*||• LONLHI THEHHUL DING IN•||*
_*By-*_
_*TangpaMinneo*_
*_____________________________*
Numei hohi kahlah kom le ka gelset na kom jong aum ji in, adeh in gampam a um KUKI nungah hohi ahung minset khah tengle ka pohnat na asang lheh jie. Nopsah jeh a gampam a natong a che koima aumpon, hinlah isum mu nauchu Pathen dei ahikhah louding joh gichat umtah thilkhat ahi kit e.
Keijong jinei chanei kahitan, hinlah vangset umtah in hinkho a dia kana kiteppi sa, Pathen le mihem het ka inneipi ding’a kana kiteppi sa ka sen angkoi Nengcha in kaki chenkal lhon kum ni jouva eina dalhah ahitan, Pathen goupeh chapa melhoi tah khat, Boigin tia kakou u chu dalha in thangvan a pa kom’a ana choldo tai. Nopsah na hinkho ana kimang khom khalou akihijeh chun genthei ni hihen lang kipani hijongle ka sen angkoi lhangaina in kadim lha jitai. Kanu adam nalaiyin, Kapa vang a um tapon, Boigin le Kanu akisin lhon’in, ken government noiya police officer khat hina a chun na ka tong’e. Pagong hinkho mang akihi jehchun kahlah kom le numei hoi tah² akimu tengle lung len aum in, iji lhangai na in akidim jitai. Hinlah akithoh ham² in, eima nopsah na ding gel a insung mite genthei sang a eima joh gentheiya, insung mite lungmong tah a koiding kana lheng jo e. Ka chapa jong lam ajot thei tan, anu in apenlhah a chu ana dalhah ahi in, Chunnu mel mulouva hung khanglen ahi dingchu kagel le hahsa kasa lheh jin, ahung khanlet a, aloi apai ho lah a, _*”Hoiche ham Kanu?”*_ tia eihin doh ding chu katijat pi pentan ahi.
Kanu in jithah neiding in eijol jing’in, hinlah kenvang kachapa genthei ding kanom pon, Pathen in achate ding a ima it aneilou ding kahe in, min ijat sei jongle bil neilou bang’in kaum e. Mi bang’a neijou jong kahipon, hinlah Pathen lungset jal’in sorkar noiya tohna khat kanei in, hiche a chu ka insung kavah ahibep e. Khangdong cha a jinei akihi jehchun kahlah le nungah hon gollhang daiyin ei dai jiuvin, aning khat a eihin jol jong aumda poi. Hinlah kenvang Nengcha dam nalai dan’in kagel in, kamit in nungah hoi tah tah mu jongleng ka lung in agel poi. Inlhun a ka chapa melmu dingbou kanom jitai. Phat ahung chal in Boigin jong lekha sim kipan theiding in ahung umtan ahile kakipah val in, ABC ahinsim dohding kalchu ka ngahlel lheh jeng in ahi. Keila phatseh a in a um theilou kahijeh in Kanu bouvin in angah jitan, school kikhen tengle Kanu in aga pui ji in, jingkal langle ken kaga thah ji ahi.
Lhakhat val ahung kai tan, akai pat a kipat in athanom lheh in, jingkal nilhah thu umlouvin _”Good morning Miss”_ ti seh seh seiyin apeng jing’in, hiche ahin jildoh jongchu keiding in kipana dimset ahi. Jingkal khat school a kaga thah hin ka ma chejep in, school gate ana kihong bep in, koima aum nailou jeh chun ka chapa kapom in school munho chu kave lele in ahile kachapa in, _”Miss”_ tia ka ang a pat aki choplhah a alhaiphei kavet chun a Miss nu khat adel jel’in, Miss nu in jong ana sang kit in ahile ka lungmit in Nengcha ahung kilang in khankho chesa ei geldoh sah in lunghel na in eibom e. Ahung phei lhon in Miss nu chun eina he in, _”Heu. Boigin hi chapang phatah ahie. Sei angaiyin, houpi jong anom’e. Anu hunglou ham? “_ tia eihin dohchun ka lungthim anemlha del in, _”Henge. Ahung poi”_ kati in, adang ima kaseibe poi. _”Miss Nengcha kahi e. Boigin ho class teacher jong kahi.”_ tia amin ahinsei chun ka kingdot jeng in, ka janmang abang jeng in ahi. Nengcha kiti min ngaitah chun ka lungsung mitlhi alonsah tai. Hichun keijong ka office lang kahin jontan ahi.
