Love Story
Writer: S.Lien
Arrange: Naocy Haokip
(Part – Three) Final Episode
Recap…….
Apot doh phat’uvin Kanu leh Kapan ka room’ah eihung nailut lhonin….
Kapa chun athu umdan ol chan aseiyin, Kanu vang chu,
Hiti lom loma nasa leh hanthem ahi lam jong kahe poi, ahan naho pi chu hin seida jeng inge jachat jat jong aume mihet din jong
Kenjong kahung lunghan thim phat’in Sesem toh kakingai lhon jong kasei doh tan ahi,
“Koi kho kelcha ham chom deh dingham” ti thuchih um ahi chu geldoh lou hileng che jan chun ipi kaso kahe hih-e, Innsunga Nute ho atamjo pi hi, Pasal seiding jong otlou, apasal sanga thunei na lenjo danin akikoi gel’uvin, Mou Nohjam, Itu icha insunga hung lha ngamlou, Chanu Pasal nei naa thu aganei jeh a achanu chengthei lou tiho jong khu Nu akon hung kipan ngenchang ahi kahin gel leh, Kei Nu bou hi akhoh/anasa ahipoi tichun kahung kilhem bi ham hamin ahi.
A Loupinau, Ngai aumnau, Agenthei nahou lang igel kit lela Mihem lah lah a Nu hi apoimo pen Achate lungset jeh a genthei jong leh pang ham ham ahi kit jeh’uvin, Lhaset a nohsan thei ahikit pouvin ahi.
Ahan chimdeh phat chun a aw (key) ahin sunemin
Boinu, Nanga ding kagel jeh a hichan chu kasei ahibouve, Phate chan gel lechun dih nasah di ahi,
Melhoi hi phat chom cha ading bou ahin, Neile gou kiti hi Damsung khel langa itu ichate ding chan a det leh Lungmon um ahi,
Chapang lunggel dinga chu Ingaitah to kichen chu nop umpen ahi, hijongleh kum Som jouleh, Melhoi na jong hung chul tantin, Ina deilou ho tojong aki kheh na thupi talou ding, Ahao ho toh kikicheng leh Idamsunga nomtah a ki um theiding ahi chu nahet them ngai ahi, ahin tin
Kei : Henu, Kei gel danin Ahao ho leh Avaicha ho jong hi Damsung adinga Pathen gotsa khel khel hidin kagel poi, ahao hojong chomkah louva in-gap leuva khe lha thei, a Vaicha ho jong Pathenin pha asah leh chomlou kah a dingdoh thei ahi, Na sei chu Kei nei lungset jeh a kagenthei khah ding na phallou jeh ahi ti kahai pon kakipah-e,
Hijongleh Ken vang ka Lungset tah khena Aphatlou, achatvai henasa sa a sumdei mana ahaosa khat moh kichenpi jeng ding chu, Mi tha-se ho lunggel bou ahi tin kalan ka nom thei mong mong poi, kati peh leh, chomkhat chu a khongai geh guh-in,
Kanu: Ven, kei jonghi Gollhang melhoi tah khat toh kana ki-ngai hija, a inchenu kavet leh hahsa kasah jeh a ka ngai sa sa a ka ki khenpi a Tua Napa hi Hoimo khehkhuh jongleh Sepai ahi jeh a kana moh kichenpi leh, tua hi nomsa ma kahi jeng tah hila tua kapan na jonghi napa sum hao jeh a, abol thei ho sum kapeh guh leh A them ho jouse sanga Kei athemmo pen eilah jengu ahi, ahin ti laitah-in Kapa anunga tou chu ahin gel doh-in, agah ki nunghei leh Kapan sal let lut’in ahin ven, Sei nalai tangem, ahin tileh, sei jeng ding jong he louvin ….i i Napa hi mi phatah ahin amel jong hi hoi cheh cheh ahe ahin ti doh tet tut’in
Kapa: Kamel jong hoi cheh cheh ahileh, Nuthoi hel’in gachenge, atia apot doh leh anunga Kanun, Julipa atia adeldoh chu kamu leh Kanui jong ajan Choh jong kasa e, ahoulim leh akoma koi umham jong donlou ho hi.
