By-Lelen Kipgen
I first love akimil jou poi, atiu hi natahsan em? Mite alungset khat toh akikhen jong leh laidang aleng un, phat chomkhat jou leh amilpei ji tauve. Kenvang tuni chanin kalungset masa leh lungset sangpen a kana lungset ‘Neinu’ milni kaneithei pon, phat khat khat le kalunga ahung kilang ji nalaiyin, phat chesa ho ngaiyin eilunghelsah jing nalaiye.
Kagollhan tillai, 2009/2010 lai chu ahitai. Hichelai phat chu tulai bangin Whatsapp, Facebook koima behseh in atham naipon, balance le SMS pack ikithun ngaset pouleh hijeng ahi. Mobile a video call le lim kithot tona aumthei loulai jeh chun Phone a kona anakingai ho chu abang kom leh jinei chaneisa pou toh anakingai kha jiuvin aboi lheh jiuvin ahi. Hiche lai chun mel kimuto louva Phone a kona kingai chu ana luck lheh e. Nupi papi ho jong akham khamin anakhalah thei lheh jeng uvin nungah gollhang ho sanga bolthei jo jong anaumda pouvin, nupa kikhen jong anatam lheh jengin ahi.
Keijong gollhang khat hina chun kaloi kagolho phone choi chu ka-otcha jin, jingkal nilhah a kanu le kapa koma kakiphin jing leh eitheichim lhon val hitantin, nikhat hi ball peh a kache, nilhah vaigei thima in kagalhun le kanun “tukal jingkal matah a natho ding, ball napeh tah lou ding, kholai naha len tah lou ding ahi. Sei nangai lou leh phone nachoi lou ding ahi” tin Phone khat eipe in kavet le Phone chu Nokia X2 ahin, kakipa dan chu lhakhat lhani sung chu kanu seisei kangaiyin, thungai tah in kaumin ahi. Hiche phat laiya Nokia X2 chu phone hoi loiya anakinei ahi. Lhakhat lhani jou lang vang chun angei ngei kahi kittan, niseh le ball kichem a kache jing jeh chun houset kane matchet jengin, kanu jah a “neiha houset val jeh a hiti gong kahiye” kati le “na-ihmut set jeh a nagon ahi” atin kakinil ji lhonin ahi.
Kaloiho toh kakisuhto ule phone number kasemthu jiuvin, ka call jiuvin numei ahile “dao ahoiye” kati jiuvin, ka call doh-u numei kiti pou chu kajol jiuvin, nom kasa lheh jiuvin ahi. Numeiho toh chun kimuto din kakitem jiuvin, kakimuto diu ni le kathimvet jiuvin ahoi lou le guhthim in kahin dalha jiuvin kana kethoh lheh jiuve. Phat chesa a ihinkho mandan ho geldoh a alunghel/angai lou aum ding katahsan poi. Mijousen hinkho thusim akinei cheh e. Abangkhat thusim chu kipana jengin alo in, abangkhat thusim chu gentheina jeng, lhasetna jeng ahi. Tunia nang hinkho thusim chu gelin, itobang thusim nanei em? Genthei lhisona thusim hijong leh achesa ihinkho chu igeldoh teng angai lou, alunghel lou kium lou ahi.
Nikhat hi kei Birthday ni ahin, kaloiho toh birthday party kabol uvin ahi. Kaloihon “ibol ngei bang uvin number khat call bolin lang numei ahile na birthday kit kah a navangpha ding, pasal naki call khah leh na birthday kit kah a navangse ding ahi” atiuvin, kenjong number ka type in dip-chah pum pumin call kabol tan ahile ginchat phah louvin numei khat in “Hello” ahinti chu kakipah valin, phone call kabol chu hepha talouvin kalam liu tan ahi. Ka phone achun “Hello.. Hello” ati ti jengin, ka phone call chu kahin geldoh in, gah kihoupi mai mai hen, tin kahoupi le a-o angei lheh jengin, kalung alut lheh jeng tan ahi.
