Love Story
PART – 1
Seiboi Khongsai
8473864702
Kalenna vangkho sung ahin numei pasal tium louvin jachat na hepha lou khop in lung kitoh tah in sun le jan in kana leng khom uvin numei holah achun Naokim kiti khat aumin ama to chun kaha kivop deh set in Naokim in jong eingai mama jin ken jong Naokim chu kangai lheh ji e; hiti chun phatsot pi lungset na hepha louvin loi le gol hinan nom tah in kahung leng khom lhonin akhon nan nikhat jeng jong kikhen thei louvin kahung um doh lhon tai. Nikhat ka School kai pet tah uvin Naokim hi ahung dammo in ka Teacher pau vin in langa kile din ahin sol tan hinlah Naokim hin kei eidalhah a achangseh a ache ding chu agel leh nopmo asah jeh chun ka Teacher pau kom chun hitin ahin sei tai. “Sir, kalel val deh poi kile da tange” tin ahin sei jin nguichet in keilam chu ahin ven atou thim beh kit tai, hitia kei beija achanga ache nom lou jeh a, lel jong le lel lou banga thu ahin sei chun eisu lungna lheh in, lang khat a kagel kitle kipah nan kadim kit in hinlah atou ding kona nguichet a eihin vet dan chu kagel le adom mo na alel ahi chu kahe kit in Sir pan ipi thu asei ham jong heta lou khop in Naokim chu kave ve jeng in anat athoh lel ding dan chu kagel in ahileh kamitlhi ahung valhan hetman louvin lungset jong kana chan man tan ahi. School kaki khen uvin Naokim loinu Thethem chu ka komin ahungin
“He Seiboi Naokim in khat vei hung tadin ati e” ahung tin, chuin keini jong Naokim kom chun kache khom lhonin Naokim in eihin mu mu chun amitlhi ahung valhan ahung kap doh tai chuin ken jong Naokim kom chun hitin kasei tai “Naokim ipi dinga lhisoa kap nahim, ipi tina him seijin” tin ka dong tai; Naokim in jong alhiso pum chun “Heu-Seiboi kei vang inlang in hung thei ta ponge ka dammo ka lel cheh cheh e kanu le kapa chu eihung pui dingin ana seipeh tan” tin ahung haka cheh cheh in ken jong Naokim thusei chu naka sa valin lang khat a lungset jong kana chan ahi jeh chun hitin kasei peh kit in “Kim hiti chun sei hih in, iti nang dalhah a ka changa inlanga kache ding ham i-che le i-che khom ding; i-um le i-um khom ding ahi, lungneo hih in kei kaum nai” tin, aloi nu Thethem kom chun kasei pai kit in “Them nangin Naokim hi ana um pi ta di o ken Auto kahol vah inge” katin Auto hol ding chun kaga chen hinlah Auto khat cha kahin mu jou tapon hiphat chun ken jong tahchapa tin aguh a kalungset Naokim chu poh tho ding kati tan ahile Naokim chu akipha lam in hi jong le aloinun “Naokim kipoh sah o, hi banga eingailu ding le eilungset ding aum le ipi kiki phalam ding ham, kipoh sa jengin ivai gei kah uvin che tau hite,” ahin tiphat chun Naokim jong ahung nui doh in ki phalam pum chun kanung lang chu ahin kol jengin ahileh koi hetpeh lou chun aguh in kaki pah lheh jeng in, hi phat chun aloinun kei bag le Naokim bag chu achoi jin ken Naokim chu kapo in, inn lam chu kahin joi tau vin ahi. Ka School kai na mun ule kakho u chu aki gamlhat lou vang chun Naokim kapoh a lam kajot vang chu kalel mong mong jengin nahchang salin kakho uchu haithe thun kaga lhun tauvin hichun Naokim loinu Thethem jong a in uva ache ding tah jeh chun kei bag le Naokim bag chu kikop motah in kachoi jin Naokim chu a in mun chan nu kaga thah in, a in nu kalhun lhon chun anu le apan lungdong tah in eina ve lhonin, Naokim nu chun “Seiboi Naokim ipi ti ham?”
