Home Crosby Haokip LUNGSETNA GIMNEI, KA-AWGIN-I

LUNGSETNA GIMNEI, KA-AWGIN-I

143
0
LUNGSETNA GIMNEI
LUNGSETNA GIMNEI

Fictional Scary Story

Story and Narrated by
Crosby Haokip

Crosby Haokip kwc
Crosby Haokip kwc

Thinglhang gam, kakhou chu anomin chuleh masanglaiya kapu kapaten anatun u kain lentah aum nalaiyin akikhel naipoi. Chuleh kitchen le inpi achom choma kisa ahin, kitchen lang vang chu tun aluival tah jehin asegam tai. Hijeh chun nikhat kapaneovin kajah a, Ahipoi, kitchen langhi asetan phet lha tau hite, atin kitchen lang chu phet lhah tah dingin aum tan ahi.

Chuin kain sah lamu lamlen a chun kache pheiyin ahile nungah kamu khah lou khat hi anaumin kamu chun hoi kasa lheh jenge. Khosunga amel kamu khah lou jeh chun koi ahidem tin kalung atheh lheh tan ahi. Kache tou chun hiche nungah nu chun kajah a, Heu, hiche sum hin dukan a khun mimi neichoh peh o,” atin sum chu kalan ama aumna muna aum denin, kei kachen dukan sunga chun chapang pasal khat anatouvin ajah a, “Nao, mimi khat neihin pe o,” katin amapan jong mimi khat eihin pen, chuin sum kapen ahileh sum chu aset val tah jehin alanom tapon kajah a, “Heu, sum hi aseval tabouve,” atin, chuin kenjong nungah nu chu kakouvin ahinla aman vang aja mong mong poi. Hiche phat chun keima sum joh kapen mimi chu kachoipeh tan ahi.

Nungah nu koma chun kachen mimi kagape tan amajong akipah lheh jenge. Hichun kaloi pasal ni kakoma ahung lhonin kajah a, “Min, kahung lhonleh hiche in’gem kisong koma lampi ah khun leinoi langa patin numei chapang khat laina tah a aka kaja lhone,” tin kicha thimtah in asei lhonin, chuin keijong kalung dongin amani chedoh nungin kachangin hiche muna chun kachen ahileh lampi a chun leiset neokhat atonglha aumin, hiche a chun khutjung tholna theibep ahomin, chutia kavet laiyin numei chapang khat leinoiya kona laina tah a kap kajan kangaiyin ahileh, “Hepa, O hepa,” tia laina tah a apa akou chu kajan katija lheh jengin ahi. Chuleh kicha pumin kakouvin, “Koi nahi ham? Ibola naka ham?” tia kadoh jongle eidonbut pon laina tahin akap kap tan ahi.

Chujou chun upa khat ahungin lunghang tahin akisenin, “Koiham hiche laiya kap chu?” atin pistol khatin amuntah chu akap in ahile numei chapang ka ogin chu athip tai. Chuin kalung adong lheh jengin kavel chu kaven nungah nu chu kamu tapoi. Chuin hiche upa pa chu kadongin, “Hepa, hiche laiya kap chapang nu chu koiham? Ibola kap ham?” tia kadoh leh aman aseiyin, Minlal, hiche a kap chapang nu chu ahinkho hiti hi ahi: masang laipeh chun, hiche khosung kisat masang chun hiche lai muna hin meithai khatin thinglhang lei abolin, amanu chun numei ni ahingin ahi. Ahinla amanu chu ajinei nom tan, jinei ding atileh ajiding pan, `nachate ni nahin puithei lou ding ahi,ʼ atipeh in ahile amanu jong alunggim lheh tai. Achanu teni toh akikhen loule kicheng thei lhon lou ding ahijehin achateni chu athatin khat alol atan pehin anaonu chu buh sunga anakhai lih tan ahi. Hiche nia pet a chu tuchan geiya hiche numei chapang teni ka ogin chu kija jing nalai ahi,” atin katija lheh jenge. Chuin kaseikitin, “Chuti ahileh hiche nupi nu chu hoiya umba hitam?” katileh aman, “Tun, Molding khoa jile cha aneiyin akhosa e,” atin hiche nupi nu chunga chun kalung ahang lheh jengin ahi.

