LUNGSET GALSAT-I

Fiction Heart Touching
(Mangcha & Pahhoi)
LOVE STORY

PART – 1

Seiboi Khongsai
8473864702

Kho sung khat ahin gollhang “Mangcha” kiti le nungah “Pahhoi” kiti khat aumin, Pahhoi tehi mi haosa tah le mikho to them tah ahiu vin, chule Mangcha tehi migenthei te ahiu vin, hiche jeh achun Lou lentah khat jong abol uvin ahi. Mangcha jong niseh in umthim manlou vin anu le apa louna toh chu akitho pi jin chule agenthei ahahsat aki het val jeh chun nungah hel, nungah jol tiho chu abol nom ji pon, hijong leh akhosung uva mi haosa tah te chanu nungah “Pahhoi” chu aguh in alungset in adei lheh jeng jin ahi. Hitia Pahhoi adeiya alungset vang chun alungset nale adei nathu chu kam khat jeng chan jong asei doh ngam jipoi.
{ Ajeh chu Pahhoi hi aneo apat mihao tah le minop sah tah ahijeh a, Mangcha hi, kipha lam’a chule agenthei akihet jeh a, kisong lelji a, Pahhoi hi ajol ngam jilou ahi. }

Jingkah khat Mangcha nun, alou uva din Pahhoi chu aga temin, Pahhoi nu le pan jong Mangcha te chu mi genthei, mi ngaicha jing te ahi jeh un, achanu lhon Pahhoi chu Mangcha te kithopi ding chun asol lhon tai. Louna tong hon jong Tucha, Chempong chule Buchun, Mechun, angai khoh ding jouse akipoh un, alou lam cheh u ajon pan pan tauve. Hi bang chun Mangcha nu le pan jong angai khoh ding jouse Tucha, Chempong, Buchun, Mechun chule Twi tiho chu Bengkong sungin asem lhonin, Pahhoi kom chun “Pahhoi, nang nau-Mangcha to hung kilhon lhon tan, na pa to kei ana masa lhon tange” tin lou lam jon din aki pat doh lhon tai. Chu jouvin Mangcha le Pahhoi jong ki houlim pumin, Lou lam chu ajon lhon tan, lampi mun khat ahin amani jong aki cholpa lhon’in, hichun mangchan Pahhoi kom’a chun hitin agah seiyin..

MANGCHA : “Hoi, hi banga nopsah a, nanu le napan keiho Lou lhou dia nahin sol jeng chu, kagel leh kiphat lam nan kadim’e”

PAHHOI : “Cho he-u, kiphat lamna ding, hi jatlah a, hiche pen pen na, kiphat lam angai hih e, ole nei son lel khat hai ?”

MANGCHA : “Hoi, kason lel nahi poije, kei sanga bon nahat joh hih ding ham, hi jong le tulai ki seiset nale kidem na khang ahi tan chule kilungset, kingailut tiho jong masang to abah tah lou jeh a, genthei te na tong dia na hung hi, injo leh mi musit nale seiset naho hung chang khan nate tia, ka dip chat a, kipha lam kahi bouve”

PAHHOI : “Heu-Mangcha nasei chu kahe them nae, ahin lah genthei hahsa kithopi chu ipi se ding ham, eiseise ding, eimusit ding hung um tama jong le khoh kasa hih e, Pathenin ase apha ahe nai”

MANGCHA : “Nao, nasei dih e, Pathenin hetlou le mulou anei poi, ahi jong le na “Hoi” che tai hite,” tin Lou lam chun ache lhon tai.

