Fiction Heart Touching
(Mangcha & Pahhoi)
LOVE STORY
PART – 2
Seiboi Khongsai
8473864702
{ RECAPITULATE PART – 1 }
PART-1 = { Hi banga chu Pahhoi in jong mi genthei tah Mangcha aki thopi jing jeh a tua Mangchan jong Service khat aki mua, in le lou jong pha tah a akisah doh theiju ahin, chule Pahhoi jong athilpha najal la, aga chu aki thopi jing Mangcha mama chu to nom tah a kilungset hinkho aman na, ahinkho lhum keija Service nei te insunga nom tah ga cheng ding chu ahi mai tai. }
{ PART – 2 TWO }
MANGCHA LE PAHHOI “KILUNGSET HINKHO MAN”
PART-2 = Mangchan Service ahin kimu aphat chun anu le apan Pahhoi jol ding chun asol sol jeng lhon tan, chule Pahhoi nu le pan jong achanu lhon Pahhoi chu Mangcha to kilungset ding le aki cheng ding in avel vel in pha tah in asei peh jing lhon tan ahi.
{ Ipi jeh a Pahhoi nu le pan achanu lhon Pahhoi chu Mangcha to kicheng tei ding le kilungset dinga asei peh peh jeng lhon ham iti le, Pahhoi adam mo chunga athi ding banga Hospital a aum lai uva, anu le apan achanu lhon Pahhoi ajen na lhon dinga sum anei lhon lou pet tah a Mangchan Thilpha abol najal la, Pahhoi chu kijen theiya, dam doh kit ahi. Hiche jeh a chu Pahhoi chu Mangcha to kicheng ding le kilungset dinga anu le apan asol sol ji lhon ahi. }
Pahhoi in jong Mangcha chu aguh a, ana lungset chu ahin, hinlah Mangchan akom tah a lungset nathu asei doh khah lou jeh chun, phat sot tah Mangcha pul chu adou vin ahi. Lang khat a Mangchan jong Pahhoi chu alungset cheh cheh jeng tan sun le jan in Pahhoi gel nale ngai nan hinkho amang jingin, alung sunga um lungset na chu a imjou lou hel phat chun, jankhat hi Pahhoi koma lungset thusei dingin ache tan, a innu aga lhun chun Pahhoi jong anu le apa to nom tah in ana toukhom uvin Pahhoi in Mangcha amu mu chun “Aiya, u-mangcha, nahung ham? Hung touvo” tin touna ado peh in, Mangchan jong tot to kop kop in hitin agah seiyin…“Henge Nao, tuni lhah cha khat phat kinei ya, nang thum ding gunset a kholai ja hung kahe” atin touna a chun atou tai. Pahhoi nu le pan jong Mangcha chu ana toh naho kisuh jing hinam, tiho chu adong lhon’in, hiti chun chom khat thu dang danga akihou lim jou uvin Pahhoi nun “Mang, na nao nu to hung kihou lim lhon to, na pa to kei gaki chol lhon tange” tin ihmu ding in room lam’in ache lhon tai.
Pahhoi nu le pa ache doh phat chun Mangchan jong jahchat na, kiphat lam na tiho chu ponse paiyin apai lhan, ana genthei, ana vaichat jeh uva phat sot apat a sei dia ana got jing le ana sei ngam jilou lungset nathu chu hitin asei tai…
MANGCHA : “Hoi, sei nom khat kanei je, kasei thei ding ham?”
PAHHOI : “Sei tango, heu ipi thu ham”
MANGCHA : “Nao, nei lungset nale nei khoto najal uva, tua nom tah a kaum thei jeh ju ahin, avel in na chunga kaki pah e, chule Nao, henu te hepa te phat satna bang le ana ki hou nau bang in, kei jong Service nei kahi tan chule ina ngah lel jing bang in tujan apat in kilungset hinkho mang khom tai hite tia kahung sei gunset ahe, iti nagel em?”