Mu athim tan kakicha lheh jenge. Chuin kain leitol u hampa chunga kalumin nungah nu chu kagelin kalung ngaito laitahin, “Heu,” tin eihung kikouvin chuin kathouvin kaven ahileh amasaa kamu nungah nu chu ahin, chuin akom a, “Nao, ipithu ham?” katileh aman, “Heu, chung langa umte khu anchang sel 5 gape hite,” atin, chuin kanao numei ni toh kache tauvin ahi.

Kacheuvin chuin kenjong amin kadongin,
KEIMA: “Nao, namin ipiham?”
NUNGAH: “Kamin, Hatshi ahi.”
KEIMA: “Tua hi hoiya naum hinam?” tia kadoh leh lungngui tahin aumin,
HATSHI: “Heu, tunilhah a hung lhung pan kahi nalaiyin lhunna ding jong kahepoi,” atin kalung adong lheh jenge. Chuin kalung asen keiho in a um dingin kajolin,
KEIMA: “Chutia umna ding nahet louleh keiho ina naum thei ahiye. Kain uvah umle chun kanu le kapan nalungset ding dan. Ajeh chu namel lhon muleh kanao nu banga agel lhon ding ahi.”
HATSHI: “Heu, nanaonu chu hoiya um hitam?”
KEIMA: “Aumlou kal kumthum achetai,” katin amaiso chu kaven ahile kathusei chu apohnat ahiding kahen ahi.

Chuleh thaomei kakidet u ahin, kalamjotna vellah u chu aven alungthim nommo lheh bangin aume. Hichun kadongin, “Nao, ipi navet ham? Nalung nopmo toh e,” katin chuin aman kajah a,
HATSHI: “Heu, noi langa dukan koma in’gem kisong khu koi in ham?”
KEIMA: “Masanga chu insung khat anachengu ahin, amun aphat lou jeh a anadalhah u ahi.”
HATSHI: “Eini jong khuche lai ina khun cheng hite,” atin athusei chu lungdon le tijat kathon ahinla kale daiyin,
KEIMA: “Ikichen lhon tengleh umnah tahen,” katile jahcha thimtahin anuiyin, chuin kachena munu kalhung tauvin ahi.

Kachena jouseu muna Hatshi chu koiham tin amupha chan akihoulhi lhi tauvin ahi. Chuleh kakilhonpi kanaote ni chun totle tah gomin, “Ka-u pa dongmanu ahi,” atiji lhonin, hiti chun mijouse hetin akingai chu kahi lhon tai. Kahung kile lamuvin umna ding ahet lou jeh chun ka-in a kapuilut tan, chuin kanun eidongin,
KANU: “Minlal, nao chu koiham?” tin eidongin, kenjong kanu jah a,
KEIMA: “Henu, ikhouva hung ahin, umna ding ahet lou jeh a eiho in a um dinga kahin pui ahi,” katin, chuin kanun Hatshi alhamonin,
KANU: “Boinu, hilaiyah lung mong tahin umin lang nain bangin gel tang o,” atin chuin adongin, “Boi, hilaiya ipibol a nahung ham?”
HATSHI: “Henu, sot a pat a hiche khomuna hung ding kanatup jing ahitai. Kaumin ahileh kanu le kapa umna bangin kagelin kalung amonge.”
KANU: “Nanu le napa um talou ham?”
HATSHI: “Aum lhon tapoi. Nao numei khat jong kananeiyin ahinla vangset umtahin anakikhai lih tai,” atin alhisohin, chuin kanun alhamonin,
KANU: “Agenthei le avangse lou koima aumpoi. Ichan chunga lung oi ding ahi,” atin, chuin kipah tahin ankong kaum tauve.