Lou agalhun lhonin Pahhoi chu Mangcha nu komin apang in Mangcha chu apa komin apang in, changlei chu kihom tho tah in alhou tau vin ahi. Pahhoi chu itih a Lou lhou kha lou ahi vang chun Mangcha sang in Lou lho athem jon, hat jong ahat jon ahijeh chun Mangcha nun Pahhoi jah a chun hitin aseiyin “Pahhoi iti a Lou na tong kha lou din Lou lho nathem lheh bouve” ati peh in, Pahhoi in jong Mangcha nu jah achun “Henu Lou aki neilou vanga Lou lho tiho hi katha nom hichuo” ati peh e. Sun ahung hiphat in ama hose jong sun Bu ne ding le kichol ding in Loubuh lam’in ache tauve. Mangchan Pahhoi Lou lho hat dan le afel dan ho chule ami houpi thep dan ho chu aguh in avelhi jin ahile, adei nale alungset na chu akhang tultul jeng jin, hinlah alungset nathu ho sei doh ding ati ji teng, kisonlel nale kiphat lam nan abomjin seidoh ngam jilou vin, thu dang dang joh in aki houpi jo jitai. Ama ho jong akichol jouphat un, atoh ban nu tong jom din changlei chu aga lhou kit un, chom khat alho jou uvin, nilhah vaiche phat jong ahung hitan; hi chun Mangcha nun Pahhoi kipoh ding in Kolbu le changmai phabep aga louvin Pahhoi Bengkong sungin asem peh in, abon chauvin In lam’in ache tau vin ahi. Phat chom khat jouvin jan ahung hitan Mangcha jong alup na chung in alup min imu vahthei louvin aguh a alungset Pahhoi chu agel gel jeng tan, ama le ama akihou vin, ki genthei hen lang ki hahsa lheh jong le jing le vang kalunggel jouse Pahhoi komin kisei tante tin, a imu tan ahi. Jingkho ahung vah in Mangcha te jong angai bangin Lou lam jon din ache kit tauvin, genthei tah in nisa noiyin Lou alhou uvun sun atou phat un Mangchan anu komin hitin asei yin..

MANGCHA : “Henu, kalunggel khat nakom in sei inge ong, henu Pahhoi khu sot a pat a kalungset ahi tan hinlah genthei te ihi jeh un kalunggel vang kasei kha naipoi, Henu nangin ipi ti nagel em?”

ANU : “Kate Boi, Pahhoi te mihao tah le minop sah tah hiuva eiju genthei te dinga anu le apan aphal ding jong hinam, dei vang kadei lheh e ka mounu dingin, mipha mo la hilou, umchan khan chan jong them tah hiya chule genthei hahsa jong akho to in, dei vang kanei je ken jong”

MANGCHA : “Henu, genthei jong leu hen Pathen aum naije, Pathen phatsah ahileh ipi jong nom mosam diu ham, henu, tu nilhah le kalunggel sei ding kati hiya”

ANU : “Apha e Boipu, napa to kei jong hat hat jeng ding laka hi lhon pon, ipi ding hi jong le Pathen thu thu hi jeng tante” tin lou lhou vin ache kit tauve.

A nilhah in Mangcha jong Pahhoi kom’a din achen ahile Pahhoi te in chun mi ana tam thim jeng in, ahijeh chun alunggel jong seithei talou vin, miho kihou ngai ya che bang chun miho kihou lim chu chomkhat angai yin, nangchet in a In lam uvin ache pai kit tai. In aga lhun jou chom khat jouvin Message khat ahungin agaven ahile Pahhoi message ahin, “Umangcha In na hunga chu kaboi val jeh a, kahoupi man lou nahe Sorry umangcha” tia hung kisei chu Mangchan jong agah Reply in “A khoh po e Nao, na boi jong kahe nai, jing le kihung kholai kit tante, ana mangpha tan” tin athot in ama jong ana toh na achol jeh chun matah in aimu tai. Jingkho ahung vah in Mangcha pan achapa Mangcha jah a hitin asei yin..