Houpi anom lheh jengin, hiti chun kahung kihou jing lhontan, aumna mun kadoh le Churachandpur a kaume, atin “keijong Churachandpur a kaume” tin aumna khomin kadoh kit le “Thinglhang lang ** ho kahin, tuhin Phailen a lekhasim in kaume” tin eidonbut in ahile kaumna lhon anakinai lheh tan ahi. Kagollhan til ahi jeh chun, nungah hel dan jong kathem pon, ipi hijong le kijol patep hen tin nilhah khat kahin jol tan, lungsetna thu kasei tan ahile aman jong “ipi hijong le velkhat kimuto hitin, chuphat le hung kigel nange” atin, chuphat in kimuto din kahung kitem lhontan ahi.
Kimuto dia kakitepna ni lhon ahitan, keijong perfume kakikap namthet in, samthao (hair oil) kanu lhoh deh in, kakipot jolselin Phailen lam kahinjon tai. Nidang in nungah toh kimuto ding ahileh kaloiho toh ahon changin kache jiuvin, hiche ni vang chun kachangin, Changkhatpu bangin kagachen ahi. Kakitepna mun lhon, waiting shed kalhun in nungah phabep anaum un, kenjong call kabol le kanunga tounu phone chu ahung ging tan ahi. Keijong kakile heiya kavet le me siu seuvin eihin ven, “heu, Boilen nahi ham?” tin eihin dongin, “henge kahiye, nang Neinu nahi ham?” tia kale doh le henge, atin chibai kakibol lhonin, amel ahoi jeh chun kenjong kamuh Olive thao kiloi jol kabahsah tai.
Aloiho toh hung ahijeh chun free tah in kakihou thei lhonpon, aloiho jah ah “nangho hilaiyah anatou uvo, keinin hilai khu gapha vah lhon inge” atile aloihon jong ajat jat in eidai uvin, keini jong kahung kijot doh lhon tan ahi. Amelhoina leh akam thepna, aumchan akhohei chun hetman lou kah in lungsetna hongsunga eikailut tai; Buongmol, Pearson jot touna lamah kihoulim toh thon ol-ol in kakijot tou lhonin ahi.
KEIMA: Neinu, Phone a ikihouva lungsetna thu kasei chun ipi hijong le ikimuto phat leh seinange natin tuhin neiseipeh tan. Kalungset banga nei lungset ding kinem a ngah jing kahi.
NEINU: Heuboilen, lungset neikha lou lai kahiye; Ajo leh keidia kana hung hikhante tin kasang ngam poi. Nei lungset mong ahile phat chomkhat neipe nalaiyin; Keijong phaten hung kigelnange.
Hiti chun vaiham laitah, nisa noiya chun lungset thu kasei lhonin, jan lhavah noi kabahsah lhonin ahi. Kigelna ding phat chomkhat neipe nalaiyin, ati jeh chun thu chom chom kasei lhonin, hitia kakihou lai lhon chun hetman louvin gamlhapi kanapha lhontan, keini jong kahung kile lhonin, ka-in lam cheh kahin kijot lhontai.
Hiche lai phat chu Maxxy Minthang “Lungdeinu kom laitol leng din” kiti ho Thangcha “Ahsi kibom/Ni em banga” kitiho ana luck laitah ahin, thinglhang banga kholai dunga guitar kipoh a mao akibol lou vangin, jan teng insunga loi le gol ho toh kajan mao jiuvin, hiche lai phat chu koukit thei hileh kanom lheh jenge. Ani ani in mihem hinkho akikhel in “nalui nathah in akhel e” kiti bangin, mihem hinkho akikhel dungjuiyin hichelai phat a ana nungah ana gollhang ho chu tun jinei chanei ahigam tan, loi le gol amollem jong ijat hamkhat aum tan ahi.
Keijong Neinu melhoina chun kalungsung alodim jing tan, jingkal nilhah in Neinu bou kagelgel jengtan ahi. Ni le lha akiheiya achal jing bangin Neinu kalungsetna jong achal jinge. Jan teng call in kakihou ji lhonin kalungset dan ho kasei jin ahi. Jan khat hi kakihou kit lhontan ahile ginchat phah louvin Neinu in kalungsetna eisanpeh tan, hiche ni jan kakipa dan chu dongma neikha nailou kahitoh, abang kom leh hetlou kah in kana me tet-tut jie.