Hiti chun Hatshi toh insung khat bangin kacheng khom tauvin chuleh amajong alungnomin alungmong lheh jenge. Chuleh sunle lou kakon khomuvin kamoh um teng uleh dukan a nehthei kacho lhonin chow kakisem ji lhonin ahi. Amavang kalungdonna khat chu ahile ina kaholmo tengleh achangin lam koma in’gem kisong koma chun achejin ahi. Nikhat kaholmo tan ingem a ache ding kaginmo jeh chun kachen ahileh anaumin bang panga anatouvin anakunin ahi.

Chuin kachen ajah a, “Nao, hilaiya ipi nabol ham? Nadam lou ham?” katin kakai dingin ahileh analhisohin ahi. Chuin kaponan, “Nao, ibola naka ham?” katileh alhi akithehin,
HATSHI: “Heu, noma hinkho kaman lou ding hitam?”
KEIMA: “Ibola nasei ham? Keiho koma noma hinkho naman ding ahi. Nadei nangai chan chuleh nalungnop mona aum jongleh kiphat lam louva nasei jeng ding ahi,” katin kalhamonin. Ahinla kakhut teni atuhin kajah a,
HATSHI: “Heu, eini hiche in ah hin cheng khom tahite.”
KEIMA: “Angol nahim? Hilaiya koima cheng ngam louva iti ichen ding? Chujongle eini la nupa ihilhon pon, mihet a insung khat a iti imoh chen khom thei ding ham?”
HATSHI: “Heu, imati taponte. Eini umle hen pha tante,” atin ahinla kanom mong mong pon, ada dan inlanga kapui tan ahi.

Lhakhat jouvin insung khat khosunga ahung cheng lut uvin in’gem kisong chu haosapun amaho ape tai. Ahinla akichon lut nilhah ma mauvin alung mong thei tapouvin mu anei neiyuvin ahi.

Nikhat kachen inneipa jah a, “Hepa, jan tengle ipi mu nanei jiu ham?” katin kadongin, amanjong kicha thim tahin kajah a aseiyin,
INNEIPA: “Boi, jan nidan 12 velleh husan gimnei tah tah ahung kija jin, chuleh numei chapang khat laina tah a kap a apa akougin akija jin, numei chapang ni insung le polanga kichem kamu jiuve,” atin ahile kati ajan kakicha lheh jeng e. Hiti pia Hatshiʼn hiche in a um dinga eijol chu ngol kasa lheh e.
KEIMA: “Hepa, chutia gimnei ahileh mun choma um jengun lang hiche in hi haosapa koma kiseiyin tin kiphet tale phante,” katin amajong anomin haosapa koma kasei lhon tan ahi.

Hiche kuma chu keijong youth club secretary kahin thule la aboi sehleh haosapun eihin min phah jingin ahi. Inphet jeng ding chu haosapa anom tan ahi. Ahinlah Hatshi kakoma alungnom tapon lhase tahin kajah a aseiyin, “Heu, chutia hiche inkhu naphet uleh nachunga kalhase ding ahi,” atin, chuin kapui dohin ajah a, “Nao, idinga hiche inkhu nahiti it lom lom ham? Ahoilai khu nop nasahna um ham?”
HATSHI: “Heu, hiche in jeh a hi hung kahibouve. Hiche in kamu tengleh masanga kanu le kanao toh kanaumna munu toh akilouvin keidin lungmon aume,” atin hiche phat chun haosapu koma kaseiyin kaphet tapouve. Ahinla koima vang avelin aum tapoi.

Chutia insung khat a kaum khom jing laiyun keitoh kicheng dingin Hatshi akiphin phin tan ahi. Ahinla kanule kapan ajah a, Chuti louvin ucha bangin umjo lhon tang o,” atilhonin ahinla Hatshi vang anompon, kanule kapa jah a, “Henu, ka-u Minlal kalungset e. Amatoh kaum tengle kalung amongin kagentheina le kachagat hinkho kasumil e. Amatoh kakichen louleh kahinkho sunga kagenthei ding ahi,” atin kanule kapan jong alungset jeh chun datei tei ding chu anom lhon tapoi. Hijeh chun nikhat kanule kapan kajah a, “Boi, akoi dang kiti jongleh aphanan, hijongle nanao Hatshiʼn nahin lungset jehin amatoh kicheng jeng tang o,” atin kanule kapa jah a, _“Henu, kada poi. Hijongle Hatshi thuhi achen achaiyin kahe nomin kakhol doh kahsen vang kichenpi ponge. Hijongle ama lungnop na dinga vang kakingaipi ding ahi,” katin hicheva pat chun dongma bolin kahin bol tai.