APA : “Mangcha, nang jong phat khat le jinei cha nei na hung hi ding ahin, tun genthei jong leu hen na jinei teng nom tah a na ji nacha te na vah thei na din lampi khat khat beh ngai to ding gel o”

MANGCHA : “Henge hepa, ken jong kagel jinai, hinlah genthei te ding in Service hol jong ahah sa e, imu ding khat, ichan ding khat jong anei jou ho kihom chai gam ji ta, hi jong le Pathen hat nan ken jong hol tange hepa”

APA : “Apha e Chapa, thiljouse Pathen songa ibol le Pathen in jong i-lampi ahin gong jinai, Mang na nun nang chun Pahhoi khu adei cha e atin, hija ham?”

MANGCHA : “Hihihi, henge hepa, ahi vanga kalungset nathu kasei naipoi, hepa Pahhoi khu mipha tah ahe, chule eiha kithopi pen u jong Pahhoi te ahiu ve” atin ahile anun ahin don but vah vah in

ANU : “Ahi le Mang khat veini a chu kalunggel kasei ding ahi na tihi lou ham, nasei nai lou ham?”

MANGCHA : “Ash… Kanu tah jong hi, akisei vanga koi chun aga sei pai jeng dia nagel hitai mo, janlhah a ain uva kiche a mi ana tam val’a ilunggel jeng jong ki seithei louva, nidang le kisei tan te tia kahung pot kit hita chuo” atin, anui poh lah lah jeng uvin, hitia aki hou lim lim lai uvin Pahhoi jong Mangcha te in na chun ahung in “Kate Umangcha ipi jong nasei uva nachoh lah lah jeng u hita?” tin Mangcha chu agah dong in ahileh, Mangcha nun Pahhoi jah a chun “Hung touva Pahhoi, na hung le apha jenge” tin agah seiyin ahile Mangcha jong jahcha akisan apoh doh pai jengin ahi.
{ Ipi jeh a Mangcha chu pot doh ham itih leh Pahhoi thu ana sei lai tah uva Pahhoi ahung jeng leh jahcha kisa ahin, chule anu le apa koma Pahhoi adei dan thuho asei chu injo leh Pahhoi komin hinsei doh kha lhon in te tia, jahcha a pot doh ahi. }

Pahhoi jong insunga chun alut in Mangcha nu jah a “Henu ka u-mangcha chu ipi tiha, kahung hung in apot doh jengin, oleh ka chunga alungnop mona um ham?” tin Mangcha nu chu adong in Mangcha nun jong “Ima aum poi Hoi, moh a nang thu asei laitah a nahung le ajah cha hinah ta o” tin, aki hou lim nau thuho chu aban neichan Pahhoi kom chun asei doh tan ahile, Pahhoi jong ajah achathim jengin, hijong le milungset thei le mikinep na thei ahi kit jeh chun khoh asa deh pon, ahijeh chun Pahhoi in jong Mangcha nu le pa kom chun hitin asei tai. “Henu, ka u-mangchan la ka komin alunggel asei kha pon ken jong kadei mo deh poi, hi jong le kanu le kapa ipi agel ding kihelou ahin, ipi ding hi jong le khat vei beh kanu le kapa komin hung sei lhon o, chule henu, kipha lam hih uvin, ken jong ka jochan na kaki thopi jing diu nahe, nahah sat, naboui kom u jong le kanu le kapa kom in jonh hung sei jeng jiuvin, iki tho khom khom diu ahe,” atin thu dang dang in chomkhat akihou lim uvin Pahhoi jong a in lam uvin ache tan ahile lampi in Mangcha to aki suton, Pahhoi yin Mangcha jah a chun…

PAHHOI : “He u-mang kahung hunga chu ipi dinga napot doh ham? Nei munom lou jong kahet thou nah chu” tin agah daiyin

MANGCHA : “Hi lou chu o Hoi, kaja chat jeh achu ka pot hichuo, kamu nomlou vin gel hih in”

PAHHOI : “Hahaha, jahcha jong le chun apan na aum tapoije, henun thil jouse eisei peh gam ahi tai, nilhah teng kholaiyin hungo u-mang” tin a in lang uvin ache pai pai tai. Chu in Mangcha jong jahcha tah achun a in lang uvin achen a in nu agalhun’in anu jah a hitin asei tai..