tin eihin dong in ken jong gadon but ding katin ahile kalel val jeh chun imacha sei lou vin Naokim chu a Room sung in kaga lup sah in, room sunga kon chun kahung pot doh pai yin ka chol val jeh chun Naokim nu le pa jong hou pi deh lou vin kei jong athi bangin khangphei chung in kaki moh jam den jeng tai, chom khat jou vin ka lel nale kachol naho jong ahung pha dom tan, chu in Naokim nun cha eihin sem peh in cha doh toh Naokim hung dam mo dan ho chu phatah in kasei peh in, kei jong inn pha lou lai kahi jeh chun ka in lang uvin kaki nung le pai kit tan ahi. Anilhah in Naokim ve ding in che kaki gon ahileh Naokim le anu joh chu ka inn uvin ahung jo lhonin ken jong Naokim kamu mu chun kaki pah lheh in “Nao nadam hitam? Nang vea hung ding kaki got hichuo na hung lhon le apha jenge” katin Naokim in jong nuiheu chan eihin ven “Henge Heu-Seiboi Pathen lungset najal le nangin nei khoto na jala hung dam kahi bouve, heu na chung in kaki pah e” ahin ti chun kaki pah lheh jeng in kalungset na jong pung chal bang khun ahung chal tul tul jeng in, hiche pet tah chun ka genthei pi nale ka lungsunga um jing ka lungset nathu hi abon cha sei doh jeng ding chu kanom lheh jengin hin jong leh kison lel nale kiphat lam nan kadim min chule kivet da nale loi le gol hina khaugui jong hung tan kante tin sei doh ngam talou vin thuchom chomin kaki hou lim pi jon Naokim nun jong kei komle kanu le kapa kom’in jong kipah thu ho asei yin jan jong ahung sot thim phat in ama ni nucha jong ain lang uvin ache go lhon tan; Naokim in “Heu-Seiboi jingkah teng School adin neihin hopa o” tin, amit sih in eihin ven ahung nuiyin Bye bye jong eihin bolin ache pai lhon tai. Kei jong Naokim teni che doh doh in ka room sunga i-mu dingin kache pai tan hinlah imu thei talou vin Naokim chu kaha gel val jeh ham chun kalung sungin aki lang jing jeng tan, abang kom le Naokim hin jong asei doh lou vanga eilungset thou hite tin, kei le kei chu kaki lhamon jin thip beh beh in kamoh nuinui ji tai, hitia Naokim kagel jing lai hin jankho jong ahung sot cheh cheh in, pung kagah ven ahileh jingkah nailam 3:30 am ana lhing man tan, chu in kei jong i-mu mosa san kaki engbol in ahile chom cha khat ka hung imu in jingkah jong ahung hipai tan, kanun ei hung thou vin “Sei, Seiboi kithou to boi, injo leh School laplou vin um khan nate, Naokim in jong eihin hopan ati hilou ham?”
ahin ti chun kahung lim doh jap jengin, kei jong gantah in kaki thou doh in, kaki sutheng theng in lekha chom khat kaven ahileh kanun jong An ne dingin eihin kou pai tan, chu in ka lekha sim kahai jin ka lekha ho chu kaki koi tup tup in, an ne ding in kache tai. An kaneh jou jouvin School adin kaki gon kalungset nu Naokim chu kaga hopan kani lhonin School kai ding chun kache khom lhon tai, dukan mun khat ahin neh thei kaki choh pa lhonin, neh thei neh to kidai pum chun oltah in kache jing lhonin ahileh Naokim chun aneh thei chu ahin kineh chai phat in kei neh thei chu thip beh