PAHHOI : “Henge, u-mangcha, ken jong iti le lungset thu nahin sei doh dem tia kinem tah a kana ngah jing ahe, heu, kitah tah a nei lungset ding ahi pou le, kei jong ka hinkho lhum keiyin nanga ding in pang det jing nange”
MANGCHA : “Hoi, nang tailou eihethem ding, eilungset ding chule eikipah sah jing ding koima um tapon te, ka hinkho a chen khom pi ding le ki angkoi pi dinga kahin lungset nahi tai”
PAHHOI : “Heu, chun le jo lungdei lam le Pathen lungdei yin hinkho mang jing hitin, Nungah Gollhang ihi laiyin setna kiti ho vang ima cha bol poi hitin, agel jong gel da jeng hite, Pathen dei lam joh in iki chen masang in Thenna hinkho mang jing hitin, Thilpha bol jing hite na heu”
MANGCHA : “Henge Nao, nasei jouse adih e, Nungah lai Golhang lai ya theng lou tah a uma, Pathen deilou lam le Nu le Pa deilou lama hinkho man ding hi, kei jong kanom poi, gel jong kagel thei hih e, Nungah Gollhang tamtah nu le pa sei ngai lou va, Pathen deilou lam ma setna hinkho, nop sah na hinkho amanga tam jong leu eini vang Pathen lungdei yin Ikhanghoi le idam sungin thenna hinkho mang jing hitin, chule iki lungset na chunga lhep na ijat in hung tam hen lang eisukhen lhon ding melma ijat in hung tam jong le lunglha dai louvin, det tah in Pathen song jing pumin LUNGSET GAL SAT khom jing hite ong” atin, Pahhoi in jong “Henge heu Pathen song pumin Lungset gal sat khom jing hite” atin, thu chom chom in, chom khat aki hou lhonin, jan ahung sot thim phat in Pahhoi chu aimut ahung soh pan tan ahijeh chun Mangcha jong ain lam uvin kipah tah in ache phei tai.
{ Hiche jan na kona hi Pahhoi le Mangchan kilungset hinkho chu aman pan bep lhon ahi. }
Hiti chun Mangcha le Pahhoi yin nop tah le kipah tah in kilungset hinkho chu ahin mang khom lhon tan, nu le pa dei lam le Pathen dei lam jengin Thengsel in, set na tiho bol lou helin lungset hinkho chu amang lhonin, chu jong le ama sang lhon na lungset gal ajo lhon na ding le lungtup amolso lhon na ding in Pathen komin tao na amang jing lhonin ahi. Jankhat Mangchan adongma nu Pahhoi chu kihoupi din Chollha vah nouiya chun akou doh in, hitin asei tai..
MANGCHA : “Nao, iki lungset na chunga thilse hin bol ding le eihin seise lhon ding ijat in hung tam tam jong le inasei sa bang in Pathen song jing pum in, dettah in lungtup imol soto kah sen kei a ding in kitah tah in pang jing ta na?”
PAHHOI : “Henge, heu, nei song lel hih in, iki dei masanga bon nanga dinga kana pan thei le tua iki lungset nunga ipi dinga nanga konna ka gam lhah thei ding ham, ithemmo na beiya misei set midem hung chang khah ta jong le hen, lung lhadai lou vin pang jing hitin, phat khat le Dantheng in kicheng hite ong, u-mangcha”
MANGCHA : “Henge, Nao, Danthenga kichen ding chu henu te, hepa te kinep na jong ahin, chule kei kinep na jong ahi e, Hoi, chom cha khat namel kamu lou jong le kan ngai ji dan, phat jousen nakom in kium um jeng thei le kanom ji lheh e”
PAHHOI : “U mang, khokhat a ium khom vang in, ken jong nidan khat namel kamu lou jong le kaum anom thei jipoi je, hi jong le tulai misei se ding le Nungah Gollhang kilungset na chunga, akin lou beh beh a thunei ding le vaikhom ding atam tan, ching thei tah in einin jong hinkho mang jing hite na” tin, atou lhon na akonin aki pat doh lhonin, jan kichol din aki khen lhon tai.