MANGCHA : Henu, nasei ding hol hi na, Pahhoi koma chu ipi dinga nana sei doh khoh ham? Nahiti ding kahet jeh a kapot doh le na na sei tah bah, nupi ho hin sei di nahol udan hi kaden jachat aum val jenge, igenthei jeh uva kisei doh ngam louva, tua nangin nana sei peh jeng vang chu kajah acha val jenge henu”

ANU : Ipi sei di kihol man hiding ham, kana seija pha jeng chula nangin la genthei jeh a sei doh ngam jilouva, Pahhoi yin jong kadei mo deh poi ati chu, nangin jong phatah in khatvei beh chu nalunggel chu sei peh tang, kei le na pan jong anu le apa komin kisei navet ta” atipeh e. Hita anun Pahhoi koma anasei doh chu alunghan thim vang chun lang khat a agel kit le alampi akihon kit jeh chun pha asa kit in ahi. Lang khat a Pahhoi jong aki gel gel jeng in, alunggel in ama le ama aki hou jin, “Ka u-mangcha hin la eilungset ahin, eihin jol tei ding ahin, ka nop peh ding ham, ka nop peh lou ding ham, kidapeh kit lela a genthei nakah a genthei kisa cheh cheh kit ding, ipi kati ding hitamo” tin aki gel gel jeng tan, nilhah ahung hiphat in aman jong ipi hile kanu le kapa komin kisei masa hen tin, ama lunggel hole Mangchan alungset dan ho chu asei doh tan ahile anu le apan jong hitin ahin donbut lhonin,

APA : “Pahhoi, phatah in kigel o, milungset thei le mikinep pithei nahi jou mong ding hinam, naki lungset lhon ding chu aset na aum poi, hinlah Mangcha te khu mi genthei ahijeh un agenthei nau akile doh na thei ding gel masan, tun kingaipi jong le chun nahin sei se ding, nahin munem ding hung kichu to jeng diu ahin, chule nanu to kei jong kaminset lo lhon ding ahi”

Anu “Hichu boinu, napa sei banga chun nadei ja na ngai mong ahi le agenthei na khu kile doh sah ding gel le chun nang jong na tong pha na hi ding, chule Mangcha te jong agenthei nau kile doh a kipah diu ahin, chu teng kilungset lhon in lang, kicheng lhon le chun nop nasah lhon ding ahi” ati peh tai.
{ Ajeh chu tulai minu mipa ten cha te nop sah na ding gel na in, koiman mi genthei khat to achapa, achanu kilungset ding chu aphal tapon, hi banga chu genthei te insunga chate gachen ding jong koima anom tapoi. Hinlah Pahhoi tehin mi genthei amusit u ahi pon, mi genthei khat aki le doh thei na ding le anop sah thei na diu tia lunggel neite ahi jouvin ahi. }

Kho jong ahung thim pan pan tan Mangcha jong Pahhoi yin akou na bang chun kholai ja din Pahhoi te inlam chu ajon tan ahi. In aga lhunin, Pahhoi yin “Hung touvo u-mang” tin touna ado peh in Mangchan jong alunggel ho chu Pahhoi koma chun asei doh tan ahile, Pahhoi in jong alungset vang chun anu le apan ana sei peh bang chun aman jong apha lam tah in Mangcha kom chun asei tan, chule Service ahol na a angai khoh ding aum jong le kipha lam louva asei thei na ding le phat khat le kilungset hinkho nom tah a aman lhon na ding in Mangcha chu pha tah in asei peh in ahi. Mangchan jong Pahhoi thusei chu agel leh aphat sah jon, ahi jeh chun toh mun khat beh kihol doh dingin aki gellha tan ahi.

