding lamdang dehsam ponte. Chihlou theplou jeh ham? Genthei jeh ham gol? Nei lungset achom ngeiye. Kumkhon puldou hen neitia, chithi neihinthot jeng ham? Kinem’a hinkho neimansah a, kinepna thon lungsetna lhem neichan, ‘katahsan poi heu’, neiti hilou ham? nang ibati nahi mo? Mel’a lom nam gol neibol nahi? Hinkho thohlou lungin la dol joulou, nei ngailut jal’a kenjong kan lungset nahi. Puldou dia nei laitan hitam? Huimut dia bon gol’in neina phallou, hinlai napuldou dia nei phal jeng hi, alamdange lungset lam hi, thimpi ajing kavai dentai. Neihung puiyo.

Thinlai lunga mang joulou dinga lungset neina chan ham kanati leh, mupet lungset kamdam bou hitam? Lunga genthei ban kanom tangeiye. Lungset neichan jong hi, kana ding bou hitam? Kalungsetna sunga ipi bulhinglel ham? Kahe chentai; ngailutna vat hilouvin, genthei jeh bou ahi. Genthei jeh a nei nungsun jeng ding vang, kagelmoi lungdei khongai tadio. Vahnem, kei dinga sunlung janlung nang nahi jeh in, kenvang kahin lha joupoi. Kumthum lungset pahbang molding hitam?” katin, kaplai bangmon, sennao bangin kakap kaptan ahi. Kalhasetna asan val jeh in, anjong kaneh nompon, kalungthim’a jong imacha kageldoh thei tapon ahi. Lainatna mitlhi long pumin ka Guitar chu kaki poh in, Lentol lang kajon tan ahi. Kavetna jouse chu Vahnem toh lungtoh a katou khom namun ahijeh chun, lhasetnan kamun ahile kalonlhi along kang thei tapon ahi. Hiti chun alhem ding beiyin, kathil jah chu kaka pitan ahi.

Thangvan’a Chollhanu ahungsoh in ahile lungtoh a kanuikhom lhon lai nikho ho kathin lunga mangmon alangin, kalainat nan eijo val jehchun kakap kittai. “Gel kit’in Vahnem, ikhankho luicheng. Molso ding tia ilel thimthu cheng, nalunga langlou hitam? Ngai nang lungmol jeh in khenna thimthu nalel’in, dingmol naleptai. Ahinla kei lungsunga vang laigil changsa nahi jeh in, agil twibang ajunmang theipoi gol natongnem. Tunin nopni hin pui jongle, nanglou chun kei mongjou ponge. Hoiba hitam gol neina tepna? Kumkhon hinmil jou ponge. Gol hinveo lungset hinkho, hiti dingin kana gelpoi. Nangla nomin leng nan natin, kei hinkho vang nopna umlou, nang jeng bou gelnan” katin, lhase tah in kakap kap tan ahi. Kaka chimdeh phat’in, ka Guitar chu kasaiyin, hiche zaila hi laina tah in, ka-oi tan ahi.

  1. Lungsetna Sunggil akel’in, haisam ding kahitai. Samang kajal mona jankho asaotai. Vahnem khending lung nahingel jeng hi, hoiya solam gabang tang-em?

Lungset boina twipi kapal lai hin gol, lung genthei nan eitom’e. Lunghel puldou nan ajuiyin, lungset lonlhin ajou jitai.

  1. Vahnem na-anglaiya lungset chamkim chu, lonlhito nei lhehmangpeh ding hitam? Kumthum lungset pahbang molding hitam? Damsung hinkhon miljou ponge.
  2. Chun le Jon khending gel jongle khen poite, tia houlimna lungin alang jinge. Hinkho lha-lengvaiya lung kagel jiteng, namel nibang ahung langji.