{ HET DIA PHA CHU Nungah Gollhang in nu le pa dei lam le Pathen dei lama iki ngai pinu, iki ngai pipa to Then na hinkho man na kitah tah a Pathen gel doh jing puma kilungset hinkho chu thengsela man jing ding ahin, chule Numei hile Pasal hile koiman mitahsa khat du chat na mai maiya mi kalungset e ti a, kilungset hinkho manpi lou ding ahi. Ajeh chu nang jeh a mipha khat jong chu mipha lou tah soh thei ahin, chu kitle na insung mi nanu, napa, na u na nao te jong minse a mivet da chang diu ahin, chule nakho sunga le gam sung jong nang jeh a minse thei ahi. Koi hi jong le chonset bol chu nikhat le Pathenin achung thu atan tei ding ahi. Bible sunga chonset thu kisei na tam jong le hiche a NUMEI UCHA CHONSETE NI thu kiseina EZEKIEL BUNG 23/24 sung hi ana sim teiyin }
PAHHOI LE MANGCHAN “LUNGSET GAL ASAT”
Hinkho Thengsel’a Pathen geldoh jing puma Mangcha le Pahhoi yin kilungset hinkho aman na lhon, kum le lha phat le nikho ho jong ahung sot cheh cheh tan ahile, vangset um tah in agel phah lhon lou le aginchat lhon lou lam beh in aki lungset na lhon chu akho sung uva misei se nom hole kho sat kho lhanga Nungah Gollhang kilungset na chunga sei ding holnom hole kiboui nasem nom jing hon Mangcha le Pahhoi kilungset chu iti bolla suhmin set a, suh khen thei ahi dem tin, lungthim pha lou tah chu ahin gel pan tauvin, ahijeh chun Mangcha le Pahhoi chu nasa tah in adem mun, aseiseu vin, phat jousen asei se jing tau vin ahi.
Themmo nanei lou Mangcha le Pahhoi chu misei set midem chang lhon jong le, tohset, bolset anei lhon lou jeh chun, aolmo deh lhon pon, ahijeh chun dettah le kitup tah in kilungset hinkho chu amang jing lhonin ahi. Nikhat Mangcha le Pahhoi jong nom chom chom in kihuilha togom in Bazar in ache lhonin ahile akho sung uva nupi mithum to Hotel khat in aki suto un, nupi thum ho chun mipha tah bang le mi lungset tah bang chun Pahhoi le Mangcha chu ahou piu vin, apahcha lheh jeng uvin, Mangchan jong hitin agah seiyin.. “Henu te ho kipah ume thiljouse Pathen hatna jal ahi bouve, chule nang ho jalla ikho sung u jong mihet thei le miki neppi thei ihiu ve” tin, akho nupi thum ho chu agah pah chan, hiti chun chom khat akihou jou uvin Pahhoi le Mangcha chu hotel akon chun apot doh lhon tan ahi. Mangcha teni che doh doh chun nupi thum ho chun Mangcha le Pahhoi chu aguh guh in hitin asei se pan tauve…
Khat na Nu : “Gol teni Mangcha le Pahhoi kidei chom bol jihi, navet nom ji lhon hinai mo, kei vang kamit to jong akitoh thei hih beh e, nupa bang in kijot lele lhon intin, aki Pathen hetsah sah lhon toh, anu te apa te pum in kavet da beh seh jenge” atin
Ni na Nu : “Hingei chu o ba, akingai lut bol ule aki dei chom bol u jong khu ipi sot deh ding hai, ajo teng Ui le Kel hung bang nah tau,” atin
Thum na Nu : “Kahe ta hih e gol teni, a Mangchan ma mingai ngaiya service agah nei khule Pahhoi nu le pan jong Mangcha tilou leiset chunga service nei dang le Pasal dang umlou abah sah lhon na, achanu to Mangcha asuh tole ipi ba kiseibe dihai” atin athum uva chun Mangcha le Pahhoi chu hasei yin asei seu vin, hotel akon chun apot doh tau ve.