MANGCHAN TOH MUN AKI HOL PAN

Genthei tah in Mangchan Lou natoh to Service hol chu ahin kop jing tan, niseh in umthim man lou helin alhai suh alhai tou jeng tan, anun jong achapa man chah ding chun Louva Kolbu, Changmai, chule anche them them ho chu ajoh ji in, asum mu jouse chu achapa Mangcha chu ape jin, Mangchan jong manthem tah in anun sum apeh ji ho chu che le vah le nan amang cha jin, hiti chun hahsa tah in Service chu genngai tah in ahol jing tan ahi. A service hol na jong kum le lha Phat le nikho ho jong asoh cheh cheh tan, hinlah service kiti him him amu thei pon, amu ding ho jong anei jou hon sum le pai yin akichoh gam jitau vin hijeh chun service chu amu thei tapon akhon nan ama jong athase doh tan service hol chu ngah ding lung ahin gel tan ahi. Nikhat Pahhoi jong Mangcha te in nin agah chen ahile Mangchan toh mun amu thei lou na hole athaset doh nathu ho chu ahin he tan, ahijeh chun aman jong Mangcha koma chun hitin asei tai..

PAHHOI : “U-mangcha, idia lungneo nahim, pasal na hichula em, thase louvin bol bol le chun phat khel le nahin muthou thou ding ahi, lungneo hih in sumle pai na ngaichat jong le kiphalam lou vin sei jeng jio, ken jong kanei kham khama kapan pi jing ding nahi.” tin asei peh tai.

MANGCHA : “Hoi, kahah sah nale kalunggel nop lou na hoa eikipah sah ding le eitilkhou jing ding chu le eikithopi jing ding nang nana um khah hi kaki pah val’e, Hoi, Pathenin Phatthei naboh jing hen o” ati peh e.

Hi che nia pat chun Mangchan jong Pahhoi til hat najal chun lunglen tah le pontho tah in Service chom chom apply ahin bol pan kit tan, chule sum le pai angai chat jong le Pahhoi yin anei kham khamin aki thopi jing tan ahile Mangcha jong ni dang sangin them khat khat a oldom tan ahi. Hitia Pahhoi yin Mangcha te ahin kithopi jing phat chun akho sung uva misei se nom hole midem nom jing ho chun Pahhoi te chu ahin sei seuvin ahin dem pan tauvin, chule Mangcha te jong ahin mu dalo tau vin ahi. Hi bang chun Pahhoi te pahcha ding le Mangcha te kithopi ding jong aki vat deh pon ahi. Hiti chun Pahhoi te jong misei set midem chang jong leu lunglha dailou vin Mangcha te chu aki thopi jing un, chule Mangcha te jong kineo sah tah in mi muda chang jong leu lethuh lou helin, kihetmo sah tah in aum jiu vin ahi.
{ Tulai thilpha ibol jong le asei se ding, adem ding atam tan, chule agenthei, ahahsa iki thopi jong le eimu da ding le eisei se ding jong atam’in, hi banga chu eisei pha ding le eipah cha ding jong atam kit thou vin ahi. Ajeh chu leiset a leng ihi nah laijeh un kisei set na, kidem na, chu kipah chat na tiho jong um ding mong ahin, ahijeh chun thase pou hitin, ithiphabol nau va misei set, mi dem chang jong leu hen lethuh ding gel pou hitin, iki thopi ding bang le ibol ding bangin thipha bol jing uhite. Ale thuh ding Pathen aum nai tisumil pou hite. }

Hiti chun Pahhoi ten Mangcha te aki thopi jeh un, akho sung uva mipha lou ho seiset na achang un, chule mangcha te jong vetda achan lo tauvin, hi jong le Mangcha te le Pahhoi ten a lethuh deh pou vin ahi. Mangchan jong kihet mo sah tah in abol ding bangin apply bol thei thei chu abol jin, kinem tah in a apply bol ho chu angah ngah jeng jin ahinlah aphat ahi teng khat cha jong amu pha deh kit jipon ahi. Hitia abol jouse alo lhing thei lou phat in alung ana beh seh jeng tan, jankhat hi Pathen komin Tao na amang kit in, service khel khel hihih jong le toh mun nao khat hi jong le akimu thei teitei nadin Pathen komin, aki phin nin lhiso pumin tao na chu amang tan ahi.