in eihin lahpeh in anui toh ajam atho jengin, gamlha thim aphah phat chun nadu chat em tin eihin dai nalai set e, ken jong houpi lou vin hung kile kit tei nante tin lungnat kaki bolthu sah in che talou vin ka ding den tan ahile nommo asah hintin nui the thun ahung kinung lekit in kakom ahin phah phat chun ken jong abeng chu hasi in kasi peh in, aman eibol na bang chun kajam san tan ahileh lungna akisa valin road lai lungtah chun amoh tou den jeng tan chuphat in ken jong alungnat ahi chu kahet phat chun kaki phalam kit in akomin kachen ka galhem tan ahileh koi lhepbi malah in ahung ki sensah cheh cheh in, ahung kagot phat chun kei jong kaki phalam cheh cheh in hitin kasei peh tai “Nao i’m so sorry neingaidam o kahin dai nahi bouve nungah pipi idia kap go nahim, hungo che loiloi hite school ilap jou lou ding ahi” tin kasei jin ahileh lunghang thim tah khun hitih ahin sei je “Chu banga ki no nahi le na changin che tang, kei na ipi kahi a nei ngah ngah ham,
lungbon nei lungset lou kahung lou ding ahi tai” ahin ti chun kalun ahbom te apha leu jenge, chuin ken jong “Ash…Nao nagel khel ahi bouve kei ding in Sana tabang nahi bouve, kalungset lou naki hisah ham ven, nangin neilungset masanga ken lungset kahin chan sana hi taije, hi jong leh, kiphat lam nale loi le gol ihi na lhon hung tan kha ding ham tia phatsot tah seidoh louva napul kana dou jing ahe,” tin kasei pai pai yin hungo che tai hite school ilap lou leh loi te lah a jachat ithoh ding ahi katin, Naokim in jong thu khat ahin sei kit in “Heu neilungset banga ken jong sot apat aguh a kana lungset nahi tai, numei kahi jeh a pasal koma lungset nathu sei masat ding ka jachat jeh a sei doh louva kaum ahin hijong le tunia ka imjou lou phat a sei doh thei na ding lampi kagel jeh a hitia hi kahin suh genthei nahi bouve, Heu-Seiboi nei lungset mong mong ahile kei adingin na hinkho lhum keijin hung pan jing ta o” tin ken jong “Henge Nao, nanga dinga thichan na pang jing ding kahi tai, nang jong kei dingin pang det jing in lang; eihin sukhen lhon ding thulam leng ijat in hung tam jong le tahsan louvin tunia iki tep nalhon hi sumil louvin tuhdet jing hite” tia kasei chai chai yin; Heu neipo o lam kajot ngap chata poi ahin ti kit in ken jong Ash…Naokim nang tah jong hina, tin kalung lel sasa chun ka pomtho in ahileh eihin ve jin kei u chu ahat e, kadei cheh che jie tin eihin dai ji in, kalel toh sei ding jong he jilou vin kamoh nui doh ji tai. School ahung nai phat in Naokim in jong lam ajot tho tan school jong kaga lhung ngal lhonin, chom khat kaki chol jou lhon hin class ho jong kahin la pan tau vin Naokim umchan ho chu aguh in kave jin ahile hoi kasa cheh cheh jengin, kalungset na jong akhang tul tul jeng jin ahi, hiti chun class ho jong nom tah in kahin la uvin school jong kahung kikhen kit tau vin inlam jon ding in, Naokim, Thethem, chule kei kathum uvin nom tah in, kaki dai phei peh uvin, chom lou kah in kho jong kaga lhung kit tau vin ahi.