Nikhat Mangcha jong a office kikhen in Bazar agah hopan anu to apa ding in sil le chen hoi tah tah achon chule adongma nu Pahhoi ding in jong man khi hoitah khat le ponve hoitah khat achon, hiti chun achoh ding jouse aki choh chai phat chun khatvei ya adongmanu to cha aga don na hotel achun cha don din aga chen ahile hiche ni chun hotel a koima ana um pon, hotel neipa le ato khompi mi nibou ana um uvin ahi. Mangchan jong hotel neipa kom chun cha le neh thei ho athumin, thep beh atou jeng sangin tin, hotel neipa jong eimi ahi thou jeh chun nom chom chom in akihou limpi tan ahi. Hotel bol pan jong Mangcha aw so dan le alim amel chu phatah in aven, chule alunggel a chu hitin aseiyin.. “Hiche pa hi masanga lekha kaga peh pa chu hitei yin te, a aw so danle alim amel hi akilou tangei je” atin, Mangcha chu hitin adong tai…
HOTEL BOLPA : “Golpa, thu khat nahin dong inge, nahou lim dan le nalim, namel hi kamu khah sale kahet khah tona bange, oleh Mangcha nahim?” tin, adong in,
MANGCHA : “Henge, kahi e, iti neihet ham? tin, adong kit in, hotel bol pan jong phat masa laiya lekha aga thah thu chu phatah in asei peh tan ahile Mangchan jong hotel bolpa chu phatah in ahe chen tan, hiti chun nom tah in thu tam pin akihou lim lhonin, ajo nan Mangchan jong Pahhoi to ahinkho thusim lhon chu dit tah le phatah in abon chan agolpa hotel bolpa chu asei peh in, chule min jou thu a aheh set uva, suhmin set tei ding agot u jong phatah in asei doh peh tan ahi. Agolpa hotel bol pan jong hitin aseiyin.. “Hiti chuba hin te golpa, khatvei ya cha don dia na dongmanu to hung lhonna chu nupi thum ho chun napot doh doh lhon na chu, sei kita nasei set uva, ken la hiche a chu nang kihe lou lai” tin, nupi thum ho thu jouse chu agolpa Mangcha chu pha tah in asei doh peh tai. Mangchan jong ajo nadin hitin asei yin.. “Kisei ta chula em, min Pahhoi to kaki lungset nahi, suhmin set tei ding le suhkhen tei ding eigot u ahin, hinlah keinin lethuh louva kihet mosah tah a hinkho kaman lhon na, phat khet kamo lhon lou dan le kaset lhon lou dan ahin het doh na diu le alungu ahin khel thei na diuva Pathen koma katao peh jing lhon ahi bouve golpa” tin asei pai pai yin..“Ahi jong le na golpa che tange, nang jong naton naho le nungah nahol nan vangpha phat nale Pathen phathei boh na chang jing in lang kihe to to ji nahite” atin, lungthim nom mo tah achun in lam ajon din ache tai.