Anu le apan jong phatah in atilkhou jing lhonin, thase louva abol jing na ding le phat khat le nom tah a aum thei na diu vin, ama ni nupan jong Pathen kom’in athum jing lhon’in, hi bang chun Pahhoi in jong Mangcha lung lhah dai louna din phat jousen atil jing in, alhamon jingin, chule ache le avah le na a amanchah ding jong anei kham khamin sum chu ape jing in ahi. Hitia Pahhoi yin aki thopi jinga, atilkhou jing jeh chun Pahhoi alungset na chu ahung sang cheh cheh tan hetman louvin alungset na chu ahung pilhing tan, kilungset hinkho man ding kal bou chu angah lel tho jeng tan, hi jong le toh mun neokhat beh mu a kilungset hinkho man ding chu agel jeh in aki tim ham ham jin, akhon nan aman jong ajo na ding tin, apply thum (3) abol pha kit in, ama le ama aki hou vin “Tuchung vang khat beh kamu tei tan te, kamu lou le vang Service hol hi kingah doh jeng tange” ati tan ahi.

Hiti chun a apply bol thum (3) ho chu khat beh amu thei tei na din Pathen kom’in athum jing in, kinem tah in Lou kon to a apply bol ho chu angah jing tan ahi. Pahhoi ten ahah sah nau le aboui najou seu va aki thopi jing jeh uchun kipah thusei ding le kiphat lam nathu ho gasei ding in nilhah khat Mangcha nu le pa chu Pahhoi te in nin kholai yin aga che lhonin, kipah thu le aki phat lam nau thu ho chu agasei lhon tan, chule Pahhoi adei dan lhon le Mangchan alungset dan ho jong asei tah lhon tan ahile Pahhoi nu le pan jong Mangcha nu le pa chu akiphat lam lhon lou din asei peh lhonin, chule Mangchan jong toh mun ahin kimu teng, Pahhoi to ki lungset hinkho mang ding le aki cheng lhon ding in aki nop to gel tau vin ahi. Lang khat a misei se hon jong Mangcha te le Pahhoi te ki ngailut dan le Mangcha to Pahhoi kingai ding le kicheng dinga aki nop to nau thu chu ahin jadoh kit tauvin, ahi jeh chun Mangcha te le Pahhoi te chu ahin mu da cheh cheh tauvin, Pahhoi le Mangcha chu ahin sugenthei pan tauvin ahi. Hiti chun ache le avah le nau vin jong Pahhoi le Mangcha chu suhmin set tei ding agel uvin, jou thu ngen nin mi komin Mangcha le Pahhoi chu asei se deh jeng jiu vin ahile atahsan loi jong aum jiu vin, chule Pahhoi te le Mangcha te hegil mong mong hon vang jouthu sei lele hothu sei chu atahsan thei pou vin ahi.

Nikhat Pahhoi hi ha dam’in ahung dam mon kho helou vin athi ding bangin ahung um doh tan, koiman ahing jou din atahsan tapou vin, hi phat chun akho sung uva lunggel them tah tah ho le anu le apa chu akitho khom uvin gangtah in Pahhoi chu Hospital in apui tau vin ahi. Mangcha le apa jong khohe pha lou tah in Louva konin ahung vailhung tan ahile anu lunggim tah a ana um chu amu doh lhon phat chun Mangchan anu jah a chun hitin asei yin “Henu tuni lhah chu ipi na chan ham? Lungnop mo na nanei ham?” tin adong in, anun jong Pahhoi dam lou thu ho chu phatah in asei peh in ahile Mangcha jong kitim jou louvin akap jah jeng tan ahi. Mangcha te hi mi genthei ana hijeh un, bolthei ding le kithopi na thei ding ima anei pou vin ahijeh chun Pahhoi dam doh na din Pathen komin Tao na amang jiuvin, chule Pahhoi jong aga vil jing un, anu le apa jong alhamon jiu vin ahi.