Sun nilhum in ka lung athi theipon, Miss Nengcha chu kagel chan in ka jinu toh kilou kasa cheh² jengtan ahi. Nilhah in Kanu apotdoh jehchun office akon in kahung kimale in school a naosen lahpa ding katile ana um tapon, Kanu ka call le ahet kitlou jehchun kalung atheh lheh tan, lungdong tah a inlang kahin del leh insung a Miss nu toh an kidai lhon in ana eocheng lhon e. Ka lungdon akilham tan, _”Miss. Itidan a. Ken la school mun lang kagave in, nang in nahung thah hamo? Kipa umval e. Ana touvo na? Cha hin om inge”_ katile ada in, _”Pha nante Heu. Boigin nu hoiya cheham? “_ ahinti chun bang a alim kitah chu kavetouvin ahile amanjong ave in, alim amuchun amatoh kilou akisa lheh jeng’in akam kaleu tai. Amin lhon jong akibang in, kenvang kamu a kipat a chu Nengcha dan a kana gel ahitai. _”Heu. Nei ngaidam o. Ka hetlou jeh ahi”_ tin ahin seiyin, kaki houlim lim uvin ama jong akile pai kittai.
Ajing in Kanu thina kinkhat a achejeh chun Boigin school a kaga thah in, nidang bang’in gate maiya Miss Nengcha ana ding in eihin mu chun ajahcha thim tobang in aum in, _”Good morning Miss”_ kagah tile eihin nuisat in, Boigin chu apom in alut lhon tai. Kenjong ka office mun lang kahin jon tan, sun kaki chol pet uvin call ahung in, _”Heu. Nangcha kahi e. Boigin adam hih in hospital a kapui e. Na onthei dingle hungo”_ eihin ti chun kadip kakidop leuvin Sir pa thu kahetsah in hospital lang kadel jeltai. Kaga lhun chun Boigin jong ana oljep tan, Miss Nengcha in ana jenle in ka lungmit in insung kikim a lenlai ni ahung lang in, chunglam kave in, _”Nao. Na vonchoi le na angkoi keima, nang lhangaiyin kaum jing lhon’e. Lhaolha beh in hung leng o Boi”_ tia kagel laitah in Nengcha ahung in, _”Heu. Pharmacy a lou lahding jouse kana la tai. Nilhah lang le discharge bolthei hi maithei ahite”_ eiti chun kamit in kajinu Nengcha dan in kamu in, kahung kinkhah chun ka lung adong jeng e.
_”Miss. Hijo. Kipa aumval e. Naosen nana khohsah jal in nachung a bat lentah kaneiye. Sah joulou ding hijongle asum a na pohdoh hobeh hi hin ledit inge.”_ kati in sum lutjat chu kape in ahile ada chahkheh in, _”Angai hih e. Heu. Bol hihbeh o”_ ati in akhut asel leutan ahile keijoh chu kakile phatlam in, nehthei kacho in kane khom tauve. _”Heu. Boigin nu chu iti ana umlou ham? “_ tin eihin dong in, kenjong abul a kipat in kaseipeh tan ahile kasei chai chun keiti amati kalhisoh lhon tan, hiche nikho a kipat chun Boigin akhohsah dan chu lamdang kasa lheh jeng’e. Iti hung kisin lhon hitam? Hapta khat joulang in Boigin in _”Henu”_ tia ahin koudoh phat chun kalung akidang leuvin, kei maiya Miss tia akouji vangchun guhthim a kangai ji le amani bou aum tengle Henu tingen in kou jitai.
Naosen jong ahung damtheng tan, school ho phate chan akai thei tai. Kanu in khatvei eikouvin, _”Min. Miss Nengcha khu kipui ngap jeng tango Boi. Naosen in jong khubang a ngaiya. Ama khu ilhaso ule katupa in a nubei ahin kihet ding kagel le ka dip adap e”_ tia lhisoh leuva ahinsei chun keijong angol kabang in, kagel le upat nung a jineikit dingchu himo kasaval in hinlah ka chapa khankho ding gelna jal in Kanu thusei chu kanom tai. Kenjong nilhah in Nengcha chu ka call tan, _”Miss. Jingle na onthei dingle Boigin neihung thahpeh theidem? Nilhah le ka onlou dingjeh in alou theilou thilkhat ahijeh in neihin khohsah pehding in kahung taove”_ katile, _”Katee. Heu. Naki ha phatlam tave. Hung thah mama nange. Ana lungkham hihbeh o”_ eiti in jing nikho ding in kaki gong tai.