Naokim to kaki lungset chu kanu le kapan jong ahe pon chule Naokim nu le pan jong ahe lhon poi. Hiti chun nu le pan hinhe doh leu eikhen diu ham tin aguh guh in kaki hou ji lhonin ahijeh chu kanu te kapa teu vin aki dei ding le aki ngai ding him him’in eigin mo pouvin hinlah kahung kidei nalhon jong ahung sot thim phat chun kho sunga khat le nin ahin hepan tau vin ahi jeh chun kanu le kapan jong Naokim to kaki lungset chu ahin hedoh lhon tan hibang chun Naokim nule pan jong ahin hedoh lhon tan, hinlah Naokim to kaki lungset nalhon chu suhkhen jou ding kahi lhon tahlou jeh chun kanu tele Naokim nu te chu aki hou uvin “I-cha te niu hi ipi thusei peh uhitin, suhkhen ding go jong leu hen icha te niu hi aki khen thei ding dan nin aum lhon tapoi, sukhen tama jong leu hen ahinkho lhon jong aset lo bep ding chule alekha sim lhon jong chavai lo bep ding ahi, ipi hi jong le aphat phat nan ve mai tau hite” aki tiu vin ahi. Hi bang chun Naokim to kaki lungset na lhon chu ani seh in achal jingin kakho sung le ka School jeng uvin jong ahe lou koima aum ta pon khosung veng sung in jong aki thang lheh jeng tan, hi jong le koiman Naokim to kaki lungset na chunga suhkhen ding lunggel ale seiset na ding lunggel la koima aum pon ahijeh chun Naokim to kipah tah in lungguh thim thu chu kasut khom jing lhonne. Hiti chun ka lekhasim lhon suboi lou vin kilungset hinkho chu phat sot tah kahin mang lhonin, Final Exam jong ahung nai phat in kanu te hou vin phatah in eihil lhonin, kilungset hinkho mang nahi lhon tah jong le na Exam na diu jong nikhat bou aki vattan ahijeh chun na exam sung lhon beh in lekha pha tah in kisim lhonin lang exam nahin chai lhon phat le nomtah in leng khom kit lhon nan nate tin eisei peh tau vin, Naokim le ken jong kanu te hou thusei chu kagel them lhonin ahijeh chun exam masang in jankhat Naokim chu kaga pui doh in Chung Chollha Vahnoi ja chun kaki hou pi tan ahi.
Kei : Nao, eini kingai lheh jong le hen ichun le ijon eini khankho ding gel naa eihil nalhon chu pha tah in jui mai tai hite, kingai hitin nikhat jeng jong kikhen thei louvin um jong le hen kihethem to hitin, i-lekhasim joh pha tahin boi pi masat hitin, exam ihin jo teng nom tah in lungguh thimthu lhavah noiyin sutkhom kit tai hite ong
Naokim : Heu kahethem naije, ichun le ijon eihil nalhon hi kipah tah in jui mai hite; hinlah na melmu lou in vang chom khat jong mong jou ponge heu
Kei : Nao ken jong namel kamu nom lou ding nahi sah ham? Hi jong le Exam ijo kah in kitim ham ham jo hite, Nao Tahsan na umkhom pi hih jong leng kalungset nan sunle jan in naum pi jenge, tivang hoilai mun in um jong le chun hin sumil hih in o
Naokim : Henge Heu iba kalo ding ham, exam jo ding kinemin ngah mai tai hite tin, ka chunga ahung kingaiyin; ahung lhison tai, ken jong Nao ipi dinga lhiso nahim, Huimut dia jong kahin phal lou nahi boi, lhiso so tahih in eini khankho ding gel najeh a inu ipan iki ngai lhon jong hena sa eihil nalhon hi kipah tahin sang mai hite tin, alhi katheh peh in abeng chu kagah chop peh in ahileh ahung nuiyin chuin keini jong ka in cheh lhonin kache lhon tai. Ajing in hoima pot lou vin ka lekha chu sunni lhumin kasim min nilhah lang ahung hiphat chun kisil ding katin Bathroom ma gah lut ding katin ahileh Naokim bang bang khat ka in lang uva ahung chu kaga gal mun ka lunggel a chun Naokim hitei inte tin, ahung soh doh chu kave ve jeng tan ahile Naokim ana hi tah bah in kain nu ahin phah phat chun ken jong lungnom mo thim tah chun “Naokim hoija vah le nahi a tutah a na hung ham? jinga exam ding nahet soh hitam?” kana tipeh in Naokim in jong “Henge heu kahet soh phat a kan ngai val jeh a na in lang uva kahung ahe, nalung hang ham?” eihin tin, kalung ahang poije Nao ken jong kan ngai ji dan, ana touvo henu te ni jong um chu kei hung kisil doh inge katin Bath Room sunga chun kalut in kaki sil chai phat in Naokim to chun jinga exam ding chu kave khom lhon tai.