Pahhoi jong Hospital a aum na ni thum (3) nili (4) lang ahi tan, dam la adam thei deh pon chule anu le apan jong sum le pai jeng jong anei jou lhon tapon, alunggim lheh lhon tan ahi. Mangchan jong Pahhoi nu le pa lunggim na chu ahet phat in aman jong kaki thopi nathei ding pen tin, alungset jing Pahhoi kijen na ding gel nan Whatsapp mangchan Pahhoi adammo dan thu ho chu hoitah in ajih in group ho in apost lele tan ahile asim doh jousen jong Pahhoi chu alungset lheh jeng uvin ahijeh chun akijen na dingin sum le pai ho chu kiphal tah tah in aum na Hospital mun na aga pe den loi jong mi tampi aumin, chu le Mangchan jong miho kithopi na sum ho chu adon khom soh phat in Pahhoi nu le pa chu aga peh tan ahile Pahhoi nu le pan jong hitia Hospital munna min sum le pai ahung peh jiu chu Mangcha jeh ahi tichu ahin hedoh lhon tan ahijeh chun Mangcha chung in jong avel vel in kipah thu asei lhonin ahi. Miho kithopi najal le Pathen lungset najal chun Pahhoi jong ahung dam doh tan, anu le apa to a in lang uvin damsel chan ahung kile doh kit tau vin ahi.
{ Na thilpha nabol na, mi genthei khat naki thopi na chu moh ahi pon aga chu nang le na insung mite ding mama ahi. Pahhoi in jong mi genthei te Mangcha te akithopi jing jeh in ama athi dinga adam mo peh in jong Mangcha jal’in mitam pin aki jen na din sum le pai yin aki thopi un Pahhoi jong akijen dam kit thei yin ahi. Mi genthei jong agenthei man uva nouise a jotho ding ahipoi, ajeh chu agenthei pen le najo thopen jong nang dinga nikhat le thilpha hin bol doh le naki thopi a hung pang thei ahi tisuh millou ding ahi. }

Mijousen adam doh jou dinga agin chat lou vu Pahhoi jong ahung dam doh a Hospital akon na damsel cha ahung kile doh kit phat chun, Mangchan jong Pahhoi kithopi jouse chung in avel lin kipah thu Whatsapp, Facebook dung ho in asei kit tan ahile Pahhoi kithopi jousen jong amu cheh kit un, Pahhoi adam doh kit tah jeh chun aki pah lheh jeng uvin, adeh in Mangcha te chu aki pah deh set uvin ahi. Hiche nia pat chun Pahhoi te le Mangcha te chu aki ngailu cheh cheh jeng tauvin, kitho khom nathei chan in jong aki thokhom jing uvin ahi. Hi bang chun Pahhoi le Mangchan jong kilungset hinkho man na kichen ding kal chu angah lel lheh jeng lhon tan, hinlah Mangchan toh mun amu nailou jeh chun, a apply bol ho ahung soh doh a toh mun khat beh amu thei na dingin Pathen komin athum jing lhon tan ahi.

MANGCHAN SERVICE AHIN MU

A apply bol ho ahung soh doh kah in anu to apa Lou natoh chu genthei tah in niseh in ulsa long in anu to apa chu aki thopi jin ahi. Nikhat anu komin hitin asei yin..

MANGCHA : “Henu, ole ka apply bol ho hi imu diu khat cha jong um kit lou hitam, ima thula aki nung het jitapon, kinep nahi athon kit ding hitam”

ANU : “Boi, kisong lel hih o, hichan bol tah a Pathen in jong itao nau sang intin tuchung vang mutei tei tan nate, lungnao jihih in” ati peh in ahi.