Apot doh doh lhonin jun kaga kithah-in kot kakamin Sesem inbox lang’ah kalut kit ngal’in ahi,
Kaki hou na jouseu chu ka seiyin ahileh ama jong akipah lheh jengin, kisonlel/kiphatlam ho sei talou dingin kathumin ahileh aman jong thumang tah in chelang thu chu asei tapoi,
Thu iham ahungti leh apet pet’a kigo jeng thei dinga ready sa a um dingin, Sepai galmun a umho bangin thu kapen ahileh, amanjong
OK ok ahin ti vanglah-in Ka Mission uchu lolhing teidin kaki guh hou toh tauvin tu chun lungmon na kalbi khat chu kahin chon thei pan tauvin ahi,
Hiti hin thu khat kagah thot’in
I kholjin nagam hi kolselah gom thuh tah tah lah ahijeh-in ichih thei hung ngai lheh dingin aume, Tua gal lang khat langa kidokai ilem na ding Lei jong hi Lungmon na lei akiti vangin lunglhahna lungin apolong jouse aneh chai ahijeh-in ilem loi loi louleh hung chimlha thei dingin kamun ahi, agal ikai nading mun jongkhu ling le khaova dim ahikit jeh-in asat ong nadinga chem a langtoa hemkhat ikipoh jing ngai ding ahi o, chelai mun khu i kai doh phat leh ilungtup na mun chu kigalmu pan bep di hinalai ahi,
Hitia chu kagah dai leh
Hiti hin ahin reply taget’e
Wauu !! Nathu sei chu Kamanga kamu khah lheh lheh toh akilouve, ipi pi jong nahin sei doh ji ham katha anom tave, hijongleh chem alangtoa hempa vang chu poh da hite o, adanger val’e, kanunga na hung di hija kahin lapkhah lo ding kati aja bouve,
Ahin ti e.
Kalungthima chun koima jahlouvin
Thainelou ding pa cha hichu o angol ngol toh Kangai tave o, Hoilang Gollhang melhoisel ngol thit thet kitoh kha hamo, munthip khat’ah….. Ih !!! aban sei dange na kamtam thei theiyutoh.
Jan jong asot tan jinga natong di ahijeh-in Mangpha kathot’in, Data ka off tai.
Ka phone a pung chu kavet leh 1:15am ahitan, adihlou khat ham kati hel’in ahi,
Ka ihmut jeng theilou phat’in inmai langa kaga potdoh leh Van chu a thengset’in Lha aumlou vangin Valpa ahsi hochu a emsel’uvin Ahsi somleng hochu thanom tah in amadon don uvah akikho jet jet’uvin, January Jan Phalbi huitheng chun nangbou nahitai a ihmu loulai eitiu hileh kilomin dot tah-in eimut hel hel’in kunjih lah dunga ganhing neo mukhamlou ham det det holeh jan daitwi inmonga va chet chet gin tilou chu thom jah ding aum tapon keijong thomhao tah in Koima hou theiding aum tah lou phat’in Vandum chunglanga Valpa ahsi hochu golphan ka neiyin, Mangphauvo kei Samang jal mai tange katia lum dinga insung ka lut got phat’in ahsi ho jong chun bye bye eitiu hiding ahin, a phe jet jet’uvin ahi,
Keijong kalum tai…
Ka Nun thouvo Boinu pung sagi lhing ta hime ahin tileh kahung khangin, Kanu buhon chu kaga khel’in kahonmin phat’a kaneh uleh, Inn sa ding hojong ahung lhung pai tauvin ahi.