Jan ahung hi kit phat in ken jong ka lekha chu kave kitin chom khat kavet jou hin kalung sung in Naokim chu ahung ki lang lang jeng tan lekha jong sim thei talou vin kalungset nu Naokim gel nan jankho jong ahung sot tan kei jong kichol din kalum’in ka imu tan ahi. Jingkho ahung vah in kanao nu Naokim to chun exam bol dingin school lam chu kajon lhonin ka room ding cheh u kaki hol tauvin ka lunggel achun kanao nu to room khat in kitou khom le kanom lheh jeng in hinlah room chom cheh a tou ding in ka hung um lhon tan chu jong leh ka oija hou vin exam sunga numei le pasal ki jot khom thei lou ding umkhom thei lou ding, akijot khom, aum khom aki mule school apat kai doh a um ding ahi tin thu ahin sei kit tauvin ahileh keini ding chun athoh ahah lheh jengin kho sung jenga jong noma ka lenkhom lhon lou nakah a school jenga jong hitia numei le pasal umkhom lou dinga thu ahin sei kit uchu kagel leh kalung ana val jengin kanao nu le kei ding chun lungnat tai lou upai dang aum ta pon ahi. Exam jong kahin bol chai tan Naokim ngah ngah jeng ding la oija hon hin hedoh leu danpal keh pa kahi a chule school a konna kaidoh a kaum ding jeh chun ngah nom jong leng ol tah in kakho lam’u chu kajon tan hinlah ka lunggel anom thei him him pon hiphat chun lampi mun khat ahin ka naonu Naokim chu kangah tan ahi. Chom khat setpi kangah jou hin gal apat in kanao nu hung chu kagah mun kaki pah lheh jeng in, Naokim in jong kakom ahin phah phat chun aki pah lheh jeng in hitin thu ahin sei in “Ash.. Heu neina ngah doh chu kaki pah val le, kei chula kingai se tah in
kahung in, Heu-Seiboi eini vang exam ahung hile igenthei lhon val jenge na” atin ken jong “Hichu o Nao iba ilo ding ham eini dei deija chon theila ihi pon, exam kachai jouva chom khat kangah le oija hon eihin hedoh unte tia hilai munna kana ngah na hitaije” katin keini jong kihou lim to kop in, in lang chu kahin jon lhonin kho ka phat lhon ding kon hin ka naonun kalel vale heu chomkhat kichol te ahin tin, kichol pi ding chula kivai gei cheh cheh ding ahi jeh chun kichol pi talou vin kalungset nu Naokim chu kho chan kapom tho tan ahi. Hiche nikho apat chun keini ding chun kimu to nale kihou naphat ahung um thei tapon genthei kaki sa lheh jenge, hiti chun exam ho jong aban neichan kahin pe jou tauvin exam kajo ding nikhou hin kaloi hoto chun kaki hou khom uvin jing khu le khat vei dinga loi le gol toh kimu tona ajo nale kilhah na dingin Picnic jong mang khom uhite kaki tiu vin hi bang chun exam kahin jo gam phat un Class 10 jouse chu kaki kou khom uvin Picnic man ding thu chu kasei khom tauvin ahileh numei ho jong athau anom lheh jeng un hiti chun jinga picnic manga che khom cheh dingin kaki vailhah tau vin ahi.
