By: John Haokholal Haokip.
“I-Mounu u Lhingboi jong I-chapa’u atahpen Seiboi toh ahung ki-chen ni lhon’a pat kum thum lang cheta a tuchen gei’a cha jong nei nailou i-phung gui i-chang gui-u jong mang ding hita hi…! A-hung pienna a-nu le a-pa in-sung’a i-nungsol uva numei thah khat i-hol uva pha hita lou ham?” tia ka-tehpi’n lunghang tah mel puo pum’a kei jah-jah ding’a ka-tehpu kom’a a-sei chun ka-lai ana val in kahet manlou kah in ka-mitlhi chu ahung luong doh jeng-e.
Numei chun ji a-nei le cha a-hin’a a-lhunna te “Ngailutna” chang ding mong chu ahi.Kei jong jinei khat hina chun “HENU” tia ei-kou ding nao ka-dei lheh jeng e. A-thisen a kijil a-nao deilou a lampi pam lah a peimang le nao sulha atam jing lai’a kei bang’a naosen dei hon ka-nei theilou u-hi ka-gel le puohnat na’n ka-dim jing e.
Chate jeh a nu-le-pate ho ki-ngailutna gil ahi dan jong lung in ka-vop jing in. Ka-nao nei thei lou hi kei jong ka-ki oi-mo puon; Ka-jipa jong ka-oimo deh puon; “Pathen in a-phat a-lhin nailou jieh a ei-peh nailou joh ahi,” tin ka-ki lha muon jing-e. Ka-jipa vang chun cha ka-neilou jeh a lungneo ding’a ei-gel jing jeh chun a-jo chen’in ei-lha muon jing e. “Lhing, I-ding’a cha i-nei thei lhon lou jeh-a lungneo ji ah nahim? Cha nei jong leh chun nei hih jong leh haina hu ka-nei sung’a ka-lungset jing dia numei a-sang a-ja lah a ka-hin lhendoh a CHRISTIAN IN-SUNG NUOM siem khompi ding’a LUNGSETNA HUON sung’a pheiphung ka-hin sunkhompi jing nahi e. Pathen in phat khat tieng ‘Na-naobu Kot’ chu ei-hon peh lhon tei nante.I-chen chung’a lung oi-sel’a um hi lungsung damtheina ahi. Nitin-phattin in ‘Ka-hin Lungset Jing-e,’ ti hi hin gel doh jing jeng o,” ti-pum a ka-ji meldei-um ka-u Seiboi in ei-ngongkoi chun ka-lunggel a-nuom chuom lheh jeng e.
Hiti-a ka-jipa’n ei-ngailut’a ei-lha muon jing vang chun, ama in a aumlou tieng ka-tehpi’n a-moute dang-dang ho sang in ka-cha neilou jeh chun ei-dal bol lheh jeng in; kei ma sang-sang ah atute ho chu apom le-le jin,”Boi,Ve tau! ama hi cha nei thei lou i-mounu u hichu…!!!” ti’n nuoise tah in ei-hou jin; ka-puohnat ji vang chun lungsung’a kap pum-pum’a ka- jipa dei bang’a thoh hat tah a “KI-MUSETNA” le “KI-NUOISENA” gal chu thepchet in ka-sat jing e.
Natoh lang ah jong a-hahsa lai-lai chu kei toh ding in a-chuom koi doh jin; a-moute le a-chanu te hon ei-ki thuopi ding jong anuom kit dih poi! Ka-dampet le toh ding tham ding i-jat um jong leh thoh hatna jal’in ka-jou jing in,ahin,ka-dammo tieng le hahsa ka-sa lheh jeng ji-e.