In aga lhun’in, anun jong Insung ho chu ana sutheng theng in, aman jong achapa a amu mu achun “Boipu na hung hitam? tuni chu na hung vai gei thim jenge” tin agah houpi ahile Mangcha jong pao lou helin thip in amun min ahile anun jong avel in agah houpi kit in…“Mang, ipi thu nahin jah kit hitam?” tin agah dong in, hinlah Mangcha chu apao deh pon, anun jong avel vel in adong dong jeng tan ahile Mangchan jong hitia anun adoh doh jeng phat chun lungna thim tah in hitin agah seije…
MANGCHA : “Henu, ijah ngai ngai ju ijah lou ule ipi thu dang ba kija ding ham” tin athu jah jouse chu anu kom chun asei tai. Chu in anun jong
ANU : “Boipu, ipi ba ilo diu ham, ithem mo nau beiya min eisei set uva, eidem u jong le kipah joh ding ahi maije” ati peh in
MANGCHA : “Hina chu henu, hi jong le Pahhoi to kaki lungset na chunga ikho sat ikho lang uva khat le nin eisei set ubon kithoh jou louva, ikho sung uva jong eisei se diu le Pahhoi to kaki lungset na chunga jou thu sei ding ahung tam cheh cheh hi, khat vei vang nupi thum hohi kibol chah dihe henu”
ANU : “Mangcha, Boi…hiti chun gel hih in, min asei nom nom’u kisei nah tau, nang le keiyin lethuh kiti chu ibol lou hel diu ahi, hiche sanga chu ama ho joh ding Pathen koma iha tao peh joh diu ahi. Boipu, kasei hi phaten ngai yin, lunghang lheh in lang thoh hah lheh jong le, koima chunga khut nahin lhah lou ding chule koima nahin houset lou ding ahi, thoh hat in gal eijo sah u ahi ti vang hoilai yin um jong le chun na suhmil lou hel ding ahi” ati peh in, Insung hochu aga sutheng kit tai.
Mangchan jong anu thusei jouse chu pha tah in angai yin, aman jong anu chu agah kou vin…“Henu, kapa to khat vei hung lhon ta di o” agah tin, anu le apa ahung phat chun, aman jong anu le apa dinga, achoh sil le chen hoi tah tah chu anu le apa chu kipah tah in apen chule Pahhoi dinga choh sangkhol le pon ve chu anu le apa chu avet sah in, aman jong anu jah achun “Henu aki lom na nadam?” tin anu chu adong in, anun jong “Henge boi, kilom sel inte, hi jong le chingthei tah in hinkho mangin ong” ati peh in ahi. Nilhah lam ahung hiphat in Mangchan adongmanu Pahhoi chu phone agah bol in…
MANGCHA : “Nao, ipi nabol a, na boui em?”
PAHHOI : “Ka boui deh hih e, ipi dinga em?
MANGCHA : “Nao, jan teng itou jina mun na chun hungo sei nom le peh nom khat kanei ye”
PAHHOI : “Henge heu, nei na ngah le chun hung nange” tin phone chu akoi lhon tai.
Jan ahung hiphat in Pahhoi jong a u-mangcha to kimu to ding in a in uva kon nin akipat doh tan ahi. Hiti chun a u-mangchan ana ngah na ding mun lam chun achen, a u-mangcha kom aphat phat chun “U mang, nei na ngah lel a” agah tin, Mangchan jong “Ka ngah lel poije, kei jong ajo cha khat a chu kalhun beh ahe” atin athil choi chu adongma nu chu ape tai. Pahhoi in jong ipi thil beh ahi tadem tin, kipah tah in a u-mangchan apeh thil chu aga ve pai jengin ahile Songkhol hoitah khat le Ponve hoitah khat ana hiphat chun akipah val in, au-mangcha chu abeng agah chop peh in, hitin asei tai..“Heu, kaki pah val jenge, Pathenin phatthei na boh jing hen” atipeh tai. Chu in Mangchan jong Pahhoi chu dettah a apan jing na ding le Lungset gal ajo thei na lhon ding in pha tah in asei peh kit in, chule khatvei ya hotel a athu jah jouse jong asei tha peh tan ahi.