Naokim to exam kahin chai lhon vang chu anop dan dan chu sei ding bei ahi jenge, chule kaki lungset lhon jong kanu te hou vin ahet gelu ahi jeh chun olmo na ding aum pon chule nom jong kasa chom lheh lhonin ahi. Kanu te houvin Chapang kilungset bangin gel ujong le keini vang thichan na dinga kilungset hinkho mang kahi lhon tah jeh chun kanu te hou vin jong ima cha thu sei talou vin Nungah Gollhang lhingset ka hung hilhon na lungtup kahin molso lhon ding chu amon ngah tho jeng tau ve. Exam kajo nijan uva hin ni dang to bang louvin Lha jong avah emsel jeng in ahijeh chun kho sunga nungah gollhang ho jong lhavah noija chun atou khom sau sau jeng tauvin, ahijeh chun ken jong Naokim toh kipah tah a lhavah noija tou khom ding chu kana ngah lel jingsa ahi jeh chun kei jong kisem thei chanin kaki semin Naokim te inlam chu kajon phei jin Naokim chu kaga pui doh tai. Ka lungset Naokim jong ni danga akisem naho toh tethei lou khop in hicheni jan na ahung kisem dan chun eilhim ngol leu vin chom khat set kamoh vet den jengin ahile Naokim in eihin khoi jin Heu ipi chang nahim hungo che tai hite ahin tin ahileh kahung limjap jengin chuin ken jong Naokim kom chun Nao tujan chu nahoi vale, nahoi nan eilhim me katin ahile Naokim jong Hihihi tin ahung nuiyin Heu-Seiboi nang jong nahoi je, ipi nahin kineh khah hitam tin ahung tot in keini jong amasa a katou khom lhon na mun mama achun kache lhonin, hilai achun katou khom lhon tan ahi. Naokim in eihin kingai na in hiti chun Lhavah emsel noija chun lungna chim set in
Lungguh Thimthu chu ka sutkhom lhonin, kon ipi thu sei hin lang jouthu lam leng ijat in hung tam jong le kikhen lou ding in kitep na jong kasem thah kit lhonin, chule damma Collage kai thei dinga ka hung um lhon le thakhat a collage jong kai khom ding in kaki tem lhonin, hiti chun lhavah noija chun thu dang dang jong kasei lhonin kaki hou hou lhon tan ahile Thethem le adongmapa jong ahung lhonin hiti chun nomtah in lhavah noija chu kaki hou khom uvin jan ahung sot thim phat chun Naokim chu ain chan nu kaga thah in kei jong ka in lang uvin kache pai pai tai. Jingkah ahung hiphat in kaki hou nau bangin kalungset Naokim chu gapui pa ding katin ahile aloinu to chun keijoh chu eihung pui lhonin hiti chun khosunga bu som sim cha sun sun chu Picnic mang ding chun kache khom tauvin munkhat ahin loi dang hoto chun kaki suto uvin kabon chau vin ka picnic mang na diu lam’a chun kache khom tau vin ahi. Nom tah in picnic jong kahin mang pan tauvin, An neh ding ahung hiphat chun kaloi hon numei to pasal pang khom’u hite ahin tijeh uchun kei jong kanao nu to chun kahung pang khom lhon tan ahileh kaloi ho khat chun asei doh lou vang chun
Naokim chu ana dei chat dan ahin, hitia Naokim to kho hepha louva kipah tah a an kahin neh khom lhon chu ana thoh lel lheh hintin an kahin neh jou phat uvin kaloi hon kei chu vadunga twi gala ding in eihin deilhen uvin ahijeh chun kei jong vadunga twi la ding chun kache tai, kache kah cha chun Naokim ana deicha pa chun kalungset pen Naokim chu mun danga ana pui doh a ana jol dan ahin, hinlah Naokim chun ana nop peh lou jeh a pasal pa chu lunghanga Naokim chu avoh a gamlah achu ahin dalhah den dan ana hin, hiti chun ima chathu hepha louvin twi chu kahin kipoh in kahung tan ahileh kalungset pen Naokim mel him him kamu tapon hoija um ahi dem o tin aloi ho um nalah chu kaga ven hinlah ana um deh pon aloi ho ka doh jong lela ahe aum kit pouvin, hiphat chun ka lung agim cheh cheh in kamoh tou thim beh jeng tan ahileh Naokim loinu Thethem chun pasal pan Naokim apui doh pet chu ana mu jeh chun eihung seipeh in, kei jong gang tah in kaki pat doh loiyin kalungset pen Naokim um na lang chu ka del tho jeng tan ahileh Naokim chu lungna tah le lhase tah in ana kap kap jengin chu in ken jong “Nao, ipi dinga na chang seh a hilai ja um’a kap nahim, ole twi doma ka dalhah chu nalung natpi ham, nei ngaidam min o” katin ahile Naokim chun hitin ahin sei tai “Ahipoi Heu Pasal khat in ka dasa sa hilai ja eipui doh a iti eijol vanga ken nang chu to kaki lungset ahi tai tia, kanop lou jeng phat a lung hanga eivoh a ei dalhah ahi. Heu na melmu ding ka jachat man a hilai ja kana um den ahi tai, heu kei joh nei ngaidam in o” ahin ti chun…
To be continue….
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
