Home William LUNGSETNA DIHTAH-II

LUNGSETNA DIHTAH-II

165
0
LUNGSETNA DIHTAH
LUNGSETNA DIHTAH

Ngailut Thusim

By: William Lhonga Madrid.

william kwc writers
william kwc writers

Thinglhang khoneo khat’a hin Anjali le anu hi acheng lhonin ahi. Anjali senlaiya apa hi Cancer natna jeh a anathi ahitai. Apan dalha tajongle anu hin achanu Anjali khankho ding gelnan gentheina tamtah athoh in, achanu chu nikho khat le amitdoh teina din ajochanin pan ala jingin ahi. Anu hi mimelhoi ahijeh in aloipa thinung chun pasal tampin ajol’in, ahinla Anjali nu hin injole kachanu hi hung genthei khante atijeh in jithah neikit ding vang agelthei tapoi. Gentheitah in louna atongin, sumlepai halkhat khat amuhoa chun achanu semnan amang jie. Achennau vangkho chu thinglhang khoneocha bou ahijeh in School jong akisuhpon, chule class-iv chan bou aume. Phat le nikho chaldungjuiyin Anjali jong atahsa akhangtou touvin, ahetna le athepna jong nitinin akibelap jinge. Akhouva Class-iv umchan chu khatvei dinga Anjali hin asimchai ahitai.

Anu chun acha Anjali toh kikhen kang ding chu hahsa asa lheh jengin, khochoma lekhasima achedoh ding chu agelmo lheh jenge. Ahinla khonung teng achanun aloi apai aphahlel khah ding chu ati aja kit’in, hijeh chun hahsa sa lheh jongle achanu mitdoh ding deinan achanu Anjali chu lekhasim din Town sung khat’a agathah tan ahi. Anu hungkile kit ding kon chun akikoi lhonin senlai bangin akap jeng lhon’e. Ajeh chu anun jong Anjali chu chanu changkhat seh a anei ahijeh chun angaima ma jengin, Anjalin jong chunle joa aneikop jeng anu chu alungmonpi ma ma jeng kit ahi. Anu anglum dalhaa phat sotpi munchoma aumding chu hahsa asa lheh jenge. Anun Anjali maiya lonlhi chu athehhul peh in, ajah-a “boi, kap hih-in; tun genthei jongle chun khonung teng nakisih louna dinga lekha kasimsah got nahijoi. Naloi napai nung naphah joulou ding hi, nachunnu ken kagelthei mong monglou ahi. Hijeh chun lekha hasimin hinsimin lang, lekha nathep’a Sap’a nahungpan phat le Jeep le Car a neitousah ding ahi. Keiman thinglhang na hatoh in tong ing ting, nangaichat jouse inlanga kona kahin suhbulhitpeh jing ding nahi. Boi, kei kache ding ahitan, kachenung teng kei ngainan hungkap kit tahih-in. Naloi napai lah a lhatdan hungthemin lang, Pathen le mipi ngailut thei din hinkho hinmang jingin. Nanu keiman jong kataona jousen hingeldoh jing nange” atin, achanu chalpang chu khatvei achop’in inlanga din ahungkile kittai.

Anjali chu Boardinga aumsah ahitai. Anun adalhah nung chun Anjali chu kingaise tah in aumin, khatvei veile anu ngainan alhi jong ahunglongdoh jin ahi. Phat sotpi anu ngainan mongmo tah in hinkho amangin, sunle janin anu bou agel jinge. Phat ahungche chen ahile, Anjalin jong loile pai ahinhaojep jep tai. Aloile apaiho jal chun Anjali jong alungmong jep jep tan, anu angaina jong ol ol’in ahungdailha jep jep tai. Anu chun nitinin louna atong jin, johthei thil aneikham kham chu ajoh jin, Anjali ngaichat jouse chu kivat louhel’in asuhbulhit peh jinge. Janteng Pathen komin atao jin, Sun teng ulsa long pumin louna atong jin ahi. Vacation amuteng Anjali chu khosungah ahungpotdoh jin, kihomtho tah le kilhalel tah in anu toh hinkho amangji lhon’e.

Kumle lha chaldung juiyin Anjali jong atahsa akhangtou touvin nungah pilhing ahung hitai. Lekhasimna lam’a jong graduate aphatan ahi. Achanu pachanna hole lolhinna ho chu guhthimin anun anakipahpi jin, mitlhi long pumin Pakai komah kipahthu seiyin taona amangjie. Masang bangin Anjali chun suty jong anei behseh ji tapon, suty amukom jongle sutding/bolding atamji jeh chun khosunga chelouvin aumna mun’a chun suty jouse jong amangchai jitan ahi. Nungah melhoi ahijeh chun akoma lungset thimthu lelding tangpa jong atam lheh in, chule loile gol jong tampi aneitai. Aloile agol ho chu mihaosa cha jong tampi aum’un, aloile agol ho umbang banga umding atiji jeh chun phatseh a anukoma sum athum jingtan ahi. Anu chun achanu mitdohna ding ahipoule tin, na hatoh in atongin sumlepai holnan agimlih deh deh jengtai. Anatoh acholji valjeh chun khatvei veile anatlo jin, nitinin atahsa jong akemtul tul’in, tehlam amano cheh cheh jengtai. Hitia adammoa toh le tham abolthei lou teng chule bat le thamin sum aholjin, ahungdam kit teng bat alah ho chu asakit jin ahi.