Hiche zaila hi ka-oile, ka-oi chim thei mong mongpon, hijeh chun mitlhi long pumin avel velin ka-oiyin ahi. Jankho asot lheh jeng tan, ahinla keivang samang jal ding gelmon, changin Huiva bang kamao jing nalaiyin ahi. Jansot nunga lonlhi puma zaila ka-oi gin chu kagolpa Sanglenin ajahdoh phat’in, kei kom jonin ahung tan ahi. Kakom ahung lhunin, kajah-a aseiyin
SANGLEN: “Bhai, inati ham? Ipi jeh a, sennao banga naka ham?”
KEI: “Bhai, nahin thupoh chu kakapi ahi. Ven Vahnem’in, sam banga monmang joulou ding lungset sangpen chu sam gibangin eikhenin, khotona beiyin eivailhah tai” katin, kathiljah ho chu kaseipeh tan ahi. Chuin Sanglenin eilhemin, kajah-a
SANGLEN: “Bai, pasal idinga nalungneo ham? Setlei chunga nungah simsenlou aum’e. Kingai kikhen ija gellou hopou boipia, kapi angaipoi. Vahnem sanga numei pha numei ching, adimet’e.”
KEI: “Sim’a sim joulou numei dimset jongle, Vahnem sanga kalungset ding numei dang khat’a khat jong aumpoi. Ama louvin kei mongjou ponge.”
SANGLEN: “Nangin lungset lheh jongle chun, Aman nang sanga achun le jo joh angailut jeh a, nakhen ahitah le, eini ipi ba isei nahlai ding ham? Nanga louding, midang nahgu khat toh naki-ngai khah joh hinte. Bhai, hungo cheta hite.”
KEI: “Keivang samang jong jalda tange. Bhai, alungkham ding hobon alungkham lou leu, kei dingin lungkham hih-in. Na-ihmut asole, chen lang ihmu jengin.”
SANGLEN: “Nalonlhi pum’a hinkho naman le, kei iti nom’a kaki choldo theiding ham? Hungo bhai, jankho asottai. Cheta hite.”
KEI: “Ahile hungo, nangho in’a che hite” katin, chuin kagolpate inlang kajon lhon tan ahi.

Jankho asot tah jehchun, kagolpa Sanglen vang nomin samang ajal paitan ahi. Kei lungsung vang meibang asan, maimit jong singthei louvin, Vahnem ngainan kalhi katheh jingin ahi. “Kei ikati dehset’a, hibanga khennung pul kadoulel ham? Vahnem lunggel vang akidang ngeiye. Hiti ding bep’a, idia kalungset’e eina tia, eina kinepsah khoh ham? Hiti ding lam ana heleng, lungset hinkho ana kilamdoh pilou dinga. Changa iti hinkho kaman ding hitam?” katin, lhase tah in, kaki-gel jingin ahi. Changa hinkho manding kagelmo jehchun, khosunga umding jong kanom tapon, hijeh chun khosung otdoh ding chu kanom tan ahi. Ahinla sum le pai kanei kitlou jehchun, chena ding jong kahe kit poi. Achai chainan “Nam Sepaiya lutding hitante” katin, jing kho hungvah ding bou chu kangah tan ahi. Kalunggel le kangaito ho chu kagolpa le kasingsung mite hetsah leng, eijahda diu kahet jehchun kahetsah nompon, hijeh chun lekha khat’a, kalunggel ho chu hiti hin kajih tan ahi.