Hiti chun Neinu toh lungset hinkho kahin mang lhontan anom lheh jenge. Jan teng kholaileng in kache jin, anu le pan jong eihomtho lheh lhonin, abang kom leh kahung geh den jin ahi. Kalungset masa (first love) ahijeh ham; lamlhung jou lou ding lungsetna vang asang lheh e. Aman jong kalungset bang bangin eilungset in, khat le khat kijato in, kitah tah in lungset hinkho kanamang lhone.
Kum ni lam ahitan, pol 10 asim kum ahitai. Chapang cha hilhon jong leng kichenna ding hihen lang, ipi ding hijong leh pol 10 achai chu kangah lhonin ahi. Kumlhun in Christmass mang din thinglhang lang ajon tan, kipah tah in kakilha doh lhone. Christmass kichaiyin exam boldin ahungin, exam achaiyin thinglhang lang jon din aum kittan ahi. Anu le apan jong kakilungset lhon chu ahe lhonin, ima vang asei kha lhon poi. Lekhasim aban kajop kit ding akisei thei tapoi ati jeh chun, akho-u network aum ji lou toh, keijong akho uva che din kakihou lha lhontan ahi.
Hiti chun amaho chedoh jou hapta ni jouvin keijong thinglhang lang jon din New bazar (parking) kahinjon tan ahi. Akho uhi Henglep lang ahin, passanger gari lhai sun chu Shaktiman chu ahijenge. Kakisem smart thet in, lungdeinu kom laitol leng din Shaktiman a chun katoudoh tan ahi. Nilhah lang nidan 3/4pm vel’in akhou kagalhungin, Neinu in kipahtah in einalem e. Hichenia mailhaisela einalem umchan chu tunichanin kalungmit in akilang jing nalaiye. Akhou kalhun chu thingna louna ahing sitset in, huilhi anem hiheuvin hindan anom lheh jenge. Changtu/Butu lai ahin, ajinga kipat chun Changtu kahung kipan tauvin ahi.
Natong kha lou kahijeh chun hahsa kasah lheh e; Ahin kalungsetpen toh tongkhom kahijeh chun pontho tah in katong jin ahi. Natoh ijakaiya kakithopi jeh chun anu le pa homtho kachangin, inlang hung doh ding chu kagelpha tapon ahi. Jan teng kikhen lou ding leh lungtup molso teidin lungset thimthu khao bang kasut khom ji lhonin, sun leh thanom tah in lou kakon khom ji lhon e. Changtu akichai tan, kaum kal jong lha khat lam ahiphat chun inlam che din kakigo tan ahi.
Anu le apan jong inlam a kanu le kapa din Sagop eipohsah lhonin,
taona eimanpeh lhonin, kipah tah in eihin lhadoh lhonin ahi. Neinun jong khopam chan eihung thah in, inlam kaphah a lhakhat jou leh ama puiya kahung kit din kakiphatsah lhonin, lunghel tah in kahung kikhen lhontan ahi.
In kalhunin Sagop kapoh chu kanu kapeh le kipah tah in nalal ding ahi, atin bongnoi cha halhet in ei-om peh in kadon vaset in ahi. Nilhah in kanu koma Neinu toh kakitepna lhon kaseiyin ahile holly marriage din aseiyin, ahinlah mi jahchase kahijeh chun kagelmo jelin ahi. Hiti chun kakitepna lhon phat ngahlal in ni le lha kasim jing tan ahi.
Hitia kaum lai chun gelphah lou beh in kanu ahung dammo tan Hospital a kaumpiuvin, kei kaum lou leh aboipi ding umlou ahijeh chun kapot thei tapon, kakitepna lhon jong aphat anaval tan ahi. Kanu adamdoh jouvin agang theipen in kakigongin, kalungsetnu toh lungtup molso din thinglhang lang kajon tan ahi.
Mailhaisel a eina lamto kit ding ham ti kinem tah in kaga lhungin, ahin kalungsetnu mel kamu tapoi..! Louva kondoh khat tou hinte tin a-in lam u kajonin, insung kaga sunglhah leh anu le anaote anaum un, anun lhase tah in einaven ahi. Eidonbut lou jeh chun keijong kalung adongin, thipchet a kaum leh ahung lhisoh in, thil umdan ho eiseipeh chun chapang kan kakap tan ahi. Aumdan chu ken kadalhah jouva chu akho kom hou gollhang khat in anaboipi jing dan ahin, anoplou jeh a namphu changa anaguh dan ahitai. Hiti chun seiding beihelin anu toh kachuti ka lhontan ahi.