Nikhat kapuiyin kahaiphung komuvah loikhat kasemin kahotin amajong akipah lheh jenge. Chuin kajah a, “Heu, nang koma kaumle anom pen e,” atin chuin loi katuhin Hatshi koma,
KEIMA: “Nao, lungset hinkho man khompi dinga neideiyam?” katileh mailhaiselin aumin amel vang vetnom nom aume. Chuin ajah a, “Nao, kahin lungset in kahin ngaiye. Kahinmu nia pet chun kahin lungset e,” katileh akap tai. Chuin kalhemin, “Nao, ibola naka ham?” katileh aman,
HATSHI: “Heu, kahin lungset e neiti chu kajan mang ham katah ham kahe chen poi. Kakipah vale. Ajehchu kahinkhon koiman hichan hin eilungset kha hih laiye.”
KEIMA: “Nao, tun vang nahin lungset jing thei ding nakimu tai,” katin akipahin,
HATSHI: “Heu, kenjong kahin lungset e,” atin hiche nia pet chun kakingai pan lhon e.

Phat le nikho ache che tan nikhat kachen masang laiya nupi khat le achanu teni thusim kholtoh dingin Sugnu langa kache tan ahi. Kalhunin Pu Thonglim koma, “Hepu, masang laiya ikhou kisat masang jep a tua khomun chet a thinglhang lei anabol meithai khat le achanu teni thusim neisei peh tango,” katin, chuin amajong ading dohin kajah a,
PU THONGLIM: “Tupa, ibola nahetnom ham? Thupha jong ahipoi.”
KEIMA: “Ahipoi hepu, tuchan hin husan akija jing nalaiyin kagenthei lheh jenguve.”
PU THONGLIM: “Nangle kei phothip thei hoi ahitapoi. Amavang lampi khat aume. Hichu ahileh achateni anavuina mun chu holdoh un lang agu achang laidoh uvin; chu joule chun lhanmol a athisa hotoh lup khom sah uvin. Chuleh hiti ding ahi: nangin jong hiche chapang teni lah a a-unu chu nakichenpi tei ngai ding ahi. Achuti louleh khoh cheh cheh ding ahi.”
KEIMA: “Hepu, amala sot a thitaa iti kakichenpi ding ham?”
PU THONGLIM: “Hiti ding ahi. Hiche chapang teni lah a atah jo nu min chu amin Hatshi akiti (chutah chun kachom mang dehchet e). Amanu lhagao chu nungah khat sunga lut intin, alhagao chu hiche nungah nu sunga chu pansaa nakingai lhon ding ahi. Chutia nakichen lhona ahitengleh chapang nu lhagao chu nungah nu sunga kon chun potdoh intin pha ding ahitai. Amavang hitia chu nabol louleh nahinkho boithei ahi. Ajeh chu namelso akonin kahe theiye. Mujong nakimuto lhon tai. Tun asetna lam ding gellouvin lunglen tah kengin lang nabol dia lom ho chen lang gabol tan,” atin kichale lungdong pumin inlam kajon tan ahi. Kalel vangin kagil akel thei tapon, kadang bou ago go jengin tuijeng bou kadon don tan ahi. Chuleh tehsepu thusei chu kati aja valin inlut ngam talouvin kanite ina kaum den tai.


Aban Part II anasim jom kit ute. Kakipahe asim jouse Pathen in phatthei boh tahen.


©️2019, Crosby Haokip, All Rights Reserved.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleELECTION LE POLITICS HI UCHA PACHA AHI
Next articleEINI HINKHO-IV

LEAVE A REPLY

Please enter your comment!
Please enter your name here