“Bhai, hiche lekha hi namu teng, kasingsung mite jong ana seipeh in. Kinepna bei kahinkho hi, lainatna le lhaset nan eitom’in, jankho vah joulouvin, lonlhin kalong longe. Lungsetna sunggil muchenlou nanghon vang, kalunggel hethem pouvin natin, kalainatna jong hechen pouvin nate. Kahinkho hi ipi hinkho hiya, hibanga lhasea, naocha banga kaplai bang theilou kahim? Kei le keijong kaki lungdong tai. Changa lunghel laitol len ding gelmon, kajontai Nam Sepai. Kamasang lampi ling le khaovin tom hen lang, lamsuh lamtou tam jeng jongle, hung kinungle kitlou dinga che kahitai. Bhai, nangbeh in nomin hinkho hin mangin jingin.” Mitlhi pumin hiche thucheng hi kajih in, kajihchai phat’in, kagolpa koma kakoiyin, kaki patdoh tan ahi. Jingpi tah ahi nalai jehchun, koima jong khangjing athou naipon, hijeh chun vangkho chu anguiyin, athipchet jengin ahi. Ngai jong aumin, lunghel jong aumin, ahinla kalainat nan eijo val jehchun,l kinung heilouvin, kache jingin ahi.

Kalainat val jeh a kache jeng vangin, alampi chu ahah lheh jengin ahile lamkah a chun gingkel dangchah jeh in, kachol lheh jeng tan ahi. Kachol val jehchun lampam mun khat’a katouvin, lhase tah in kaki ngaiton, “numei khat jeh a kahiti jeng hi, phading hinam? Kachunga kasingsung mite lunglhai diu hinam? Kajot namun hi lhung leng, nopna kamu mong nadem?” katin, angol bangin kei le kei question kaki bol’in ahi. Lunggel ajat jat aumin, abang komle kinungle kit ding kanomin, ahinla kinungle kit’a, Vahnem toh kalenna lhang mukit ding chu kagelle kalungjo tapon, hijeh chun kinunghei louvin, kamano kittan ahi. Nilhang langin keijong chol le nang pumin kaga lhung tan ahi. Nam lamkai ho toh kaki muton, kaki houlim tauvin ahi. Gentheina ijat um jongle, akhon ni geiya thoh lhung dinga che kahi tah jehchun, hikoma chun kaum tan ahi.

Mithah/melthah kahi nalai jehchun, loi le pai ho chun einoise lheh jengun, sol le kol danin, khut le kenga eimangun ahi. Vonsop, anhon ho chu kaboipi jingin ahile kaki-sihna kom jong atam jin ahi. Ahinla kinungle ding chu kanom kit pon, hijeh chun gentheina tincheng kathoh ham hamin ahi. Ni phabep jouvin training jong kabol pantan ahile gel sangin hahsa kasa lheh jengin ahi. School kai sangin jong ahahjon, minoiya kun jing ding chu ahi maitai. Training kabol sunga chun kalel lheh jengin ahile katahsa jong akemsuh jengin ahi. Ajehchu iphat mandan akikhel teng, itahsan adoulel ji ahi. Pathen lungset’in damselin training kajouvin, loi le pai angsunga chun, “hahsatna tam hen lang, douding melma tam lheh jongle, kahaina hu abei masang chule thisan vatkhat kanei laisea, kanampia dinga hinkho phal ngam’a, kapan jing ding ahitai” katin, kitepna jong kanei tan ahi. Hiche nia kipat chun galvon lhingset’in kaki vonin, meithal jong kachoi pantan ahi.

Nampi khankho ding gelnan, loi le pai cheng toh hinkho phal’in, gingkel dangchah galvon pumin, phung le changa khenlou din, nipi thapi melmu din, lungkhat heiphung kason khomun ahi. Douding le ginding melma atam jeh in, sun le jan’in kiging jing pumin hinkho kamang jingun ahile hinkho nopna vang keiho dinga aum tapoi. Hoichanna kachea, hoilai mun’a kaum vangin, lunghel nan eijui jingin ahile hikoma jong chun lunghel adai chompon ahi. Katahsa gammang noiya aum’a, go le dai noiya hinkho kaman vangin, kalungthim chu Vahnem koma alaileng jingin ahi. Chollhanu ahungso jiteng, tongdon theilou Chollhanu chu kahoupi jin “lungset um khennung Chollha, kangai samang jal hitai mo? Ahinkho chu lungmonga um hinam?” katin, khen nungin jong kalungkhampi jingin ahi.