Jingkah khat Mangchan a intol u asuh theng theng le Pasal khat ahung Mangchan jong hiche Pasal pa chu itih a amu khah lou le ahet khah lou beh ahijeh chun phatah in ahoupin, “Golpa ipi ngaito a nahung ham? Koi nahim?” tin adong in ahile Pasal pan jong “Golpa hiche lekha hi kahung thah nahie, tunia pat a lungmong tah service na natoh thei ahi tai” ati peh in aki nung le pai tan ahi. Hitia agel phah lou lam beh a toh mun ahin mu jeng chu agel le akipah val lin kipah na mitlhin ahin chup in ahung kap doh tan ahile insunga um anu le apa jong tol lam chun ahung pot doh pai lhonin, anun “Mang, ipi ti nahim? Ipi thu na jah a kap na him” tin adong in Mangchan jong akhut a achoi lolhing na lekha chu anu chu apeh hitin ahin seitai..“Henu, Hepa, toh mun khat kamu taije, tunia pat a lungmong tah a ium diu ahitai” atin ahile anu le apa jong akipah val lhon jeh chun kitim joulou vin abon chau vin akap tauvin ahi. Lang khat a Pahhoi ten jong Mangcha Service mu chu ahet phat un ama ho jong akipah lheh jeng uvin ahi.

Jan ahung hiphat in Mangcha te jong Pahhoi te koma ki pahthu sei ding le Maicham semkhom ding in acheu vin ahi. Hitia Mangchan toh mun anei thei na chu Pathen jal ahin, chule Pahhoi te kithopi na jal jong ahi jeh chun Mangcha nu le pan jong Pahhoi te koma chun kipah thu sei jou lou asei lhonin, Maicham jong asem khom tau vin ahi. Pahhoi nu le pan jong achanu lhon Pahhoi chu Mangcha to kilungset hinkho mang ding le aki cheng lhon dingin aphal thengsel lhon tan ahi. Mangchan jong genngai tah in Service na chu atong in, Pathen lungset najal in, sum le pai ho jong ahin mu pan tan, In jong nom tah in aki sah doh tauvin ahi. Nikhat Mangcha jong Pahhoi koma kipah thu sei dingin achen, Pahhoi jah achun hitin asei tai..

MANGCHA : “Nao, hichan geija lolhing na kanei ja, In le lou phatah tah kaki sah doh thei hi nang kithopi na jal le nei tosot jing najal la ahi bouve, Nao, nang ana um lou hile chun ka genthei nau jong kile doh naipon te, Nao kaki pah e na chungin”

PAHHOI : “Heu, kei jong kaki pah e, thiljouse Pathen jal ahi bouve, heu nang koma joh chu kipah thu sei ding kati hichuo”

MANGCHA : “Kei koma kipah thu ipi sei ding um hitam, sei tango Hoi”

PAHHOI : “Heu-mangcha, Hospital a athi ding banga kaum chunga, kanu le kapan sum le pai jeng jong anei lhon lou peh tah a nathilpha hin bol na jal’a kei jong kadam kit ahi bouve” tin, asei pai paiyin “Heu, cha don hite na” atin cha chu aga sem’in kihou lim pum’in cha chu tui tah in adon lhon tan ahi.
{ Mi genthei namu da a, mi nasei set set sangin na muda pa, na muda nu, chule nasei set nu / pa chu phatah in lungset in lang a genthei ahahsat naho in kithopi jing le chun nang jong Pathen Phatthei boh chang in natin, chule naki thopi nu, naki thopi pa jong agenthei ahahsah na ho a kona hung kile doh thei ahi. Hi banga chu Pahhoi in jong mi genthei tah Mangcha aki thopi jing jeh a tua Mangchan jong Service khat aki mua, in le lou jong pha tah a akisah doh theiju ahin, chule Pahhoi jong athilpha najal la, aga chu aki thopi jing Mangcha mama chu to nom tah a kilungset hinkho aman na, ahinkho lhum keija Service neite insunga nom tah ga cheng ding chu ahi maitai. }

Tobe continue Next Part-2

MANGCHA LE PAHHOI KILUNGSET HINKHO MAN
( Etc² )

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.