Jing nlhah hin keijong vaigei tah in kaga lhung tan, insung a Kanu leh Nengcha aki houlim kamu phat in ki hetmo sah tah in kaga chelut in, _”Miss. Kipa um e. Nang in nei khohsah jeh uvin boina tampi jong suhlhap in aum jie”_ katile ei nuisat in keijong kavon kaga kilheh in, cha ka om le Kanu in, _”Min. Jinei in akiti lela nanom hih in cha jong nang ma in naki omnilhah nilhah bunahon nahon dihe”_ eitichun kaki jongmat in, _”Nengcha chu ahon ding in sei tango”_ katile Nengcha in, _”Kihon hen kitia nang nomlou chu”_ eihin tikit chun kajachat man in ka cha om chu ka donsah in, _”Jing a pat nahung honding ahe”_ katile mitkan in, chomkhat jouvin akile kigot le Boigin in, _”Henu. Keijong kahung ding”_ atichun ahung jahcha in, _”Napa kom a kisei tango”_ tin akidai lele uvin chomkhat pi aumden nalaiyin nilhah lang auto aum louding jeh chun ken kaga thah tai. Gari sung a chun kenjong kasei tan, _”Nengcha. Ka hinkho manjong nahet ding ka tahsan e. Jachat helouvin jong neigel da in. Kahin mu nia konchun ka sen angkoi ka lung in ahung kilang in, nang in ima a nagel louvang in kenvang, insung genthei na pomang dingle LONLHI THEHHUL DING IN kahin lheng e. Iti nagel em? “_ katile a kun mangjel in, _”Heu. Kagelmo poi. Kenjong na hinkho thusim kahet a Boigin khankho ding kagel le Boigin chunnu hiding le a chagat hinkho kile na ding kahinom e. Numei jahcha se hin ima kaseidoh ngam poi. Heu. Kenjong damsung a chenkhom piding le Christian insung sem khompi din kahin lheng e”_ ahinti chun kakipah val in, gari ka kham leuvin, _”Na tah nasei ham? Nengcha. Phat jong nga da tate.Insung dinmun nahe in, lungtup molso ta hite na? “_ katile, _”Kenjong hiche chu ka ngalel ahe”_ ahinti chun ima ngahsot louvin gari mai kahei in inlam kahin jon pai lhontai.
In kaga lhun lhonchun Kanu alungdong lhajeng in, _”Ipidia nahung kile kit lhon ham? “_ eiti chun kamoh nuisat le Nengcha in Kanu koma chun, _”Henu. Damsung a ding a kahin jot ahitai. Namou ding in neisang jengtan”_ atileh Kanu in kipah tah in asang in, chibai abol in hetsah thei² ahetsah in insung a chun vailhunna khat kabol tauve. Ka hinkho chedan chu kanung gel gel leh kanui jong aja thim in, hinlah ka sen angkoi masa Nengcha kahin geldoh chun lunghel na in kadim in, ka kaham tan, _”Boi. Ivonchoi khankho ding geljo kahi. Nei ngaidam in Boi.”_ kati in alim chu ka ang in ka sipbeh in guhthim in kakap tai. Pute kom a kiphong a kache u chun amahon jong ngailutna neitah in eina bol uvin, phatthei eiboh uvin, _”Mimin. Nengcha in sot a kon a nang le Boigin thu ana seijing ahitan, tunin nangni jong insung semding nahi lhontah jeh in, phat chesa ho gel a ki suboi talouvin, maban hinkho a inchen semding joh gel lhontan. Genthei te Pathen aumnai. Gollhang june jukham khat ang a genthei athoh sang in nang kom a kipah a aumding kadeijo uve. Hung vangpha lhontan. Cha lenao, neile gou, sumle pai, chang le mim in nahin sa lhon henlang, Boigin hi nuneilou ahi akihet louna ding in hin boipi lhontan”_ tia kapute in ei lhalho u chu kagel le mantam kasa val in, hiche nikho chun ka ji masa Nengcha nulepa jong ahung jaovin, kipana mitlhi kana theh uve. Nengcha(kaji masa) nu in Boigin chu a mitlhi pum in apom in, _”Boi. Na Chunnu kalungmit in kamu e Boi. Tunia hi Pathen in nu napeh ahitai. Hung vangpha tan”_ ti in Nengcha jongchu atilkhouvin, kipah tah in inlam kahin jon tauve.