Pahhoi in jong hiche thu ajah jah a chun alung na val in, au-mangcha chunga chun aki ngaiyin akap tan ahi. Chu in Mangchan “Nao, kap hih o, kap hih in, naka ding le nalhiso ding jong kaphal poi, ven LUNGSET GALSAT ihi lhon jeh in, thoh hat tah in pang hitin, phat khat le Lungset gal jong ihin jo a, nom tah a marriage jong ibol ding ahi” ati peh in Pahhoi chu alhem lhem jeng tan ahi. Chom khat jouvin Pahhoi jong aka ahung hai yin, hitin asei tai..
PAHHOI : “Heu, genthei kaki saval taije, ithem mo na beiya seiset ichan jing nakah in, ikho sah uva Gollhang khat in phat jousen eijol in, kichen pi ding ei go go jeng taije, hinlah ken iki lungset nathu le kicheng dia ikitep na thu ho abon cha kana sei peh peh ji vanga, eijol tei tei phat a anumber ka Block peh le aloi ho number a pat tuni chan in eisu boui jing nalai e” ati jou jou chun aphone na message khat ahung in, aman jong au-mangcha chu to aven ahile hiche Gollhang pa message chu ana hin, ama nin jong athu hin thot chu asim suh suh lhonin ahile ajo na achun hitin akisun ne, “Nao, sot apat kana jing bang in, nang hi kaji dinga kana gel jing sa nahi jeh in tujan in na pui ding in kahung tai, ijem tia nanop lou leh na hinkho kalah ding ahi” tin akisun nin ahi.
Chu in Pahhoi chu tijat kichat nan adim in ati pum pi chu aki thing thing jeng tan chule Mangchan jong hitia thu kisei chu agel leh alungna val in akhon nan alung anat val jeh chun lunghan nalam in ahin sep khan hitia adongma nu ana suboui jingpa chu voh ding in ahin gel lo tan, hinlah Pahhoi yin ha kham in akham in, hitin asei peh tai..“Heu, lung hang lheh jong le chu kitim ham ham inlang mivoh ding gel hih beh o” tin au mangcha chu a sei peh peh jeng tan, ahin lah Mangchan adongmanu Pahhoi thusei chu angai peh tapon hitin lunghan tah in ahin sei tai..“Ken bon tuni chan geiya khat vei cha jong naki house kha louva, nalhiso ding le nakap na ding him him ma imacha jong kisei khalou, kibol kha louva, hiche pasal pan hito banga nahin hou jeng hi nakipah lheh ham, nadei lheh ham, che tang gaki cheng pi tang” tin lunghang tah chu agah sei yin ahile Pahhoi jong kitim jou talou vin hakan akap jah jah jeng tan ahi.
Chom khat jouvin Mangchan jong athusei chu agel gel le sei khel aki sa val in, Pahhoi chu akol in “Nao, nei ngaidam mo, kahin sei khel ahi tai, koi ma to ki boui ponge, kap ta hih in” tin, in lam jon din ache lhon tan ahile vangset um tah in hiche Gollhang pa le aloi mi ni (2) chu to khosung lam pin aki suto un, hiche gollhang pa chu Mangcha jah a chun hitin asei yin…“Acha, nang hi ba hivet ta chun ka mangsanga thang kam jing, na thoh nom lou le Pahhoi chu dalhan lang gangchel in nain lang in kichen” tin, lunghang tah in asei yin ahi.
Mangchan jong aw nem heu chan…“Ahi poi je Bhai, gelset dale chun Pahhoi yin avel vel a pha tah a kaki lungset lhon thu nasei peh jingsa hilou ham, ipi atile tuni chan geiya neisuh boui jing lhon ham” tin agah sei peh in ahile Gollhang pa jong ahung lhung hang in aloi teni chu to akitho un, themmo nanei lou Mangcha chu voh ding ahin ti tau vin ahile Pahhoi jong kitim jou talou vin ahung lunghang in, hiche gollhang pa chu aha houvin agah housen tan ahile gollhang pa jong ahung lunghang cheh cheh in Mangcha chu aki ning lou kah chan hasot in agah ason lhun Pahhoi chu asam in aman in abeng tah chu ha beh in abeh peh in ahile Pahhoi in jong na asa val in hakan akap in, athil chu akichoi yin ain lang uvin ajam mang lo tan ahi. Chu in Mangcha jong kitim jou talou vin hiche gollhangpa le aloi mini chu toh haki del in aki del un, Mangcha chu achang ahi jeh chu aha thoh lheh in, kho he lou to bang in akijam den tan hiphat chun pasal thum ho chu akho lam uvin ajam tau vin ahi.