Kagah vet leh Sesem chu kagah muchet jengin ipi aseiyu ham, anui vel vul’uvin ahi,
Cheni chu Kanu jong Duty’n ache pon ipi jeh a chelou ahidem tichu monmo khat kanei ngal jengin, doh hel dila hijep lou ka velhi jingin, sun kichol phat’a cha kaga hop leh Sesem chu kamu tapon kadip a kohut jengin a loiho kadoh jeng leh Boss nun ahung koudoh hija atiu vin, kenjong ima loutah bang khun, achuti leh chehi acha di o ahungphat leh ana peuvin katin katungin ka dalha tai,
Hoilaiya akoudoh hija katin insunga kona chu kadalele leh, inn nung langa mi sat chul chul gin kajan kang chan kache pheiyin kaga ngai leh ana hi ta ngei ngeiyuvin, bangtoh kana kol kasu to in ka ngai leh Ka ginchat khel’in Kanu aw chu anem het hot jeng kit taget’in, ipi asei ham vang bang abit jeh-in kaja thei poi, agin kajah lou phat’a inmai lang kagah vet leh Sesem in cha chu ana don, kamu phat’in ipi lom lom aseipeh samlou hinte katin ka lung among dom tan ahi,
Chom khat jouvin Bolero khat ahung lhai lut voh voh in UThanpi chu Mailhai sesu in ahung kumin Theitwi (thumpsup) bottle lenpa tah khu ahin khaidoh loh loh-in,
Kanu jong inlhang lang’ah ahung soh doh in ka gapot leh kaki suto sao sao uvin,
Peh bon eihin pe loulai chun,
Ash!! Kipa aumji tave nang nahung leh choikhat nahin nei teiyin katileh,
Akipa lot lot chun anui fefu in kanu jong chun, aginchat bang eisah lou ham Thangpi chu to aki veto uvin ame sesu in ahi,
Khon kaga ladoh-in kaki pei bengbong jengin ahileh Thangpi chu lungmong kisa deukhun ahung tou ei ouvin, Seihih jong leh ka bol ding chutoh,
Sungin lang insa ho khu gahom masa o ahin tileh Kanun, hichu Boi Na-U seibang chun bol masa tang eihin tin
Na U seibang chun.
Kenjong, Kanun, Na-U eiti pa seibang chun kaga homin ahileh Sesem chun eihin ven me tit tet’in like👍 ahin hiti bol’in, UThangpi chun jong ahin mu hidi ahin a kipah deu tah in, koi lungthim jong helou pichun, akhutpi ku thet thut chun mi dan danin Sesem chu like👍 agah bol khumin ahi.
Nilhah in Sesem kom’ah, Tunia chu Kanun ipi nahin seipeh hamo ti message a kagah dohleh
Sem: Thuse ahi poi, Juli toh na kingai lhon ham? Atia kenjong thengtah a kasei jeng leh, hitin aseiye, Nungah Gollhang kingai chu thilse ahipon, hijongleh Juli khu min ahung dot’u ahin, peh ding peh louding vang thulhuh na aum naipoi, ama ka doh uleh Nangtoh kingai ahi thu aseiyin, a ipi chu hileh, kiveng jep’unlang mi mu a umdan kiveng jep’un, tiho pou asei ahe, Henu khu mi chingtah mi lunglen tah hibouvinte, ahin tin, chechu kajah phat’in, Ka ginchat khel’in Kanu chu chingthei kasan, kakipah-in lungmon jong umjep kasatan ahi,
Ajing jingkah pung 8 lah in Kanun Boinu, Na pu te inn’ah Medi gathah peh o, hon’a Bega hohi asei jing keiyuvin, atin Bega tamthim tah hin bag khat a asemin, da theila hilou, nom beh lou sasa chun kaki go tai, Lampia Auto eihung nga pi in kaki patdoh chet’uleh, Heater off louva kakoi chu ana off in gah kiti hen kiti chu aphone a ngeiphe toh asuton apau joh joh-in, ana mu nante katin kasei tapoi, Hmuia Veng ka phah uvin ka Auto tounau ahung se taget’in, kalhun nading chula Lingsiphai langtah, Auto chom khat’a touding katileh Atol pan janom kitlou kasemchai paiding ahitai atin, Inlang lhunkit vah kanop chutoh, thanvei kabang jeng tai, Kanu ka-call lela busy bing bengintin chomkhat jouva ka call kit leh kihou jou nailou, ka call kit leh ahin lan,
Kanu: Na lhunlou lai hamo Boinu
Kei: Ka Auto touna se ahe Hmuia veng’ah,
Kanu : Ash!! Aboi tave, atin call ahung tanin “Uisu Network,” katin, ka gah call kit got laitah-in eihin call chet’in
Kanu : Hmuia veng’ah Ka Auto touna ase e atin, chelang chu del uvo kintah-in……
Kei : ipi seiya kinei nahim kati phat’in..