Insung’a numei a-moute le a-chate i-jat um jong le ka tehpi’n toh ding tham ding jouse chu kei a-din a-chuom koi doh jing e.Mi-unu hinan ahahsa i-jat um jong le kimaituopi dia guotsa chu kahi jing e. Ka-pa le ka-nu insung’a ka-um lai’a ka-bu le ka-me du pen chu ka-lhun na te dia adu mo pen’u ahung hi jing tan; chi avat e,melcha athah jep e,bu agum jep e,bu alhuoh jep e ti-ho ka-hin ja jing tan lungchang heu-a ki-sun ahung bang jing tan; ka-pienna insung’a ka-um laija insah-inlhang a ka-che di jongle ka-insung mite ho kom’a seingai behseh lou jong chu tu’n vang insah-inlhang a ka-che di tieng jongle kicheh tah-tah a sei tei ahung ngai jing tan; Lung ngam tah a bu neh pet le ka-ang’a um jouse kam bem-bem’a jahcha lou tah-a ka-neh jing chu tun kiphat lam tah in ka-galso tho chol-chol tan; insung-in mai suh thieng,von-sop,tui khai,lhuung jut ho jouse chu niseh a ka-bol jing chu ahung ngai jing tai!
Ka-ji ngaitah ka-u Seiboi chu natong a akalsuong doh phatleh chun katehpi’n eibol genthei lheh jeng ji-e. Phalpi dap lai tah hin jan khat kaha dammo lheh jeng in,ka-lunggel ngapna ka-u Seiboi lah ana tohna mun’a aum jeh chun lunggel ngapna di mi kaneilou jeh chun ka-dammo na chu lonlhi luong pum in kathuoh tun-tun jeng in jing kah khovah kuon’a ka-imut lhah bep jeh chun jing khovah kana hetapon; bu hun dia ka-tehpin ei nga-nga jeng a katho lou phat chun ka-lupna lang chu ahin juon in lung hang tah in,”Tu chen-chen ipi nalup-pi ham? Tho phat na-het lou ham,na bu huon ding,na lhuung jut ding,na tui khai ding,na von sop ding nahet lou ham???” tipum chun tui bel a tui let set’a ahin dop chun ka-lu a-pat ka-kengto geijin ahin sung lha jeng in,adap toh kalhaset toh ka dammo toh sei ding jong helouvin ka-ding doh in bu huon na lang chu thip chet’in ka-juon in luonlhi pum’in ka-toh dia lom ho chu bannei chan katong jom jing e.
Hitia katehpi’n a-galmi bang’a ei-thet bol hi mihing hinan ka-thoh jou louna jong atam jin; Pathen in katehpi hi nikhat le alung gel ei-khel peh in tin mihing ho lah a eingailu pen’a ei siem peh thei ahi dan le “Thohhatna hi Galjona Ahi,” ti lung’a kinepna nei jing pum’a “Lungneng tah le Thohhat” tah a thuphalou tam tah ka-sei nuom vang’a hatah-a ki tiem jing chu kahi e.
Ka-jipa toh ka-um tieng ka-gentheina ho le ka-tehpi’n ei-bol na-ho ki-chen tah’a sei din ka-lung in ei-phut ten-ten jin; hiche ho jouse chu sei leng ka-insung’u keh-ni ki-suo ding ahijeh chun apha ding deina jieh chun ka-im mang jing jeh chun ka-lung in athoh jou lou jong hintin ka-u Seiboi chung’a ka-ki ngai pet tah a ka-mitlhi chu ahung luon a kahung ki-nuh dot-dot phat chun,”Lhing,I-dia na-ka hija ong??? Neo,Nei ngai val ji-em.Ken jong ka-hin ngai ji dan-dan hi o! Phattin in na-kom ah ki-um hen lang na-ki nui sah-sah jeng le ka-nuom val jeng e.Ahin,ka tohna ho jeh in lunggel ka-bang jou ji po-e. Na-gentheina ho jong ka-hin het thiem peh e. Thoh hattah in pang det jing hite o.Pu-le-pate’n,’Mi-upa le lam sah aki pel thei poi!’ atiu bang’a ei-ni din mun hi lentah ahi in,hijeh a chu hahsatna jong tam dihset ding ahi e.Mi-upa hi nen kholna bang’a insung ki-sam kai thupha-thuse lutna mun jong ahi kit’e. I-ki tho khom lhon’a pan i-lah khom jing lhon leh I-insung u-hi mi musiet chang lou ding ahi. Insung min-sietna le min-phatna jong ei-ni khut’a um ahi. Na-ka jong le na-nui jong le na-mel ahoi jing jeng e. Nui-nui jeng leh chun na-hoi dihset ding ahi e.Ka-nao chu nahoi tave o…,” tipum chun ka-beng ahin seh in ka nui-nui na ding’a a-lim a-mel jat chuom-chuom’a ahin bol phat chu ka-mitlhi pum chun ka-hung nui doh jeng-e. Hitobang a hi ka-ji ngaitah kom’a phatseh-a um ding chu ka-lung in angai chat pen chu ahitai!