Nampi khonung ding gelna jeh a, gonoi dainoi thoukang, vaisi chule ling le khao lah a um akihi jehchun, lungsetnu ngainaa maona ding phat vang aum thei tapon ahi. Singsungmi ngaicheng dalhan, lunghel lung genthei thoh in, hem le thal choiyin gol ngaicheng toh kapang jingun ahi. Kachang changin kaki ngaiton, “kagam le kanam’a din chihna thepna neihih jong leng, kapeh thei sun sun kahinkho hi peng kate. Thutah thudih choijing ting, joni teng Nampin hanla sante.” katin, lung le tha panin, nampi adin hangsan tah in kapang jingin ahi. Galsat dinga kavaikon doh diu phat teng, “Lompi mabang heikhom din, Ngalchang hadohsa nungkem louding, pasal hangsan nungchon louding, inam jalen ding galdot’in, pang jingute.” tin, kaki hanlah jiuvin ahi. Hiti chun thiding jong ging louvin, Nampi jalen nading gelkhohna jalin, hinkho phal’in, kamano jingun ahi. Tahsa jong acholdo manpon, lunggel jong acholdo manpon ahile gentheina le hahsatna chu bulhing selin kamang jingun ahi.

Nikhat kavale nauvin melmate toh kaki kap touvin ahile amaho atam jeh-u chun, kating jou pouvin ahi. Ajehchu amihem’a jong amaho atam jouvin chule meithal meichang jong ahao jouvin ahi. Kaloite toh kajammang jou tauvin, ahinla kalamkai pao chu achamo jeh in ahung jamdoh manpon ahi. Kalamkai pao kamulou phat’in, kaloite jah-a kaseiyin “ilamkai pao hoiya um hitam? Hoilaiya vaitham hitam?” katin ahile kaloite chu athipchet’un, houlou abang jengun ahi. Ajehchu galmun’a kalamkai pao kahin dalhah jeh-uva chu gaki nungvet le, kithi khante ati jeh-uva paonom louvu ahi. Chuin kenjong kasei kit’in, “ilamkai pao iga nungvet lou diu ham? Ama jao louva iti eiho ijam thei diu ham? Melmate anga, ilamkai pao idalhah jeng dingu hitam?” katin ahile khatcha a-uhpoh deh pouvin ahi. Chuphat’in kenjong kalungthim’a, “nang holoi hou sangin, songpi kihou jongle eidonbut jonte.

Nang holoi houva phat suhmang sangin, kachangin che tange. Kathi jongle nampi khankho ding gelna jal’a, kathi ahi maiye” katin, kaki kapto namun langu chu kanung del tan ahi. Kalamkai pao chu Songpi panga ana kisel’in, akichat jehchun ana kihot hot jengin ahi. Gal’a kona kavet chun kalungset lheh jengin ahi. Chuin kenjong oltah in kageplut’in, kalamkai pao huhdoh teiding tin, galmite chu kakap’in ahi. Pathenin eidinpi hintin, phat chomkhat jouvin galmite chun ei-otdoh tauvin ahi. Kalamkai pao chu kamasanga kahin solin, kei chu ama nunga kahungin, galmiten eihin nungdel khah leu tin, kiging jingin pumin kalamkai Pao nung chu kahin juiyin ahi. Hiche nia kipat chun kalamkai paovin eivetna achomin, eingailu lheh jeng tan ahi. Tah jong eitahsanin, son jong eikisonpi tan ahi.

Aban jingle sim kittau hite. Lunglut tah a sim jouse chunga kipathu kaseiyin, Pathenin phatthei naboh cheh tauhen. Kakipah e.
Keima William Lhonga Madrid.
8731974334.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Previous articleSANA SIELKI KIMANSAH THUSIMA
Next articleMOLSANG A BOIKIM-IV