Kanu: Hekateiyo!!! atin call a cut in ka call kit leh busy’n a um kit tai, Adihlou khat aume katin Auto pu chu cheng Som kapen, kame poh hi ahunglah diu ahi katin ka dalhan Inn ning khat’ah kakisel’in Police station ka call pai ngal’in ahi,
Police hochu Gypsy ni in ahung kikho lhung paiyun, athu umdan chu kaseiyin aguh a kanga uleh Bolero khat Auto koma chu ahung kikhamin Auto tol pu chu avoh deh deh jeng pet tah chun Police hon aga man ngal’uvin ahileh Amaho chun Anun eisol’u ahibouve ati phat’uvin, Ak butt in Thangpi opphang tah chu asuh peh uvin, Thangpi loiho mithum chu a Gari uva chun apeh lut tho uvin, Keichu Gypsy ah eitou sah-un, a Gari utoh gypsy khat chu Police station ah kalut’un, Thangpi jaonan Police gari khat’in ka inn lang uh a delsuh vut vut tauvin ahi.
Kei chu room chom khat’ah eikoijlyun ama ho room chom’ah, Window akon chun Kanu ahin pui diu chu kana ve ve jeng tan, ka lunghan toh ka jachat toh,
Chomkhat jouvin Gypsy khat chu ahunglut’in ka gah vet goh goh leh Kanu chu ahung kumin anung’ah Thangpi toh Sesem akhut’u nung kaleh a kikanin ahung kum lhah-u kamu tai.
Sesem chu kagah vet phat phat leh thisan asangkhol a mat jong kagah mun, Ka lungset val val’in “LUNGSET MITLHI” kabenga hung longlha chu theh jong kago pon, jactna jong hoilanga umham jong kahe tapoi, mitlhi kai neu nouvin kalhai doh-in, Police agamanpa koma chun,
Ipi asuh set’a chehi nahin puiyuham, katia ka kolchah jeng leh anah a thisan pot jong chu ahul nai pon asangkhol a valha chu akot deh duh jengin chechu kamu phat’in Ha ka in kakap’in, Kanu, leh Police ho masanga chun,
Thangpi chu amaichang tah kakoh-in, Jahmo pa ibol’a che hi nahin matsah hamo ipi ham asuhkhel, Jongsan Thui!!
Che nahin mat jeh a na ipi phachom dihamo, kati leh kalha ahung secheh nalaiyin seijom theilouvin kakap’in ahi.
Thangpi: Nanu khu kidoh tang ahin tin Kanu chu la, athip beh buh-in, milah’ah kahouse nom jep pon, hou ngal ngal leng kaha houset val di ahijeh-in Police Pa kom’ah
Sir, Ibol’a che mona neilou hi nahin voh uhamo, Mona bei chunga khutlha dinga Government in right nahin peh-u ahileh Keijong eivo tangem katin ka kapjah jah jengin ahileh, Police ho jong aki veto chet chut’uvin, Sap pa chun, nom mosa hileh kilom tah khun eihin ven, aloiho chu amit’in agah houpi jot’in ahileh Police constable ni in Thangpi chu In nung lang’ah akailut vut vut lhonin, Kanu jong chu aChom khat’ah akai lut uvin ahi.