Anutoh akimelmu khah louna kumthum ache jou nungin, Anjali chu anutoh kimuto din khosunga chedin akigongtai. Acheding kon chun aloikhat’in “keijong nakhouva chu kahung ding ahi” atijeh in Anjalin jong ajahda theipon, agolnu Lily chutoh buolna vangkho jon din ahungkipatdoh lhontai. Aloinu chu ahinpui jeng vanga Anjali chun hungdaleh atiten ten jeng ahi. Ajeh chu Town sunga amani nomtah a um lhon’a, thinglhang khoa ache lhon’a agolnun akikhosah dan hou ahungmu ding chu jahcha ahi. Ajeh chu anu jong agolnu nu banga kisem jolsil sel hilou, chule a-in’u jong agolnu te in banga pahthit theh hilou, khosunga dinga agentheipen hikit lhon nalai, hijeh a chu agolnun ahinjui ding chu nomlou ahi. Ahinla agolnu koma “hung hih-in” atinom loujeh a ahinmohpui jeng ahitai.

Khosung alut lhon’a chun Anjali chu jachatna le kiphatlam nan adimset’in, alangkhat’a Lily chu a-itih a thinglhang kho mukhah lou ahijeh chun nom asa lheh jenge. Amani jong in alhung lhontan, anu chun achate ni chu kimelmuna chibai abol’in, “naote ni, anatou lhon’o ken cha gadom inge” atin, chadom din achetai. Anjali nu chun vohsedeh duh anakivonin, amel jong anachul lheh jengtai. Hichepet laitah chun agolnu Lily chun Anjali chu adongin, “golnu, ama chu koiba ham? ” tin adongtai. Agolnu thudoh chu Anjali chun donbut hahsa asa lheh jenge. Ajeh chu “kanu ahi” gahti ding jong ajachatpi ahitai. Phat chomkhat akingaito jouvin, agolnu Lily koma chun “amanu chu em? Kasohnu ahiye” tin aseitai. Achanun kasohnu ahi tia aseilai tah ajah jeh chun anu chun apona val’in seiding jong helouvin achadop pum chun amohdinden jengtan ahi. “Ama khankho ding gelna jeh a chol le nanga na kitonga, kagentheipina neokhat jong hepha louva kasohnu ahi tia eisei jeng vang hi-o” tia lhase tah a akigel gel laiyin phulouvin akiseplhun, thoudoh jou talouvin ahinkho achepai paitai.

Hitia phulou helouva anun hungkinungle kit lou dia adalhah jeng chu Anjali amuphat’in apona val’in hakan akaptai. Anu longdamsa chunga chun Anjali chu mitlhi dimset pumin akap’in, “henu, inati ham? Hungthouvo henu, idia neidalhah jeng hitam? Nangin neidalhah le kei ikati ding hitam? Henu, nacha khankho ding hi neigelpeh louding hitam? Henu, nei ngaidam’o! Henu, henu, hungthouvin lang, kamcheng khat beh in neidonbut tangem” tia aka ka vangin aphachom tapoi. Anuthi nung chun aboipi ding koimacha aumtapon, hijeh chun alekhasim ban jong asimjomthei tapon, nop le da kibangin hahsa tah in neh le chah, sumlepai, sil le chen akiholthu tan ahi. Akamchenga anaseidoh anu “kasohnu” ahi tia asei chu akisih lheh jengin, ahinlah kamcheng sohsa chu anunglah thei tapon, kisihna mitlhi long puma ijatvei aka vangin phat le nikho anakipel joutan ahi.

Sopi, hiche thusim’a kona ipi najildoh em?

Inule ipa hi iloi igol lah hihen lang, hoilai mun hijongle jachat louding ahi. Ahoimo nau, athenlou nau, akitup lounau ho jouse jong hi aboncha chate khankho ding gelna jeh ahibouve.

Inu le ipan eingailut dan hi leiset’a atepi ding jong umlou ahitai. Adeh a minuten achate angailut dan hi sang mong mong jeng, sohphah jouhoi hilou ahi.

A-oisunga ikijil’a kona eigentheipina ho, ikhohetthei masanga eigimpina ho, ilet nung geiya eikhohsahna hohi simjou hilouhel ahi. Sum’a sah ding hile anoitwiya eivahna manseh seh jong sahjou hilou ding ahi.

Minute hin seithei lou khop’in insungah gentheina athoh-un, agimpen le acholpenin jong apang jiuvin, ahinlah insunga agimnau le acholnau seilhom pen ahikit jiuve.

Ahinkho pumpiu chate din aphalthengsel jiuvin, thina changeiyin jong athoh ngapcha jiuve.

Mihem khat ithilbol ho ihung kisih teng hatlai nikho le damlai nikho anachejou nungsang anahinom jitai. Hijeh chun hatlai ni le damlai nin nulepa mantam dan hethem’u tin, athupeh juijingute. Injoleh ivaigei khah diu tijat aume.

Lunglut tah a hiche thusim sim jouse chunga kipathu kahin phongin, Pathenin asim jouse phatthei naboh cheh tauhen. Kakipah-e, keima William.

Copyright © William 2021.All Rights Reserved.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleLUNGSETNA DIHTAH-I
Next articleNa android phone mang iti nahol ding ham?