Kalha asevalin apet pet in kahung potdoh kittan, khojin kon ahitai. Inlam hinjot ding jong gari umlou ahitan, jotna ding kahet lou phat in khopam a thingphung chung khat a kakaldoh in, thingphung chunga chun kakap khovah in ahi. Kanu damlou boipi lou hileng kalungsetnu jong chan pong kate; Ama jong anop a che ahipon, tuhin kei ngaiyin kap kap inte o!! Kalungset chang jou lou, kahin hin a ipi kan tading ham, tin thi ding bou kanom tan ahi. Kaka nan kamit kamai apom lha tan, ahinlah eilhembi ding kalungsetnu mol le lhangin eikhen lhontai. Hiti chun khopam a thingphung chunga chun kakap khovah tan ahi.
Ajing khovah in Ccpur jon ding gari a chun kahung toudoh in, In kahin jontan ahi. kaka khovah jeh chun kamo thethu in angol kabang jenge. In kalhun in kanun kaumchan kamaiso hoilou chu ahet them jeh chun imacha eidong pon, ka bag eilahpeh in akoitup in, keijong ka room kajon in kakap kittan ahi.
Hitia kaka jing lai chun kanu ahungin, kangong akoiyin, kanu kamu chun kalhasetna akibe in hakan kakap kittai. Kanun ibola kap nahim tin eidongin, kap puma thil umdan ho kasei leh kanun jong kapohnatna ahet them jeh chun eikapin, kanucha lhonin kakikoi lhonin kakap lhonin ahi. Chomkhat jouvin kanun “boi, kap tahih in. Pathenin nanga dia agon hilou khat hinte; kap tahih in ama sanga hoijo le phajo nakimu thou thou ding ahi” tin eilhemin, ahinlah keivang lhepbi jou kahi tapon ahi.
Suntin jantin lunghel nan hinkho kamang jing tan, lungset mitlhi jantin along jinge; Gibang khen dia kaphal lou, ngaiyo nachunga kalungtup cheng hi lhiso kanan kamolso tai. Alamlhung lou ding kilungsetna vang asange o!!
Hiche a kipat chun keijong nungah kiti mong mong vet jong vetalouvin kaumtan, kaphat hoilai jouse puldou nan kana mang chaiyin ahi. Loi le gol cheng jong ajinei soh tan, keijong insung miten ahasei val jeh chun 2017 kum chun kei vet jong hilou, ka-inkoten nungah khat eivet pen uvin, insungmite kihoutoh dungjuiyin ji kana neiyin ahi. Ahinlah tuni chanin lungset khat bouva kananei Neinu milni kanei thei pon, velkhat khat leh kalunga ahung kilang jin, phat chesa ho ngaiyin eilunghel sah jing nalaiye. Kum ijat hamkhat chenung hitajong leh velkhat beh Neinu mel mu ingting lhahna thu kamchang khat beh sei leng kanom lheh jenge.
Numei chung changa seidin ‘kiguh’ kiti hi aphae tia tuni chan a ichep nahlaiyu hintem? Leiset chunga hitobang dan chepi hi aum ding katahsan poi. Ipu ipa khanga pat inachepiu Juneh aphapoi, itiuvin, inga uvin akichai tai. Numei guh kiti, ichepiu jong hi ahithei leh pailhah a pha ahitai. Hitobang mihem khat chunga chalohna hi Goverment danin jong aphal louhel ahi. Pasal in ahinkhoa achenkhompi ding adeitah, alungset tah akilhen bangin numei in jong ahinkhoa achenkhompi ding chu aman adeitah, alungset tah hihen. Chuti leh isempau, I-Pathen u lunglam hijo ding, iphatthei joh diu ahi.
Thusim hichan hin akichai tai. Lunglut tah a nasimchai jeh in kakipah e.
©️2020, Lelen Kipgen, All Rights Reserved
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