{ I-dongma khat ilungset pen khat min imit mutah a, ikom tah a ahinvoh a, anop nop a ahin seiset vang chu ito bang in kiki phat sah jong le akive jou ji pon aki ngai thei him him jipon, chu tah le ijo ding hihen lang ijo jou lou ding hi jong leh upai dang um lou kinah a kidel chu aluck pen ahi jeng jin ahi }
Chom khat jouvin Mangcha jong ahung lim dom tan, ol tah in a in lam’u chu ajon tan ahi. In aga lhun chun anu le apan jong “Ipi ti naham, koi to nahung ki del ham?” tin ana dong lhonin, Mangchan jong thu um dan ho chu abon chan anu le apa chu asei peh in, jan ma asot thim tah jeh chun imu ding in a room lam’in ache pai tai. Jingkho ahung vah in, Mangcha jong adam sel jeng kit tan, chule Pahhoi jong anu le apa to au-mangcha ve ding chu acheu vin, Pahhoi in jong au-mangcha koma chun hitin asei yin…“Heu, naha kisuh khah lou hinam” tin amitlhi ahung valhan ahile Mangchan jong “Nao, kaha kisuh khah hih naije” tin, amitlhi chu atheh peh in ahi.
Pahhoi nu le pan jong Mangcha chu phatah in ahil lhonin, chule abon chau vin Maicham jong asem khom uvin, ama ho jong ain lang uvin ache kit tau vin ahi. Hitia Mangcha mito akidel chu akho sung uvin ahung ki thang kit tan, chule akho sung uva mikam tam, mipha lou kon khat chun Pahhoi le Mangcha chu ha oiyin aoimou vin, chu kit le nupi thum ho chu hitin aki hou kit un, Mangcha chu “Havoh in vo u hen lang volih pai leu pha dinga” tin, aki hou lim chet chut jiu vin ahi. Hi bang chun Mangcha le Pahhoi ana lungset jing hole ana hethem jing ho chun Mangcha le Pahhoi chu pha tah in ahil jiu vin,chule thoh hat tah a hinkho aman jing lhon na ding in jong aseipeh un phatah in atilkhou jiu vin ahi.
Hiti chun akho sung uva mipha lou ho chun Mangcha le Pahhoi chu mun tin gam tin nin jouthu ngen in ajoh leleu vin ahile akhon khon nan themmo nanei lou le suhkhel, bol khel nanei lou Mangcha le Pahhoi chu ahung minse doh lhon tan ahi. Hinlah Pahhoi le Mangchan lunglha dai deh louvin, min aha seiset chang uvin akilungset na lhon chu adet cheh cheh jon chule thoh hat tah in athah beh in pan ala khom cheh cheh lhon’in, lunghang lou helle, lethuh lou hel’in thoh hattah in Pathen kom joh in phat khet le alungu ahin khel uva Pathen ahin kimu doh thei na diu vin athah bep in mitlhi long leu leuvin hiche holoi ding chun phat jousen tao na amang jing jeng lhon tan ahi.
Tobe continue…Part-3
PAHHOI LE MANGCHAN “LUNGSET GAL AJO”
PAHHOI THUM DING’A, MANGCHA NU LE PA CHE
Thusim nom sa hon anoiya “Like” button meh utin, seinom neihon comments bolthei ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
