-Lelen Kipgen
Lungset kiti hi ipi ham? Lungset hinkho hin mang sa ho thusei phabep ana veu hite:
Lungset in hou le vai akhen poi.
Lungset hi mitcho ahi.
Thina thei ngol nathei lungset ahi.
Jum le ja jong kichat neilou lungset ahi.
Lungset in khantum anei poi.
Mi masa ho thuseija kon a imudoh u chu, “lungset kiti hin gamgi(boundary) anei poi.” ti muthei in aumin ahi. Achuti le lungset kiti hi jalen tah ahi.
Lungset hinkho a ipi pi poimo em? anave kit u hite:
khat le khat kitahsan to na.
kingailut na.
kikhohsah to na.
kihetthem to na.
kingaidam jou na.
kija to na.
lunggel kipeh to na.
Hicheng hi lungset hinkho a dinga poimo ma ma ho chu ahi. Ipi jeh inem? hicheng hin pan alah jou lou teng lungset hinkho a lungtup molso nading gamlha ji ahitai.
Lungset kiti hi mi masa hon ana jotpa khang khat chu ahin khangdong hon jong ihin jotpa teidiu khang khat jong ahi. Lungset hinkho hi aman phat aumin aphat khentoh angaijin ahi.
Na tahsa mit vet a alhin manin dongma nei ding moh thanop hih in.
Na dongma chu nahinkho lhunga nachen khompi ding ahi ti kihet inlang alhen dan them in.
Dongma nalhen teng nadei jeh leh min najol manin kimoh ngaipi hih in lang ahina nahet doh thei nadin alhompen in kum khat beh ve in.
Dongma nei ding kino val hih in, ngahlel hihbeh jong le chun aphat ahung lhin teng nanei thou thou ding ahi.
Na dongmapa/nu ding chu nu le pa phatsah ahi jong thilpha ahi.
Christian tahsan dol a sei dingin vang nahinkho a ji hoi jipha nakimu nadin tao jingin.
Kakipahe.