Police khat’in Sesem khut kikan na khao chu ahung lhamin, Sappa (amanpa) Pachun eihin kui jot’in kaga che leh, Ama jong chu ati phat’in Sesem jong kapuiyin, ,
Police khat pa koma chun Che teni hi Bathroom’ah ppuyin lang a sangkhol ding T Shirt khat toh o, ati phat’in Henge Sir atin eipui lhonin akisuh theng jouvin Sap (SI) pa chun aroom’ah ei kou lut lhonin, Bolkhel ahidan aseiyin, Cha eidon sah jouvun
A jou leh Office a kahin kou diu ahin, ima kichat ding aumpoi o, hiti chun ana touvun o atin eidalha lhon tai.
Apot phat’in,
Sesem chu ka Lungse val’in,
Keijeh-a na thoh pat hita na? katin abengchu chop chuh chuh ding kanomin, hijongleh amun alemlou jeh-in kaki sum ham hamin,
Ipi jeh-a nahin mat’u hamo? Katileh
Sem: Nanun hichepa a kona ima jouse kipan ahe ahin tileh, ima jong kisei manlou, Police hon ei voh jeng phat’un, ka thoh leh thoh tange katia ima jong kasei lou ahi tai, ahin tin, seiding jong kahe pon, ka kol’a kamoh ka jeng laitah-in, police khat ahungin, kaki kol lhona kaka chu eihin mu phat’in, chomkhat adingin,
Ehem… Ahintin,
Keini jong kaki lhakang jot jeng lhonin, che phat chun,
Office a Sir in hung lhonin ati e, ahin ti phat’in ka che tauvin ahi.
Ka ga lut uleh Kanu chu ana kap pel pul’in, Thangpi chu, mai vum chei choiyin anatou ngeng ngungin ahi.
Thangpi chun eihin mu phat’in, lunghan melpu tah khun eihin ve let lut’in ima vang asei poi,
Police lah a officer khat ahung dingin, Paotinthang@Thangpi hi “Atemp to Kidnape” case a mat ahitan, ,Seinom anei leh 3minute phat peh ahi, ahin tin atou kit tai.
Thangpi ahung dingin
Ja umtah Lamkai hon nei ngoh nau chu thudih ahi, hijongleh, Keithu ahipon Nu Lamshi (Juli nun) eisol jeh ahi, ahintileh Kanu chu akindot jengin…
Lamkai pan, Tun Mrs. Lamsi in, ipi jeh-a Na Chanu chu mi Kidnape dinga nasol ham? hinseiyo ahin tin ahileh,
Kanu ahung ding doh-in Thangpi chu a hinkoh chang keiyin, Nachanu neipeh leh 5 Lakh apet pet’a kahin peh ding nati hilou ham, ahin ti phat’in, Lamkai hon hiti hin thu ahin tan tauve
Thangpi leh Lamshi hi a mo-nau kibang hijongleh Thangpi hi Pasal ahi jeh-in Lha 3 Jail a umintin Lamshi hi Lhakhat um ding ahi, Mona neilou Sesem chu lhadoh ahitai ti thu ahin phongdoh tauvin ahi,
Che phat chun Sesem toh kahung pot doh lhonin Damsunga Twi leh Nga banga hinkho mangkhom dinga Thichan a Kikhen talou din Lungtup Ka Molso lhontan ahi.
Kangai kalungsetpen lonlhi ijat’in long jongle mit’a kon hung longdoh lonlhi jouse abonchan lungset jeh ahibouve, “LUNGSET MITLHI,” longdoh chengin hinkhoa kipana eipuilhung lhontai.
(Beita)
“LUNGSET MITLHI” Love Story Part I-III chu hichan hin akichai tai,
Abul’a pat lunglut tah-a sim jing jouse chunga kipathu kaseiye, boina tampi um jongle jihchai ahitah jeh-in Pathen thangvah-in umhen.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