Jankhat kamang in Nengcha kahinmu in, kakhut atuh in, _”Uu. Naosen khankho ding gelna a na thilbol kalung alhaisel e. Lungsettah in genthei na hin tosah hih in. Tahsa in um thei tahih jongle hen, chung’a konin Pa ang a kahin thumpeh jing naove Uu. Kahin ngaival e”_ tia aman pai chun kahung king khang in, _”Nao”_ ti in kahung pengdoh leuvin, ka ulsa ana long man e. Kaki hei phei le kakom a Nengcha le Boigin lungmong sel a alup kamu chun khankho chesa gel in kamitlhi along tan, bang a Nengcha lim kitah chu ka lalha in ka kap tai. Kajinu ahung thoudoh in, _”Uu. Idia kap² nahim? Kap tahih in. Boigin in hin hedoh le apohnat johding ahi. Chen kichol tan”_ ti in ei puilut in, eilhembi tai.
Hiche nikho a kon chun insung nomtah in kacheng khom uvin, Boigin jong ahung khang len tan, Pathen vangboh jal in naosen numei melthah khat kamu kit uvin, amin ding in *Veinunnem* kasah uvin, *Nunnem* ti in kakou jiuve. Pathen lungset in mibang in anngol lom lom in kaum pouvin, nilhah seh in insung maicham kasem jiuvin, khosung mite in kihilna in einei tauve. Nikhat hi Boigin ahung dammo tan, jankhang laiyin akap² jeng tan, _”Henu. Hepa. Ka oi ana val e”_ ti in akap tan ahile Nengcha in gangchel in eihin thoudoh in, _”Heu. Boigin hospital a pui ngai ding ahi. Thou loiyin”_ tin hospital lang kadel taove. Kaga vetsah ule damthei ding dinmun in aum in ahile kipa aumlheh jeng in, hapta khat joulang in damtah in inlam kahin jon tauve. Jing nikho in Nengcha nulepa ahung in Boigin chu ahung veuvin, ei khohsah dan houchu kavet le kalung alhai lheh jeng e.
Boigin dammo jeh in Nengcha jong ahina bang in school a ache thei tapon ahile principal pa alung lhai thei tapoi. Hijeh chun angah ding tobang in ahung umtan ahile nommo kasa lheh in, hinlah kaki phatlam jehchun ima seipoh louvin kaum in ahile, office a kon kahung kile hin Nengcha ana lhisoh tan, _”Nao. Ipiti nahim?”_ katile eihin koiyin, _”Heu. Katohna mun a konin ei haisah tauve. Insung a ka panmun ding alhom tai”_ atichun kalhem in, _”Nao. Idia naka ham? Henu kithopi na phat tamjo nanei ding ahitai. Aphajo ahi. Sumle pai nalo a na genthei sang chun insung a Henu boipi johle chun Pathen le Henu lunglhai joding ahi”_ katile ahung lungmong in, _”Nao. Boigin jeh a hichan nalhun hi kagel le kaki phatlam e. Nasung a penglou hijongle hibang a na khohsah kamu le kalung alhaival in, Boi. Ka hinkho chesa ho lungin ahung lang e”_ kati chun langlou dingcheng lung in ahung kilang in aban seithei louvin kaumtai. Nengcha in eikoi pum in eilhembi tan, _”Heu. Kasung a peng bang bang a kagel ahi. Idia hitia chu nasei ham? Min ijat seijongle keiding in kacha hina akikhel poi. Heu. LONLHI THEHHUL DING IN ka hinkho hi kacha teni, Henu chuleh nang ding in kaphal thengsel tai.”_ eiti in, genthei nikho hung lhung henlang, mite in ijat seijong le ki semphat na in kanei uvin, mitlhi lonni hung lhung tajongle, ka *LONLHI THEHHUL DING IN* apang jing’e.
*•••BEITA•••*
_*Thusim hin sim jouse chung’a seijoulou kipana kahin phong in, chuleh tilkhouna eihin neijing loile pai nulepa jouse chung a jong atumbeh in kipathu kahin thot e. Thusim chang chang a seinom nanei le anoiya ka number kikoi a khu neihin houpi jingthei ahi. Asim jouse Pathen in phatthei naboh cheh tauhen.*_
*KAKIPAH E*
Thusim hinjih.
“`Keima“`
_*TangpaMinneo*_
_(+91 8131046031)_
*____________________________*
_*Copyright ©TangpaMinneo 2019. All Rights Reserved*_