Hitichun phat-le-nikho ho a-chal jing peh in katehpi’n jat chuom-chuom’a ei-bol gentheina jong chu ka-hin ki-mai tuopi jing e.
“Lhingboi,Na-tehpi kailhang ah a-che na ah kanglhei (Car) in atang kha’n Lou-Inn(Hospital) lang ah apuo pei-pei tauve! A-gim lheh jeng in louthem hon damdoh jong le atahsa bukim lou ding in a-sei uve,” tia ka-kho haosapu’n ei-hung sei peh chun ka-u Seiboh toh lunggim tah in Lou-Inn lang chu ki-no tah in ka-del lhon’in,amun kaga lhung lhon in ka-tehpi chu a-sei bang u-chun ana gim lheh jeng e. Lou thiem hon hoi tah a ni phabep avet chil jou uvin ahung phadom in,ahin,atahsa a-kong a-pat nuoilam se vang chu achat thei tapon,agenthei lheh jieng e. Ke’njong ka-tehpi chu nasa tah in ka-ve kol in atahsa ho jong kasuh thieng peh jing e.
Lou-Inn a lha khat val ka-um jou uvin Louthiem (Doctor) ho’n in a kahung kile kit thei na diuvin phalna eipeuvin; hiche ni’a ki-pat chun atahsa a-kong a-pat nuoilam chet thei talou ka-tehpi chu jalkhun chung ah ka-hin ve-kol jing uve. A-jun a-eh jong a-jal khun chung ah chun ka-suh thieng peh jing e.
A-tahsa jong anamset nalou ding in kasuthieng jing-in; nasa tah in ngailutna neitah a kahin vet kol jing jeh chun eivet dan jong phat che dung juijin ahung ki-khel jing in,eingailut chuom in kahe e.
Ka-bol jing bang’a nikhat in mai a ka sil guot jing lai chun mitlhi luong pum in ei-hin ven ei-ngong koijin, “Ka-nao,Nang bang’a numei pha le numei thohhat tuni chen in kamu kha nai poi. Boi,Na tehpi’n hichen gei’a ka-hin suhgenthei nung’a jong nei ngailut jing na lai hi kidang kasa val jeng e.Boi,Na-ngailutna kana hetthem lou jeh in lungset tah in nei ngaidam tei o. Boi,Hichen gei a kahin suhgenthei hi LUNGSET UMTAH MOUNU nahi e,” tia kap pum a ngaidam athum phat chun ka-ngong koijin,”Henu,Ngaidam sa nahi e.Hitia nalung ahung ki khel ding hi kana ngah lel val jeng e. Ken jong bol khielna kanei le nei ngaidam tei o,” tipum in kaki ngaidam tuo lhon e. Hicheni’a kipat chun kingailutah le kilungset tah in kahung cheng khom jing lhon in insung jong a nuom chuom-chuom khosung a a-tehpi toh kingailupen le kilung tuoh pen hina chu kahung chang in, pathen lungset na jal in cha le nao jong kahin nei thei’in, hiche ho jouse kahin kho a kahin kimaituopi toh lhon’in THOH HATNA HI GAL JONA ahi ti gel jing pum in ka-ji ngaitah Ka-u Seiboi toh haina hu nei sung’a CHRISTIAN INSUNG NUOM siem jing ding in chung leng va bang in laituol ka leng khom jing lhon tai!
